EKICWEKA EKY’OKWEGA 40
‘Okureetera Baingi Kuba Abahikiriire’”
‘Abarikureetera baingi [kuba abahikiriire nibaija kwaka] nk’enyonyoozi okuhitsya ryari na ryari.’—DAN. 12:3.
EKYESHONGORO 151 Naija Kweta
EBIRAAGAMBWEHO *
1. Ni mbeera ki ezirikushemeza eziraabeho omu Butegyeki bw’Emyaka Rukumi?
NIBWIJA kuba obwire burungi okuzooka kukuratandikye kubaho omu nsi omu Butegyeki bwa Kristo obw’Emyaka Rukumi. Boona abafeereirwe abakundwa baabo baine ekihika ky’okugaruka kubareeba. Kandi na Yehova nikwo arikwehurira atyo. (Yob. 14:15) Teekateeka aha kushemererwa okuraabeho omu nsi yoona abantu ku baraagarukye kuba n’abakundwa baabo abaafiire. Nk’oku twegire omu kicweka eky’enyima, ‘abahikiriire’ abu amaziina gaabo gari omu kitabo ky’amagara nibaija ‘kuzookyera amagara.’ (Byak. 24:15; Yoh. 5:29) Obundi baingi aha bakundwa baitu nibaija kuba bari omuri abo abaraabanze kuzoorwa kugaruka kutuura omu nsi. * Kandi, ‘abatahikiriire,’ abarikutwariramu abataratungire omugisha gurikumara kwega ebirikukwata ahari Yehova nari kumuheereza omu bwesigwa batakafiire, nibaija ‘kuzookyera okucwerwa orubanja.’
2-3. (a) Nk’oku kirikworekwa omuri Isaaya 11:9, 10, ni murimo ki mukuru munonga oguraije kukorwa? (b) Nituza kushwijuma ki omu kicweka eki?
2 Abo boona abaraazoorwe nibaija kuba baine kwegyesibwa. (Isa. 26:9; 61:11) N’ahabw’ekyo omurimo gw’okwegyesa ogurikukirayo omu byafaayo by’abantu nigwija kuba gwine kukorwa. (Shoma Isaaya 11:9, 10.) Ahabw’enki? Ahabw’okugira ngu abatahikiriire abaraazoorwe nibaija kuba baine kwega ebirikukwata ahari Yesu Kristo, entebeekanisa y’Obukama, ekitambo, okumanya obukuru bw’eiziina rya Yehova, n’ahabw’enki ahikire kutegyeka byona. Nangwa n’abahikiriire nibaija kuba baine kwega ebintu bisya ebirikukwata aha kigyendererwa eki Yehova ainiire ensi eki atwire naashuuruurira abantu be. Abamwe aha beesigwa abo bakafa kare, Ekigambo kya Yehova, Baibuli kitakahwaire kuhandiikwa. Abatahikiriire n’abahikiriire nibaija kuba baine bingi by’okwega.
3 Omu kicweka eki, nituza kugarukamu ebibuuzo ebi: Niki ekiraatwarirwe omu kukora omurimo mukuru ogw’okwegyesa? Niki ekiraahikye abantu abaraagyendere aha bi baraayegyesibwe kandi niki ekiraahikye ahari abo abaraayange kubigyenderaho? Ni kikuru ahariitwe kumanya eby’okugarukamu by’ebibuuzo ebyo hati. Nk’oku turikuza kureeba, obunabi oburi omu kitabo kya Danieli n’Okushuuruurwa nibuza kutuhwera kushoboorokyerwa ebiraabeho obu abafu baraazoorwe. Ka tubanze, tushwijume ebirikushemeza ebiri omu bunabi bwa Danieli 12:1, 2.
‘ABAGWEJEGYEREIRE OMU MUCUUCU NIBAIJA KUSISIIMUKA’
4-5. Danieli 12:1 neegamba ki aha biraabeho omu bwire bw’emperu?
