1. Kurugiirira ahari Malaki 3:16, ni kitabo ki eki Yehova atwire naahandiika kandi kirimu ki?

 KUMARA emyaka mingi Yehova atwire naahandiika ekitabo ky’omutaano. Ekitabo eki kirimu amaziina, kutandika n’eiziina rya Abeeli owaabandize kuba omwesigwa. * (Luk. 11:50, 51) Kuruga obwo, Yehova atwire naayongyera amaziina agandi omu kitabo ekyo, hati kirimu amaziina maingi. Omu Baibuli, ekitabo ekyo nikimanywa ‘nk’ekitabo ekirimu ebirikwijutsya,’ ‘ekitabo ky’amagara,’ nari omuzingo gw’amagara. Omu kicweka eki, nituza kukyeta ‘ekitabo ky’amagara.’​—Shoma Malaki 3:16; Kush. 3:5; 17:8.

2. Ni baahi abahandiikirwe omu kitabo ky’amagara, kandi twine kukora ki kubaasa kuhandiikwa omu kitabo ekyo?

² Ekitabo ky’omutaano eki kirimu amaziina g’abaheereza ba Yehova boona abarikumutiina, nari abarikumuha ekitiinisa, kandi abarikukunda eiziina rye. Baine omugisha gw’okutunga amagara agatahwaho. Hati amaziina gaitu nigabaasa kuhandiikwa omu kitabo ekyo, twateeraho kugira omukago guhami na Yehova turikwihirira aha kitambo ky’Omwana we, Yesu Kristo. (Yoh. 3:16, 36) Twena nitwenda ngu amaziina gaitu gaahandiikwe omu kitabo ekyo, yaaba twine amatsiko g’okuza kutuura omu iguru nari omu nsi.

3-4. (a) Mbwenu shi obu amaziina gaitu gahandiikirwe omu kitabo ky’amagara, nikimanyisa ngu nitwija kugumaho ebiro byona? Shoboorora. (b) Nituza kushwijuma ki omu kicweka eki, n’ekirikukurataho?

³ Mbwenu shi eki nikimanyisa ngu boona abahandiikirwe  omu kitabo eki, nibaza kutunga amagara agatahwaho? Eky’okugarukamu ky’ekibuuzo ekyo kiri omu bigambo ebi Yehova yaagambiire Musa ebiri omu Okuruga 32:33. Yehova akagira ati: ‘Weena oncumwireho, niwe ndaije kwiha omu kitabo kyangye.’ N’ahabw’ekyo amaziina agari omu kitabo ekyo, nigabaasa kwihwamu, orikushusha ngu Yehova akaba agahandiikiise ekaraamu. (Kush. 3:5) Twine kuteeraho kuhamya ngu eiziina ryaitu ryaguma omu kitabo ekyo, kuhitsya obu riraahandiikirwemu kimwe orikushusha ngu rihandiikirwe n’akacumu.

⁴ Eki nikibaasa kureetaho ebibuuzo bitari bimwe. Nk’eky’okureeberaho, Baibuli neegamba ki ahari abo abahandiikirwe omu kitabo ky’amagara n’abo abatahandiikirwemu? Abahandiikirwe omu kitabo ky’amagara nibaija kutunga ryari amagara agatahwaho? Kandi shi abo abaafiire batarikumanya ebirikukwata ahari Yehova? Mbwenu shi amaziina gaabo nigabaasa kuhandiikwa omu kitabo ekyo? Ebibuuzo ebi nibiza kugarukwamu omu kicweka eki n’ekirikukurataho.

NI BAAHI ABARI OMU KITABO KY’AMAGARA?

5-6. (a) Nk’oku kirikworekwa omu Abafilipi 4:3, ni baahi abahandiikirwe omu kitabo ky’amagara? (b) Ni ryari obu amaziina gaabo garaahandiikirwe kimwe omu kitabo ky’amagara?

