1. Entumwa Petero ari haihi kufa, Yehova akamubasiisa kukora ki?

 ENTUMWA Petero akaba naamanya ngu amagara ge nigaza kuhendera juba. Emyaka mingi ei yaamazire naaheereza omu bwesigwa, akagyenda na Yesu, yaatandikaho emiringo misya y’okubuurira, kandi yaaheereza aha kakiiko akareeberezi. Kwonka obuheereza bwa Petero bukaba butakahendeire. Nk’omu gwa 62-64 Y.A.K., Yehova akamukoresa kuhandiika ebaruha ibiri eziri omu Baibuli, ebaruha y’okubanza eya Petero n’eya kabiri. Akaba aine amatsiko ngu ebaruha ezo niziija kuhwera Abakristaayo yaaba yaafiire.—2 Pet. 1:​12-15.

2. Ahabw’enki ebaruha ezi Petero yaahandiikire zaabaire nizetengyesa?

² Petero akahandiika ebaruha ezo ibiri omu bwire obu Abakristaayo bagyenzi be baabaire nibaraba omu ‘kugyezibwa kw’emiringo mingi.’ (1 Pet. 1:6) Abantu babi bakaba nibateeraho kureetaho enyegyesa z’ebishuba n’emitwarize mibi omu kibiina. (2 Pet. 2:​1, 2, 14) Abakristaayo abaabaire nibatuura omuri Yerusaalemu bakaba bari haihi kureeba “emperu ya byona,” amahe g’Abarooma garikucwekyereza orurembo na hekalu. (1 Pet. 4:7) Buzima, ebaruha za Petero zikahwera Abakristaayo kumanya eki baine kukora kugumisiriza okugyezibwa n’okwetebeekanisiza ebyabaire nibiza kubaho. b

3. Ahabw’enki twine kushwijuma ebaruha za Petero zombi?

³ N’obu Petero araabe yaahandiikiire Abakristaayo ab’ekyasha  ky’okubanza, ebaruha ze, Yehova akazita omu Kigambo kye. N’ahabw’ekyo naitwe nitubaasa kugasirwa omu baruha ezo. (Rom. 15:4) Nitutuura omu nsi erikushagika ebikorwa bitashemeire, kandi nituhikwaho oburemeezi oburikubaasa kutureetera kugumirwa kuheereza Yehova. Kandi, turi haihi kuhika omu kubonabona kwingi okurikukira okwahikire aha Bayudaaya obu Yerusaalemu yaacwekyerezibwa na hekalu. Ebaruha ibiri ezi Petero yaahandiikire zirimu obuhabuzi burungi. Nizibaasa kutuhwera kwetebeekanisiza ekiro kya Yehova, kusingura okutiina abantu, n’okwongyera kugirira abandi rukundo. Kandi ebirimu nibibaasa kuhwera abareeberezi kumanya oku baine kureeberera gye obusyo.

4. Kurugiirira ahari 2 Petero 3:3, 4, niki ekirikubaasa kugyeza okwikiriza kwaitu?

⁴ Twetoroirwe abantu abatarikwikiriza mu bunabi bwa Baibuli. Abahakanisa nibabaasa kutukiniika ahabw’okugira tutwire tutegyereize emperu kumara emyaka mingi. Kandi abamwe nibagira ngu emperu teraije. (Shoma 2 Petero 3:​3, 4.) Twahurira ebigambo nk’ebyo kuruga ahu twabuurira, ou turikukora nawe, nari ow’omu ka yaitu, okwikiriza kwaitu nikubaasa kugyezibwa. Petero akagamba ekirikubaasa kutuhwera.

5. Niki ekiratuhwere kuguma twine emiteekateekyere mirungi aha mperu y’entebeekanisa y’obusingye obu? (2 Petero 3:8, 9)

⁵ Abamwe nibabaasa kureeba Yehova nk’okyerereirwe kuhendera entebeekanisa y’ensi egi embi. Ebigambo bya Petero nibibaasa kutuhwera kuguma twine emiteekateekyere mirungi, kandi nibitwijutsya ngu oku Yehova arikureeba obwire nikutaanira kimwe n’emireebere y’abantu. (Shoma 2 Petero 3:​8, 9.) Ahari Yehova emyaka rukumi ni nk’ekiro kimwe. Yehova naagumisiriza, atarikwenda muntu weena kuhwerekyerera. Ekiro kye ku kiraahikye, entebeekanisa y’obusingye obu neeza kuhendera. Ka twine omugisha gw’amaani ogw’okukoresa obwire obutsigaireyo kubuurira abantu b’amahanga goona!

