EKICWEKA EKY’OKWEGA 39
EKYESHONGORO 125 “Abanyambabazi Baine Okushemererwa”
Gira Okushemererwa Kwingi Okurikuruga omu Kuha Abandi
“[Okuha nikureeta okushemererwa] okukira okuheebwa.”—BYAK. 20:35.
ENTIMA
Oku turikubaasa kuguma twine okushemererwa okurikuruga omu kuha abandi, kandi tukakwongyeraho.
1-2. Nitugasirwa tuta ahabw’okuhangwa n’okubaasa kw’okugira okushemererwa okurikuruga omu kuha abandi?
YEHOVA akahanga abantu baine okubaasa kw’okushemererwa munonga baaha abandi, okukira baaheebwa. (Byak. 20:35) Eki shi nikimanyisa ngu titurikushemererwa twaheebwa? Ngaaha. Nitukimanya gye ngu twatunga ekiconco nitwehurira gye. Kwonka, nitugira okushemererwa kwingi twaha abandi. Kandi buzima ni kirungi kugira ngu Yehova akatuhanga omu muringo ogwo. Ahabw’enki?
2 Ahabw’okugira ngu Yehova akatuhanga atyo, nitubaasa kwongyera aha kushemererwa kwaitu. Ekyo nitubaasa kukikora turikusherura oburyo bw’okuha abandi. Buzima omuringo ogu twahangirwemu ka nigutangaaza!—Zab. 139:14.
3. Ahabw’enki Yehova naayetwa Ruhanga w’okushemererwa?
3 Ebyahandiikirwe nibituhamiza ngu okuha abandi nikireeta okushemererwa, n’ahabw’ekyo tikirikututangaaza Baibuli yaayeta Yehova Ruhanga w’okushemererwa. Niwe yaabandize kuha, kandi niwe arikukirayo kuha abandi. Entumwa Paulo akagira ngu ahabwa Yehova, “tuba abahuriire, tugyenda kandi tugumaho.” (Byak. 17:28) Buzima, “engabirano yoona enungi n’ekiconco kyona ekihikire” nibiruga ahari Yehova.—Yak. 1:17.
4. Niki ekiratuhwere kwongyera kugira okushemererwa?
4 Baingi omuriitwe nitwenda kwongyera kugira okushemererwa kwingi okurikuruga omu kuha abandi. Ekyo nitubaasa kukikora turikuba efura nka Yehova. (Efe. 5:1) Twaba nitushwijuma oku turikubaasa kuba efura nka Yehova, Yetegyereze eki turikubaasa kukora, abandi baaba batasiimire eki twabaha. Okumanya ebyo nikiija kutuhwera kuguma twine okushemererwa okurikuruga omu kuha abandi, n’okwongyera kukugira.
BA EFURA NKA YEHOVA
5. Ni bintu ki ebi Yehova arikutuha?
5 Yehova n’efura mu miringo ki? Ka tureebe emwe ahariyo. Yehova naatuha eby’okutubaisaho. Nitubaasa kutagira byona ebi turikwenda, kwonka nitusiima Yehova ahabw’okutuha eby’okutubaisaho. Nk’eky’okureeberaho, naatuha eby’okurya, eby’okujwara, n’oburaaro. (Zab. 4:8; Mat. 6:31-33; 1 Tim. 6:6-8) Mbwenu shi Yehova naatuha eby’okutubaisaho ahabw’okugira ngu aine kukikora? Ngaaha buzima! Mbwenu shi ahabw’enki naabituha?
