1-2. (a) Kurugiirira aha Enfumu 16:31, twine kutwara tuta abakuzire abeesigwa? (b) Nituza kugarukamu bibuuzo ki omu kicweka eki?

HARIHO omwanya omu ishaza rya Arkansas, omuri U.S.A., ahu amabaare ga daimandi garikuba nigareebwa butunu. Kwonka daimandi ezi zikiri omu buhangwa bwazo, tizishemeziibwe. N’ahabw’ekyo abarikuzireeba nibabaasa kutamanya ngu n’ez’omuhendo bazirabeho bazihingure.

² Omu miringo mingi, ab’eishe-emwe na banyaanyazi-itwe abakuzire bari nka daimandi ezo, n’ab’omuhendo munonga. Ekigambo kya Ruhanga nikigyeragyeranisa eishokye ry’enju ery’abakuzire abo n’ekirunga. (Shoma Enfumu 16:31; 20:29) Kwonka, kyorobi kutabareeba ngu n’ab’omuhendo. Abato baamanya ngu abakuzire n’ab’omuhendo, nibatunga ekintu ky’omugasho munonga kukira eby’obugaiga. Omu kicweka eki, nituza kugarukamu ebibuuzo bishatu ebi: Ahabw’enki Yehova naareeba abakuzire abeesigwa nk’ab’omuhendo? Yehova abahaire mwanya ki omukuru omu ntebeekanisa ye? Nitubaasa kukora ki kugasirwa omu bwijwire omu by’okureeberaho byabo?

3. Kuhikaana na Zaaburi 92:12-15, ahabw’enki abakuzire abeesigwa n’ab’omuhendo ahari Yehova?

³ Abakuzire abeesigwa n’ab’omuhendo ahari Yehova Ruhanga. Naareeba eki bari kyenyini omunda, kandi emitwarize yaabo mirungi naagireeba nk’ey’omuhendo. Abakuzire baabagana n’abakiri bato obwengye bwabo obu batwire nibatunga barikuheereza omu bwesigwa, ekyo nikishemeza Yehova. (Yob. 12:12; Enf. 1:1-4) Yehova naasiima n’okugumisiriza kwabo.  (Mal. 3:16) N’obu baraabe baine oburemeezi, nibaguma baine okwikiriza kuhami omuri Yehova. Hati baine amatsiko maingi aha biro by’omumaisho kukira obu baabanza kwega amazima. Kandi Yehova naabakunda ahabw’okugira ngu nibagumizamu nibaranga eiziina rye n’omu myaka yaabo eya bukuru.—Shoma Zaaburi 92:12-15.

4. Ni nshonga ki ezirikubaasa kugumya ab’eishe-emwe na banyaanyazi-itwe abakuzire?

⁴ Ku oraabe ori omu myaka ya bukuru, gira obuhame ngu Yehova naijuka ebi waakozire enyima. (Heb. 6:10) Otwire ori omweziriki omu kushagika omurimo gw’okubuurira, kandi ekyo nikishemeza Tataitwe ow’omu iguru. Obaasize kugumisiriza okugyezibwa, otwariiremu n’okw’amaani munonga, ohamiire aha mitindo ya Baibuli ehikiriire, waahikiiriza obujunaanizibwa bwingi, kandi waatendeka abandi. Okozire kyona ekirikubaasika kugyenda hamwe n’ekibiina kya Yehova ekiri aha bwira bw’amaani. Obaasize kuhiga abandi n’okubashagika kuza omu buheereza obw’obutwire. Yehova Ruhanga naakukunda munonga ahabw’okumuhamiraho. Naaraganisa ngu ‘tarikwija kutsigaho’ abamuhamiireho! (Zab. 37:28) Naakuha obuhame obu: ‘Nimwija kurugaho mumere enju nkibaheekire.’ (Isa. 46:4) N’ahabw’ekyo, otateekateeka ngu ahabw’okugira ngu hati okuzire, tokiine mwanya gw’omuhendo omu kibiina kya Yehova. Buzima okiri ow’omuhendo!

