1. Noobaasa kumanya ota omuntu orikwesigwa?

 OMUNTU orikwesigwa naateeraho kuhikiiriza ebi arikuraganisa kandi naagamba amazima. (Zab. 15:4) Abandi nibaba nibamanya ngu nibabaasa kumwesiga. Nikwo turikwenda ngu ab’eishe-emwe na banyaanyazi-itwe kutureeba. Nitubaasa kukora ki kureetera abandi kutwesiga?

2. Nitubaasa kworeka tuta ngu nitwesigwa?

² Titurikubaasa kugyema abandi kutwesiga. Twine kugira eki twakora abandi kubaasa kutwesiga. Nitubaasa kugyeragyeranisa obwesigwa n’esente. Kigumire kuzikora kwonka kyorobi kuzifeerwa. Hatariho kubangaanisa, Yehova ayorekire ngu n’omwesigwa. Butoosha nitubaasa kumwesiga ahakuba ‘emirimo ye yoona naagikora n’obwesigwa.’ (Zab. 33:4) Kandi naayenda ngu tumutooreze. (Efe. 5:1) Ka twetegyereze bamwe aha baheereza ba Yehova abaatooreize Ishebo ow’omu iguru kandi bakooreka ngu nibeesigwa. Kandi nituza n’okugamba aha mitwarize etaano eraatuhwere kuba abarikwesigwa.

3-4. Nabi Danieli akooreka ata ngu n’omwesigwa, kandi ekyo kishemereire kutuhiga kwebuuza bibuuzo ki?

³ Nabi Danieli akataho eky’okureeberaho kirungi omu kuba orikwesigwa. N’obu araabe yaatwirwe Babulooni nk’enkwatwa, omu bwire bukye akamanywa nk’omuntu orikwesigwa. Baingi bakoongyera kumwesiga bwanyima ya Yehova kumuhwera  kushoboororera Omugabe Nebukadeneeza amakuru g’ebirooto bye. Rimwe, Danieli akagambira Omugabe ngu agwisize kubi Yehova, obutumwa obu omugabe yaabaire atarikukunda kuhurira. Akaba aine kugira obumanzi kumugambira ahakuba Nebukadeneeza akaba naarahuka kugira ekiniga! (Dan. 2:12; 4:20-22, 25) Bwanyima y’emyaka mingi, Danieli akagaruka yaayoreka ngu n’omwesigwa arikushoboorora amakuru g’obutumwa obwabaire butarikwetegyerezibwa gye obwahandiikirwe aha kisiika omuri Babulooni. (Dan. 5:5, 25-29) Kwonka nabwo, Dario Omumeedi n’abakuru abandi bakeetegyereza ngu Danieli akaba ariho “omwoyo murungi.” Bakareeba ngu Danieli “akaba ari omwesigwa, atarikureebwamu kishobyo n’obu kyakuba ekicumuro.” (Dan. 6:3, 4) Eego, abategyeki abakaafiire nabo bakareeba ngu omuheereza wa Yehova ogu naayesigwa!

⁴ Turikuteekateeka aha ky’okureeberaho kya Danieli nitubaasa kwebuuza tuti: ‘Abantu abatari baheereza ba Yehova nibamanya nka muntu wa muringo ki? Niimanywa nk’omuntu omwesigwa orikuhikiiriza gye obujunaanizibwa bwangye?’ Ahabw’enki ni kikuru kwebuuza ebibuuzo ebyo? N’ahabw’okugira ngu nituhimbisisa Yehova twaba nitwesigwa.

5. Niki ekyareeteire Hanania kumanywa nk’omuntu orikwesigwa?

⁵ Omu mwaka gwa 455 Y.A., bwanyima y’Omukungu Nehemia kwombeka ebisiika bya Yerusaalemu, akatoorana abashaija abarikwesigwa abarikubaasa kureeberera orurembo. Omwe ahari abo akaba ari, Hanania  omukuru w’ekigo. Baibuli neegamba ahari Hanania ‘nk’omuntu orikwesigwa kandi orikutiina Ruhanga okukira abandi baingi.’ (Neh. 7:2) Ahabw’okugira ngu Hanania akaba naakunda Yehova kandi atarikwenda kumugwisa kubi, eki kikamuhiga kutwara obujunaanizibwa bwona obu yaahairwe nka bukuru. Emitwarize nk’egyo naitwe neija kutuhwera kuba abeesigwa omu buheereza bwaitu.

