1. Petero akatwaza ata ku baakwatsire eby’enyanja omu muringo gw’eky’okutangaaza?

 PETERO akaba amazire ekiro kyona arikujuba eby’enyanja kwonka ataine eki arikukwatsa. Ekirikutangaaza, Yesu akamugira ati: “Mwirire aha gati y’enyanja, mutegye obutimba bwanyu.” (Luk. 5:4) Petero akaba naabanganisa yaaba araakwate eby’enyanja, kwonka akakora eki baamugambiire. Obutimba obu baategire bukatandika kucweka ahabw’eby’enyanja kuba bingi munonga. Petero na bagyenzi be ku bareebire eky’okutangaaza ekyo, “bakatangaara.” Petero akagira ati: “Ndugaho, Mukama wangye, ahabw’okuba ndi omusiisi.” (Luk. 5:​6-9) Petero naabaasa kuba yaayehuriire nk’otashemereire kuba omu maisho ga Yesu.

2. Ahabw’enki ni kikuru kuteekateeka aha ky’okureeberaho kya Petero?

² Petero akaba ahikire, akaba ari “omusiisi.” Ebyahandiikirwe nibyoreka ngu obumwe akaba naagamba nari akora ebi yaabaire ayeefuza bwanyima. Naiwe obumwe nooyehurira nka Petero? Oine omutwarize ogu orikwenda kwongyera kugira nari obweremwa obu orikwenda kusingura? Kyaba nikwo kiri, okwega ebirikukwata ahari Petero nikibaasa kukugumya. Ahabw’enki? Teekateeka ahari eki: Obweremwa bwa Petero bukaba nibubaasa kutahandiikwa omu Baibuli. Kwonka Yehova akabuhandiikisa kugira ngu tubaase kubwegyeraho. (2 Tim. 3:​16, 17) Okwega aha bweremwa bwa Petero owaabaire aine enyehurira nk’ezaitu nikituhwera kumanya ngu Yehova tarikutwenza ebi tutarikubaasa. Kureka naayenda ngu tugumizemu nituteeraho n’obu twakuba twine obweremwa.

3. Ahabw’enki twine kugumisiriza?

³ Ahabw’enki ni kikuru kugumisiriza? Hariho engamba erikugira eti: “Kamwe kamwe nigwo muganda.” Nk’eky’okureeberaho:  Omweshongozi naabaasa kumara emyaka mingi arikwega kuteera enanga. Omu bwire obwo naabaasa kukora enshobe nyingi, kwonka yaaguma naayegyezamu naayega kugiteera gye. N’obu arikuba yaabaire omukugu, obumwe naabaasa kukora enshobe. Kwonka nabwo tarikuhanika akabirugaho. Naagumizamu naayegyezamu kugira ngu ayongyere kukora gye. Omu muringo nigwo gumwe, naitwe obu turikuba nitureeba ngu tusingwire obweremwa bwaitu, nitubaasa kugaruka enyima. Kwonka nitugumizamu nituteeraho kukora gye. Twena nitugamba nari tukora ebintu ebi turikwefuuza bwanyima, n’obu kiraabe kiri kityo, twaba tutahanikire, Yehova naija kutuhwera kwongyera kukora gye. (1 Pet. 5:10) Ka tureebe eky’okureeberaho kya Petero eky’okugumisiriza. Embabazi ezi Yesu yaamugiriire n’obu yaabaire akora enshobe, nizibaasa kutuhiga kugumisiriza tugumizemu nituheereza Yehova.

4. Nk’oku kirikworekwa omuri Luka 5:​5-10, Petero akeegambaho ata, kandi Yesu akamuhamiza ata?

⁴ Ebyahandiikirwe tibirikworeka ahabw’enki Petero yaayegambireho ‘nk’omusiisi’ nari ebibi ebi yaabaire naamanyisa. (Shoma Luka 5:​5-10.) Kwonka naabaasa kuba yaakozire ebibi by’amaani. Yesu akeetegyereza ngu Petero akaba atiinire ahabw’okugira ngu akaba naayereeba nk’otashemeire. Kandi Yesu akaba naamanya ngu Petero naabaasa kuguma ari omwesigwa. N’ahabw’ekyo Yesu akagambira Petero ati: “Otatiina.” Ekyo kikakwata munonga ahari Petero. Bwanyima, we n’omurumuna Anderea bakatsigaho omurimo gwabo gw’okujuba eby’enyanja baahinduka abakuratsi ba Mesia ab’obutwire, kandi bakatunga emigisha mingi.—Mak. 1:​16-18.

