1-2. Ahabw’enki twine kwega ebirikukwata ahari Samusooni?

 NIKI ekirikwija omu biteekateeko byawe waahurira eiziina Samusooni? Nooteekateeka aha mushaija w’amaani maingi? Nikwo kiri. Kandi Samusooni akacwamu kubi ekyamureeteire akabi. Kwonka, Yehova akata omutima aha bikorwa bye eby’obwesigwa, kandi akabindiikisa omu Baibuli kutugasira.

² Yehova akakoresa Samusooni kuhwera abaheereza be, Abaisraeli. Bwanyima y’emyaka mingi, Yehova akahwera Paulo kuhandiika amaziina g’abashaija abaabaire baine okwikiriza otwariiremu na Samusooni. (Heb. 11:​32-34) Eky’okureeberaho kya Samusooni nikibaasa kutugumya. Akaba naayesiga Yehova, n’omu mbeera zigumire. Ka twetegyereze oku eky’okureeberaho kya Samusooni kirikubaasa kutugumya n’ebi turikubaasa kumwegyeraho.

3. Samusooni akaheebwa bujunaanizibwa ki?

³ Samusooni akazaarwa obu Abafilistia baabaire nibategyeka eihanga rya Israeli kandi barikubatwariza kubi. (Bar. 13:1) Ekyo kikareetera Abaisraeli kubonabona munonga. Yehova akatoorana Samusooni “kujuna Abaisraeli omu mikono y’Abafilistia.” (Bar. 13:5) Ka bwabaire buri obujunaanizibwa bw’amaani! Samusooni kubaasa kuhikiiriza obujunaanizibwa obwo, akaba aine kwesiga Yehova.

4. Yehova akahwera ata Samusooni kuruga omu mikono y’Abafilistia? (Abaramuzi 15:​14-16)

⁴ Teekateeka aha ky’okureeberaho eki ekirikworeka ngu Samusooni  akaba naayesiga Yehova n’obushagiki bwe. Eizooba rimwe, eihe ry’Abafilistia rikaija kukwata Samusooni omuri Leehi, obundi eyaabaire neeshangwa Yuda. Abashaija ba Yuda bakatiina, baacwamu kuhayo Samusooni omu mikono y’abazigu. N’ahabw’ekyo bakamukoma n’emirunga ebiri misya baamutwarira Abafilistia. (Bar. 15:​9-13) Kwonka, ‘omwoyo gwa [Yehova] gwamwijaho n’amaani’ emirunga eyaabaire emukomire yaacweka. Ku yaareebire aha rubaju, “yaagwa aha igufa ry’oruba rusya rw’endogoya,” yaarukwata, yaarwitsa abashaija Abafilistia 1,000.—Shoma Abaramuzi 15:​14-16.

5. Samusooni okukoresa eigufa ry’oruba rw’endogoya kikoreka kita ngu naayesiga Yehova?

⁵ Oruba rw’endogoya rukaba rutari kirwaniso, mbwenu shi ahabw’enki Samusooni yaarukoreise? Hatariho kubangaanisa Samusooni akaba naamanya ngu obusinguzi bwe niburuga ahari Yehova, beitu kitari kirwaniso eki yaakoreise. Omushaija ogu omwesigwa akakoresa ekyabaire kiriho kuhikiiriza ekigyendererwa kya Yehova. Ahabw’okugira ngu Samusooni akeesiga Yehova, akamuhwera kuba omusinguzi.

6. Nitwegyera ki ahari Samusooni twaba nituhikiiriza obujunaanizibwa bwaitu?

⁶ Naitwe Yehova naabaasa kutuha amaani g’okuhikiiriza obujunaanizibwa bwaitu, n’obu twakuba nitureeba ngu bugumire. Yehova naabaasa kutuhwera omu muringo ogu tutarikuteekateeka. Waayesiga Yehova naaza kukuha amaani g’okukora ebi arikukunda nk’oku yaahweraire Samusooni.—Enf. 16:3.

