1. Ahabw’enki kitarikututangaaza kureeba ngu abantu omu nsi tibaine ou barikwesiga?

 ABANTU abarikutegyekwa Sitaane tibarikumanya ou barikubaasa kwesiga. Ab’eby’obushuubuzi, ab’eby’obutegyeki n’abeebembezi b’ediini nibagwisa kubi abantu ahabw’oku barikutwaza. Eki kireetaire banywani baitu, bataahi baitu n’abanyabuzaare kutatwesiga. Kwonka eki tikirikututangaaza. Ahakuba Baibuli ekagira ngu, omu biro by’aha mperu, abantu bakaba nibaija kuba abatarikwesigwa, abarikubeihererana, kandi abarikureebyana. Ekirikumanyisa ngu, abantu bakaba nibaija kutwaza nka ruhanga w’entebeekanisa y’obusingye obu otarikwesigwa na kakye.​—2 Tim. 3:1-4; 2 Kor. 4:4.

2. (a) Ni baahi abu twine kwesiga omu bwijwire? (b) Abamwe nibabaasa kwebuuza ki?

² Kwonka, itwe Abakristaayo nitubaasa kwesigira kimwe Yehova. (Yer. 17:7, 8) Nituhamiza kimwe ngu naatukunda kandi tarikubaasa kutsigaho banywani be. (Zab. 9:10) Nitubaasa kwesiga na Yesu ahakuba akahayo amagara ge ahabwaitu. (1 Pet. 3:18) Kandi ebi turabiremu bitwegyeise ngu Baibuli neeha obuhabuzi oburikwesigwa. (2 Tim. 3:16, 17) Nitubaasa kwesiga Yehova, Yesu na Baibuli. Kwonka abamwe nibabaasa kwebuuza yaaba butoosha nibabaasa kwesiga ab’eishe-emwe na banyaanyazi-itwe omu kibiina. Ku oraabe noogira ngu eego, ahabw’enki nitubaasa kubeesiga?

3. Twine mugisha ki ogw’omutaano? (Mako 10:29, 30)

³ Yehova atutooraine kuba omu ka ye ey’abarikumuramya omu nsi yoona. Ogu ka n’omugisha gw’omutaano kandi ogurikutugasira munonga! (Shoma Mako 10:29, 30.) Omu nsi yoona, twine ab’eishe-emwe na banyaanyazi-itwe abarikukunda  Yehova nkaitwe, kandi nibateeraho munonga kugyendera aha mitindo ye. Orurimi rwaitu, oruganda, n’emijwarire, nibitaana, kwonka nituhurira turi haihi nabo, n’obu twakubabugana omurundi gw’okubanza. Okukira munonga nitukunda kuba hamwe kuramya n’okuhimbisa Tataitwe ow’omu iguru orikutukunda.​—Zab. 133:1.

4. Ahabw’enki nitwenda obuhwezi bw’ab’eishe-emwe na banyaanyazi-itwe?

⁴ Hati okukira ira, twine kuguma nitukwatanisa gye n’ab’eishe-emwe na banyaanyazi-itwe. Obumwe, nibatuhwera twaba twine oburemeezi. (Rom. 15:1; Gal. 6:2) Kandi nibatuhiga kuguma turi abeeziriki omu kuheereza Yehova n’okuguma tuhami omu by’omwoyo. (1 Tes. 5:11; Heb. 10:23-25) Teebereza embeera ei twakubaire turimu ku ogire ngu ti twine burinzi bw’ekibiina, kutuhwera kutatengyetsibwa abazigu baitu ab’amaani, Sitaane Omuregi, n’ensi ye embi. Juba, Sitaane n’abu aineho obushoboorozi nibaija kutaahirira abaheereza ba Ruhanga. Teekateeka aha kushemererwa oku turaabe twine ahabw’okuhwerwa ab’eishe-emwe na banyaanyazi-itwe!

