1-2. Omubuurizi 11:6 nihakwata hata aha kubuurira amakuru marungi g’Obukama?

OMU mahanga agamwe, abantu nibasiima amakuru marungi. Nigo barikuba batwire bategyereize! Omu mahanga agandi, abantu tibarikufayo ahari Ruhanga nari Baibuli. Abantu nibakira kutwaza bata ei orikutuura? Oku barikutwaza kwona, Yehova naayenda ngu tugumizemu nitubuurira kuhitsya obu araagire ngu omurimo gwahwa.

² Omu bwire bwa Yehova obuhikire, omurimo gw’okubuurira nigwija kuhendera reero ‘emperu ehikye.’ (Mat. 24:14, 36) Obwire obwo butakahikire, nitubaasa kworobera tuta ebigambo ebi ngu “orekye kugwisa omukono”? *​—Shoma Omubuurizi 11:6.

3. Nituza kushwijuma ki omu kicweka eki?

³ Ekicweka ekihwaire kyorekire ebintu bina ebi twine kukora kubaasa kuba “abajubi b’abantu.” (Mat. 4:19) Ekicweka eki nikiza kworeka emiringo eshatu oku turikubaasa kwongyera aha kumariirira kwaitu kubuurira, n’obu twakuba turi mu mbeera ki. Nituza kwega ahabw’enki kiri kikuru (1) kuguma otaire omutima aha kubuurira, (2) kuba abagumisiriza, (3) n’okugira okwikiriza kuhami.

4. Ahabw’enki twine kuguma tutaire omutima aha murimo ogu Yehova atuhaire kukora?

⁴ Yesu akagamba aha mbeera n’ebintu ebyabaire nibiija kworeka ngu turi omu biro by’emperu, kandi ebirikubaasa kuhuzya abakuratsi be bikabaremesa kuta omutima aha murimo gw’okubuurira.  Akahiga abeegi be ‘kuguma nibareeba.’ (Mat. 24:42) Obunaku obu, hariho ebirikuhuzya ebirikushushana n’ebyaremeise abantu omu bunaku bwa Noa kuhurikiza okurabura oku Noa yaabaire naaranga. (Mat. 24:37-39; 2 Pet. 2:5) N’ahabw’ekyo, nitwenda kuguma tutaire omutima aha murimo ogu Yehova atuhaire kukora.

5. Ebyakozirwe 1:6-8 nihashoboorora hata obuhango bw’omurimo gw’okubuurira?

⁵ Omurimo gw’okubuurira nigwetengyesa ngu tugume tugutaireho omutima obunaku obu. Yesu akagira ngu omurimo ogu nigwija kugumizamu nigweyongyera omu buhango, n’omu bicweka bingi bwanyima y’okufa kwe. (Yoh. 14:12) Bwanyima ya Yesu kufa, abeegi be abamwe bakagaruka aha murimo gwabo gw’okujuba. Bwanyima ya Yesu kuzooka, omu muringo gw’eky’okutangaaza akatega eby’enyanja yaabiha abeegi be. Akakoresa obwire obwo kubahamiza ngu omurimo gwabo gw’okujuba abantu ni mukuru munonga kukira ekindi kyona eki barikubaasa kukora. (Yoh. 21:15-17) Yesu atakagiire omu iguru, akagambira abeegi be ngu omurimo gw’okubuurira ogu yaabaire atandikire nigwija kurenga emyatano ya Israeli. (Shoma Ebyakozirwe 1:6-8.) Bwanyima y’emyaka, Yesu akaha entumwa Yohaana okworekwa kumumanyisa ebyabaire nibiza kubaho omu “izooba rya Mukama.” * Baamaraika bakahwera Yohaana kureeba kimwe aha bintu birikutangaaza, eky’amakuru marungi “ag’ebiro n’ebiro” garikubuurirwa omu ‘mahanga goona, n’enganda zoona, n’endimi n’abantu.’ (Kush. 1:10; 14:6) Buzima, n’ekigyendererwa kya Yehova ngu obunaku obu twejumbe omu murimo gw’okubuurira kuhitsya obu guraahendere.