5. Abakuzire baine kuguma nibaijuka ki?

⁵ Abakuzire baine emigasho mingi. N’obu baraabe nibabaasa kuba bataine maani nk’agu baabaire baine omu kubanza, baine ebi barabiremu bingi kumara emyaka ebi turikubaasa kubeegyeraho. Yehova naabaasa kugumizamu naabakoresa omu miringo mingi, nk’oku eby’okureeberaho ebi ebya ira n’ebya hati birikworeka.

6-7. Gamba abakuzire bamwe abarikugambwaho omu Baibuli abaatungire emigisha ahabw’okuheereza omu bwesigwa.

⁶ Omu Baibuli harimu baingi abarikugambwaho abaabaire baine okwikiriza kandi abaaheereize Yehova omu myaka yaabo ya bukuru. Nk’eky’okureeberaho, Musa akaba aine  emyaka nka 80 obu yaatandika kuheereza Yehova nka nabi, kandi omwebembezi w’eihanga rya Israeli. Obu nabi Danieli yaabaire aine emyaka nka 90, Yehova akaba naakimukoresa nk’omugambirizi we. Kandi n’entumwa Yohaana akaba ari nk’omu myaka ya 90 obu yaahandiika ekitabo ky’Okushuuruurwa.

⁷ Abeesigwa abandi baingi bakaba batarikumanywa munonga, n’ahabw’ekyo kikaba nikibaasa kworoba kubeehuzya. Kwonka nabwo, Yehova akaba naabamanya kandi akabashumbuusha ahabw’okumuhamiraho. Nk’eky’okureeberaho, Simeoni owaabaire “ari ohikiriire naatiina Ruhanga,” naagambwaho kakye omu Baibuli, kwonka Yehova akaba naamumanya, kandi akamuha omugisha gw’okureeba omwereere Yesu n’okugamba obunabi oburikukwata aha mwana ogwo na nyina. (Luk. 2:22, 25-35) Teekateeka n’aha faakazi kandi nabikazi Anna. Akaba ari omukaikuru w’emyaka 84, kwonka “akaba ataruga omuri hekalu.” Ahabw’obwesigwa bwe ‘bw’okuguma naaza omu nteerane’ nawe akaheebwa omugisha gw’okureeba omwereere Yesu. Bombi Simeoni na Anna bakaba bari ab’omuhendo ahari Yehova.—Luk. 2:36-38.

8-9. Banyaanyazi-itwe efaakazi ni bintu ki ebi barikubaasa kugumizamu nibakora?

⁸ Omu bwire obu, abakuzire baingi abeesigwa n’eby’okureeberaho birungi aha bato. Teekateeka aha ky’okureeberaho kya Munyaanyazi-itwe Lois Didur. Akaba aine emyaka 21 obu yaatandika kuheereza nka payoniya ow’omutaano omuri Canada. Bwanyima we na iba, John, bakamara obwire bwingi omu murimo gw’okutaayaayira ebibiina. Bwanyima bakaza kuheereza aha Beseeli ya Canada kumara emyaka erengire 20. Obu Lois yaabaire aine 58, we na John bakashabwa kuza omu buheereza busya omuri Ukraine. Bakaba nibaija kukora ki? Mbwenu shi bakateekateeka ngu bakuzire munonga tibarikubaasa kuheereza omu ihanga erindi? Ngaaha, bakaikiriza obuheereza obwo, kandi John akatooranwa kuheereza aha Kakiiko k’Eitaagi. Bwanyima ya John kufa aheereizeyo emyaka mushanju, Lois akacwamu kuguma omu buheereza bwe. Hati Lois aine emyaka 81, kandi naakiheereza n’obweziriki aha Beseeli omuri Ukraine kandi naakundwa munonga.

