Omu myaka ya 1940, Abajurizi ba Yehova bakatandika kwegyesa abazaire bangye Baibuli. N’obu baraabe baarekyeire aho kwega, maawe akaguma naatunga Watchtower na Awake! Omuri 1950 hakabaho oruteerane oruhango omu rurembo New York, kandi ab’eka yaitu bakazayo

Bwanyima y’oruteerane orwo, Ow’eishe-emwe Lawrence Jeffries akatandika kututaayaayira. Akateeraho kumpwera kwega amazima. Omu kubanza, nkaba ntarikwikirizana n’Abajurizi ba Yehova kuteejumba omu by’obutegyeki n’okutaza omu mahe. Nkamugira ngu buri omwe omuri America kuri naayanga kwejumba omu ntaro, abazigu bakatutaahiriire beegaruriza. Ow’eishe-emwe Jeffries n’obugumisiriza akambuuza ati: “Noogira ngu Yehova Ruhanga naabaasa kukora ki, abantu boona omuri America baaba ni bamuramya, reero abazigu bakabataahirira?” Ebi yaagambire aha nshonga egyo n’ezindi nyingi bikampwera kwetegyereza ngu nkaba ngwire. Ekyo kikandeetera kugira ekihika ky’okumanya ebirikukiraho.

Nkamara obwire bwingi ndikushoma Watchtower na Awake! ezi maawe yaabaire abiikire. Bwanyima y’obwire, nketegyereza ngu nkaba niinyega amazima, n’ahabw’ekyo nkaikiriza Ow’eishe-emwe Jeffries kunyegyesa Baibuli. Kandi nkatandika kuza omu nteerane butoosha. Nkakunda ebi naabaire niinyega, kandi nkatandika kubuurira amakuru marungi. Ebigyendererwa byangye bikahinduka obu naayetegyereza ngu “eizooba rya [Yehova] erikuru riri haihi.” (Zef. 1:14) Omu mwanya gw’okuza aha yunivasite, nkaba niinyenda kuhwera abandi kwega amazima ga Baibuli.

Nkaheza emishomo yangye Okwamukaaga 13, 1956, bwanyima y’ebiro bishatu, nkabatizibwa aha ruteerane oruhango rw’ekiro kimwe. Nkaba ntarikumanya  ngu ninza kutunga emigisha mingi ahabw’okucwamu kwega n’okwegyesa abandi ebirikukwata ahari Yehova.

Bwanyima y’ameezi mukaaga mperize kubatizibwa, nkaba payoniya ow’obutwire. Obuheereza Bwaitu obw’Obukama aka Desemba 1956 kakaba karimu ekicweka “Noobaasa Kuheereza ahu Ababuurizi Baingi Barikwendwa?” Nkareeba ngu nimbaasa kukora ekyo. Nkaba niinyenda kuhwera ahu ababuurizi b’amakuru marungi baabaire bari bakye.—Mat. 24:14.

N’ahabw’ekyo, nkafuruka naaza Edgefield, South Carolina. Ekibiina ky’omu kicweka ekyo kikaba kirimu ababuurizi bana. Ku naagiireyo twahika bataano. Tukaba nitugirira enteerane zaitu omu nju y’ow’eishe-emwe. Buri kwezi, nkaba mbuurira eshaaha 100. Nkaba ninkora bingi omu kibiina ndikwebembera enteerane z’okubuurira kandi ndikuha n’embazo. Ekirikushemeza, ku naayongyeire kukora bingi nikwo naayongyeire kwega ebirikukwata ahari Yehova.

Omukazi omwe ou naabaire ninyegyesa Baibuli omuri Johnston, mahiro nkye kuruga Edgefield, South Carolina akaba aine omwanya gw’okubiikamu eshanduukye z’okuziikamu. Akangirira embabazi yaampa omurimo gw’okukora ebiro bikye buri wiiki, kandi yaatwikiriza kukoresa kimwe aha byombeko bye nk’Ekyombeko ky’Obukama.

