EKICWEKA EKY’OKWEGA 39
Omukundwa Waawe Yaaruga Ahari Yehova
‘Ka ni kaingi obu baamugwisa kubi.’—ZAB. 78:40.
EKYESHONGORO 102 ‘Hwera Abataine Maani’
EBIRAAGAMBWEHO *
1. Abamwe nibeehurira bata abakundwa baabo baabingwa?
OINE omukundwa obingirwe omu kibiina? Ekyo nikibaasa kukuhenda omutima! Munyaanyazi-itwe Hilda, naagira ati: “Bwanyima ya ibanyi omwesigwa kufa tumazire emyaka 41 omu bushwere, nkakireeba nk’ekintu ekirikukirayo obubi ekirampikireho. * Kwonka mutabani wangye, omukazi we, n’abaana be, ku baarugire omu kibiina, ekyo kikaba kibi munonga.”
Yehova naayetegyereza obusaasi n’enaku ebirikubaho omwe aha b’eka yaitu yaarekyera aho kumuheereza (Reeba akacweka 2-3) *
2-3. Kurugiirira ahari Zaaburi 78:40, 41, Yehova naayehurira ata abaheereza be baamurugaho?
2 Teekateeka aha busaasi obu Yehova yaagizire obu baamaraika abamwe omu ka ye baamurugaho! (Yud. 6) Kandi teebereza oku yaayehuriire arikureeba abantu abu arikukunda, Abaisraeli barikumugomera emirundi mingi. (Shoma Zaaburi 78:40, 41.) Gira obuhame ngu Tataitwe ow’omu iguru naayehurira kubi omukundwa waawe yaarekyera aho kumuheereza. Naayetegyereza gye obusaasi obu oine. Kandi naija kukuhuumuriza kandi akushagike nk’oku kirikubaasika.
3 Omu kicweka eki, nituza kureeba eki turikubaasa kukora kutunga obuhwezi bwa Yehova, omukundwa waitu yaaba abingirwe. Nituza n’okureeba oku turikubaasa kuhwera abandi omu kibiina abari omu mbeera nk’egyo. Kwonka, ka tubanze tureebe emiteekateekyere etahikire ei tushemereire kwetantara.
REKA KWECWERA ORUBANJA
4. Abazaire abaingi nibeehurira bata omwana waabo yaarekyera aho kuheereza Yehova?
4 Mutabani waawe nari muhara waawe omukundwa yaarekyera aho kuheereza Yehova, noobaasa kwebuuza yaaba haine eki waabaire noobaasa kukora kumuhwera kuguma omu mazima. Ow’eishe-emwe Luke naagira ngu bwanyima y’omutabani kubingwa omu kibiina, akeecwera orubanja. “Nkaba ningira n’ebirooto bibi. Obumwe nkaba ndira kandi ngira n’obusaasi bwingi omu mutima,” Luke nikwo arikugira. Munyaanyazi-itwe Elizabeth, nawe owaahikirweho embeera niyo emwe akaguma naayebuuza ati: “Nk’omuzaire hariho enshobe ei naakozire? Nkateekateeka ngu nimbaasa kuba naaremirwe kwegyesa gye omutabani wangye amazima.”
5. Omuntu yaaruga ahari Yehova neeba eri enshobe y’oha?
5 Twine kwijuka ngu Yehova ahaire buri omwe ekiconco ky’okwecweramu. Eki nikimanyisa ngu nitubaasa kwecweramu kumworobera nari kutamworobera. Abato abamwe abu abazaire baabo batarabateereireho eky’okureeberaho kirungi, bacwiremu kuheereza Yehova omu bwesigwa. Abandi abu abazaire baabo baakozire n’amaani kubeegyesa emisingye ya Baibuli, nibacwamu kuruga omu mazima baakura. Emperu ya byona eri ngu, buri omwe aine kwecweramu yaaba naija kuheereza Yehova. (Yos. 24:15) N’ahabw’ekyo, abazaire murekye kwecwera orubanja abaana baanyu baacwamu kutaheereza Yehova!
6. Omwana naabaasa kwehurira ata omuzaire we yaaruga ahari Ruhanga?
6 Obumwe, omuzaire naaruga omu mazima kandi atsigaho n’eka ye. (Zab. 27:10) Eki nikibaasa kureetera abaana obuhinza mutima, na munonga baaba baabaire nibareeba omuzaire waabo nk’eky’okureeberaho kirungi. Esther, ou ishe yaabingirwe omu kibiina naagira ati: “Nkarira munonga ahakuba nketegyereza ngu akaba atariyo naaruga omu mazima kyonka, kureka akaba ariyo naacwamu kurugira kimwe ahari Yehova. Ninkunda tata, n’ahabw’ekyo ku yaabingirwe, nkaguma ninyerarikirira aha mbeera ye. Obumwe nkaba nkangarana.”