⁵ Ni baahi abahandiikirwe omu kitabo eki eky’akamanyiso? Kubaasa kugarukamu ekibuuzo ekyo, nituza kushwijuma guruupu itaano z’abantu. Bamwe aharibo, bahandiikirwe omu kitabo ky’amagara, kandi abandi tibahandiikirwemu.

⁶ Guruupu y’okubanza neetwariramu abatoorainwe kuza kutegyeka na Yesu omu iguru. Mbwenu shi hati amaziina gaabo gahandiikirwe omu kitabo ky’amagara? Eego. Kurugiirira aha bigambo by’entumwa Paulo ebi yaahandiikiire ‘abakozi bagyenzi be’ ab’omuri  Filipi, amaziina g’entoore, abatoorainwe kutegyeka na Yesu, hati agari omu kitabo ky’amagara. (Shoma Abafilipi 4:3.) Kwonka amaziina gaabo kubaasa kuguma omu kitabo ekyo eky’akamanyiso, baine kuguma bari abeesigwa. Reero ku baraateebweho akamanyiso ak’aha muheru batakafiire nari okubonabona kwingi kuri haihi kubaho, amaziina gaabo nigaija kuhandiikirwa kimwe omu kitabo ekyo.​—Kush. 7:3.

7. Kurugiirira aha Okushuuruurwa 7:16, 17 ni ryari obu amaziina g’ab’omutwe muhango gw’abantu garaahandiikirwe kimwe omu kitabo ky’amagara?

⁷ Guruupu ya kabiri neetwariramu omutwe muhango gw’ab’entaama ezindi. Amaziina gaabo hati shi gahandiikirwe omu kitabo ky’amagara? Eego. Mbwenu shi amaziina gaabo nigaija kuguma omu kitabo ky’amagara bwanyima y’okuhonokaho ahari Haramagedoni? Eego. (Kush. 7:14) Yesu akagira ngu abari nk’entaama nibaija kutaaha omu “magara agatahwaho.” (Mat. 25:46) Kwonka abaraahonokeho ahari Haramagedoni tibarahikye nibatunga amagara agatahwaho. Amaziina gaabo nigaija kuguma gahandiikirwe omu kitabo ky’amagara n’ekaraamu. Yesu ‘naija kuba omuriisa waabo, kandi abeebembera abahitsye aha nshuro z’amaizi g’amagara’ omu Butegyeki bw’Emyaka Rukumi. Abaraayorobere obuhabuzi bwa Kristo, kandi bakaguma bari abeesigwa ahari Yehova kuhitsya aha muheru amaziina gaabo nigaija kuhandiikirwa kimwe omu kitabo ky’amagara.​—Shoma Okushuuruurwa 7:16, 17.

8. Ni baahi abatahandiikirwe omu kitabo ky’amagara kandi niki ekiraabahikyeho?

⁸ Guruupu ya kashatu neetwariramu embuzi, abaraacwekyerezibwe ahari Haramagedoni. Amaziina gaaba tigari omu kitabo ky’amagara. Yesu akagira ngu ‘nibaija kuza omu kubonabonesibwa okw’ebiro n’ebiro.’ (Mat. 25:46) Paulo arikuhwerwa omwoyo gurikwera akagira ngu ‘nibaija kuheebwa ekifubiro eky’okuhwerekyerera okw’ebiro n’ebiro.’ (2 Tes. 1:9; 2 Pet. 2:9) Nikyo kimwe ekiraahikye ahari bo abarikushiisha nkana aha mwoyo ogurikwera. Nabo tibaraatugye amagara agatahwaho, kureka nibaija kucwekyererezibwa kimwe. Amazima agari ngu, tibaraazoorwe. (Mat. 12:32; Mak. 3:28, 29; Heb. 6:4-6) Hati ka twetegyereze gye guruupu ibiri z’abantu abaraazoorwe kutuura omu nsi.

ABARAAZOORWE

9. Nk’oku kirikworekwa omu Ebyakozirwe 24:15, ni guruupu ki ibiri z’abantu abaraazoorwe kutuura omu nsi, kandi nizitaana zita?