6. Nituguma tutegyereza’ ekiro kya Yehova tuta? (2 Petero 3:11, 12)

⁶ Petero naatuhiga ‘kutegyereza’ ekiro kya Yehova. (Shoma 2 Petero 3:​11, 12.) Nitubaasa kukikora tuta? Kyaba nikibaasika, ni kirungi buri izooba kuteekateeka aha migisha y’ensi ensya. Teera akashushani orikwitsya omwoya murungi, orikurya eby’okurya birungi, orikwakiira abakundwa baawe abaafiire, kandi orikwegyesa abantu abaabaire bariho ebyasha ebya ira aha bunabi bwa Baibuli obwahikiriire. Okuteekateeka oku nikubaasa kukuhwera kuguma otegyereize kandi kikuhwere kutagira emiteekateekyere nk’ey’abantu b’obwire obu turimu. ‘Ahabw’okumanya’ ebirikukwata aha biro by’omumaisho, titurikwija ‘kuhabisibwa’ abeegyesa b’ebishuba.—2 Pet. 3:17.

7. Okutiina abantu nikitukwataho kita?

⁷ Twaguma nituteekateeka aha kiro kya Yehova, nikituhiga kugambira abandi amakuru marungi. Kwonka, omu mbeera ezimwe nitubaasa kutiina kugamba. Ahabw’enki? Nitubaasa kutiina abantu. Ekyo kikaba ahari Petero. Aha kiro obu Yesu yaabaire naahozesibwa, Petero akatiina kwemanyisa ngu n’omwe aha beegi ba Yesu kandi akeehakana ngu tarikumanya Yesu. (Mat. 26:​69-75) Kwonka bwanyima, Petero akabaasa kugamba n’obumanzi ati: “Mutaritiina okukangisa kwabo kandi mutaryemereza emitima.” (1 Pet. 3: 14) Ebigambo bya Petero nibituhamiza ngu nitubaasa kusingura okutiina abantu.

8. Niki ekirikubaasa kutuhwera kusingura okutiina abantu? (1 Petero 3:15)

⁸ Niki ekirikubaasa kutuhwera kusingura okutiina abantu? Petero naatugambira ati: “Muhe Kristo ekitiinisa nka Mukama omu mitima yaanyu.” (Shoma 1 Petero 3:15.) Eki nikitwariramu okuteekateeka aha mwanya n’amaani agu Mukama waitu kandi Omugabe, Kristo Yesu aine. Waatunga omugisha gw’okubuurira amakuru marungi okahurira otiinire, ijuka Omugabe waitu. Muteekateekeho arikutegyekyera omu iguru ayetooroirwe baamaraika baingi. Ijuka ngu aine “obushoboorozi bwona omu iguru n’omu nsi” kandi ngu naija kuguma naiwe “ebiro byona okuhitsya obu ensi egi erihwaho.” (Mat. 28:​18-20) Petero akatuhiga ‘kuguma tweteekateekire’ kushoboorora ebi turikwikiriza. Okaayenzire kubuurira aha murimo, aha ishomero, nari kitaraariire? Teekateeka bukiri kare oku orikubaasa kukora ekyo, kandi otebeekanise n’eki oraagambe. Shaba kugira obumanzi, kandi ogire obwesigye ngu Yehova naaza kukuhwera kusingura okutiina abantu.—Byak. 4:29.

9. Eizooba rimwe, Petero akaremwa ata kworeka rukundo? (Reeba n’ekishushani.)

⁹ Petero akeega oku aine kworeka rukundo.  Akaba ariho obu Yesu yaagira ati: “Nimbaha ekiragiro kisya nti: Mukundane; nk’oku naabakunzire, naimwe mube nikwo mwakundana.” (Yoh. 13:34) Kwonka, Petero akanga kurya n’ab’eishe-emwe Abanyamahanga, ahabw’okutiina Abakristaayo Abayudaaya. Eki Petero yaakozire, entumwa Paulo akakyeta ‘oburyarya.’ (Gal. 2:​11-14) Petero akaikiriza obuhabuzi kandi yaabugyenderaho. Omu baruha ze ibiri, akahandiika ngu titwine kugirira ab’eishe-emwe rukundo kyonka, kureka twine n’okugyoreka.

