1. Ni mbeera ki egumire eyaahikire ahari Yoasi, Uziya, Yosia?

 TEERA akashushani ori omugabe w’abantu ba Ruhanga okiri muto nari ori omunyeeto! Okaakoreise ota obushoboorozi bwawe? Baibuli neegamba aha bato batari bamwe abaahindukire abagabe ba Yuda. Nk’eky’okureeberaho, Yoasi akaba omugabe aine emyaka 7, Uziya akaba aine emyaka 16, kandi Yosia akaba aine emyaka 8. Teekateeka aha kugyemeserezibwa oku baabaire baine! N’obu boona baabaire baine oburemeezi bakaba baine obuhwezi oburikwetengyesa kubusingura n’okukora ebihikire bingi.

2. Ahabw’enki twine kwega ebirikukwata ahari Yoasi, Uziya, na Yosia?

² Tituri bagabe nari abagabekazi, kwonka hariho ebi turikubaasa kwegyera aha bagabe bashatu aba. N’obu baraabe baabaire nibacwamu gye, haine obu baacwamu kubi. Twaba nitushwijuma ebirikubakwataho, nituza kureeba ahabw’enki twine kusherura abanywani barungi, kuba abacureezi n’okugumizamu nitusherura Yehova.

3. Omunyamurwa Omukuru Yehoyaada ku yaahaire Yoasi obuhabuzi akatwaza ata?

³ Cwamu gye nka Yoasi. Obu omugabe Yoasi yaabaire ari muto akacwamu gye. Ahabw’okugira ngu akaba ataine ishe, akakuratira obuhabuzi bw’omunyamurwa omukuru omwesigwa Yehoyaada. Omunyamurwa ogwo akeegyesa Yoasi nk’omwana we. N’ekyarugiremu, Yoasi akacwamu omu muringo  gw’obwengye kwebembera okuramya okw’amazima n’okuheereza Yehova. Kandi akataho entebeekanisa y’okuhunduuza hekalu ya Yehova.—2 Bus. 24:​1, 2, 4, 13, 14.

4. Nitugasirwa tuta twayorobera ebiragiro bya Yehova? (Enfumu 2:​1, 10-12)

⁴ Ku oraabe nooyegyesibwa kukunda Yehova n’okugyendera aha mitindo ye, oriyo nooheebwa ekiconco ky’omuhendo. (Shoma Enfumu 2:​1, 10-12.) Abazaire nibabaasa kutendeka abaana baabo omu miringo mingi. Yetegyereze oku ishe wa munyaanyazi-itwe Katya yaamuhweraire kuguma naacwamu gye. Buri izooba ku yaabaire aba naamutwara aha ishomero akaba agaaniira nawe aha kyahandiikirwe ky’eizooba. Katya naagira ati: “Ebi twabaire tugaaniira bikaba bimpwera kuraba omu mbeera zigumire eizooba eryo.” Kwonka shi obuhabuzi bwa Baibuli obu abazaire baawe barikukuha ku bwakuba nibureebeka nk’amaremesa? Niki ekirikubaasa kukuhwera kubwikiriza? Munyaanyazi-itwe Anastasia naijuka ngu abazaire be bakaba bafayo kumushoboororera ahabw’enki baabaire bataho ebiragiro ebimwe. Naagira ati: “Ekyo kikampwera kutareeba ebiragiro ebyo nk’amaremesa, kureka nk’eky’oburinzi.”

5. Ebi orikucwamu nibikwata bita aha bazaire baawe na Yehova? (Enfumu 22:6; 23:​15, 24, 25)

⁵ Waagyendera aha buhabuzi bw’Ebyahandiikirwe obu orikuheebwa, abazaire baawe nibashemererwa. Ekikuru munonga, nooza kushemeza Ruhanga, kandi ogire omukago guhami nawe. (Shoma Enfumu 22:6; 23:​15, 24, 25.) Ekyo tikirikukureetera kugira enshonga nungi y’okutooreza Yoasi obu yaabaire ari muto?