6. Nitubaasa kuguma tuta tutaire omutima aha murimo gw’okubuurira?

⁶ Nitubaasa kuta omutima aha murimo gw’okubuurira twateekateeka munonga aha bintu bingi ebi Yehova arikukora kutuhwera. Nk’eky’okureeberaho, naatuha eby’okurya  bingi by’omwoyo kurabira omu bitabo ebiteirwe n’ebiri aha Intaneeti, eby’amaraka na vidiyo, na tiivi y’aha Intaneeti. Teekateeka ahari eki: Aha mukura gwaitu ogutongoziibwe, hariho obutumwa omu ndimi ezirikurenga 1,000! (Mat. 24:45-47) Omu nsi egi ebaganisiibwemu eby’obutegyeki, ediini, n’eby’eby’entaatsya, abaheereza ba Ruhanga abarikurenga obukaikuru munaana nibakwatanisa omu nsi yoona nk’eishe-emwe emwe. Nk’eky’okureeberaho, aha Rwakataano, Okwakana 19, 2019, Abajurizi ba Yehova omu nsi yoona bakashwijuma hamwe ekyahandiikirwe ky’eizooba eryo. Omu mwabazyo aha izooba eryo, abantu 20,919,041 bakaza aha Kiijutsyo kwijuka okufa kwa Yesu. Twateekateeka aha mugisha gwaitu gw’okureeba eby’okutangaaza ebi n’okubyejumbamu, nikituhiga kuta omutima aha murimo gw’okubuurira aha Bukama.

7. Eky’okureeberaho kya Yesu nikituhwera kita kutahuga?

⁷ Omuringo ogundi ogu turikubaasa kuguma tutaire omutima aha kubuurira n’okutooreza Yesu. Taraikiriize ekintu kyona kumuremesa kujuririra amazima. (Yoh. 18:37) Taraikiriize kubeihwabeihwa Sitaane obu yaamuha “ensi z’abagabe boona n’ekitiinisa kyazo,” kandi nabwo taragwire mu kwohibwa obu abandi baabaire nibenda kumuhindura omugabe. (Mat. 4:8, 9; Yoh. 6:15) Taraikiriize kutwarwatwarwa ekyetengo ky’okugira eby’obugaiga, nari kwikiriza kuremesibwa okuhakanisibwa kw’amaani. (Luk. 9:58; Yoh. 8:59) Okwikiriza kwaitu kwagyezibwa, nitubaasa kuguma tutahugire turikwijuka obuhabuzi bw’entumwa Paulo. Akahiga Abakristaayo kutooreza Yesu kugira ngu ‘bataruha’ bakabirugaho!​—Heb. 12:3.

8. Okugumisiriza niki, kandi ahabw’enki nikwetengyesa munonga hati?

⁸ Okugumisiriza nikimanyisa okutegyereza oikaikaine ngu embeera ehindukye. Yaaba tutegyereize twine ekihika ngu embeera mbi ehendere, nari tutegyereize okuhikiirira kw’ekintu eki turikwegomba, twine kuba abagumisiriza. Nabi Habakuuki akaba aine ekihika ky’okureeba embeera z’obushaarizi omuri Yuda nizihendera. (Hab. 1:2) Abeegi ba Yesu bakaba baine amatsiko ngu Obukama bwa Ruhanga “bwaza kureebwa” ahonaaho bubacungure omwaga gw’Abarooma. (Luk. 19:11) Twine ekihika ky’okureeba obu Obukama bwa Ruhanga buraiheho ebikorwa bibi, reero tukaza omu nsi ensya erimu okuhikiirira. (2 Pet. 3:13) Kwonka twine kugumisiriza tukategyereza obwire bwa Yehova obuhikire. Yetegyereze emiringo emwe ei Yehova arikutwegyesa kuba abagumisiriza.

9. Ni by’okureeberaho ki ebirikworeka okugumisiriza kwa Yehova?

⁹ Yehova naatuteeraho eky’okureeberaho kirungi eky’okugumisiriza. Akaha Noa obwire burikumara kwombeka emeeri n’okuba omubuurizi “w’okuhikiirira.” (2 Pet. 2:5; 1 Pet. 3:20) Yehova akahurikiza obu Abrahamu yaabaire naabangaanisa aha kucwamu kwe okw’okucwekyereza abantu babi aba Sodoma na Gomora. (Kut. 18:20-33) Kumara ebyasha bingi, Yehova akagumisiririza munonga eihanga ry’Abaisraeli abaabaire batari beesigwa. (Neh. 9:30, 31) Nitureeba obuhame bw’okugumisiriza kwa Yehova obunaku obu, arikuha obwire abantu abarikwenda kuba banywani be kuhika “aha kweteisa.” (2 Pet. 3:9; Yoh. 6:44; 1 Tim. 2:3, 4) Eky’okureeberaho kya Yehova nikituha enshonga nungi y’okugumisiriza twaba nitukora omurimo gwaitu gw’okubuurira n’okwegyesa abantu. Kandi naatwegyesa kuba abagumisiriza kurabira omu ky’okureeberaho ekiri omu Kigambo kye.