4 Shoma Danieli 12:1. Ekitabo kya Danieli nikyoreka oku ebiraabeho biraakuratane omu bwire bw’emperu. Nk’eky’okureeberaho, Danieli 12:1 nihooreka ngu Mikaeli, niwe Yesu Kristo, ‘orikureeberera abantu [ba Ruhanga].’ Ekicweka ky’obunabi obu kikatandika kuhikiirira omuri 1914 obu Yesu yaatooranwa nk’Omugabe w’Obukama bwa Ruhanga oburikutegyekyera omu iguru.
5 Kwonka, Danieli akagambirwa ngu Yesu akaba naija ‘kwimuka’ omu ‘bunaku bw’obusaasi obutakabahoga, okwiha obu eihanga ryabaho okuhitsya obwo.’ “Obunaku bw’obusaasi” obu nikwo “okubonabona kwingi” okurikugambwaho omuri Matayo 24:21. Yesu naija kwimuka nari naija kugira eki yaakora kurinda abaheereza ba Ruhanga, aha muheru gw’obunaku bw’obusaasi, ahari Haramagedoni. Ekitabo ky’Okushuuruurwa nikigamba aha bantu nibo bamwe nk’omutwe muhango gw’abantu ‘abarugire omu kubonabona kwingi.’—Kush. 7:9, 14.
6. Niki ekiraabeho ab’omutwe muhango gw’abantu ku baraahonokeho bwanyima y’okubonabona kwingi? Shoboorora. (Reeba n’ekicweka “Ebibuuzo Kuruga omu Bashomi” kumanya ebirikukwata aha baraazookyere amagara omu nsi.)
6 Shoma Danieli 12:2. Niki ekiraabeho ab’omutwe muhango gw’abantu baaheza kuhonokaho omu bunaku bw’obusaasi? Obunabi obu tiburikugamba aha kuzooka kw’abarikuza omu iguru nari okugaruka kuba abahuriire omu by’omwoyo omu biro by’aha mperu nk’oku tutwire nitukyetegyereza. * Kureka, obunabi obu nibugamba aha kuzooka kw’abafu okuraabeho omu nsi ensya. Ahabw’enki nitubaasa kugira tutyo? Ekigambo ‘omucuucu’ ekirikukoresibwa omuri Yobu 17:16, nakyo nikimanyisa “ekituuro.” Obuhame obu nibworeka ngu Danieli 12:2 neegamba aha kuzooka okuraabeho bwanyima y’ebiro by’emperu na bwanyima y’orutaro rwa Haramagedoni.
7. (a) Abamwe nibaija kuzookyera bata “amagara agatahwaho”? (b) Ahabw’enki oku ‘n’okuzooka okurikukira oburungi’?
7 Danieli 12:2 nihamanyisa ki haagira ngu abamwe nibaija kuzookyera “amagara agatahwaho”? Ekirikumanyisa ngu abaraazoorwe bakamanya nari bakagumizamu kumanya, kandi bakoorobera Yehova na Yesu omu myaka 1,000, nibaija kutunga amagara agatahwaho. (Yoh. 17:3) Oku nikuza kuba “okuzooka okurikukira oburungi” waakugyeragyeranisa n’okuzooka kw’abantu aba ira. (Heb. 11:35) Ahabw’enki? Ahabw’okugira ngu abantu abo bakaba batahikiriire bakagaruka baafa.