7. Omuzaire waawe yaaba abingirwe nikireetera Yehova kwehurira ata?
7 Abato, omwe aha bazaire baawe yaaba abingirwe, buzima nitushaasha naiwe! Nyabura ‘we gira obwesigye ngu Yehova naamanya gye obusaasi bwawe. Naakukunda kandi naakusiima ahabw’okumuhamiraho, nikyo kimwe n’ab’eishe-emwe na banyaanyako. Kandi ijuka ngu, tiiwe orikujunaanwa ahabw’okucwamu kw’omuzaire waawe. Nk’oku kyaba kyagambirweho, Yehova ahaire buri omwe obugabe bw’okwecweramu. Kandi buri omwe oyehaireyo kandi obatiziibwe aine kwekorera “omutwaro gwe wenka” ogw’obujunaanizibwa.—Gal. 6:5.
8. Abarikuguma bari abeesigwa omu ka nibabaasa kukora ki baaba bategyereize omukundwa waabo kugarukira Yehova? (Reeba n’akabokusi “ Garukira Yehova.”)
8 Omukundwa waawe yaaruga ahari Yehova, nooguma oine amatsiko ngu rimwe naija kurugaho naamugarukira. Noobaasa kukora ki waaba okitegyereize ekyo kubaho? Noobaasa kuta omutima aha kwereeberera omu by’omwoyo. Waakora otyo, ab’eka yaawe abandi nooba noobateeraho eky’okureeberaho kirungi, kandi ekyo nikibaasa n’okuhwera obingirwe. Kandi noija kutunga amaani g’okwemera obusaasi bwawe. Ka tureebe bimwe ebi orikubaasa kukora.
EKI ORIKUBAASA KUKORA KUGUMA OHAMI OMU BY’OMWOYO
9. Noobaasa kutunga amaani kuruga ahari Yehova mu miringo ki? (Reeba n’akabokusi “ Ebyahandiikirwe Ebirikukugumya Omukundwa Waawe Yaabingwa.”)
9 Hamira aha ntebeekanisa yaawe nungi ey’eby’omwoyo. Ni kikuru munonga ngu ogumizemu nooyegaruramu amaani, kandi noogumya n’abandi omu ka yaawe. Ekyo noobaasa kukikora ota? Tunga amaani kuruga ahari Yehova orikuguma oine entebeekanisa y’okushoma Ekigambo kya Ruhanga, okiteekateekeho kandi ogume nooza n’omu nteerane z’Ekikristaayo. Joanna, ou ishe na munyaanya baarugire omu mazima, naagira ati: “Nintunga obunanukye naashoma ebirikukwata aha barikugambwaho omu Baibuli nk’Abigaili, Esteeri, Yobu, Yosefu, na Yesu. Ebi baarabiremu nibindeetera kwehurira gye n’okutuubya obusaasi bwangye. Kandi ebyeshongoro ebihimbirwe nabyo nibingumya munonga.”
10. Ebiri omu Zaaburi 32:6-8 nibituhwera bita kwemera amaganya?
10 Gambira Yehova okwerarikirira kwawe. Waagira amaganya otakarekyera aho kumushaba. Mweshengyereze kukuhwera kureeba embeera nk’oku arikuzireeba, akuhe ‘n’obwengye kandi akuhabure n’omuhanda ogu oshemereire kutoora.’ (Shoma Zaaburi 32:6-8.) Buzima, nikibaasa kutooroba kugambira Yehova oku orikwehurira kwenyini. Kwonka Yehova naayetegyereza gye obusaasi bw’omutima gwawe. Naakukunda munonga kandi naakuhiga kumugambira buri kimwe ekikuri aha mutima.—Kur. 34:6; Zab. 62:7, 8.
11. Kurugiirira aha Abaheburaayo 12:11, ahabw’enki twine kwesiga okuhana kwa Yehova? (Reeba n’akabokusi “ Okubingwa omu Kibiina Nikworeka Rukundo ya Yehova.”)
11 Shagika okucwamu kw’abareeberezi. Okubinga n’etebeekanisa ya Ruhanga. Okuhana nikugasira buri omwe omu kibiina, otwariiremu n’obingirwe. (Shoma Abaheburaayo 12:11.) Abamwe omu kibiina nibabaasa kugamba kubi aha ku abareeberezi bahanire omuntu, kwonka aha rubaju orundi nibabaasa kushwekyerera enshobe ezi ohanirwe akozire. Amazima gari ngu, nituba tutaine obuhame bwona. N’eky’obwengye kwesiga eki abareeberezi bacwiremu ahakuba nibateeraho kugyendera aha misingye y’Ebyahandiikirwe ‘n’okuramurira’ Yehova.—2 Bus. 19:6.