10. Nitwegyera ki aha ky’okureeberaho ky’omuhingi omuri Yakobo 5:7, 8?

¹⁰ Shoma Yakobo 5:7, 8. Eky’okureeberaho ky’omuhingi orikuhinga ebimera nikitwegyesa oku twine kuba abagumisiriza. N’amazima,  ebimera ebimwe nibirahuka kukura. Kwonka, ebimera ebingi na munonga ebirikutaho ebijuma, nibitwara obwire buraingwa kukura. Omuri Israeli, ebihingwa bikaba nibimara ameezi mukaaga kukura. Ku haabaire hahinguraho obwire bukye enjura etandikire kugwa, omuhingi akaba abyara ebihingwa reero ashaaruura obwire bw’enjura bwahwayo. (Mak. 4:28) Ka tube abanyabwengye tugire okugumisiriza nk’okw’omuhingi! Kwonka eki nikibaasa kutooroba.

11. Okugumisiriza nikwija kutuhwera kuta omu buheereza bwaitu?

¹¹ Abantu abatahikiriire nibakira kwenda amagoba g’ahonaaho kuruga omu kuteeraho kwabo. Kwonka, twaba nitwenda ngu omusiri gwaitu gurugyemu ebirungi, twine kuguma tugutaireho omutima, turikuhinga, tukabyara, tukoombera, kandi tukaitirira. N’omurimo gw’okuhindura abantu abeegi nagwo nigwetengyesa okuguma turi abeeziriki. Nikitwara obwire kuhwera abu turikwegyesa kweihamu okushoroora na rwango. Okugumisiriza kwaitu nikwija kutuhwera kwetantara kuhwamu amaani twatunga oburemeezi. Nangwa n’obu abantu baakuhurikiza gye, nabwo twine kuba abagumisiriza. Titurikubaasa kugyemesereza abeegi ba Baibuli kutunguuka omu kwikiriza. Obumwe, nangwa n’abeegi ba Yesu bakaba batuuraho kwetegyereza ebimwe ebi yaabaire naayegyesa. (Yoh. 14:9) Ka twijukye ngu nitubaasa kubyara, kandi twitirire amaizi, kwonka Ruhanga niwe arikukuza.​—1 Kor. 3:6.

12. Nitubaasa kugumisiriza tuta twaba nitubuurira abanyabuzaare abatari mu mazima?

¹² Nikibaasa kutugumira kugumisiriza twaba nitubuurira abanyabuzaare abatarikuheereza Yehova. Omusingye oguri omu Omubuurizi 3:1, 7 nigubaasa kutuhwera. Nigugira ngu hariho “obunaku bw’okuhunama n’obunaku bw’okugamba.” Nitubaasa kureka emitwarize yaitu ehe obujurizi tutaine eki tugambire, kwonka butoosha tushemereire kusherura oburyo bw’okugamba aha mazima. (1 Pet. 3:1, 2) Nitugumisiririza abantu boona otwariiremu  abanyabuzaare twaba nitubuurira kandi turikwegyesa twine obweziriki.

13-14. Ni by’okureeberaho ki eby’okugumisiriza ebi turikubaasa kutooreza?

¹³ Nitubaasa kwegyera aha barikugambwaho omu Baibuli nangwa n’ab’obunaku obu kuba abagumisiriza. Habakuuki akaba aine ekihika ky’okureeba ebikorwa bibi nibihendera, kwonka akagamba aine obumanzi ati: “Niinyija kwemerera kureeba, nyemerere aha munaara gw’okurindiraho.” (Hab. 2:1) Entumwa Paulo akagamba ekyetengo kye kuruga aha mutima ‘eky’okuheza’ obuheereza bwe. Kwonka, akagumisiriza yaagumizamu naajuririra gye ebirikukwata aha makuru marungi.​—Byak. 20:24.

¹⁴ Teekateeka aha ky’okureeberaho ky’omushaija n’omukazi we abaarugire omu ishomero rya Gileadi, reero bakooherezibwa omu ihanga eririmu Abajurizi ba Yehova bakye, kandi abantu baingi omu ihanga eryo tibarikwikiririza omuri Kristo. Abantu baingi bakaba batarikukunda kwega Baibuli. Okutaana n’ekyo, abandi abu baabaire bari nabo omu ishomero rya Gileadi bakaba nibabatsindikira obutumwa oburikworeka ngu baine abeegi ba Baibuli abarikutunguuka. Oyihireho okutunguuka kukye omu kicweka ky’ow’eishe-emwe ogwo n’omukazi we, bakagumizamu nibagumisiriza. Bwanyima y’okubuurira omu kicweka ekyo ekyabaire nikireebeka nk’ekitarimu karungi kumara emyaka munaana, bakarugaho baatunga okushemererwa ahabw’okureeba omwe aha beegi baabo ba Baibuli arikubatizibwa. Mbwenu shi eby’okureeberaho ebi ebya ira n’eby’obunaku obu nibishushana bita? Abantu aba abeesigwa tibarabaire abeeremwa nari kugwisa emikono yaabo, kandi Yehova akabashuumbuusha ahabw’okugumisiriza kwabo. Ka tuteereho ‘kutooreza abo abarikuhungura ebyaraganisiibwe ahabw’okwikiriza n’okugumisiriza.’​—Heb. 6:10-12.