5. Petero akatunga birungi ki ahabw’okusingura okutiina n’okwikiriza kuba omukuratsi wa Yesu?

⁵ Petero akatunga ebirungi bingi arikuheereza nk’omukuratsi wa Kristo. Akareeba Yesu arikukiza abarwaire, arikubinga baadaimoni, kandi arikuzoora n’abafu. b (Mat. 8:​14-17; Mak. 5:​37, 41, 42) Petero akareeba okworekwa kw’ekitiinisa kya Yesu nk’Omugabe w’Obukama bwa Ruhanga, kandi ekyo kikamukwataho munonga. (Mak. 9:​1-8; 2 Pet. 1:​16-18) Buzima, Petero akareeba ebintu bingi ebi yaabaire atarikwija kureeba ku ogire ngu tarahindukire omukuratsi wa Yesu. Ka aine kuba yaashemereirwe ahabw’okutaikiriza obweremwa bwe kumureetera kufeerwa kutunga emigisha egyo!

6. Mbwenu shi Petero akarahuka kusingura obweremwa bwe? Shoboorora.

 ⁶ Oyihireho ebi Petero yaareebire n’ebi yaahuriire, akaguma naateganisibwa obweremwa bwe. Teekateeka aha by’okureeberaho ebi. Yesu ku yaashoboroire oku araabonabone kandi akafa arikuhikiiriza obunabi, Petero akamuteisa. (Mak. 8:​31-33) Emirundi mingi, Petero n’entumwa abandi bakahakana aha waabaire ari omukuru omuribo. (Mak. 9:​33, 34) Aha kiro ky’aha muheru Yesu atakafiire, Petero ahabw’ekiniga akatema omushaija okutu. (Yoh. 18:10) Kandi aha kiro ekyo, Petero ahabw’okutiina akeehakana munywani we Yesu emirundi eshatu ngu tarikumumanya. (Mak. 14:​66-72) Ekyo kikareetera Petero kurira munonga.—Mat. 26:75.

7. Petero akaheebwa mugisha ki bwanyima y’okuzooka kwa Yesu?

⁷ Yesu tararugire aha ntumwa ye owaabaire naayehurira kubi. Yesu ku yaazookire, akaha Petero omugisha gw’okworeka ngu naakimukunda. Yesu akaha Petero obujunaanizibwa bw’okuriisa entaama ze. (Yoh. 21:​15-17) Petero akaba ayeteekateekire kukora eki Yesu yaamugambiire. Akaba ari omuri Yerusaalemu aha izooba rya Pentekoote kandi akaba ari omu baabandize kushukwaho omwoyo gurikwera.

8. Petero akakora nshobe ki y’amaani omuri Antiokia?

⁸ Na bwanyima ya Petero kuhinduka Omukristaayo oshukirweho omwoyo gurikwera, akaba akiine obweremwa. Omuri 36 Y.A.K., Petero akaba ariho obu Koruneelio Omunyamahanga otashazirwe yaashukwaho omwoyo gurikwera, ekyayorekire gye ngu ‘Ruhanga tarikushoroora mu bantu’ kandi ngu n’Abanyamahanga nibabaasa kuza omu kibiina Ekikristaayo. (Byak. 10:​34, 44, 45) Kuruga obwo Petero akatandika kurya n’Abanyamahanga, ekintu eki yaabaire atarikubaasa kukora enyima. (Gal. 2:12) Kwonka, Abakristaayo Abayudaaya abamwe bakaba nibateekateeka ngu Abayudaaya n’Abanyamahanga tibashemereire kurya hamwe. Bamwe aha baabaire baine emiteekateekyere egyo ku baagire Antiokia, Petero akarekyera aho kurya n’ab’eishe-emwe Abanyamahanga, arikutiina kugwisa kubi Abakristaayo Abayudaaya. Entumwa Paulo akareeba oburyarya bwe kandi yaamuhana butunu omu maisho g’abantu. (Gal. 2:​13, 14) N’obu Petero yaakozire enshobe egyo, akagumisiriza. Niki ekyamuhweraire?