5. Ahabw’enki abamwe nibagumirwa kwesiga ab’eishe-emwe na banyaanyabo?

⁵ Abamwe nibagumirwa kwesiga ab’eishe-emwe na banyaanyabo, obundi omwe aharibo akabareebya, nari akaremwa kuhikiiriza okuraganisa kwe. Nari obundi omu kibiina haine owaagambire nari owaakozire ekintu ekyabagwisize kubi munonga. Ekyo kyabaho nitubaasa kugumirwa kwesiga abandi. Mbwenu shi niki ekiraatuhwere kwesiga Abakristaayo bagyenzi baitu?

6. Rukundo neebaasa kutuhwera eta kwesiga ab’eishe-emwe? (1 Abakorinso 13:4-8)

⁶ Rukundo niyo erikutureetera kwesiga abandi. Abakorinso ey’okubanza eshuura 13  neeshoboorora oku rukundo erikubaasa kutuhwera kwesiga abandi nari kugaruka kubeesiga. (Shoma 1 Abakorinso 13:4-8.) Nk’eky’okureeberaho, omushororongo gwa 4 nigugira ngu “okukunda kugumisiriza, kugira embabazi.” Yehova naatugumisiririza n’obu turaabe nitushobya. N’ahabw’ekyo, naitwe twine kugumisiririza ab’eishe-emwe baagamba nari baakora ebirikutugwisa kubi. Omushororongo 5 nigwongyeraho guti: ‘[Okukunda] tikurikurahuka kuguubwa kubi, tikurikubiika nziika.’ Titurikwenda kubiika enziika, turikwijuka buri nshobe yoona ei baatushagiize. Omubuurizi 7:9 nihagira ngu titushemereire ‘kurahuka kugira ekiniga.’ Nikiba kiri kirungi kugyendera aha bigambo ebiri omu Abaefeso 4:26: ‘Eizooba rirekye kurenga mukiine’ ekiniga!

7. Emisingye eri omuri Matayo 7:1-5 neija kutuhwera eta kugira obwesigye?

⁷ Ekindi ekirikubaasa kutuhwera kwesiga ab’eishe-emwe na banyaanyazi-itwe n’okubareeba nk’oku Yehova arikubareeba. Ruhanga naabakunda kandi tarikuguma naijuka eby’okushiisha byabo. Naitwe titushemereire kukikora. (Zab. 130:3) Omu mwanya gw’okuta omutima aha nshobe zaabo, twine kuteeraho kureeba emitwarize mirungi ei baine n’ebirungi ebi barikubaasa kukora. (Shoma Matayo 7:1-5.) Titushemereire kugira okubangaanisa aha bwesigwa bwabo ahakuba okukunda “kwikiriza byona.” (1 Kor. 13:7) Ebigambo ebyo tibirikumanyisa ngu twine kwesigira eryo ab’eishe-emwe, kureka Yehova naayenda ngu tubeesigye ahakuba boorekire ngu n’abeesigwa. *

8. Noobaasa kwongyera kwesiga ota ab’eishe-emwe?

⁸ Twine kugira eki twakora abandi kubaasa kutwesiga, kandi ekyo nikitwara obwire. Noobaasa kukora ki kwongyera kwesiga ab’eishe-emwe? Twine kuteeraho kubamanya gye. Gaaniira nabo waaba ogiire omu nteerane z’ekibiina. Taho entebeekanisa y’okubuurira nabo. Bagumisiririze, bahwere kworeka ngu nibeesigwa. Omu kubanza, noobaasa kutagambira omuntu ou orikuteeraho kunywana byona ebirikukwataho. Omukago gwanyu gwayongyera kuhama, obundi noija kworoberwa kugamba oku orikwehurira. (Luk. 16:10) Kwonka shi noobaasa kukora ki ow’eishe-emwe yaakureebya? Otarahuka kwita omukago gwanyu, kureka mugumisiririze. Kandi otaikiriza enshobi z’abantu bakye kukureetera kuteesiga ab’eishe-emwe. Omu kicweka eki, nituza kureeba bamwe aha baheereza ba Yehova abeesigwa, abagumiizemu kwesiga abandi n’obu bamwe barikubareebya.