10. Niki ekirikutuhwera kworeka ‘rukundo y’eishe-emwe [etarimu] buryarya?’ Shoboorora. (1 Petero 1:22)

¹⁰ Petero akagira ngu twine ‘kukundana nk’eishe-emwe tutarikuryarya.’ (Shoma 1 Petero 1:22.) Rukundo egyo neerugiirira ‘omu kworobera amazima.’ Amazima aga nigatwariramu enyegyesa erikworeka ngu ‘Ruhanga tarikushoroora.’ (Byak. 10:​34, 35) Titurikubaasa kugira ngu nitworobera ekiragiro kya Yesu ekya rukundo twaba nitukunda bamwe omu kibiina kwonka turikwanga abandi. Nka Yesu, nitubaasa kuba nitworoberwa kwirira haihi bamwe kukira abandi. (Yoh. 13:23; 20:2) Kwonka Petero naatwijutsya ngu twine kuteeraho kugira ‘rukundo y’eishe-emwe,’ niyo rukundo ei twiniire ab’eishe-emwe na banyaanyazi-itwe boona.—1 Pet. 2:17.

11. ‘Okukundana munonga twihire aha mutima’ nikitwariramu ki?

¹¹ Petero akatuhiga ‘kukundana munonga twihire aha mutima.’ ‘Okukundana munonga’ nikitwariramu okukunda omuntu n’obu kirikuba kigumire kumukunda. Nk’eky’okureeberaho, ow’eishe-emwe naabaasa kuba naatugwitsa kubi. N’ahabw’ekyo omu mwanya gw’okumworeka rukundo nitubaasa kwenda kumutwariza omu muringo nigwo gumwe. Kwonka, Petero akeegyera ahari Yesu ngu okuhoora enzigu tikirikushemeza Ruhanga. (Yoh. 18:​10, 11) Petero akahandiika ati: “Murekye kwihurana ebibi, nari okugarurirana ebijumo, kureka omu mwanya gw’ebyo mushabirane omugisha.” (1 Pet. 3:9) Waaba nookunda munonga abandi, rukundo neija kukuhiga kubagirira embabazi n’okubafaho otwariiremu n’abo abarikuba bakugwisize kubi.

12. (a) Okukundana munonga nikituhiga kukora ki ekindi? (b) Nooyenda kuteeraho kukora ki, nk’oku kirikworekwa omu vidiyo Rinda Ekiconco ky’Omuhendo eky’Obumwe?

¹² Omu baruha ya Petero ey’okubanza akakoresa ebigambo “mukundane munonga.” Rukundo egyo terikushweka ebibi bikye byonka, kureka ‘neeshweka ebibi bingi.’ (1 Pet. 4:8) Obundi Petero akaijuka eishomo eririkukwata aha kusaasira eri Yesu yaamwegyeise emyaka mikye enyima. Omu bwire obwo, Petero naabaasa kuba yaateekateekire ngu naaba akozire gye yaasaasira mugyenzi we “emirundi mushanju.” Kwonka Yesu akamwegyesa ngu aine kusaasira ‘emirundi 77,’ ekirikumanyisa okusaasira otaine bugarukiro, kandi naitwe nikyo twine kukora. (Mat. 18:​21, 22) Waaba noogumirwa kugyendera aha buhabuzi obu, otahwa amaani. Abaheereza ba Yehova abatahikiriire obumwe bagumiirwe kusaasira. Ekikuru munonga hati n’okukora kyona ekirikubaasika kusaasira ow’eishe-emwe mugyenzi waawe kandi okagira obusingye nawe. c

13. Niki ekirikubaasa kureetera abareeberezi kugumirwa kuhwera ab’eishe-emwe na banyaanyazi-itwe?

¹³ Yesu ku yaazookire akagambira Petero ati: “Riisa entaama zangye,” kandi ekyo Petero tarakyebirwe. (Yoh. 21:16) Waaba ori  omureeberezi, obuhabuzi obu naiwe nibukukwataho. Omureeberezi nikibaasa kutamworobera kutunga obwire bw’okuhikiiriza obujunaanizibwa obu. Abareeberezi baine kubanza bareeberera amaka gaabo omu by’omubiri, enyehurira n’omu by’omwoyo. Kandi nibataho eky’okureeberaho kirungi omu murimo gw’okubuurira, n’omu kutebeekanisa ebicweka by’enteerane enkye n’empango kandi bakabiha. Abamwe bari aha Bukiiko Oburikuhikaanisa Abarwaire n’Eirwariro nari nibakora n’Ekitongore ky’Okwombeka n’Okuhunduuza Ebyombeko by’Ekibiina. Abareeberezi buzima baine bingi by’okukora!