9. Ebiri omu Yohaana 6:​68, 69 nibyoreka bita obwesigwa bwa Petero?

⁹ Petero akaba ari omwesigwa, taraikiriize kintu kyona kumuremesa kukuratira Yesu. Akooreka obwesigwa obwo obu Yesu yaagambira abeegi be ekintu eki bataretegyereize. (Shoma Yohaana 6:​68, 69.) Baingi tibarategyereze kushoboorokyerwa, kureka bakarekyera aho kukuratira Yesu. Kwonka Petero, akamuhamiraho. Akeetegyereza ngu Yesu wenka niwe yaabaire aine “ebigambo by’amagara agatahwaho.”

10. Yesu akooreka ata ngu naayesiga Petero? (Reeba n’ekishushani.)

¹⁰ Yesu taratsigireho Petero. Aha kiro ekyahereerukireyo, Yesu akaba naamanya ngu Petero n’entumwa ze abandi nibaza kumutsigaho. Kwonka nabwo, Yesu akaba aine obwesigye omuri Petero ngu naija kumugarukira kandi agume ari omwesigwa. (Luk. 22:​31, 32) Yesu akaba naayetegyereza ngu “omutima gwo nigukunda, kwonka omubiri n’omweremwa.” (Mak. 14:38) Na bwanyima ya Petero kumwehakana, Yesu tararugire aha ntumwa ye. Kandi Yesu ku yaazookire akeeyoreka Petero  ari wenka. (Mak. 16:7; Luk. 24:34; 1 Kor. 15:5) Ekyo ka kiine kuba kyahuumuriize Petero!

11. Yesu akahamiza ata Petero ngu Yehova naija kumushagika?

¹¹ Yesu akahamiza Petero ngu Yehova naija kumushagika. Yesu ku yaazookire akagaruka yaahwera Petero n’entumwa abandi kukwata eby’enyanja omu muringo gw’eky’okutangaaza. (Yoh. 21:​4-6) Hatariho kubangaanisa, eky’okutangaaza ekyo kikahamiza Petero ngu Yehova naabaasa kubaha ebirikwetengyesa omu by’omubiri. Naabaasa kuba yaijukire ebigambo bya Yesu ngu Yehova naija kureeberera ‘abarikubanza kusherura Obukama.’ (Mat. 6:33) Ebyo byona, bikahwera Petero kwebembeza obuheereza, beitu gutari murimo gwe ogw’okujuba eby’enyanja. Akeegyesa n’obumanzi aha izooba rya Pentekoote 33 Y.A.K., kandi ekyo kikahwera baingi kwikiriza amakuru marungi. (Byak. 2:​14, 37-41) Bwanyima akahwera Abasamaria n’Abanyamahanga kwikiririza omuri Kristo. (Byak. 8:​14-17; 10:​44-48) Yehova akakoresa Petero omu muringo gurikutangaaza kureeta abantu b’emiringo yoona omu kibiina.

12. Eky’okureeberaho kya Petero nikibaasa kutuhwera kita twaba twine obweremwa oburikugumaho?

¹² Yehova naabaasa kutuhwera kugumisiriza. Nikibaasa kutugumira kugumizamu, na munonga twaba tugumisiriize obweremwa nibwo bumwe kumara obwire buraingwa. Obumwe, obweremwa bwaitu nibubaasa kureebeka nk’obugumire munonga kukira obu Petero yaabaire aine. Kwonka Yehova naabaasa kutuha amaani g’okugumisiriza. (Zab. 94:​17-19) Nk’eky’okureeberaho, ow’eishe-emwe akeejumba omu butingwa kumara emyaka mingi atakeegire mazima. Bwanyima akacwa omuze ogwo. Kwonka, obumwe akaba naateganisibwa ebyetengo bibi. Niki ekyamuhweraire kugumisiriza? Naashoboorora ati: “Yehova naatugumya. Ahabw’omwoyo gwa Yehova . . . , nyegire ngu nikibaasika [kugumizamu] omu muhanda gw’amazima . . . Yehova abaasize kunkoresa, kandi n’obu ndaabe nyine obweremwa naagumizamu kungumya.”