6. Yoasi akatandika kuhurikiza obuhabuzi bwa baahi, kandi hakarugamu ki? (2 Obusingye 24:​17, 18)

⁶ Yegyera aha kucwamu kubi kwa Yoasi. Yehoyaada ku yaafiire, Yoasi akagira abanywani babi. (Shoma 2 Obusingye 24:​17, 18.) Akacwamu kuhurikiriza abanyiginya ba Yuda abaabaire batarikukunda Yehova. Noobaasa kuba noikiriza ngu Yoasi akaba naabaasa kwetantara abanyiginya babi abo. (Enf. 1:10) Kwonka, akahurikiza abaabaire nibeetwara nka banywani be. Kandi Zekaria omunyabuzaare wa Yoasi, ku yaataireho kumuhabura, Yoasi akamwita. (2 Bus. 24:​20, 21; Mat. 23:35) Ekyo ka kyabaire kibi kandi eky’obushema! Yoasi akatandika gye, kwonka eky’obusaasi akahinduka omwitsi kandi yaayehagura aha mazima. Empereruka, abaheereza be bakamwita. (2 Bus. 24:​22-25) Ka yaabaire  naija kuhendera gye, ku ogire ngu akagumizamu naahurikiza Yehova n’abarikukunda Yehova! Waayegyera ki ahari Yoasi?

7. Ni baahi abu oine kuhindura banywani baawe? (Reeba n’ekishushani.)

⁷ Eishomo rimwe eriturikwegyera aha kucwamu kubi kwa Yoasi n’okugira ngu twine kugira abanywani abarikutuhwera kutwaza gye, abarikukunda Yehova, kandi abarikwenda kumushemeza. Titwine kunywana ab’orwingano rwaitu bonka. Ijuka ngu Yehoyaada akaba naakira Yoasi. Aha bikwatiraine n’abanywani abu orikutoorana, yebuuze oti: ‘Nibampwera kwongyera kwikiririza omuri Yehova? Nibampiga kugyendera aha mitindo ya Ruhanga? Nibagamba ebirikukwata ahari Yehova n’amazima ge ag’omuhendo? Nibaha emitindo ya Ruhanga ekitiinisa? Nibangambira ebi ndikwenda kuhurira, nari nibampabura kyaba nikyetengyesa?’ (Enf. 27:​5, 6, 17) Amazima gari ngu, banywani baawe baaba batarikukunda Yehova, toine kuguma nabo. Kwonka waaba oine abanywani abarikukunda Yehova, nibaija kukuhwera.—Enf. 13:20.

8. Twine kuteekateeka ahari ki twaba nitukoresa emikura y’empurizana?

⁸ Emikura y’empurizana neebaasa kutuhwera kuguma nituhurizana n’ab’eka yaitu n’abanywani. Kwonka, abantu baingi nibagikoresa kushemeza abandi, kutaho ebishushani na vidiyo kworeka ebi baguzire nari ebi bakozire. Waaba nookoresa omukura gw’empurizana, yebuuze oti: ‘Ekigyendererwa kyangye n’okushemeza abandi? Nimba ngyendereire kwombeka abandi nari kweyoreka? Niinyikiriza abarikukoresa omukura ogu kushiisha emiteekateekyere yangye, emigambire yangye, nari kundeetera kutwaza kubi?’ Ow’eishe-emwe Nathan Knorr, owaabaire ari aha Kakiiko Akareeberezi, akaha obuhabuzi obu: “Otateeraho kushemeza abantu. Noija kuhendera otaine ou oshemeize. N’ahabw’ekyo shemeza Yehova, reero noija kushemeza boona abarikumukunda.”

9. Yehova akahwera Uziya kukora ki? (2 Obusingye 26:​1-5)

⁹ Cwamu gye nka Uziya. Obu Omugabe Uziya yaabaire ari muto akaba ari omucureezi. Akeega ‘kutiina Ruhanga’ ow’amazima. Kandi omu myaka ye 68, obwire obwingi Yehova akamuha emigisha. (Shoma 2 Obusingye 26:​1-5.) Uziya akasingura amahanga maingi g’abazigu be, kandi yaahamya ngu Yerusaalemu eine oburinzi. (2 Bus. 26:​6-15) Uziya aine kuba yaashemereirwe ahabwa byona ebi Ruhanga yaamuhwereire kukora.—Mub. 3:​12, 13.

10. Niki ekyahikire ahari Uziya?

¹⁰ Yegyera aha kucwamu kubi kwa Uziya. Omugabe Uziya akaba atwire naagambira abandi eby’okukora. Mbwenu shi ekyo kikamureetera kuteekateeka ngu naabaasa kukora kyona eki arikwenda? Eizooba rimwe, Uziya akataaha omu hekalu ya Yehova, kandi akeeragiira yaayoterera obubaane aha itambiro, eki abagabe baabaire batarikwikirizibwa kukora. (2 Bus. 26:​16-18) Omunyamurwa Omukuru Azaria akateeraho kumuzibira, kwonka Uziya akagira ekiniga kingi. Eky’obusaasi, Uziya taragumire ari omwesigwa, kandi Yehova akamurwaza ebibembe. (2 Bus. 26:​19-21) Ka byabaire nibiija kumugyendera gye ku ogire ngu akagumizamu ari omucureezi!