6. Tukiko akooreka ata entumwa Paulo ngu n’omunywani orikwesigwa?

⁶ Ka twegyere ahari Tukiko ou entumwa Paulo yaabaire naayesiga. Obu Paulo yaabaire akomiirwe omu nju Tukiko akamuhwera munonga, kandi akamugambaho ‘nk’omuheereza omwesigwa.’ (Efe. 6:21, 22) Paulo akamutuma kutwarira ab’eishe-emwe ba Efeso na Kolosai amabaruha, reero akabagumya kandi akabahuumuriza. Tukiko naatwijutsya abashaija abeesigwa ab’omu bunaku obu abarikutureeberera omu by’omwoyo.​—Kol. 4:7-9.

7. Abareeberezi n’abaheereza omu kibiina kyawe noobaasa kubeegyeraho ki aha bikwatiraine n’okuba abarikwesigwa?

⁷ Obunaku obu nitusiima munonga abareeberezi n’abaheereza abarikwesigwa. Nka Danieli, Hanania na Tukiko, obujunaanizibwa bwabo nibabutwara nka bukuru. Nk’eky’okureeberaho ku turikuza omu ruteerane rw’aha gati ya saabiiti nituba nitumanya ngu ebicweka byona hariho abarikuza kubiha. Abareeberezi nikibashemeza munonga abahairwe ebicweka ebyo baabitebeekanisa gye, kandi bakabaho omu ruteerane kubiha! Nk’eky’okureeberaho, titurikweziringa kweta abu turikwegyesa Baibuli kwija omu nteerane z’aha wiikenda, titurikutiina ngu orikuza kuha orubazo naabaasa kwebwa kurutebeekanisa. Kandi nituba twine obwesigye ngu ebitabo ebi turikukoresa omu kubuurira nibiza kuba biriho. Nitusiima Yehova ahabw’okutuha ab’eishe-emwe aba abarikwesigwa kandi abarikutureeberera gye. Nitubaasa kworeka mu miringo ki ngu turi abeesigwa?

8. Ahabw’enki twine kukoresa okwetegyereza twaba nituteeraho kumanya ebirikukwata aha bandi? (Enfumu 11:13)

⁸ Nitukunda ab’eishe-emwe na banyaanyazi-itwe kandi nitufayo kumanya oku bari. Kwonka, titwine kurengyesereza turikwetaatsya omu nshonga zaabo ez’omubonano. Bamwe omu kibiina Ekikristaayo omu kyasha ky’okubanza bakaba ‘nibabuzya [orugambo], nibeetaasya omu bitari byabo, nibagamba ebitabashemereire.’ (1 Tim. 5:13) Buzima titurikwenda kutwaza nkabo. Kwonka omuntu naabaasa kutugambira ebirikumukwataho aine obwesigye ngu tituraabigambire abandi. Nk’eky’okureeberaho, munyaanyazi-itwe naabaasa kutugambira ngu naateganisibwa amagara mabi nari oburemeezi obundi, kandi atushabe kutagira ou twagambira. Nituba twine kukora eki yaatushaba. * (Shoma Enfumu 11:13.) Ka tureebe embeera ezindi ezirikworeka obu twine kubiika ekihama.

9. Ab’eka nibabaasa kworeka bata ngu nibeesigwa?

⁹ Omu ka. Buri omwe omu ka aine obujunaanizibwa bw’okubiika ebihama by’eka. Nk’eky’okureeberaho, omukazi Omukristaayo naabaasa kuba aine omuze ogu iba atarikukunda. Mbwenu shi aine kugamba aha muze ogwo nari kugugambira abandi, kandi kireetere omukazi we kushwara? Ngaaha buzima! Ahabw’okugira ngu naakunda omukazi  we, naaba atarikwenda kukora ekintu kyona ekirikumureetera kwehurira kubi. (Efe. 5:33) Eminyeeto nibaba nibenda kutwarizibwa omu muringo gw’ekitiinisa. Ni kikuru abazaire ekyo kukimanya. N’ahabw’ekyo tibashemereire kushwaza abaana baabo barikugambira abandi enshobe zaabo. (Kol. 3:21) Abaana baine kuba abanyabwengye, barikwetantara kugambira abandi ebirikubaasa kuhemura ab’eka yaabo. (Bir. 5:16) Buri omwe omu ka yaateeraho okutagamba enshonga ezirikukwata aha ka yaabo, nikihamya enkoragana yaabo.