6. Nitwega ki omuri Matayo 6:25, 26?
6 Yehova naatuha eby’okutubaisaho ahabw’okugira ngu naatukunda. Yetegyereze ebi Yesu yaagambire omuri Matayo 6:25, 26. (Kishome.) Akakoresa eby’okureeberaho by’ebihangirwe. Akagamba aha binyonyi ati: ‘Tibirikubiba, tibirikugyesha, n’obu kwakuba okuhunika omu bitara.’ Kandi akoongyeraho ati: ‘Kwonka Shoimwe ow’omu iguru naabiriisa.’ Bwanyima Yesu akabuuza ati: ‘Mbwenu imwe timurikubikira?’ Eky’okwega? Yehova naareeba abaheereza be nk’ab’omuhendo munonga kukira abantu. Yehova ku araabe naabaasa kureeberera enyamaishwa, naitwe nitubaasa kugira obwesigye ngu naija kutureeberera. Nka nyineeka, Yehova naareeberera ab’eka ye ahabwa rukundo ei abainiire.—Zab. 145:16; Mat. 6:32.
7. Ni mu muringo ki gumwe oku turikubaasa kuba efura nka Yehova? (Reeba n’ekishushani.)
7 Nka Yehova, rukundo neebaasa kutuhiga kuha abandi eby’okwebaisaho. Nk’eky’okureeberaho, haine ow’eishe-emwe nari munyaanyazi-itwe ou orikumanya okyenire eby’okurya nari ebijwaro? Yehova naabaasa kukukoresa kugira eki waaha omuntu ogwo kumuhwera. Abaheereza ba Yehova nibamanywa ahabw’okworeka obufura haabaho ekihikiirizi. Nk’eky’okureeberaho, omu bwire bw’ekigwererezi kya COVID-19 ab’eishe-emwe na banyaanyazi-itwe bakaba nibaha bagyenzi baabo eby’okurya, ebijwaro, n’ebindi bintu by’okukoresa. Kandi baingi aharibo bakahayo kushagika omurimo ogurikukorwa omu nsi yoona. Ekyo kikabaasisa abahikirweho ebihikiirizi omu nsi yoona kuhwerwa. Ab’eishe-emwe abo efura bakagyendera aha buhabuzi oburi Abaheburaayo 13:16 aharikugira hati: “Mutarireka kukorera abantu ebirungi, n’okukwatanisa omu bi mwine, ahakuba ebitambo nk’ebyo nibyo bishemeza Ruhanga.”
Twena nitubaasa kutooreza Yehova omu kuba efura (Reeba akacweka 7)
8. Nitugasirwa tuta omu maani ga Yehova? (Abafilipi 2:13)
8 Yehova naaha amaani. Yehova aine amaani agataine bugarukiro kandi naashemererwa kugabagana n’abaheereza be abeesigwa. (Shoma Abafilipi 2:13.) Oraashabire Yehova kukuha amaani g’okwangira okwohibwa nari kugumisiriza okugyezibwa kw’amaani? Noobaasa kuba waamushabire kukuha amaani g’okuhikiiriza ebi oine kukora omu eizooba. Ku yaagarukiremu okushaba kwawe, noobaasa kuba waikirizaine n’entumwa Paulo owaahandiikire ati: “Amaani agarikukirira kimwe n’aga Ruhanga, ti gaitu.”—2 Kor. 4:7.
9. Nitubaasa kutooreza tuta Yehova omu kukoresa amaani gaitu kuhwera abandi? (Reeba n’ekishushani.)
9 N’obu turaabe tutahikiriire nitubaasa kutooreza Yehova omu ku turikukoresa amaani gaitu kuhwera abandi. Titurikubaasa kuha abandi amaani butunu. Kwonka nitubaasa kukoresa amaani gaitu kubahwera. Nk’eky’okureeberaho, nitubaasa kuhwera Omukristaayo okaikwire nari otarikwebaasa kugura ebintu, nari kukora emirimo y’aha ka. Kyaba nikibaasika, nitubaasa kuhwera omu kuhunduuza Ekyombeko ky’Obukama. Okukoresa amaani gaitu omu muringo ogu nikigasira abaheereza ba Yehova.