14. Niki ekirikubaasa kuhiga abareeberezi kugumya obusyo bwa Ruhanga? (1 Petero 5:​1-4)

¹⁴ Petero akahiga abareeberezi bagyenzi be ati: “Muriise gye obusyo bwa Ruhanga.” (Shoma 1 Petero 5:​1-4.) Waaba ori omureeberezi, nitumanya ngu nookunda ab’eishe-emwe na banyaanyazi-itwe kandi nooyenda kubareeberera omu by’omwoyo. Kwonka, obumwe noobaasa kugira bingi by’okukora nari ohurire oruhire otarikubaasa kuhikiiriza obujunaanizibwa obu. Noobaasa kukora ki? Gambira Yehova oku orikwehurira omu kushaba. Petero akahandiika ati: “Orikuheereza aheereze n’amaani agu Ruhanga amuhaire.” (1 Pet. 4:11) Ab’eishe-emwe na banyaanyazi-itwe nibahikwaho oburemeezi obutarikubaasa kurugiraho kimwe hati. Kwonka ijuka ngu “Omuriisa omukuru,” Yesu Kristo, naabaasa kubahwera kukira oku orikubaasa kukikora. Ekyo naabaasa kukikora hati, n’omu nsi ensya. Yehova naayenda ngu abareeberezi bakunde ab’eishe-emwe bagyenzi baabo, babagumye kandi babe ‘eky’okureeberaho aharibo.’

15. Omureeberezi omwe naagumya ata ab’eishe-emwe? (Reeba n’ekishushani.)

¹⁵ William, omazire emyaka mingi ari omureeberezi, ayetegyereize obukuru bw’okugumya ab’eishe-emwe. Ekigwererezi kya COVID- 19 kitandikire, we n’abareeberezi bagyenzi be bakataho entebeekanisa y’okuhurizana na buri omwe ori omu guruupu zaabo z’okubuurira buri saabiiti. Naashoboorora ahabw’enki baakozire ekyo: “Ab’eishe-emwe baingi bakaba bari bonka omu ka, n’ahabw’ekyo bakaba nibabaasa kurahuka kugira ebiteekateeko bitahikire.” Ow’eishe-emwe yaaba aine oburemeezi, William naafayo kuhurikiza  kugira ngu amanye ekirikumwerarikiriza n’ekirikubaasa kumuhwera. Reero naasherura ekirikubaasa kuhwera Omukristaayo mugyenzi we, na munonga vidiyo eziri aha mukura gwaitu. Naagira ati: “Okugumya ab’eishe-emwe nikyetengyesa munonga hati okukira ira. Nitukora n’amaani kuhwera abantu kwega ahari Yehova, twine kukora nikyo kimwe kugumya entaama ze kuguma omu mazima.”

16. Nitubaasa kugyendera tuta aha bi twayega omu baruha za Petero?

¹⁶ Twareeba amashomo makye kuruga omu baruha ibiri z’entumwa Petero. Noobaasa kuba waareeba ahu orikwenda kwongyeramu amaani. Nk’eky’okureeberaho, nooyenda kwongyera kuteekateeka aha migisha ei turaatungye omu nsi ensya? Waataireho ekigyendererwa ky’okubuurira aha murimo, aha ishomero, nari kitaraariire? Nooreeba emiringo oku orikubaasa kwongyera kukunda ab’eishe-emwe na banyaanyazi-itwe omu bwijwire? Mbwenu shi abareeberezi, mumaririire kuriisa entaama za Yehova mwekundiire kandi mutagyemirwe? Waayeshwijuma noobaasa kureeba ngu oine obweremwa, kwonka otahwa amaani. Ruhanga aine embabazi kandi naija kukuhwera. (1 Pet. 2:3) Petero naatuhamiza ati: ‘Ruhanga . . . Naija kubagarura busya, abagumye, abahe amaani.’—1 Pet. 5:10.

17. Twagumisiriza kandi tukaikiriza Yehova kututendeka, nihaija kurugamu ki?

¹⁷ Haine obu Petero yaayehurira nk’otashemereire kuba omu maisho g’omwana wa Ruhanga. (Luk. 5:8) Kwonka Petero arikuhwerwa Yehova na Yesu, akabaasa kugumisiriza kandi yaaguma ari omukuratsi wa Kristo omwesigwa. N’ekyarugiremu Petero akatunga omugisha ‘gw’okutaaha omu Bukama obutahwaho bwa Mukama waitu kandi Omujuni, Yesu Kristo.’ (2 Pet. 1:11) Ogwo ka n’omugisha gw’omutaano! Naiwe waagumisiriza nka Petero kandi okaikiriza kutendekwa Yehova noija kuheebwa ekihembo ky’amagara agatahwaho. Noija kutunga ‘okujunwa kw’amagara gaawe, nk’ekihembo ky’okwikiriza kwawe.’—1 Pet. 1:9.