⁹ Efaakazi nka Lois nibabaasa kuba batarikumanywa munonga nk’oku baabaire nibamanywa obu iba yaabaire akiriho, kwonka obufaakazi bwabo tiburikutuubya omuhendo gwabo. Banyaanyazi-itwe ababaasize kushagika baibabo kumara emyaka mingi, kandi na hati abakirikuheereza omu bwesigwa n’ab’omuhendo ahari Yehova. (1 Tim. 5:3) N’ekindi, nibagumya n’abo abakiri bato.

10. Tony akataho ky’okureeberaho ki ekirungi?

¹⁰ N’abakaikwire baingi abarikutuura omu marwariro agu barikureebereramu abakaikwire nabo n’ab’omuhendo munonga. Nk’eky’okureeberaho, ow’eishe-emwe orikwetwa Tony  hati naatuura omu irwariro nk’eryo. Akabatirizibwa omuri Pennsylvania, U.S.A., omu Kwamunaana 1942 aha myaka 20. Bwanyima akateebwaho orubanja ahabw’okuteejumba omu by’obutegyeki, baamuta omu kihome kumara emyaka ebiri n’ekicweka. We n’omukazi we, Hilda, bakakuriza abaana baabo babiri omu mazima. Kumara emyaka, Tony akaheereza omu bibiina bishatu nk’orikwebembera akakiiko k’abareeberezi (hati orikumanywa nk’omuhikaanisa w’akakiiko k’abareeberezi) kandi orikureeberera oruteerane rw’ekyanga. Akaba naaza omu kihome kutebeekanisa enteerane n’okwegyesa abantu Baibuli. Na hati obu Tony aine emyaka 98, tayeteekateekire kurekyera aho kuheereza. Naagumizamu kukora eki arikubaasa, kuheereza Yehova n’ab’omu kibiina kye!

11. Nitubaasa kworeka tuta ngu abari omu marwariro g’abakaikwire n’ab’omuhendo ahariitwe?

¹¹ Nitubaasa kworeka tuta ngu nituha ekitiinisa abakuzire abarikutuura omu marwariro g’okureebereramu abakaikwire? Abareeberezi nibabaasa kubahwera kwejumba omu ntebeekanisa z’ekibiina nk’oku kirikubaasika. Nitubaasa kworeka ngu nitubafaho turikuza kubataayaayira nari turikuhurizana nabo kurabira aha vidiyo. Kandi twine kufayo munonga ahari abo abarikutuura omu marwariro hare n’ebibiina byabo. Twaba tutafiireyo, nitubaasa kwehuzya abakaikwire aba. Twaba nitugaaniira nabo, nitubaasa kwetegyereza ngu bamwe aharibo tikirikuboorobera kugamba ebirikubakwataho. Kwonka nitwija kugasirwa munonga twagira obwire bw’okubahurikiza kutugambira okushemererwa oku baatungire omu kibiina kya Yehova.

12. Omu kibiina kyaitu nitubaasa kuba twinemu abantu ba muringo ki?

¹² Nitubaasa kutangaara kumanya ngu omu kibiina kyaitu harimu abakaikwire abeesigwa abaine eby’okureeberaho birungi. Munyaanyazi-itwe Harriette akaheereza Yehova omu bwesigwa kumara emyaka mingi omu kibiina kye ekya New Jersey, U.S.A. Bwanyima akaza kutuura n’omuhara. Ab’eishe-emwe omu kibiina kye bakatwara obwire kumumanya, kandi baamanya ngu n’ow’omuhendo. Akabahiga arikubagambira ebirikukwata aha buheereza bwe obu yaabaire aherize kwega amazima omuri 1920. Omu bwire obwo, akaba agyenda na buraashi y’okweza amaino yaaba naaza kubuurira ahabw’okumanya ngu nibabaasa kumukwata. Nangwa, bakamukoma emirundi ebiri omuri 1933 yaamara esaabiiti omu kihome. Omu bwire obwo, iba owaabaire atari Mujurizi wa Yehova kwonka orikumushagika, niwe yaabaire naareeberera abaana baabo bashatu abato. Buzima, abakuzire abeesigwa nka Harriette twine kubatwara nk’ab’omuhendo!