⁹ Baibuli neegamba ahari guruupu ibiri z’abaraazoorwe baine amatsiko g’okutuura omu nsi ebiro byona, nibo ‘abahikiriire’ “n’abatahikiriire.” (Shoma Ebyakozirwe 24:15.) ‘Abahikiriire’ n’abo abarikuheereza Yehova omu bwesigwa batakafiire. Kandi, ‘abatahikiriire’ n’abo abarikufa batakaheereize Yehova. Nangwa, emitwarize yaabo ekaba neetaanira kimwe aha y’abahikiriire. Mbwenu shi ahabw’okugira ngu aba guruupu zombi nibaija kuzoorwa, nitubaasa kugira ngu amaziina gaabo gahandiikirwe omu kitabo ky’amagara? Kubaasa kugarukamu ekibuuzo ekyo, ka tushwijume buri guruupu okwayo.

10. Ahabw’enki ‘abahikiriire’ baraazoorwe, kandi bamwe nibaija kutunga bujunaanizibwa ki? (Reeba n’ebiri omu kicweka “Ebibuuzo Kuruga omu Bashomi” aha bikwatiraine n’okuzooka kw’abaraatuure omu nsi.)

¹⁰ ‘Abahikiriire’ niyo guruupu ya kana. Batakafiire, amaziina gaabo gakaba gahandiikirwe omu kitabo ky’amagara. Mbwenu shi ku baafiire amaziina gaabo gakaihwa omu kitabo ekyo? Ngaaha, ‘bakihuriire’ ahakuba Yehova naakibaijuka. Yehova “ti Ruhanga w’abafu, kureka ow’abahuriire, ahakuba omu  maisho ge boona baba abahuriire.” (Luk. 20:38) Eki nikimanyisa ngu ku baraazoorwe kutuura omu nsi, amaziina gaabo nigaija kuba gari omu kitabo ky’amagara kwonka gahandiikirwe “n’ekaraamu.” (Luk. 14:14) Kandi hatariho kubangaanisa bamwe aha baraazoorwe nibaija kutunga bujunaanizibwa bw’okuheereza ‘nk’abategyeki omu nsi yoona.’​—Zab. 45:16.

11. ‘Abahikiriire’ nibaija kuba baine kukora ki amaziina gaabo kubaasa kuhandiikwa omu kitabo ky’amagara?

¹¹ Guruupu y’aha muheru neetwariramu, ‘abatahikiriire.’ Obundi ahabw’obutamanya ebiragiro bya Yehova, tibarakozire by’okuhikiirira batakafiire. N’ahabw’ekyo amaziina gaabo tigarahandiikirwe omu kitabo ky’amagara. Kwonka Ruhanga naija kubazoora kugira ngu batungye omugisha gw’okuhandiikwa omu kitabo ekyo. ‘Abatahikiriire’ nibaija kuba baine kuhwerwa. Batakafiire, bakaba nibakora ebihagaro by’amaani n’ebintu bibi munonga. N’ahabw’ekyo nibaija kuba baine kwegyesibwa kugyendera aha mitindo ya Yehova ehikiriire. Ekyo kubaasa kubaho, Obukama bwa Ruhanga nibwija kutaho entebeekanisa ey’okwegyesa abantu erikukirayo omu byafaayo by’abantu byona.

12. (a) Ni baahi abaraayegyese abatahikiriire? (b) Niki ekiraahikye aha baraayangye kugyendera aha bi beegire?

¹² Ni baahi abaraayegyese abatahikiriire? Omutwe muhango gw’abantu n’abahikiriire abaraazoorwe nibo baraabegyese. Amaziina g’abatahikiriire kubaasa kuhandiikwa omu kitabo ky’amagara, nikiija kubeetengyesa kugira omukago murungi na Yehova, kandi beeheyo ahariiwe. Yesu Kristo n’abashukirweho omwoyo gurikwera nibaija kucwera orubanja abatahikiriire barikwihirira aha bi begyesiibwe. (Kush. 20:4) Omuntu weena oraayangye kugyendera aha bi araayegyesibwe, taraikiriziibwe kuguma ahuriire nangwa n’obu yaakuba ahikize emyaka 100. (Isa. 65:20) Yehova na Yesu nibabaasa kushoma emitima, kandi nibaija kuhamya ngu tihaine oraije kushiisha obusingye omu ensi ensya.​—Isa. 11:9; 60:18; 65:25; Yoh. 2:25.