10. Okuba omunywani owaabuzima nikitwariramu ki? (Enfumu 17:17)

¹⁰ Omu mikago yaitu. Obumwe n’obumwe, baingi ahariitwe nituba nitwenda kugambira munywani waitu ow’aha mara oku turikwehurira. Ekyo nikibaasa kutooroba. Nitubaasa kuba tutamanyiriire kugambira abandi oku turikwehurira, kandi nitwehurira kubi twamanya ngu munywani waitu agambiire abandi ebi tumugambiire. Kwonka, ka nikitushemeza munywani waitu yaabiika ekihama! Ogwo niwe ‘munywani owaabuzima.’​—Shoma Enfumu 17:17.

11. (a) Abareeberezi n’abakazi baabo nibooreka bata ngu nibeesigwa? (b) Nitubaasa kwegyera ki aha ku omureeberezi owaaruga kukora aha nshonga y’omubonano reero bwanyima akaba n’ab’eka ye? (Reeba ekishushani.)

¹¹ Omu kibiina. Abareeberezi abarikubiika ebihama bari “nk’omwanya ogw’okwekingaho omuyaga, n’obwegamo bw’eihunga” bw’ab’eishe-emwe bagyenzi baabo. (Isa. 32:2) Nitumanya ngu nitubaasa kugamba n’abashaija aba tutatiinire, twine obwesigye ngu tihaine ou baraagambire ebihama byaitu. Titurikubagyemesereza kutugambira enshonga ezi baine kwesigariza. Kandi, twine kuha ekitiinisa abakazi b’abareeberezi ahakuba tibarikuteeraho kugyemereseza baibabo kubagambira ebirikukwata aha bandi. Buzima, ni kirungi omureeberezi kutagambira omukazi we ebirikukwata aha b’eishe-emwe na banyaanyabo. Muka omureeberezi omwe akagira ati: “Nikinshemeza kureeba ngu ibanyi tarikungambira ebirikukwata aha bu arikuba agaaniire nabo kubagumya nari abaine kuhwerwa omu  by’omwoyo, n’obu kwakuba okungambira amaziina gaabo. Eki ni kirungi ahakuba tindikwerarikira aha nshonga ezitarikunkwataho nari ezi ntarikubaasa kushoboorora. Nimbaasa kugaaniira na buri omwe omu kibiina nyikaikaine. Kandi nimbaasa kwesiga ibanyi ngu naamugambira oku ndikwehurira nari oburemeezi bwangye, taraabugambire abandi.” Buzima, twena nitwenda kumanywa nk’abantu abarikwesigwa. Ni mitwarize ki eraatuhwere kuhika aha kigyendererwa ekyo? Ka tureebe etaano ahariyo.

12. Ahabw’enki rukundo nigwo musingi gw’obwesigwa? Ha eky’okureeberaho.

¹² Rukundo nigwo musingi gw’obwesigwa. Yesu akagira ngu ebiragiro bibiri ebikuru n’okukunda Yehova na mutaahi waawe. (Mat. 22:37-39) Rukundo ei twiniire Yehova neetuhiga kutooreza eky’okureeberaho kye ekihikiriire eky’okuba orikwesigwa. Nk’eky’okureeberaho, rukundo ei twiniire ab’eishe-emwe na banyaanyazi-itwe neetuhiga kutagamba enshonga zaabo ez’omubonano. Titwine kugamba ekintu kyona ekirikubaasa kubakora kubi, kubahemura, nari kubasaasa.​—Yoh. 15:12.

13. Obucureezi nibutuhwera buta kuba abarikwesigwa?

¹³ Obucureezi nibutuhwera kuba abarikwesigwa. Omukristaayo omucureezi tarikuteeraho kushemeza abandi arikuba niwe yaabanza kusheeshuura ebihama by’abandi. (Fil. 2:3) Tarikuteeraho kureetera abandi kuteekateeka ngu naamanya bingi obundi n’ebi atashemereire kugamba. Kandi obucureezi nibutuhwera kwetantara kujanjaaza enshonga ezi tutarikumanya gye ezitarikugambwaho omu Baibuli nari omu bitabo by’ekibiina.

