Kurugiirira aha biri omu 1 Abakorinso 15:8, Paulo akagira ati: “Aha muheru gwa boona naanye yaanyeyoreka ndi nk’omwana” ozairwe atahikire. Tukaba twashobooroire ngu Paulo akaba naagamba aha kyamuhikireho obu Yesu yaamweyoreka ari omu kitiinisa kye omu iguru. Okaba nooshusha ngu akatunga omugisha gw’okuzaarwa nari kuzooka omu mwoyo obwire butakahikire, harikuburayo ebyasha bingi okuzooka okwo kukabaho. Kwonka, okwongyera kucondooza aha kyahandiikirwe eki kituhweraire kureeba ngu twine kuhindura omu nshoboorora yaitu.

N’amazima Paulo akaba naagamba ebyamuhikireho obu yaahinduka Omukristaayo. Kwonka shi akaba naamanyisa ki obu yaagira ngu akazaarwa atahikire? Hariho enshoboorora zitarikushushana.

Okuhinduka kwe kukabaho kitaraariire kandi akatunga ekyekaango ky’amaani. Okuzaara omwana atahikire butoosha nikibaho kitaraariire. Obu Saulo (owaizire kumanywa nka Paulo) yaabaire naaza Damasiko kuhiiganisa Abakristaayo, akaba atarikuteekateeka ngu Yesu owaabaire azookire naija kumweyoreka. Okuhinduka oku tikuratangaarize Paulo wenka, kureka n’Abakristaayo abu yaabaire naaza kuhiiganisa omu rurembo orwo. Kandi, akatunga ekyekaango ky’amaani yaahuma amaisho kumara obwire bukye.—Byak. 9:1-9, 17-19.

Akahinduka omu “bwire butahikire.” Ekigambo ky’Orugriika ekirikuvunuurwa nk’ozairwe atahikire nibibaasa n’okumanyisa ozairwe omu bwire butahikire. Jerusalem Bible neegira eti: “Nkaba ndi nk’ozairwe omu bwire butahikire.” Obu Paulo yaahinduka Omukristaayo, Yesu akaba yaagarukire omu iguru. Paulo okutashushana n’abu yaabaire naagambaho omu mishororongo ey’enyima, tarareebireho Yesu obu yaabaire atakagiire omu iguru. (1 Kor. 15:4-8) Yesu okweyoreka Paulo kitaraariire kikamubaasisa kumureeba, n’obu eki kyabaireho omu bwire oburikureebeka nk’obutahikire.

Akaba naayegambaho omu muringo gw’obucureezi. Kurugiirira aha bacondooza abamwe, ebigambo ebi Paulo yaakoreise biine amakuru g’okwegarura ahansi. Kyaba nikwo kiri, Paulo akaba naayoreka ngu akaba atashemereire omugisha ogu yaahairwe. Kandi akoongyeraho ati: “Ahakuba ndi muto aha ntumwa ezindi, otashemereire kwetwa ntumwa, ahabw’okuba nkahiiga [ekibiina kya] Ruhanga. Kwonka ahabw’embabazi za Ruhanga ndi nk’oku ndi.”—1 Kor. 15:9, 10.

N’ahabw’ekyo, nikireebeka ngu Paulo akaba naagamba aha ku Yesu yaamweyorekire kitaraariire, kandi omu muringo gw’eky’okutangaaza atakahindukire Omukristaayo, nari nk’owaabaire atashemeire omu by’omwoyo kutunga okworekwa kw’omuhendo okwo. Byona ebyabaireho, Paulo akabitwara nk’eby’omuhendo. Bikamuhamiza ngu buzima Yesu akaba azookire omu bafu. Tikirikutangaaza kureeba ngu akaba naakira kugamba aha byamubaireho kitaraariire arikubuurira abandi ebirikukwata aha kuzooka kwa Yesu.—Byak. 22:6-11; 26:13-18.