8. Ni mu muringo ki ogu abamwe baraazookyere ‘okuhemuka n’okugaywa okutarikuhwaho’?
8 Kwonka ti boona abaraazoorwe ngu nibaija kwikiriza kwegyesibwa Yehova. Obunabi bwa Danieli nibugira ngu bamwe nibaija kuzookyera “okuhemuka n’okugaywa okutarihwaho.” Ahabw’okugira ngu nibaija kworeka omutima gw’obugomi, amaziina gaabo tigaraahandiikwe omu kitabo ky’amagara, kandi tibaraatungye amagara agatahwaho. Kureka nibaija kuhikwaho ‘okugaywa okutarikuhwaho,’ nari okucwekyerezibwa. N’ahabw’ekyo ebiri omuri Danieli 12:2 nibyoreka ebiraahikye ahari abo boona abaraazoorwe kurugiirira aha bi baraakore bwanyima y’okuzooka. * (Kush. 20:12) Abamwe nibaija kutunga amagara agatahwaho, kandi abandi tibarikwija kugatunga.
‘OKUREETERA BAINGI KUBA ABAHIKIRIIRE’
9-10. Niki ekindi ekiraabeho bwanyima y’okubonabona kwingi, kandi ni baahi ‘abaraije kwaka nk’omushana ogurikwakira omu mwanya’?
9 Shoma Danieli 12:3. Niki ekindi ekiraabeho bwanyima ‘y’obunaku bw’obusaasi’? Okwongyera ahari Danieli 12:2, omushororongo 3 nigworeka ekindi ekiraabeho bwanyima y’okubonabona kwingi.
10 Ni baahi ‘abaraije kwaka nk’omushana ogurikwakira omu mwanya’? Nitubaasa kubamanyira aha bigambo bya Yesu ebiri omu Matayo 13:43 aharikugira hati: ‘Obwo abahikiriire nibaija kwengyengyeta nk’eizooba omu Bukama bwa Ishebo.’ Ebigambo ebyetooroire ekyahandiikirwe eki nibyoreka ngu Yesu akaba naagamba aha “baana b’Obukama,” nibo beene-ishe abashukirweho omwoyo gurikwera abarikuza kutegyeka nawe omu Bukama bw’omu iguru. (Mat. 13:38) N’ahabw’ekyo Danieli 12:3 neegamba aha ntoore n’ebi baraakore omu Butegyeki bw’Emyaka Rukumi.
Abashukirweho omwoyo gurikwera 144,000 nibaza kukorera hamwe na Yesu kwebembera omurimo gw’okwegyesa oguraakorwe omu nsi omu myaka 1,000 (Reeba akacweka 11)
11-12. Omu myaka rukumi abashukirweho omwoyo gurikwera 144,000 nibaija kukora murimo ki?
11 Entoore nibaija ‘kureetera baingi kuba abahikiriire’ mu muringo ki? Entoore nibaza kukorera hamwe na Yesu kureeberera omurimo gw’okwegyesa oguraakorwe omu nsi omu myaka 1,000. Abashukirweho omwoyo gurikwera 144,000 nibaija kutegyeka nk’abagabe kandi baheereze nk’abanyamurwa. (Kush. 1:6; 5:10; 20:6) N’ahabw’ekyo nibaija ‘kutambira amahanga’, mporampora bahwere abantu kugaruka kuba abahikiriire. (Kush. 22:1, 2; Ezk. 47:12) Entoore ka nibaija kushemererwa!
12 Ni baahi abarikutwarirwa omuri “baingi” abaraahindurwe abahikiriire? Nihatwarirwamu abaraazoorwe, abaraahonokeho ahari Haramagedoni n’abaana abaraazaarwe omu nsi ensya. Emyaka 1,000 erikuza kuhendera, boona abaraabe nibatuura omu nsi nibaija kuba bahikiriire. Mbwenu shi ni ryari obu amaziina gaabo garaahandiikirwe kimwe na bwino omu kitabo ky’amagara beitu etari ekaraamu?
OKUGYEZIBWA OKW’AHA MUHERU
13-14. Abantu boona abahikiriire nibaija kukora ki kubaasa kutunga amagara agatahwaho?