7. Ni by’okureeberaho ki ebirikworeka obukuru bw’okusherura obuhabuzi bwa Yehova?

⁷ Ab’eishe-emwe na banyaanyazi-itwe baingi abarikwejumba omu murimo gw’okwombeka ebyombeko by’ekibiina boorekire ngu nibeesiga Yehova. Ira ab’eishe-emwe bakaba nibakira kuhunduuza nari kwombeka ebyombeko bisya by’Obukama n’ebindi byombeko. Kwonka, ekibiina kya Yehova kikozire empinduka ahabw’okugira ngu nikyongyera kuhanguha. Ab’eishe-emwe abaine obujunaanizibwa bakashaba Yehova kubahwera,  kandi baateeraho kukoresa emiringo misya nk’okugura ebyombeko n’okubihunduuza. “Omu kubanza, kikagumira bamwe kwikiriza empinduka ezo,” nikwo Robert, otwire naakora naitwe omu kwombeka ebyombeko by’ekibiina omu nsi yoona arikugira. Naayongyeraho ati: “Eki kikaba nikitaanira kimwe n’ebi twabaire nitukora kumara obwire. Kwonka ab’eishe-emwe bakaikiriza empinduka kandi nikireebwa butunu ngu Yehova naaha emigisha empinduka ezi.” Eki ni kimwe aha by’okureeberaho ebirikutuhamiza ngu Yehova naahwera abaheereza be kukora ebi arikukunda. Butoosha ni kikuru buri omwe kwebuuza ati: ‘Ninsherura obuhabuzi bwa Yehova kandi nyikiriza empinduka ezirikubaho omu kibiina kye?’

8. Samusooni akakora ki ku yaagizire eiriho ry’amaani?

⁸ Noobaasa kuba waashomire ebintu ebindi ebirikutangaaza ebi Samusooni yaakozire . Eizooba rimwe akarwanisa entare yaagiita, reero bwanyima yaita abashaija 30 omuri Ashikelooni orurembo rw’Abafilistia. (Bar. 14:​5, 6, 19) Samusooni akaba naamanya ngu tarikubaasa kukora ebintu nk’ebyo ataine buhwezi bwa Yehova. Ekyo kikareebwa butunu obu yaagira iriho ry’amaani bwanyima y’okwita Abafilistia 1,000. Akakora ki? Omu mwanya gw’okweyesiga kutunga eky’okunywa, akatakira Yehova kumuhwera.—Bar. 15:18.

9. Yehova akagarukamu ata okushaba kwa Samusooni? (Abaramuzi 15:19)

⁹ Yehova akagarukamu okushaba kwa Samusooni omu muringo gw’eky’okutangaaza yaataho eiziba ry’amaizi. Ku yaaherize kuganywa, “omutima gwamugaruka omunda, yaagarukwamu amaani.” (Shoma Abaramuzi 15:19.) Eiziba eryo, rikaba ririho obu Yehova yaahwera nabi Samueli kuhandiika ekitabo ky’Abaramuzi. Abaisraeli abaareebire amaizi ago baine kuba baijukire ngu Yehova naahwera abaheereza be abarikumwesiga omu bwire obugumire.

10. Okusherura obuhwezi bwa Yehova nikitwariramu ki? (Reeba n’ekishushani.)

¹⁰ Naitwe twine kwesiga Yehova kutuhwera n’obu twakuba twine etalanta nari haine ebi tubaasize kuhikiiriza omu buheereza bwe. Twine kuba abacureezi tukaikiriza ngu nitutunga obusinguzi obwabuzima twayesiga Yehova. Nk’oku Samusooni yaatungire amaani bwanyima y’okunywa amaizi ogu Yehova yaamuhaire, naitwe nituhama omu by’omwoyo twateeraho kugasirwa omuri byona ebi Yehova arikutuha.—Mat. 11:28.