Nitubaasa kukoresa amaani gaitu kuhwera abandi (Reeba akacweka 9)
10. Nitubaasa kukoresa tuta ebigambo byaitu kwombeka abandi?
10 Oteebwa ngu ebigambo byaitu byine amaani. Haine ou orikumanya orikubaasa kugasirwa waamusiima oyihire aha mutima? Nari orikwetenga kuhuumurizibwa? Ku araabe ariho, ba niiwe waabanza kugira eki waakora kworeka ngu noomufaho. Noobaasa kumutaayaayira, omuteerere esimu, omwoheerereze kaada, nari obutumwa. Kandi toine kukoresa ebigambo bingi. Ebigambo bikye ebirikuruga aha mutima nibibaasa kuhwera Omukristaayo mugyenzi waawe kuguma ari omwesigwa nari kwehurira gye.—Enf. 12:25; Efe. 4:29.
11. Yehova naakoresa ata obwengye bwe?
11 Yehova naatuha obwengye. Yakobo akahandiika ati: ‘Omuriimwe ku haraabe harimu obuzirwe obwengye, abushabe Ruhanga, oha boona n’omutima ogutarikwima, n’obu kwakuba okweshaanya, kandi naija kubuheebwa.’ (Yak. 1:5) Ebigambo ebi nibyoreka ngu Yehova tarikwesigariza obwengye bwe. Kureka naabuha n’abandi. Kandi yaaba naaha obwengye ‘tarikweshaanya.’ Tarikutureetera kwehurira kubi ahabw’okugira ngu nitwenda atuhe obwengye, kureka naatuhiga kubusherura.—Enf. 2:1-6.
12. Nitubaasa kubagana tuta n’abandi obwengye obu twine?
12 Kandi shi itwe? Nitubaasa kutooreza tuta Yehova tukabagana n’abandi obwengye obu twine? (Zab. 32:8) Hariho emiringo mingi ei turikubaasa kugambira abandi ebi twegire. Nk’eky’okureeberaho, nitukira kutendeka abasya omu kubuurira. Abareeberezi nibahwera abaheereza n’ab’eishe-mwe ababatiziibwe kwega kuhikiiriza obujunaanizibwa bwabo omu kibiina. Kandi abaine obukugu omu kwombeka n’okureeberera Ebyombeko by’ekibiina nibahwera omu kutendeka abarikumanya bikye.
13. Twaba nitutendeka abandi, nitubaasa kutooreza tuta Yehova omu kubagana n’abo obwengye?
13 Abarikutendeka abandi baine kuteeraho kutooreza Yehova omu kubagana n’abandi obwengye. Ijuka ngu Yehova naaha obwengye atarikwetsigirayo. Nikyo kimwe, nitukunda kwegyesa abu turikutendeka ebi turikumanya. Titurikwetsigariza ebi turikumanya turikutiina ngu ou turikutendeka naabaasa kuza omu mwanya gwaitu. Nari kuteekateeka tuti: ‘Tihaine waantendekire! Reka nawe abyeyegyese.’ Abaheereza ba Yehova tibaine kugira emiteekateekyere nk’egyo. Kureka, twine kubagana n’abandi obwengye bwaitu twekundiire, kandi tweheyo kubatendeka. (1 Tes. 2:8) Twine obwesigye ngu twakora tutyo, nabo nibaija ‘kubaasa kubyegyesa abandi.’ (2 Tim. 2:1, 2) Kandi, nitwija kugira okushemererwa okurikuruga omu kuha, tuhwere n’abandi kugira obwengye n’okushemererwa.
WAABA NOOSHUSHA NGU TIBAAKUSIIMA
14. Abantu baingi nibatwaza bata twabooreka obufura?
14 Twayoreka abantu obufura, okukira munonga ab’eishe-emwe na banyaanyazi-itwe, nibatusiima. Nibabaasa kutwoherereza kaada y’okutwebaza nari boorekye okusiima omu muringo ogundi. (Kol. 3:15) Ku barikutusiima nitushemererwa munonga.