13 Twine kwijuka ngu omuntu okuba ohikiriire tikirikumanyisa ngu naija kutunga amagara agatahwaho ataine eki akozire. Teekateeka ahari Adamu na Haawa. Bakaba bahikiriire, kwonka bakaba baine kworeka ngu niboorobera Yehova kubaasa kuguma baine amagara agatahwaho. Eky’obusaasi, bakaremwa kumworobera.—Rom. 5:12.
14 Abaraabe nibatuura omu nsi nibaija kuba bari mu mbeera ki aha muheru gw’emyaka 1,000? Boona nibaija kuba baahindukire abahikiriire. Mbwenu shi abantu boona abahikiriire nibaija kushagika obutegyeki bwa Yehova omu bwijwire ebiro byona? Nari bamwe nibaija kuba nk’Adamu na Haawa, abataragumire bari abeesigwa n’obu baabaire bahikiriire? Ebibuuzo ebi nibiija kugarukwamu bita?
15-16. (a) Ni ryari obu abantu boona baraatungye omugisha gw’okworeka ngu bahamiire ahari Yehova? (b) Niki ekiraabeho bwanyima y’okugyezibwa okw’aha muheru?
15 Sitaane naija kukomwa kumara emyaka 1,000. Omu bwire obwo, tihaine ou araabaase kuhabisa. Kwonka, aha muheru gw’emyaka 1,000 naija kurekurwa. Naija kuteeraho kuhabisa abantu abahikiriire. Omu kugyezibwa okwo, abantu boona abahikiriire abaraabe nibatuura omu nsi nibaija kutunga omugisha ogw’okworeka butunu, ngu nibaha eiziina rya Ruhanga ekitiinisa, kandi ngu niwe ahikire kutegyeka byona. (Kush. 20:7-10) Oku buri omwe araatwaze yaagyezibwa Sitaane nikwija kworeka yaaba eiziina rye rishemereire kuguma omu kitabo ky’amagara.
16 Omubaro gw’abantu ogutarikumanywa, nibaija kwanga obutegyeki bwa Yehova nk’Adamu na Haawa. Niki ekiraabahikyeho? Okushuuruurwa 20:15 nihagira hati: “Omuntu weena ou eiziina rye ryabaire ritahandiikirwe mu kitabo ky’amagara, yaanagwa omu nyanja y’omuriro.” Eego, abagomi boona nibaija kucwekyererezibwa kimwe. Kwonka abantu abahikiriire abarikukira obwingi nibaija kuraba omu kugyezibwa okwo. Amaziina gaabo nigaija kuguma gahandiikirwe omu kitabo ky’amagara.
OMU “BUNAKU BW’AHA MPERU”
17. Niki eki maraika yaagambiire Danieli ekyabaire nikiija kubaho omu bunaku bwaitu? (Danieli 12:4, 8-10)
17 Ka nikishemeza kuteekateeka aha bintu ebi ebiraabeho omu biro by’omumaisho! Kandi, Danieli akaheebwa obutumwa bukuru oburikukwata aha, ‘bunaku bw’emperu,’ obu turimu. (Shoma Danieli 12:4, 8-10; 2 Tim. 3:1-5) Maraika akagambira Danieli ngu, okumanya okuhikire kukaba nikwija kweyongyera. Eego, ebigambo by’obunabi ebiri omu kitabo kya Danieli, abaheereza ba Yehova bakaba nibaija kwongyera kubyetegyereza. Maraika akagaruka yaagira ngu omu bunaku obu ‘ababi nibaija kugumizamu nibakora ebibi, kandi tihariho n’omwe omuri abo ababi [oraije] kubyetegyereza.’
18. Niki ekiri haihi kuhika aha babi?
18 Omu bunaku obu nikibaasa kureebeka ngu ababi tibarikufubirwa ahabw’ebikorwa byabo bibi. (Mal. 3:14, 15) Kwonka Yesu ari haihi kucwera orubanja abari nk’embuzi kandi abashoroore aha bari nk’entaama. (Mat. 25:31-33) Ababi tibaraahonokeho aha kubonabona kwingi nari kuzoorwa kutuura omu nsi ensya. Amaziina gaabo tigaraahandiikwe omu ‘kitabo ekirimu ebirikwijutsya’ ekirikugambwaho omuri Malaki 3:16.