11. Nitubaasa kworeka tuta ngu turi abacureezi? (Reeba n’ekishushani.)

¹¹ Uziya ku yaabaire ow’amaani, akeebwa kumanya ngu Yehova niwe yaamuhwereire kuba ow’amaani n’okutunguuka. Eishomo ni riiha? Ni kikuru kwijuka ngu Yehova niwe arikutuha  emigisha n’obujunaanizibwa ebi twine. Omu mwanya gw’okwehimbisa ahabw’ebi tukozire, twine kusiima Yehova ahabw’ebi turikubaasa kukora. b (1 Kor. 4:7) Twine kuba abacureezi tukaikiriza ngu tituhikiriire, kandi ngu twine kuhaburwa. Ow’eishe-emwe ori omu myaka ya 60 akahandiika ati: “Nyegire ngu tinyine kuguubwa kubi naahaburwa. Naaheebwa obuhabuzi ahabw’okukora enshobe z’obushema, niinteeraho kukora empinduka ngumizamu nimpeereza.” Twaba nitutiina Yehova, kandi tukaguma turi abacureezi, buri kimwe nikiija kutugyendera gye.—Enf. 22:4.

12. Obu Yosia yaabaire ari muto akasherura ata Yehova? (2 Obusingye 34:​1-3)

¹² Cwamu gye nka Yosia. Yosia akaba ari omunyeeto obu yaatandika kusherura Yehova. Akaba naayenda kwega ebirikukwata ahari Yehova n’ebi arikukunda. Kwonka, omugabe muto ogu akaraba omu mbeera zigumire. Akaba aine kuhamira aha kuramya okw’amazima, n’obu okuramya okw’ebishuba kwabaire kukanyire. Kandi ekyo nikyo yaakozire. Obu Yosia yaabaire atakahikize emyaka 20, akatandika kwihaho okuramya kw’ebishuba omuri Israeli.—Shoma 2 Obusingye 34:​1-3.

13. Okwehayo ahari Yehova nikukwata kuta aha bi orikucwamu?

¹³ N’obu waakuba ori muto, noobaasa kucwamu gye nka Yosia kusherura Yehova, kandi okongyera kwega aha mitwarize ye. Waakora otyo nikiija kukuhiga kwehayo ahariwe. Okwehayo okwo nikwija kukwata kuta aha bi orikukora? Luke, owaabatiziibwe aine emyaka 14, naagira ati: “Kuruga obwo, nkacwamu kwebembeza okuheereza Yehova, kandi niinyija kugumizamu niimushemeza.” (Mak. 12:30) Ka noija kutunga emigisha naiwe waaba oine ekyetengo ky’okukikora!

14. Ha eby’okureeberaho ebirikworeka oku eminyeeto abamwe barikutooreza Omugabe Yosia.

¹⁴ Abarikucwamu kuheereza Yehova bakiri bato nibatunga buremeezi ki? Johan, owaabatiziibwe aine emyaka 12, naagamba oku abeegi bagyenzi be baamugyemesereize kureetsa. Johan kubaasa kutunga obumanzi  bw’okwanga, akaijuka ngu okureetsa nikushiisha amagara ge n’omukago gwe na Yehova. Rachel, owaabatiziibwe aine emyaka 14, naashoboorora ekyamuhweraire kwemera oburemeezi obu yaabaire naatunga aha ishomero. Naagira ati: “Niinteeraho kuteekateeka aha bintu ebirikukwata ahari Baibuli na Yehova. Nk’eky’okureeberaho, nimbaasa kwijuka ebyafaayo by’omuntu orikugambwaho omu Baibuli nari obunabi. Nari naaba ningaaniira n’omuntu nimbaasa kwijuka ekyahandiikirwe eki ndikubaasa kumushomera.” Oburemeezi obu orikutunga nibubaasa kuba nibutaana n’obu Omugabe Yosia yaatungire, kwonka noobaasa kuba omwesigwa kandi omunyabwengye nkawe. Okwemera oburemeezi ori omunyeeto nikibaasa kukutebeekanisiza kworekyera oburemeezi obu oraatungye nyentsya.