13. Twayega ki aha bikwatiraine n’omwanya ogu abakuzire baine omu kibiina kya Yehova?

¹³ Ab’eishe-emwe na banyaanyazi-itwe abakuzire n’ab’omuhendo omu ntebeekanisa ya Yehova. Bareebire oku Yehova abahaire emigisha omu miringo mingi, hamwe n’ekibiina kye. Beegire amashomo maingi kurabira omu nshobe ezi baakozire. Bareebe ‘nk’enshuro y’obwengye,’ kandi ogasirwe omu bi barabiremu. (Enf. 18:4) Waatwara obwire kubeetegyereza gye, okwikiriza kwawe nikwija kuhama, kandi noija kubeegyeraho ekintu kimwe nari bibiri!

14. Ebiri omu Eky’Ebiragiro 32:7 nibahiga abato kukora ki?

¹⁴ Kyehabure kugaaniira n’abakuzire. (Shoma Eky’Ebiragiro 32:7.) N’amazima, nibabaasa kuba batakihweza gye, batakiine bwira,  batakigamba gye, kwonka nibaba bakiri bato aha mutima, kandi bakozire “eiziina rirungi” na Yehova. (Mub. 7:1) Ijuka ngu Yehova naabatwara nk’ab’omuhendo. Gumizamu noobaha ekitiinisa. Ba nka Elisa. Akangisiriza ngu naayenda kuguma haihi na Eliya aha izooba eri baahererukireyo kuba hamwe. Emirundi eshatu Elisa akamugira ati: “Tindikwija kukurugaho.”—2 Bag. 2:2, 4, 6.

15. Ni bibuuzo eki ebi orikubaasa kubuuza abakuzire?

¹⁵ Yoreka ngu noofayo aha bakuzire orikubabuuza ebibuuzo omu muringo gw’embabazi. (Enf. 1:5; 20:5; 1 Tim. 5:1, 2) Noobaasa kubabuuza ebibuuzo nk’ebi: “Obu waabaire okiri muto niki ekyakuhamiize ngu otungire amazima?” “Ebi orabiremu bikuhweraire bita kwirira haihi Yehova?” “Ni kihama ki ekikubaasiise kuguma oshemereirwe omu kuheereza Yehova?” (1 Tim. 6:6-8) Bwanyima hurikiza baaba nibakutebeza ebirikubakwataho.

16. Omuto yaagaaniira n’okuzire, bombi nibagasirwa bata?

¹⁶ Okuzire yaagaaniira hamwe n’omuto, bombi nibagasirwa. (Rom. 1:12) Imwe abato nimwija kwongyera kwetegyereza omuringo ogu Yehova arikureeberera abaheereza be abeesigwa, kandi okuzire naija kuhurira arikuheebwa ekitiinisa. Naija kushemererwa kukugambira emigisha ei Yehova amuhaire.

17. Ahabw’enki turikubaasa kugira ngu abakuzire abeesigwa nibaguma nibeeyongyera kuba barungi buri kuhinguraho obwire?

¹⁷ Bukuru neehezaho oburungi bw’aha mubiri, kwonka abahamiire ahari Yehova nibaguma nibeeyongyera kuba barungi omu maisho ge buri kuhinguraho omwaka. (1 Tes. 1:2, 3) Ahabw’enki ekyo kihikire? N’ahabw’okugira ngu kumara emyaka, baikiriize omwoyo gurikwera kubahwera kugira emitwarize mirungi. Twayongyera kumanya ab’eishe-emwe na banyaanyazi-itwe abakuzire, tukabaha ekitiinisa, kandi tukabeegyeraho, nitwongyera kubareeba nk’ab’omuhendo!

18. Nituza kushwijuma ki omu kicweka ekirikukurataho?

¹⁸ Ekibiina nikyongyera kuhama abato baatwara abakuzire nk’ab’omuhendo, n’abakuzire baatwara abato nk’ab’omuhendo. Omu kicweka ekirikukurataho, nituza kureeba oku abakuzire barikubaasa kworeka ngu nibatwara abato omu kibiina nk’ab’omuhendo.