12. Abamwe batungire birungi ki ahabw’okushagika entebeekanisa ya Yehova ey’okuhana?
12 Waashagika okucwamu kw’abareeberezi okw’okubinga omukundwa waawe, nikibaasa kumuhwera kugarukira Yehova. Elizabeth, owaaba yaagambirweho naagira ati: “Kikaba kigumire munonga kwetantara kukwatanisa na mutabani waitu omukuru. Kwonka ku yaaherize kugarukira Yehova, akaikiriza ngu akaba ashemereire kubingwa. Bwanyima, akagira ngu naasiima amashomo agu yaayegire. Nketegyereza ngu butoosha okuhana kwa Yehova nikuba kuhikire.” Iba orikwetwa Mark naayongyeraho ati: “Ku haahingwireho obwire, mutabani waitu akagira ngu naayenda kugaruka, kandi kimwe aha byamuhweraire n’okwanga kukwatanisa nawe. Ninsiima Yehova ahabw’okutuhwera kworobera obuhabuzi bwe.”
13. Niki ekirikubaasa kukuhwera kwemera amaganya?
13 Gaaniiraho n’abanywani abarikwetegyereza oku orikwehurira. Nywana Abakristaayo abakuzire omu by’omwoyo abarikubaasa kukuhwera kuguma oine emiteekateekyere mirungi. (Enf. 12:25; 17:17) Joanna, owaaba yaagambirweho, naagira ati: “Omu mutima gwangye, nkaba nyine eihamba. Kwonka okugaaniiraho n’abanywani abeesigwa kikampwera kugumira embeera.” Kandi shi ku haakubaho omuntu omu kibiina owaakugambira ebintu ebirikukureetera kwehurira kubi?
14. Ahabw’enki twine kugumizamu ‘nitugumisiririzana kandi nitusaasirana’?
14 Gumisiririza ab’eishe-emwe na banyaanyako. Amazima gari ngu, boona tibarikwija kukutwariza omu muringo gurikushushana. (Yak. 3:2) Twena tituhikiriire, n’ahabw’ekyo kitakutangaaza abamwe baagumirwa kutunga eby’okugamba nari haagira owaagamba ekitahikire atakigyendereire kikakugwisa kubi. Ijuka okwehanangiriza kwa Paulo ngu mugumizemu “nimugumisiririzana, kandi ku haraabe hariho oine eki arikufa na mugyenzi we, musaasirane.” (Kol. 3:13) Munyaanyazi-itwe omwe ou omunyabuzaare we yaarugire ahari Yehova naashoboorora ati: “Yehova akampwera kusaasira ab’eishe-emwe abaateireho kukora ekihikire omu butahikiirira bwabo.” Ekibiina nikibaasa kukora ki kuhwera ab’eka abagumire bari abeesigwa?
EKIBIINA NIKIBAASA KUHWERA
15. Niki ekirikubaasa kuhwera ab’eka abaine omuntu aherize kubingwa?
15 Abagumire bari abeesigwa omu ka baakiire gye. Munyaanyazi-itwe Miriam naikiriza arikugira ngu akaba atiinire kuza omu nteerane bwanyima y’omurumuna kubingwa omu kibiina. “Nkaba nyerarikiriire eki abantu baraagambe. Kwonka hakaba hariho abanywani barungi abasaasire naanye batarikugamba kubi ahari murumuna wangye owaabingirwe. Nimbasiima, ahabw’okumpwera kwehurira ntari nyenka omu kuganya.” Munyaanyazi-itwe ondiijo naagira ati: “Bwanyima ya mutabani waitu kubingwa omu kibiina, banywani baitu ab’aha mara bakaija kutuhuumuriza. Abamwe nibagira ngu bakaba batarikumanya eky’okugamba. Bakaba barira naanye, nari obumwe baampandiikira. Eki baakozire kikampwera munonga!”
Ekibiina nikibaasa kushagika ab’eka abagumire bari abeesigwa (Reeba akacweka 17) *
16. Ekibiina nikibaasa kugumizamu kita nikishagika eka erimu obingirwe?
16 Gumizamu nooshagika abagumire bari abeesigwa omu ka. Obwire obwo nibwo barikuba nibendera kimwe okugumibwa n’okworekwa rukundo okukira obundi bwona. (Heb. 10:24, 25) Obumwe, abanyabuzaare b’obingirwe beetegyereize ngu bamwe omu kibiina nibarekyera aho kukwatanisa nabo. Otakaikiriza ekyo kubaho! Abato abu abazaire baabo barugire omu mazima nituba twine kubasiima n’okubagumya. Maria, ou iba yaarugire ahari Yehova kandi akatsigaho eka ye, naagira ati: “Banywani bangye bakaba baija owangye, bateeka eby’okurya kandi baatuhwera n’omu kwega kw’eka. Bakashaasha naanye kandi baarira naanye. Baakamporereza obu abandi baabaire nibangambuura. Buzima bakandeetera kwehurira gye!”—Rom. 12:13, 15.