14. Okwetegyereza nikutuhwera kuta kuba abarikwesigwa?

¹⁴ Okwetegyereza nikuhwera Omukristaayo kutaanisa “obunaku bw’okuhunama n’obunaku bw’okugamba.” (Mub. 3:7) “Okugamba kuri nk’efeeza, kwonka okuhunama kuri nk’ezaabu” ebi n’ebigambo ebirikukira kukoresibwa omu myanya emwe. Eki nikimanyisa ngu, obumwe nikiba kiri kirungi kuguma ohunami omwanya gw’okugamba. Eki nikihikaana n’obuhabuzi oburi omu, Enfumu 11:12 oburikugira ngu, “omuntu orikwetegyereza aguma ayehunamiire.” Teekateeka aha ky’okureeberaho eki. Ow’eishe-emwe omazire obwire ari omureeberezi naakira kuza kuhwera ebibiina ebiine oburemeezi. Omureeberezi mugyenzi we akamugambaho ati: “Butoosha naayegyendesereza kutagamba aha nshonga z’omubonano ez’ebibiina ebindi.” Okwetegyereza kw’omureeberezi ogwo kureetaire abandi abu arikuheereza nabo aha kakiiko k’abareeberezi kumuha ekitiinisa. Baine obwesigye ngu tarikwija kugambira abandi enshonga z’omubonano.

15. Ha eky’okureeberaho kworeka ahabw’enki okuba ow’amazima kirikubaasa kureetera abandi kukwesiga.

¹⁵ Okuba ow’amazima ni kimwe aha birikwetengyesa kuba orikwesigwa. Nitwesiga omuntu ow’amazima ahakuba nitumanya ngu butoosha naagamba amazima. (Efe. 4:25; Heb. 13:18) Nk’eky’okureeberaho, ka tugire ngu nooyenda kuboneza omu myegyeseze yaawe. Noobaasa kushaba omuntu kuhurikiza orubazo rwawe, kandi akuhe obuhabuzi aha ku orikubaasa kubonezamu. N’oha ou orikwesiga kukuha obuhabuzi obuhikire? Okaayenzire kubuheebwa omuntu orikukugambira eki orikwenda kuhurira, nari orikukugambira amazima omu muringo gw’embabazi? Eky’okugarukamu kyorobi. Baibuli  neegira eti: “Okuhana butunu nikukira okukunda kusherekirwe. Obuhuta obu ohutaazibwa omunyamukago n’obuhikire.” (Enf. 27:5, 6) N’obu obuhabuzi obwo omu kubanza burikuguma kugyenderwaho, kwonka nibubaasa kukuhwera bwanyima y’obwire.

16. Enfumu 10:19 nihooreka hata obukuru bw’okugira omutwarize gw’okwezibira?

¹⁶ Okwezibira n’omutwarize mukuru munonga ogu twine kugira kubaasa kwesigwa abandi. Omutwarize ogu nigutuhwera kutagamba ebihama ebi abandi batugambiire. (Shoma Enfumu 10:19.) Okwezibira kwaitu nikubaasa kugyezibwa twaba nitukoresa emikura y’empurizana. Twaba tutegyendesereize, nitubaasa kugamba ebihama tutakigyendereire. Kandi twaheza kujanjaaza amakuru ago aha mikura y’empurizana, nituba tutaine bushoboorozi aha ku obutumwa obwo buraakoresibwe nari akabi akarikubaasa kubaho. Okwezibira nikutuhwera kuguma tuhunami abarikutuhakanisa baateeraho kutubeihabeiha kugamba ebirikubaasa kuta amagara g’ab’eishe-emwe na banyaanyazi-itwe omu kabi. Ekyo nikibaasa kubaho abaporiisi baaba baine ebi barikutubuuza omu ihanga ahu omurimo gwaitu gwemereziibwe nari guzibiirwe. Omu mbeera ezi n’ezindi nitubaasa kugyendera aha musingye ogurikugira ngu twine ‘kubumba akanwa [kaitu].’ (Zab. 39:1) Yaaba nitukoragana n’ab’eka yaitu, abanywani, ab’eishe-emwe, nari n’omuntu ondiijo weena twine kuba abarikwesigwa. Kandi kubaasa kuba abarikwesigwa, twine kugira omutwarize gw’okwezibira.

17. Nitubaasa kureetera tuta buri omwe omu kibiina kuba orikwesigwa?

¹⁷ Ka nikitushemeza kureeba ngu Yehova atwiriize haihi n’oruganda rw’ab’eishe-emwe orurimu abantu abaine rukundo kandi abarikwesigwa! Twena twine kureetera ab’eishe-emwe na banyaanyazi-itwe kutwesiga. Buri omwe ahariitwe yaateeraho kugira omutwarize gwa rukundo, ogw’obucureezi, ogw’okwetegyereza, ogw’okwezibira, kandi tukaba ab’amazima, obwesigwa nibweyongyera omu kibiina. Twine kugumizamu nituteeraho kuba abarikwesigwa. Ka tumariirire kutooreza Ruhanga waitu, Yehova kandi tworekye ngu nitwesigwa.