Jolly Jeffries, mutabani w’ow’eishe-emwe owaanyegyeise Baibuli, akaruga Brooklyn, New York, yaanyegaitaho twaheereza hamwe nka baapayoniya. Tukaba nitutuura hamwe omu nju ei ow’eishe-emwe yaatupangiise.

Omuri South Carolina tukaba nitushashurwa esente nkye, doora nka ibiri nari ishatu buri izooba. Eizooba rimwe, nkaba naaheza kukoresa esente ezi naabaire ntsigaize kugura eky’okurya omu duuka. Ku naashohoire omushaija akambuuza ati: “Nooyenda omurimo? Ninza kukushashura doora emwe buri shaaha.” Akanshaba kukora ebiro bishatu buri wiiki ndi kuboneza aha mwanya ogu baabaire nibombekaho. Nkakireeba butunu ngu Yehova akaba naampwera kuguma omuri Edgefield. Nkabaasa kuza aha ruteerane oruhango orurikubaho ab’amahanga agandi orwabaireho omuri 1958 omu rurembo New York.

Aha izooba rya kabiri ery’oruteerane orwo, hakabaho ekintu ky’omutaano. Nkabugana Ruby Wadlington, owaabaire ari payoniya ow’obutwire omuri Gallatin, Tennessee. Ahabw’okugira ngu twena tukaba nitwenda kuba abamiisani, tukaza omu ruteerane rw’abarikwenda kuza omu ishomero rya Gileadi. Bwanyima, tukatandika kuhandiikirana ebaruha. Kandi ku haahingwireho obwire bakanyeta kuha orubazo rwa boona omuri Gallatin. Nkakoresa omugisha ogwo kumushaba kutaaha nawe omu bushwere. Nkafuruka naaza omu kibiina kya Ruby, kandi tukataaha omu bushwere omuri 1959.

Aha myaka 23, nkatooranwa kuba omuheereza w’ekibiina (hati orikumanywa nk’omuhikaanisa  w’akakiiko k’abareeberezi) omuri Gallatin. Ow’eishe-emwe Charles Thompson akabanza kutaayaayira ekibiina kyaitu nk’omureeberezi wa saketi. Akaba naamanya bingi, kwonka akanshaba kugamba eki naabaire ninteekateeka aha ki ab’eishe-emwe baabaire nibenda, n’omuringo ogu abareeberezi ba saketi baabaire nibakwatamu enshonga ezo. Nkamwegyeraho ngu ni kikuru kubanza waabuuza reero okamanya byona ebirikutwarirwamu otakacwiremu.

Omu Kwakataano 1964, nkeetwa kuza omu Ishomero ry’Obuheereza bw’Obukama omuri South Lansing, New York. Ab’eishe-emwe abaabaire nibatwegyesa bakandeetera kugira ekihika ky’okwega bingi n’okutunguuka omu by’omwoyo.

Nyowe na Ruby tukaza omu buheereza bwa saketi omu Kwokubanza 1965. Saketi ei twabandize kuheerezamu ekaba neetandikira Knoxville, Tennessee, ehika haihi na Richmond, Virginia. Ekaba neetwariramu ebibiina by’omuri North Carolina, Kentucky, na West Virginia. Nkaba nimpeereza omu bibiina by’abairaguju byonka ahabw’ebiragiro by’okushoroora omurangi ebyabaire biriho omuri United States, abairaguju bakaba batarikwikirizibwa kuteeranira hamwe n’abarikwera. Ab’eishe-emwe bakaba bari abooro, tukeega kubagana nabo ebi twabaire twine. Omureeberezi wa saketi owaabaire amazire obwire buraingwa naaheereza akanyegyesa ekintu kikuru: “Waataayaayira ekibiina ba ow’eishe-emwe, beitu oteetwara nk’orikubakira. Noobaasa kubahwera baaba nibakureeba nk’ow’eishe-emwe mugyenzi waabo.”