9. (a) Hanna akashagika ata entebeekanisa ya Yehova n’obu abajwekyerwa be baayorekire obweremwa? (b) Haana ebi yaarabiremu nibikwegyesa ki aha kwesiga entebeekanisa ya Yehova?(Reeba ekishushani.)

⁹ Ow’eishe-emwe oine obujunaanizibwa araakureebizeho? Kyaba nikwo kiri, noobaasa kugasirwa waayega ebyahikire ahari Hanna. Eli, Omunyamurwa Omukuru niwe yaabaire naakizayo obujunaanizibwa bw’eby’omwoyo omuri Israeli omu bwire obwo. Kwonka ab’omu ka ye tibarataireho eky’okureeberaho kirungi. Batabani be abaabaire batoorainwe kuheereza, butoosha bakaba nibeejumba omu bikorwa by’obushambani, kandi ishebo tarabahanire kirikumara. Ahonaaho, Yehova taramwihireho obujunaanizibwa obu yaabaire aine. Kwonka, Hanna tarayangire kushagika entebeekanisa ya Ruhanga arikwanga kuza aha hekalu kuramya Yehova obwire bwona obu Eli yaamazire naaheereza nk’omunyamurwa omukuru. Eli ku yaareebire Hanna  arikushaba aine amaganya maingi, akarahuka kumucwera orubanja arikugira ngu asinzire. Akacwera orubanja omukazi ogu owaabaire oine obusaasi bwingi atabandize kumanya byona. (1 Sam. 1:12-16) N’obu ekyo kyabaireho, Hanna akaraganisa ngu yaazaara omwana w’omwojo, naija kumutwara aha hekalu, ahu araije kuba naareebererwa Eli. (1 Sam. 1:11) Mbwenu shi enshonga y’abatabani ba Eli ekaba eine kushoboororwa? Eego, kandi Yehova omu bwire obuhikire akagira eki yaakora. (1 Sam. 4:17) Ruhanga akaha Hanna omugisha yaatunga omwana w’omwojo, Samueli.​—1 Sam. 1:17-20.

10. Omugabe Daudi akaguma naayesiga ata abandi n’obu bamwe baamureebize?

¹⁰ Munywani waawe ow’aha mara araakureebizeho? Kyaba nikwo kiri, shwijuma eky’okureeberaho ky’Omugabe Daudi. Omwe ahari banywani be akaba naayetwa Ahisofeeli. Kwonka Abusalomu mutabani wa Daudi ku yaateireho kwehindura omugabe, Ahisofeeli akakwatanisa na Abusalomu omu bugomi obwo. Daudi ka yaagwerirwe akagwe kufeerwa obushagiki bwa mutabani we Abusalomu n’obw’omushaija ou yaabaire naatwara nka munywani we! Kwonka Daudi taraikiriize ekyo kumureetera kuteesiga abandi. Akagumizamu naayesiga Hushai, munywani we ondiijo omwesigwa, owaayangire kwegaita aha baamureebize. Daudi akaba aine enshonga zihikire z’okwesiga munywani we. Ahakuba Hushai akooreka ngu n’omunywani owaabuzima, nangwa akata n’amagara ge omu kabi kubaasa kuhwera Daudi.​—2 Sam. 17:1-16.