19. Twine kukora ki hati, kandi ahabw’enki? (Malaki 3:16-18)
19 Hati twine kworeka omu bikorwa ngu tituri omu babi abo. (Shoma Malaki 3:16-18.) Yehova ariyo naarundaana abu arikutwara ‘nk’eitungo rye,’ nari ab’omuhendo. Buzima nitwenda kuba omuri abo.
Ka nihaija kubaho okushemererwa kwingi kureeba Danieli, abakundwa baawe, n’abandi baingi barikugaruka ‘kwemerera’ kutunga omugabo gwabo omu nsi ensya!(Reeba akacweka 20)
20. Danieli akaraganisibwa ki aha muheru, kandi ahabw’enki oiniire ekihika okuhikiirira kw’ekiragaaniso ekyo?
20 Hatariho kubangaanisa, turi omu bwire obu obunabi buriyo nibuhikiirira. Kwonka hariho ebintu by’amaani ebiri haihi kubaho. Juba nituza kureeba ebintu bibi birikumarirwaho kimwe. Bwanyima y’ekyo, nituza kureeba okuhikiirira kw’ebi Yehova yaaragaaniise Danieli: “Oyemerere omu mwanya ogwakuteereirweho, aha muheru gw’ebyo biro.” (Dan. 12:13) Oiniire ekihika eizooba obu Danieli n’abakundwa baawe, baraagarukye ‘kwemerera’? Kyaba nikwo kiri, kora kyona eki orikubaasa hati kuguma ori omwesigwa, obwo noobaasa kuhamiza kimwe ngu eiziina ryawe niriza kuguma rihandiikirwe omu kitabo ky’amagara.
EKYESHONGORO 80 “Roza Oreebe Yehova ku Ari Murungi”
^ Ekicweka eki kirimu enyetegyereza ehindwirwemu aha bikwatiraine n’omurimo mukuru munonga ogw’okwegyesa ogurikugambwaho omuri Danieli 12:2, 3. Nituza kureeba obu omurimo ogu guraakorwe n’abaraagukore. Kandi nituza n’okureeba oku omurimo ogu guraatebeekanise abaraabe nibatuura omu nsi, kworekyera okugyezibwa okw’aha muheru okuraabeho aha kuhendera kw’Obutegyeki bwa Kristo obw’Emyaka Rukumi.
^ Okuzooka nikubaasa kutandika n’abaafiire bari abeesigwa omu biro by’emperu, hakurateho abaababandiize kufa, reero bagume nibazooka obusingye burikukuratana n’obundi. Eki ku kiraabe nikwo kiri, buri busingye nibwija kutunga omugisha gw’okutangirira abu baabaire nibamanya gye. Kyona ekiraabeho, Ebyahandiikirwe nibyoreka ngu abaraazoorwe kuza kutuura omu iguru buri omwe naija kuzoorwa omu “rubu rwe,” n’ahabw’ekyo nitubaasa kugira ngu n’okuzooka kw’abaraatuure omu nsi nikwija kubaho omu muringo gutebeekanisiibwe.—1 Kor. 14:33; 15:23.
^ Egi n’enyetegyereza nsya y’ebiri omu kitabo Pay Attention to Daniel’s Prophecy! eshuura 17, na Watchtower eya Gyuraayi 1, 1987, rup. 21-25.
^ Okutashushana n’ebigambo ebiri omuri Danieli 12:2, ebigambo ‘abahikiriire n’abatahikiriire’ ebiri omu Ebyakozirwe 24:15 n’ebigambo “abo abaakozire gye” n’abo “abaakozire kubi” ebiri omuri Yohaana 5:29, nibimanyisa ebi abaraazoorwe baakozire batakafiire.