17. Abareeberezi nibabaasa kuhuumuriza bata abarikuganya?
17 Abareeberezi musherure oburyo bw’okugumya abagumire bari abeesigwa omu ka. Mwine obujunaanizibwa bw’omutaano bw’okuhuumuriza Abakristaayo bagyenzi baanyu abu abakundwa baabo barugire ahari Yehova. (1 Tes. 5:14) Yehabure kubagumya enteerane z’Ekikristaayo zitakatandikire na zaahwa. Bataayaayire kandi oshabe nabo. Kora nabo omu kubuurira, nari obumwe obeete kukwegaitaho omu kuramya kw’eka. Abariisa b’entaama za Yehova baine kugirira Abakristaayo abarikuganya embabazi, kubakunda, kandi bakafayo kumanya n’eki barikwenda.—1 Tes. 2:7, 8.
GUMA OINE AMATSIKO KANDI ORIKWESIGA YEHOVA
18. Kurugiirira ahari 2 Petero 3:9, Ruhanga naayenda ngu abasiisi bakore ki?
18 Yehova ‘tarikwenda muntu weena kuhwerekyerera, kureka naayenda ngu boona bahikye aha kweteisa.’ (Shoma 2 Petero 3:9.) N’obu omuntu yaakukora ekibi ky’amaani, amagara ge nigaba gakiri ag’omuhendo ahari Ruhanga. Teekateeka aha muhendo gw’ekitambo eki Yehova yaashashwire, obu yaahayo Omwana we omukundwa ahabw’amagara g’abasiisi. Yehova omu muringo gwa rukundo naateeraho kuhwera abantu nk’abo kumugarukira. Aine amatsiko ngu nibaija kumugarukira, nk’oku kirikworekwa omu ky’okureeberaho kya Yesu eky’omwana owaarazire. (Luk. 15:11-32) Baingi abaarugire omu mazima babaasize kugarukira Ishebo ow’omu iguru owa rukundo. Kandi ekibiina kikabakiira n’okushemererwa kwingi. Elizabeth, owaaba yaagambirweho, akashemererwa ahabw’okureeba omutabani naagaruka omu kibiina. Ku arikuteekateeka aha by’enyima naagira ati: “Buzima ninsiima munonga abaatuhigire kugumizamu twine amatsiko.”
19. Ahabw’enki nitubaasa kugumizamu nitwesiga Yehova?
19 Butoosha nitubaasa kuta amatsiko omuri Yehova. Tarikubaasa kutuha obuhabuzi oburikutureetaho akabi. Ni Tataitwe efura, ow’embabazi orikukunda boona abarikumukunda kandi abarikumuramya. Gira obuhame ngu Yehova tarikwija kukutsigaho waaba oine amaganya. (Heb. 13:5, 6) Mark owaaba yaagambirweho, naagira ati: “Yehova taratutsigireho. Tari hare naitwe twaba turi omu mbeera zigumire.” Yehova naija kugumizamu kukuha “amaani agarikukirira kimwe” aha ga butoosha. (2 Kor. 4:7) Eego, noobaasa kuguma ori omwesigwa kandi oine amatsiko n’obu omukundwa waawe yaakuruga ahari Yehova.
EKYESHONGORO 44 Okushaba kw’Omuntu Ohwairemu Amaani
^ kacw. 5 Buzima noogira amaganya maingi omukundwa waawe yaaruga ahari Yehova! Ekicweka eki nikishoboorora oku Ruhanga arikwehurira ekyo kyabaho. Nikigamba aha bintu ebi abeesigwa abarikuba batsigaire omu ka barikubaasa kukora kwemera obusaasi n’okuguma bahamire omu by’omwoyo. Kandi ekicweka eki nikiza n’okworeka oku boona omu kibiina barikubaasa kuhuumuriza eka egyo kandi bakagishagika.
^ kacw. 1 Amaziina agamwe omu kicweka eki gahindwirwe.
^ kacw. 79 ENSHOBOORORA Y’EBISHUSHANI: Ow’eishe-emwe yaaruga ahari Yehova yaatsigaho n’eka ye, omukazi we n’abaana nibabonabona.
^ kacw. 81 ENSHOBOORORA Y’EBISHUSHANI: Abareeberezi babiri baija kugumya eka emwe omu kibiina.