13. Kurugiirira aha Ebyakozirwe 4:​13, 29, 31 nitubaasa kutooreza tuta Petero? (Reeba n’ekishushani.)

¹³ Nk’oku twareeba, Petero akakora enshobe emirundi mingi ahabw’okutiina abantu. Ahabw’okugira ngu Petero akaguma  naashaba, akabaasa kworeka obumanzi. (Shoma Ebyakozirwe 4:​13, 29, 31.) Naitwe nitubaasa kusingura okutiina. Teekateeka aha kyabaire ahari Horst, ow’eishe-emwe muto owaabaire naatuura omuri Germany omu bwire bwa Nazi. Emirundi erikurenga ahari gumwe, akasingurwa okugyemeserezibwa ari aha ishomero, arikugamba ebigambo ebi: “Himbisa Hitler!” Omu mwanya gw’abazaire ba Horst kumugambira kubi, bakashaba nawe, barikushaba Yehova kumuha obumanzi. Ahabw’obuhwezi bw’abazaire be n’okwesiga Yehova, Horst akatunga obumanzi. Bwanyima akagira ati: “Yehova tarantsigireho.” c

14. Abareeberezi nibabaasa kugumya bata abahweiremu amaani?

¹⁴ Yehova na Yesu tibarikwija kututsigaho. Petero ku yaaherize kwehakana Kristo akaba aine kukora okucwamu kugumire. Mbwenu shi akaba aine kubirugaho, nari akaba aine kugumizamu ari omwegi wa Kristo? Yesu akaba yaashabiire Petero ngu okwikiriza kwe kutahwaho. Yesu akagambira Petero aha kushaba okwo, kandi yaayoreka obwesigye bwe omuriiwe ngu akaba naija kugumya ab’eishe-emwe abandi. (Luk. 22:​31, 32) Petero okuteekateeka aha bigambo bya Yesu ebyo, ka kiine kuba kyamugumize! Twaba twine eki turikwenda kucwamu ekigumire, Yehova naabaasa kukoresa abareeberezi abarikutufaho kutuhamiza ngu nitubaasa kuguma turi abeesigwa. (Efe. 4:​8, 11) Paul omazire obwire buraingwa ari omureeberezi naateeraho kuhuumuriza abandi. Naagambira abarikuba nibenda kuhanika kuteekateeka aha ku Yehova yaabareetsire omu mazima. Reero abahamiza ngu rukundo ya Yehova etarikuhinduka terikumwikiriza kureka abantu be kumurugaho. Naagira ati: “Ndeebire baingi abarikuba bahweiremu  amaani barikugumisiriza ahabw’okuhwerwa Yehova.”

15. Eky’okureeberaho kya Petero na Horst nikyoreka kita amazima ga Matayo 6:33?

¹⁵ Nk’oku Yehova yaareebereire Petero n’entumwa abandi omu by’omubiri, naitwe naija kutureeberera twayebembeza okumuheereza. (Mat. 6:33) Bwanyima y’Orutaro rw’Ensi Yoona II, Horst, owaaba yaagambirweho, akateekateeka aha kuba payoniya. Kwonka akaba ari omworo ataine matsiko ngu naabaasa kubona esente z’okwereeberera kandi akaguma omu buheereza obw’obutwire. Akakora ki? Akacwamu kugyeza Yehova arikubuurira saabiiti yoona obu omureeberezi wa saketi yaabaire abatayayiire. Aha muheru gwa saabiiti egyo, akatangaara omureeberezi wa saketi ku yaamuhaire ebahaasa atamugambiire ahu yaaruga. Ekaba erimu esente ezaabaire nizetengyesa kumushagika arikuheereza nka payoniya kumara ameezi. Horst akareeba ekiconco ekyo nk’obuhame ngu Yehova naija kumureeberera. Obwire bwe bwona obwakuratsireho akabukoresa kwebembeza eby’Obukama.—Mal. 3:10.

16. Ahabw’enki twine kwega ahari Petero n’ebi yaahandiikire?

¹⁶ Petero aine kuba yaashemereirwe munonga ahabw’okugira ngu Yesu taramutsigireho, n’obu araabe yaamushabire ngu amurugyeho! Kristo akagumizamu naatendeka Petero kuba entumwa omwesigwa kandi eky’okureeberaho kirungi aha Bakristaayo. Hariho bingi ebi turikubaasa kwegyera aha kutendekwa okwo. Petero akagamba bimwe aharibyo omu baruha ibiri ezi yaahandiikiire ebibiina omu kyasha ky’okubanza. Omu kicweka ekirikukurataho nituza kweijutsya bimwe aha biri omu baruha ezo n’oku turikubaasa kubigyenderaho.