 ABARAAZOOKYERE AMAGARA N’ABARAAZOOKYERE OKUCWERWA ORUBANJA

13-14. (a) Tutwire nitwetegyereza tuta ebigambo bya Yesu ebiri omu Yohaana 5:29? (b) Twine kwijuka ki aha bikwatiraine n’ebigambo ebyo?

¹³ Kandi Yesu akagamba n’aha baabaire nibaija kuzoorwa kutuura aha omu nsi. Nk’eky’okureeberaho, akagira ati: ‘Mutatangaarira eki, ahakuba obunaku nibwija, abari omu bituuro boona [abarikwijukwa] obu barihurira eiraka rye, bakarugamu, abo abaakozire gye, bakazookyera amagara, n’abo abaakozire kubi bakazookyera okucwerwa orubanja.’ (Yoh. 5:28, 29) Yesu akaba naamanyisa ki?

¹⁴ Tutwire nitumanya ngu ebigambo bya Yesu nibikwata aha ku abantu baraatwaze bwanyima y’okuzooka, ekirikumanyisa ngu bamwe nibaija kuzooka bakore ebintu birungi, kandi abandi nibaija kuzooka bakore ebintu bibi. Kwonka, yetegyereze ngu Yesu taragizire ngu abarazoorwe kuruga omu bituuro nibaija kukora ebintu ebirungi nari ebibi. Akakoresa ebigambo ebirikworeka ngu n’ebikorwa byabo ebya ira. Naagamba ahari abo “abaakozire gye” n’abo “abaakozire kubi.” eki nikimanyisa ngu ebi baakozire bakabikora batakafiire. Ekyo nikikora amakuru, tikwo? Ahakuba tihaine oraikirizibwe kukora ebintu bibi omu nsi ensya. Abatahikiriire baine kuba baakozire ebintu bibi ebyo batakafiire. Mbwenu shi nitubaasa kwetegyereza tuta ebigambo bya Yesu ebirikukwata aha ‘kuzookyera amagara’, ‘n’okuzookyera okucwerwa orubanja’?

15. Ni baahi ‘abaraazookyere amagara,’ kandi ahabw’enki?

¹⁵ Abahikiriire abaakozire gye batakafiire, nibaija ‘kuzookyera amagara’ ahakuba amaziina gaabo nigaija kuba gahandiikirwe omu kitabo ky’amagara. Eki nikimanyisa ngu okuzooka kw’abo “abaakozire gye” okurikugambwaho omuri Yohaana 5:29 kwine akakwate n’okuzooka ‘kw’abahikiriire’ abarikugambwaho omu Ebyakozirwe 24:15. Enyetegyereza egi neehikaana n’ebigambo ebiri omu Abarooma 6:7, ebirikugira ngu “ahakuba ofiire aba atakitegyekwa kibi.” Ebibi ebyakozirwe abatahikiriire aba bikabeihwaho obu baafa, kwonka Yehova akaguma naijuka ebintu birungi ebi baakozire. (Heb. 6:10) Amazima gari ngu, abahikiriire abaraazoorwe nikiija kubeetengyesa kuguma bari abeesigwa amaziina gaabo kubaasa kuguma gahandiikirwe omu kitabo ky’amagara.

16. ‘Okuzookyera kucwerwa orubanja’ nikumanyisa ki?