Obu twabaire tutaayaayiire ekibiina kikye, Ruby akatandika kwegyesa omukazi Baibuli owaabaire aine omwana w’omwishiki w’omwaka gumwe. Omu kibiina ekyo tihaine owaabaire naabaasa kugumizamu arikumwegyesa, n’ahabw’ekyo Ruby akaguma naamwegyesa arikukoresa amabaruha. Aha kutaayaaya kwaitu okundi, omukazi ogwo akaija omu nteerane zoona. Baapayoniya babiri ab’omutaano ku baagiire kuheereza omu kicweka ekyo, bakagumizamu barikumwegyesa, bwanyima y’obwire bukye akabatizibwa. Bwanyima y’emyaka 30, omuri 1995 ku twabaire turi aha Beseeli ya Patterson, munyaanyazi-itwe muto akeeyanjurira Ruby. Akaba ari muhara w’omukazi ou Ruby yaayegyeise Baibuli. Munyaanyazi-itwe ogwo na iba bakaba bari omu Ishomero rya Gileadi 100.

Saketi ya kabiri ei twaheereizemu ni Florida. Omu bwire obwo tukaba nitwenda motoka, kandi tukagigura aha muhendo murungi. Kwonka, saabiiti y’okubanza, ingini yaayo ekafa. Tukaba tutaine esente z’okugikanikisa. Nkeeta ow’eishe-emwe owaabaire naabaasa kutuhwera. Akagambira omwe aha bakozi be kugikanika kandi taratushabire sente zoona. Akatugira ati: “Mutafayo tindikubabanja.” Kandi akatuha n’ekiconco ky’esente! Ekyo kikatworeka oku Yehova arikureeberera abaheereza be. Kandi tukeega ngu naitwe tushemereire kuba efura aha bandi.

Ku twabaire tutaayaayira ekibiina, tukaba turaara omu maka g’ab’eishe-emwe. N’ekyarugiremu, tukatunga abanywani baingi abaabuzima. Eizooba rimwe, nkatandika kuhandiika ripoota erikukwata aha kibiina, reero naagitsiga omu taipu ruraita. Ku naagarukire omu mwabazyo, nketegyereza ngu omwojo w’emyaka eshatu omu ka egyo yaazaanira ahari taipu ruraita yaashiisha ripoota egyo, reero naagigarukamu busya. Nkamara emyaka mingi ndikumurahura.

Omuri 1971, nkatunga ebaruha ndikushabwa kuza kuheereza nk’omureeberezi wa disiturikiti omuri New York City. Kikatutangaaza! Ekyo kikabaho, obu naabaire nyine emyaka 34 yonka. Ab’eishe-emwe bakanyakiira n’okushemererwa kwingi nk’omureeberezi wa disiturikiti waabo w’okubanza omwiraguju.

Nk’omureeberezi wa disiturikiti, nkaba ninkunda kwegyesa ahari Yehova buri wiikenda aha ruteerane oruhango orwa saketi. Abareeberezi ba saketi abaingi bakaba nibamanya bingi kunkira. Omwe aharibo niwe yaahaire orubazo rwangye obu naabatizibwa. Ow’eishe-emwe ondiijo, Theodore Jaracz, bwanyima akaza aha Akakiiko Akareeberezi. Kandi hakaba hariho ab’eishe-emwe baingi abaabaire bamazire obwire nibaheereza aha Beseeli ya Brooklyn. Abareeberezi ba saketi n’Ababeseeli bakampwera kwikaikana kandi ekyo kikaanshemeza  munonga. Nkeereebera butunu abareeberezi abaine rukundo, baabaire nibeesiga Ekigambo kya Ruhanga, kandi barikuhamira aha kushagika ekibiina kye. Obucureezi bwabo bukampwera omu kuheereza nk’omureeberezi wa disiturikiti.