11. Nitubaasa kugasirwa tuta omu bi Yehova arikutuha? Ha eky’okureeberaho.

¹¹ Teekateeka ahari Aleksey, omwe aha ab’eishe-emwe omuri Russia orikwemera okuhiiganisibwa kw’amaani. Niki ekimuhweraire kuguma aine okwikiriza kuhami omu mbeera egyo egumire? We n’omukazi we bakaba batwire baine entebeekanisa nungi ey’eby’omwoyo. Naashoboorora ati: “Nkaba niinteeraho kuhamira aha ntebeekanisa yangye y’eby’omwoyo ndikweyegyesa kandi nkashoma Baibuli buri izooba. Buri kasheeshe, nyowe n’omukazi wangye tukaba tushwijuma ekyahandiikirwe kya buri izooba kandi tushaba Yehova.” Eki nitukyegyeraho ki? Omu mwanya gw’okwemanya obwengye, twine kwesiga Yehova. Tuta shi? Turikuteeraho kugira entebeekanisa nungi y’okweyegyesa kandi tukejumba omu mirimo y’Obukama. Reero Yehova naija kutuha emigisha ahabw’okuteeraho kumuheereza. Akaha Samusooni amaani, kandi naitwe naija kugatuha.

12. Enkoragana ya Samusooni na Delila ekaba neetaana eta n’ei yaabaire aine n’abakazi Abafilistia?

¹² Samusooni akaba atahikiriire, n’ahabw’ekyo obumwe akaba naacwamu kubi. Haine obu yaacwamu kubi kikamurugiramu oburemeezi bw’amaani. Bwanyima y’okumara obwire naaheereza nk’omuramuzi, ‘akakunda omukazi ow’omu ruhita rwa Sooreki, owaabaire naayetwa Delila.’ (Bar. 16:4) Enyimaho, akaba ari omu bushwere n’Omufilistiakazi, kwonka Yehova niwe yaikiriize ngu kibeho, “ahakuba akaba naasherura obwiho bw’okurwana n’Abafilistia.” Bwanyima, Samusooni akaza omu nju ya maraaya omuri Gaaza, orurembo rw’Abafilistia. Aha izooba eryo, Yehova akaha Samusooni amaani g’okwekorera enyingi z’eirembo, ekyareetaire orurembo orwo kutagira oburinzi. (Bar. 14:​1-4; 16:​1-3) Kwonka, Samusooni okukunda Delila orikubaasa kuba yaabaire ari Omuisraeli akaba atarikwenda ah’okwihirira kurwanisa Abafilistia.

13. Delila akareetera ata Samusooni kugwa omu kabi?

¹³ Abafilistia bakaha Delila esente nyingi kugira ngu areebye Samusooni. Obundi ahabw’okugira ngu Samusooni akaba naakunda munonga Delila akaremwa kumanya eki yaabaire naayenda kukora. Delila akateeraho emirundi mingi kugyemesereza Samusooni kumugambira obukomooko bw’amaani ge kandi akahendera amugambiire. Eky’obusaasi, Samusooni akeeta omu mbeera eyaamureeteire kufeerwa amaani ge n’okutasiimwa Yehova kumara akaire.—Bar. 16:​16-20.

14. Niki ekyahikire ahari Samusooni ahabw’okwesiga Delila?

 ¹⁴ Samusooni akabonabona munonga ahabw’okwesiga Delila omu mwanya gw’okwesiga Yehova. Abafilistia bakamukwata baamwihamu amaisho. Bakamuta omu kihome omuri Gaaza ahu yaabaire ahemwire abatuuzi baayo, yaaguma naakora omurimo gw’okusa. Bwanyima bakashwaza Samusooni aha mukoro gwabo. Abafilistia bakatambira Dagoni ruhanga waabo ekitambo kihango, orikushusha ngu niwe yaahaireyo Samusooni omu mikono yaabo. Bakamwiha omu kihome baamureeta aha bugyenyi bwabo ‘kubazaanira’ n’okumushungisa.—Bar. 16:​21-25.

15. Samusooni akagaruka yaayoreka ata ngu naayesiga Yehova? (Abaramuzi 16:​28-30) (Reeba ekishushani ekiri aha kipampagare.)