11. Omwe aha baheereza ba Nabali akooreka ata ngu naayesiga abandi?

¹¹ Teekateeka aha ky’okureeberaho ekindi eky’omwe aha baheereza ba Nabali. Daudi n’abashaija be bakarinda gye abaheereza b’Omwisraeli Nabali. Bwanyima y’obwire, Daudi akashaba Nabali owaabaire ari omugaiga, kuha abashaija be eby’okurya. Nabali ku yaayangire kukora eki Daudi yaamushabire, Daudi akagira ekiniga kingi munonga yaacwamu kwita buri mushaija omu nju ya Nabali. Kwonka omwe aha baheereza be akagambira Abigaili muka Nabali aha nshonga egi. Nk’omwe aha barikutuura omu ka egyo, akaba naamanya ngu Abigaili niwe arikubaasa kukiza amagara ge. Omu mwanya gw’okuhunga, akeesiga  Abigaili ngu naija kutereeza embeera. Akabaasa kugira obwesigye obwo ahakuba Abigaili akaba naamanywa nk’omukazi w’obwengye. Ebyarugiremu bikooreka ngu akacwamu gye kumwesiga. Abigaili akeeshengyereza Daudi aine obumanzi kutakora eki yaabaire amaririire kukora. (1 Sam. 25:2-35) Akaba aine obwesigye ngu Daudi naaza kucwamu gye.

12. Yesu akooreka ata ngu naayesiga entumwa ze n’obu baraabe baabaire baine obweremwa?

¹² Yesu akeesiga entumwa ze n’obu baraabe baabaire baine obweremwa. (Yoh. 15:15, 16) Yakobo na Yohaana ku baashabire Yesu kubaha emyanya y’omutaano omu Bukama, Yesu tarabanganiise aha bigyendererwa byabo by’okuheereza Yehova nari kureka kubatwara nk’entumwa ze. (Mak. 10:35-40) Bwanyima, abeegi be boona bakamutsigaho ekiro eki baamukwatiireho. (Mat. 26:56) Kwonka, Yesu akagumizamu naabeesiga. N’obu araabe yaabaire naamanya gye obutahikiirira bwabo, akagumizamu “naabakunda okuhitsya aha muheru.” (Yoh. 13:1) Bwanyima ya Yesu kuzooka, akaha entumwa ze 11 abeesigwa obujunaanizibwa bukuru obw’okwebembera omurimo gw’okuhindura abantu abeegi, n’okureeberera entaama ze ez’omuhendo. (Mat. 28:19, 20; Yoh. 21:15-17) Akaba aine enshonga nungi kwesiga abashaija aba abatahikiriire. Boona bakaheereza omu bwesigwa kuhitsya aha muheru gw’obuheereza bwabo omu nsi. Hatariho kubangaanisa, Hanna, Daudi, omuheereza wa Nabali, Abigaili, na Yesu bakataho eky’okureeberaho kirungi eky’okwesiga abantu abatahikiriire.

13. Niki ekirikubaasa kutureetera kugumirwa kwesiga abandi?

¹³ Oragambiire ow’eishe-emwe ekihama, kwonka bwanyima akakigambira abandi? Ekyo nikibaasa kukukora kubi munonga. Munyaanyazi-itwe omwe akagambira omureeberezi ebirikumukwataho aine obwesigye ngu tarabigambe. Eizooba eryakuratsireho, muka omureeberezi akaija kugumya munyaanyazi-itwe ogwo, arikumanya byona ebi yaagambiire omureeberezi. Munyaanyazi-itwe ogwo akagumirwa kwesiga omureeberezi ogwo. Ekirungi, munyaanyazi-itwe ogwo akacwamu gye yaashaba obuhwezi. Akaza ow’omureeberezi ondiijo owaamuhweraire kugaruka kwesiga abareeberezi.

14. Niki ekyahweraire ow’eishe-emwe omwe kugaruka kwesiga ab’eishe-emwe?

¹⁴ Ow’eishe-emwe akaba aine obutaikirizana n’abareeberezi babiri abu yaabaire naareeba ngu tarikubaasa kwesiga. Bwanyima akatandika kuteekateeka aha bi ow’eishe-emwe ou yaabaire naaha ekitiinisa yaagambire. Akamugambira ebigambo byorobi kandi eby’amaani ebi: “Sitaane niwe muzigu, beitu batari b’eishe-emwe.” Ow’eishe-emwe ogwo akashaba, reero yaateekateeka munonga aha bigambo ebyo, bwanyima akagaruka yaagira obusingye n’abareeberezi bombi.