Omuri 1974 Akakiiko Akareeberezi kakatoorana guruupu endiijo y’abareeberezi ba saketi kugaruka kuheereza nka abareeberezi ba disiturikiti, kandi nkagaruka naaheereza nk’omureeberezi wa saketi, omuri South Carolina. Ekirungi, omu bwire obwo ebibiina na saketi bakaba nibabaasa kubigaita, ekyo kikashemeza ab’eishe-emwe.

Omwaka 1976, gurikuza kuhendera, nkooherezibwa omu saketi ya Georgia eyaabaire eri aha gati ya Atlanta na Columbus. Ninyijuka gye ndikuha orubazo rw’okuziika abaana bataano abairaguju abu enju yaabo yaateirwe bomu. Nyinabo akatwarwa omu irwariro ahabw’okuhutaara. Abajurizi ba Yehova abairaguju n’abarikwera bakaguma nibaza omu irwariro kuhuumuriza abazaire b’abaana abo. Rukundo y’ab’eishe-emwe abo ekaba eri ey’omutaano. Rukundo nk’egyo neehwera abaheereza ba Ruhanga kwemera embeera zigumire munonga.

Omuri 1977, nyowe na Ruby tukashabwa kuza kuhwera aha Beseeli ya Brooklyn kumara ameezi makye. Ku twabaire turi hakye kurugayo, ab’eishe-emwe babiri ab’aha Kakiiko Akareeberezi bakambuuza yaaba twabaire tweteekateekire kugumira kimwe aha Beseeli. Tukaikiriza.

Nkakora aha by’Obuheereza kumara emyaka 24, ab’eishe-emwe abarikukora omu ofiisi egi nibakira kugarukamu ebibuuzo bigumire. Akakiiko Akareeberezi katwire nikatuha obuhabuzi oburikuhikaana n’emisingye ya Baibuli. Obuhabuzi obu nibuhwera omu kugarukamu ebibuuzo, okutendeka abareeberezi ba saketi, abareeberezi, na baapayoniya. Eki kihweraire bingi kutunguuka omu by’omwoyo. Kandi kibaasiise ekibiina kya Yehova kwongyera kuhama.

Kuruga 1995 kuhika 2018, mbaasize kutaayaayira ofiisi z’amataagi nyingi nk’omujwekyerwa wa ofiisi enkuru. Nkaba niingumya abari aha Bukiiko bw’Amataagi, Ababeseeli, abamiisani, kandi mbahwera omu birikubeerarikiriza. Kandi nyowe na Ruby butoosha tutwire nitugumibwa ebi ab’eishe-emwe barikurabamu. Nk’eky’okureeberaho, tukataayaaya omuri Rwanda omu 2000. Ku twahuriire ebi ab’eishe-mwe n’Ababeseeli baarabiremu omu kiita bantu ekyabaireho omuri 1994 bikatukwataho munonga. Baingi aharibo bakafeerwa abakundwa baabo. N’obu baahikirweho ebyo byona, ab’eishe-emwe abo bakaguma baine okwikiriza, amatsiko n’okushemererwa.

Hati turi omu myaka ya 80. Mmazire emyaka 20, nimpeereza aha Kakiiko k’Eitaagi rya United States. Tindagiire aha yunivasite, kwonka mbaasize kutunga obwegyese oburikukirayo kuruga ahari Yehova n’ekibiina kye. Ekyo kimbaasiise kwegyesa abandi amazima ga Baibuli agarikubaasa kubagasira ebiro byona. (2 Kor. 3:5; 2 Tim. 2:2) Ndeebire oku obutumwa bwa Baibuli burikuhwera abantu kuhindura omu mitwarize yaabo kubaasa kugira omukago murungi n’Omuhangi waabo. (Yak. 4:8) Nyowe na Ruby nitugumizamu kuhiga abandi kusiima omugisha gw’okwega ahari Yehova n’okwegyesa abandi amazima ga Baibuli, ogu nigwo mugisha ogu omuheereza wa Yehova arikubaasa kugira!