15. Niki ekyahweraire Yosia kuheereza Yehova omu bwesigwa? (2 Obusingye 34:​14, 18-21)

¹⁵ Omugabe Yosia ku yaakuzire akatandika kuhunduuza hekalu. Ku baabaire nibakora omurimo ogwo, bakabona “ekitabo ky’Ebiragiro bya [Yehova], ekyahandiikirwe Musa.” Omugabe ku yaahuriire ebyabaire birimu, ahonaaho akakora empinduka kubyorobera. (Shoma 2 Obusingye 34:​14, 18-21.) Nooshoma Baibuli butoosha? Ku kiraabe nikwo kiri, nookunda kugishoma? Nooteeraho kumanya emishororongo erikubaasa kukuhwera? Luke, owaaba yaagambirweho, naahandiika enshonga ezirikumushemeza ezi arikutunga. Noogira ngu waamutooreza nikiija kukuhwera kwijuka emishororongo nari enshonga ezirikubaasa kukuhwera? Oku orikwongyera kumanya n’okukunda Baibuli, nikwo oraayongyere kwenda kuheereza Yehova. Nk’oku Ekigambo kya Ruhanga kyahweraire Omugabe Yosia, naiwe nikiija kukuhwera.

16. Ahabw’enki Yosia yaakozire enshobe y’amaani, kandi nitukyegyeraho ki?

¹⁶ Yegyera aha kucwamu kubi kwa Yosia. Obu Yosia yaabaire aine 39, akakora enshobe eyaamurugiiremu okufa. Akeeyesiga omu  mwanya gw’okushaba Yehova obuhabuzi. (2 Bus. 35:​20-25) Haine eki turikubaasa kukyegyeraho. Yaaba tukuzire kirikwingana ki nari tutwire nitushoma Baibuli, twine kugumizamu nitusherura Yehova. Ekyo nikitwariramu okushaba Yehova obuhabuzi butoosha, okushoma Ekigambo kye, kandi tukahurikiza obuhabuzi bw’Abakristaayo abakuzire omu by’omwoyo. Ekyo nikiija kutuhwera kutakora enshobe z’amaani, kandi tushemererwe.—Yak. 1:25.

17. Abagabe bashatu ba Yuda twabeegyeraho ki?

¹⁷ Hariho ebintu bingi ebi orikubaasa kukora waaba okiri muto. Eky’okureeberaho kya Yoasi, Uziya, na Yosia nikyoreka ngu abato nibabaasa kucwamu ebirikushemeza Yehova, kandi babikore. Nk’oku twareeba, tihariho buhame oburikworeka ngu buri kimwe nikiza kukugyendera gye. Kwonka, nitubaasa kwegyera aha birungi ebi abagabe aba baakozire, kandi twetantare kukora enshobe nk’ezi baakozire. Twakora tutyo, nitwija kutunga okushemererwa.

18. Ni by’okureeberaho ki omu Baibuli ebirikworeka ngu noobaasa kuba gye? (Reeba n’ekishushani.)

¹⁸ Baibuli erimu eminyeeto abandi abaacwiremu kuba banywani ba Yehova, kandi bakaba abasinguzi omu kumuheereza. Daudi akaba ari omwe aharibo. Akacwamu kuheereza Yehova akiri muto, reero bwanyima yaahinduka omugabe orikwesigwa. N’obu obumwe yaabaire naakora enshobe, Ruhanga akaguma naamureeba nk’omushaija omwesigwa. (1 Bag. 3:6; 9:​4, 5; 14:8) Noobaasa kugasirwa waayega aha mbeera ei Daudi yaarabiremu n’oku yaaheereize Yehova omu bwesigwa. Nari noobaasa kutaho ekigyendererwa ky’okwega ebirikukwata ahari Mako, nari Timoseo. Noija kwetegyereza ngu bakaheereza Yehova bakiri bato kandi yaabasiima, yaabaha n’emigisha.

19. Noija kutunga birungi ki?

¹⁹ Kubaasa kugira nyentsya nungi nikiija kurugiirira aha ku orikucwamu hati. Waayesiga Yehova omu mwanya gw’okwesiga okwetegyereza kwawe naakuhwera kucwamu gye. (Enf. 20:24) Noobaasa kugira okushemererwa n’okumarwa. Ijuka ngu Yehova naasiima ebi orikukora. Mbwenu shi hariho ekirikukira okuheereza Tataitwe ow’omu iguru owa rukundo?