15. Ahabw’enki kirikutwara obwire kugaruka kwesiga abandi? Ha eky’okureeberaho.

¹⁵ Oriihirweho obujunaanizibwa omu kibiina? Buzima ekyo nikireeta obusaasi. Grete na nyina bakaba bari Abajurizi ba Yehova abeesigwa omuri Nazi Germany omu myaka ya 1930, obu omurimo gwaitu gwabaire gwemereziibwe. Grete akaba aine obujunaanizibwa obu yaabaire naakunda munonga, obw’okukopoororera ab’eishe-emwe bagyenzi be Omunaara gw’Omurinzi. Kwonka ab’eishe-emwe ku baakimanyire ngu ishe akaba naahakanisa amazima, bakamwihaho obujunaanizibwa obwo barikutiina ngu ishe naabaasa kureebya ekibiina arikugambira abahakanisa ebirikukikwataho. Grete akahikwaho n’okugyezibwa okundi. Omu Rutaro rw’Ensi Yoona Orwa Kabiri,  ab’eishe-emwe bakaba batarikwesiga Grete na nyina kandi bakaba batarikubaha magaziini nari kugamba nabo baababugana omu muhanda. Ekyo kikabasaasa munonga! Akatunga enkojo z’amaani aha mutima, Grete naagira ngu kikamutwarira obwire buraingwa kusaasira ab’eishe-emwe abo n’okugaruka kubeesiga. Bwanyima, akeetegyereza ngu Yehova ashemereire kuba yaabasaasiire, kandi nawe nikyo yaabaire aine kukora. *

16. Ahabw’enki twine kuteeraho kwega kwesiga ab’eishe-emwe na banyaanyazi-itwe?

¹⁶ Oku oraabe oraahikirweho embeera nk’egyo erikumaramu amaani, teeraho kugaruka kwombeka obwesigye bwawe. Nikibaasa kutwara obwire kwonka okuteeraho kwawe nikwija kurugamu ebirungi. Nk’eky’okureeberaho, waarya eby’okurya bikakukora kubi, noobaasa kutandika kwegyendesereza ebi orikurya. Kwonka, ekiihuro kimwe tikishemereire kutureetera kurekyera aho kurya eby’okurya. Nikyo kimwe, titushemereire kwikiriza ebintu bibi ebyabaireho kutureetera kurekyera aho kwesiga ab’eishe-emwe na banyaanyazi-itwe, abu turikumanya ngu bakazaarwa batahikiriire. Twagaruka kwesiga ab’eishe-emwe, nitwija kwongyera kushemererwa, kandi nitwija n’okuta omutima aha ki turikubaasa kukora kuhwera abandi kwesiga ekibiina.

17. Ahabw’enki okwesiga abandi kiri kikuru munonga, kandi omu kicweka ekirikukurataho nituza kugamba ahari ki?

¹⁷ Omu nsi erikutegyekwa Sitaane baingi tibarikwesiga abandi, kwonka nitubaasa kwesiga ab’eishe-emwe na banyaanyazi-itwe ahakuba nitubakunda. Obwesigye obwo nibutureetera kugira obumwe n’okushemererwa, kandi omu biro by’omumaisho nibwija kuturinda twahikwaho embeera zigumire. Kwonka shi ku haakuba haine owaakureebize kandi otakimwesiga, noobaasa kukora ki? Teeraho kureeba enshonga nk’oku Yehova arikuzireeba, ta omu nkora emisingye ya Baibuli, girira ab’eishe-emwe rukundo eyaabuzima, kandi yegyera aha by’okureeberaho by’omu Baibuli. Nitubaasa kusingura okwehurira kubi kandi tugaruke kwesiga abandi. Twakora tutyo, nitwija kutunga omugisha gw’okuba n’abanywani baingi ‘abarikukira’ abu tuzairwe nabo. (Enf. 18:24) Okwesiga abandi tikirikumara, nabo baine kuba nibatwesiga. Omu kicweka ekirikukurataho nituza kureeba oku turikubaasa kureetera ab’eishe-emwe kutwesiga.