¹⁶ Kandi shi abo abaakozire ebintu bibi batakafiire? N’obu ebibi byabo birikubaihwaho aha kufa, kwonka tibaraheereize Yehova obu baabaire baakihuriire. N’ahabw’ekyo, amaziina gaabo tigahandiikirwe omu kitabo ky’amagara. Okuzooka ‘kw’abaakozire kubi’ nikushushana n’okuzooka ‘kw’abatahikiriire’ abarikugambwaho omu Ebyakozirwe 24:15. Nabo nibaija ‘kuzookyera okucwerwa orubanja.’ * Abatahikiriire nibaija kucwerwa orubanja ahakuba entwaza yaabo neija kuba neeshwijumwa. (Luk. 22:30) Nikiija kutwara obwire kumanya yaaba nibaija kuba abahikire kuhandiikwa omu kitabo ky’amagara. Abatahikiriire abo ku baraahindure omu micwe yaabo, bakeehayo ahari Yehova nibwo amaziina gaabo garikubaasa kuhandiikwa omu kitabo ky’amagara.

17-18. Abaraazookyere amagara omu nsi nibaija kuba baine kukora ki, kandi ‘ebi baakozire’ ebirikugambwaho omu Okushuuruurwa 20:12, 13 niki?

 ¹⁷ Abaraazoorwe yaaba bahikiriire nari batahikiriire, nibaija kuba baine kworobera ebiragiro ebiraabe biri omu mizingo emisya eraashuuruurwe omu butegyeki bw’emyaka 1,000. Entumwa Yohaana akashoboorora eki yaareebire omu kworekwa ati: “Naareeba abafu, abakuru n’abato, beemereire omu maisho g’ekitebe ky’obukama, ebitabo byashuuruurwa. N’ekitabo ekindi kyashuuruurwa, nikyo eky’amagara. Abafu baacwerwa emanja z’ebyahandiikirwe omu bitabo nk’ebi baakozire oku biri. Enyanja yaagarura abafu abaabaire bagirimu, na Rufu n’Okuzimu byagarura abafu abaabaire bariyo, boona baacwerwa emanja ez’ebi baakozire.”​—Kush. 20:12, 13.

¹⁸ Abaraazoorwe nibaija kucwerwa orubanja barikwihirira ahari ki? Mbwenu shi nibaija kucwerwa orubanja barikwihirira aha bi baakozire batakafiire? Ngaaha! Ijuka ngu, ku barikufa ebibi byabo nibiragazibwa. Ekirikumanyisa ngu, ‘ebi baakozire’ t’ebyo ebi baakozire batakafiire Kureka, n’ebyo ebi baraakore bwanyima y’okwegyesibwa omu nsi ensya. Nangwa n’abashaija abeesigwa nka Noa, Samueli, Daudi, na Danieli nibaija kuba baine kwega ahari Yesu Kristo, kandi boorekye ngu nibaikiririza omu kitambo kye. Buzima n’abatahikiriire nibaija kuba baine bingi by’okwega!

19. Niki ekiraahikye ahari abo abaraayange omugisha ogu ogw’omuhendo?

¹⁹ Niki ekiraahikye ahari abo abaraayange omugisha ogu ogw’omuhendo? Okushuuruurwa 20:15 nihagira hati: “Omuntu weena ou eiziina rye ryabaire ritahandiikirwe omu kitabo ky’amagara, yaanagwa omu nyanja y’omuriro.” Eego, nibaija kucwekyererezibwa kimwe. Ka ni kikuru kuhamya ngu eiziina ryaitu ryahandiikwa omu kitabo ky’amagara kandi rikagumamu!

20. Ni murimo ki ogurikushemeza oguraakorwe omu Butegyeki bw’Emyaka Rukumi? (Reeba ekishushani ekiri aha kipampagare.)

²⁰ Obutegyeki bw’Emyaka Rukumi ka nibwija kuba nibushemeza! Obwo nibwo bwire obu omurimo gw’okwegyesa ogurikukirayo guraakorwe omu nsi. Kandi nibwo n’emitwarize y’abahikiriire n’abatahikiriire eraashwijumwe. (Isa. 26:9; Byak. 17:31) Omurimo ogu ogw’okwegyesa nigwija kukorwa guta? Ekicweka ekirikukurataho nikiza kutuhwera kwetegyereza n’okusiima entebeekanisa egi ey’omutaano.