¹⁵ Samusooni akakora enshobe, kwonka tarahanikire. Akasherura oburyo bw’okuhikiiriza obujunaanizibwa bw’okucwekyereza Abafilistia, obu Yehova yaabaire amuhaire. (Shoma Abaramuzi 16:​28-30.) Samusooni akeeshengyereza Yehova ati: Reka “mpoore Abafilistia.” Ruhanga ow’amazima akagarukamu okushaba kwe yaagaruka yaamuha amaani g’omutaano. N’ekyarugiremu, aha murundi ogu Samusooni akaita Abafilistia baingi okukira obundi bwona.

16. Nitubaasa kwegyera ki aha nshobe ei Samusooni yaakozire?

¹⁶ N’obu Samusooni araabe yaatungire oburemeezi ahabw’enshobe ye, akaguma naateeraho kukora ebi Yehova arikukunda. Twakora enshobe tukahanwa nari tukaihwaho obujunaanizibwa, titwine kuhanika. Ijuka ngu Yehova, naaguma atwinemu amatsiko. (Zab. 103:​8-10) N’obu twakukora enshobe, nituguma turi ab’omuhendo ahariwe nka Samusooni.

17-18. Eky’okureeberaho kya Michael nikikukugumya kita? (Reeba n’ekishushani.)

¹⁷ Teekateeka aha ky’okureeberaho ky’ow’eishe-emwe muto orikwetwa Michael. Akaba naayecurenga omu mirimo y’Obukama, ari omuheereza kandi ari payoniya w’obutwire. Kwonka ky’obusaasi, akakora enshobe eyaamureeteire kwihwaho obujunaanizibwa omu kibiina. Naagira ati: “Ekyo kitakabaireho, ebintu bikaba nibigyenda gye omu buheereza bwangye. Bwanyima embeera ekahinduka ahonaaho, naatandika kwereeba nk’otarikubaasa  kugira eki naakora omu kibiina kya Yehova. Nkaba niimanya ngu Yehova tarikubaasa kuntsigaho, kwonka nkaba niinyebuuza yaaba nimbaasa kugaruka kugira omukago murungi nawe n’okumuheereza omu bwijwire nka ira.”

¹⁸ Ekirungi, Michael tarabirugireho. Naayongyeraho ati: “Nkata omutima aha kugaruka kugira omukago murungi na Yehova ndikumugambira buri kimwe omu kushaba, ndikweyegyesa kandi nkateekateeka.” Bwanyima y’obwire, Michael akagaruka yaaheebwa obujunaanizibwa omu kibiina. Hati n’omureeberezi kandi payoniya ow’obutwire. Naagira ati: “Obushagiki obu naatungire na munonga obw’abareeberezi, bukampwera kwetegyereza ngu Yehova naakinkunda. Mbaasize kugaruka kuheereza omu kibiina n’omutima ogutarikweshinja. Eki kinyegyeise ngu Yehova naasaasira omuntu weena orikweteisiza kimwe.” Nitubaasa kugira obwesigye ngu twakora enshobe, reero tukakora kyona eki turikubaasa kutereeza emitwarize yaitu kandi tukagumizamu nitwesiga Yehova naija kutukoresa kandi atuhe emigisha.—Zab. 86:5; Enf. 28:13.

19. Eky’okureeberaho kya Samusooni kyakugumya kita?

¹⁹ Omu kicweka eki, twareeba zimwe aha mbeera ezi Samusooni yaarabiremu. Akaba atahikiriire, kwonka akagumizamu naateeraho kuheereza Yehova, nangwa na bwanyima y’okukora enshobe ari owa Delila Yehova taramutsigireho. Akagaruka yaamukoresa omu muringo gw’omutaano. Yehova akaguma naamureeba nk’omushaija owaabaire aine okwikiriza kw’omutaano, kandi yaamuhandiikisa omu Abaheburaayo eshuura 11 n’abantu abandi abeesigwa. Ka nikitugumya kumanya ngu nituheereza Tataitwe ow’omu iguru, oine rukundo n’ekihika ky’okutuha amaani na munonga twaba twine oburemeezi! Ka tushabe Yehova nka Samusooni owaagizire ati: “Ninkweshengyereza nyijuka, mpa amaani.”—Bar. 16:28.