15. Ni muringo ki gumwe ogu okwikiriza kurikuhamya okumariirira kwaitu kw’okubuurira?

¹⁵ Nitwikiririza omu butumwa obu turikubuurira, n’ahabw’ekyo nituba twine ekihika ky’okugambiraho abantu baingi nk’oku kirikubaasika. Nitwesiga ebi Ruhanga arikuraganisa ebiri omu Kigambo kye. (Zab. 119:42; Isa. 40:8) Tureebire obunabi bwa Baibuli burikuhikiirira obunaku obu. Tureebire oku abantu barikuhindura embeera zaabo ahabw’okugyendera aha buhabuzi bwa Baibuli. Obuhame obu nibwongyera kutuhamiza ngu amakuru marungi agarikukwata aha Bukama nigo butumwa obu buri omwe aine kuhurira.

16. Kuhikaana na Zaaburi 46:1-3, okwikiririza omuri Yehova na Yesu nikuhamya kuta okumariirira kwaitu kw’okubuurira?

¹⁶ Kandi nitwikiririza omuri Yehova, Obukomooko bw’obutumwa obu turikubuurira, n’omuri Yesu ou yaayemekire kuba Omugabe w’Obukama bwe. (Yoh. 14:1) N’obu twakuhikwaho mbeera ki, Yehova naija kuguma ari obuhungiro bwaitu kandi amaani gaitu. (Shoma Zaaburi 46:1-3.) Kandi, twine obuhame ngu Yesu naayebembera omurimo gw’okubuurira arikwema omu iguru, arikukoresa amaani n’obushoboorozi ebi Yehova amuhaire.​—Mat. 28:18-20.

17. Ha eky’okureeberaho ekirikworeka ahabw’enki twine kugumizamu nitubuurira.

¹⁷ Okwikiriza nikuhamya obwesigye bwaitu ngu Yehova naija kutuha emigisha ahabw’okuteeraho kwaitu, obumwe n’omu miringo ei tutarikuteekateeka. (Mub. 11:6) Nk’eky’okureeberaho, buri izooba enkumi z’abantu nibaraba aha bugaari bwaitu oburiho ebitabo. Mbwenu shi omuringo gw’okubuurira ogu nigukora? Eego buzima! Obuheereza Bwaitu obw’Obukama aka Novemba 2014 kakagamba aha mwegi wa yunivasite owaabaire naayenda kuhandiika ebirikukwata aha Bajurizi ba Yehova. Tarabaasize kubona Ekyombeko ky’Obukama, kwonka akareeba  akagaari g’ebitabo haihi na yunivasite, kandi yaatunga n’eby’okuhandiika. Bwanyima, akaija yaaba Omujurizi wa Yehova obatiziibwe, kandi hati ni payoniya ow’obutwire. Eby’okureeberaho nk’ebi nibituhiga kugumizamu nitubuurira ahakuba nibyoreka ngu hakiriyo abantu abarikwenda kuhurira obutumwa bw’Obukama kandi bakabumanya.

18. Ahabw’enki nituhamya ngu omurimo gw’okubuurira aha Bukama nigwija kuhendera nk’oku Yehova arikwenda?

¹⁸ Nitubaasa kuhamya ngu omurimo gw’okubuurira aha Bukama nigwija kuhendera omu bwire obuhikire. Yetegyereze ekyabaireho omu bunaku bwa Noa. Yehova akooreka ngu niwe arikukirayo kukwata obwire. Yehova akataho obwire obu omwegyemure gwabaire nigwija kwiziramu harikuburayo emyaka 120. Bwanyima y’emyaka, akaragiira Noa kwombeka emeeri. Obundi harikuburayo emyaka nka 40 nari 50 omwegyemure gutakabaireho, Noa akagumizamu naakora n’obweziriki. N’obu abantu baraabe baabaire batarikumuhurikiza, akagumizamu naabuurira obutumwa bw’okurabura kuhitsya obu Yehova yaamugira ngu hati n’obwire bw’okureeta enyamaishwa omu meeri. Reero, omu bwire buhikire, Yehova ‘akamukingiranamu.’​—Kut. 6:3; 7:1, 2, 16.

19. Nitubaasa kugira ekihika ky’okutunga ki twaba tutagwisize emikono yaitu?

¹⁹ Juba, Yehova naija kuhendera omurimo gw’okubuurira aha Bukama, kandi naija ‘kukinga’ obusingye obu obwa Sitaane reero tuze omu nsi ensya erimu okuhikiirira. Ekyo kitakabaireho, ka tutooreze Noa, Habakuuki, n’abandi abataragwisize emikono yaabo. Ka tugume tutaire omutima aha kubuurira, tugumisirize, kandi tugume twine okwikiriza kuhami omuri Yehova n’ebi arikuraganisa.