15. Niki eki twine kukora abamwe baaba batatusiimire?
15 Amazima gari ngu, abamwe nibabaasa kutooreka ngu nibasiima ebi turikubaha. Kaingi, nitubaasa kukoresa obwire bwaitu, amaani, nari ebintu byaitu, kwonka oshangye ngu abu twabiha tibasiima. Nitubaasa kukora ki kuguma tushemereirwe tutagwiirwe kubi? Ijuka ebigambo by’ekyahandiikirwe kikuru ky’ekicweka eki, Ebyakozirwe 20:35. Okushemererwa oku turikugira ahabw’okuha abandi tikurikurugiirira aha ku barikututwariza. Nitubaasa kuba nitukunda kuha abandi n’obu baakuba batarikutusiima. Tuta shi? Yetegyereze emiringo emwe.
16. Twine kuta mutima ahari ki twaba nituha bandi?
16 Ta omutima aha kutooreza Yehova. Naaha abantu ebintu birungi yaaba nibasiima nari tibarikusiima. (Mat. 5:43-48) Yehova naaraganisa ngu twaha abandi ‘tutaineyo matsiko, obwo ebihembo byaitu nibiija kuba bingi.’ (Luk. 6:35) N’ahabw’ekyo otahwa amaani baaba batakusiimire, Yehova naija kuhamya ngu yaakushuumbusha ahabw’ebi orikukora kuhwera abandi, n’okuba “efura.”—Enf. 19:17; 2 Kor. 9:7.
17. Nitubaasa kuguma tuta twine emiteekateekyere ehikire? (Luka 14:12-14)
17 Omusingye oguri omuri Luka 14:12-14 (Kishome) nigubaasa kutuhwera kuguma twine emiteekateekyere ehikire aha kuha abandi. Ti kigwire kukunira nari kworeka obufura abarikubaasa kutukorera nikyo kimwe. Kwonka shi ku, twayetegyereza ngu tutwire nituha abandi, twine amatsiko ngu nabo nibaija kutuha? Nitubaasa kuteeraho kugyendera aha buhabuzi bwa Yesu, turikuba efura aha muntu ou turikumanya ngu taine kubaasa kw’okutununira. Twakora tutyo nitwija kushemererwa ahabw’okugira ngu twatooreza Yehova. Kandi emiteekateekyere egyo neija kutuhwera kuguma tushemereirwe twaba tutasiimirwe.
18. Niki ekiraatuhwere kutabanganisa ebigyendererwa by’abandi?
18 Yetantare kubangaanisa ebigyendererwa by’abandi. (1 Kor. 13:7) Abandi baaba batatusiimire, nitubaasa kwebuuza tuti: ‘Buzima n’entasiima, nari baayebwa kutusiima kyonka?’ Obundi hariho enshonga ezindi ahabw’enki batatwaza nk’oku twaba nituteekateeka. Abamwe nibabaasa kuba nibasiimira omu mutima kwonka kirikubagumira kukyoreka. Nibabaasa kuba nibashwara kutunga obuhwezi, okukira munonga baaba nibo baabaire nibahwera abandi. Kwonka, rukundo y’Ekikristaayo neija kutuhiga kutabangaanisa ebigyendererwa by’ab’eishe-emwe bagyenzi baitu, kandi tugumizemu kuha tushemereirwe.—Efe. 4:2.
19-20. Ahabw’enki twine kugumisiriza twaba nituha abandi? (Reeba n’ekishushani.)
19 Gumisiriza. Omugabe Sulemaani akahandiika aha kuba efura ati: ‘Mamagiza embibo zaawe aha maizi, bwanyima y’ebiro bingi naija kuzireeba.’ (Mub. 11:1) Ebigambo ebi nibyoreka ngu bamwe nibabaasa kusiima obufura bwaitu “bwanyima y’ebiro bingi.” Teekateeka aha ky’okureeberaho eki.
20 Emyaka mingi enyima, muka omureeberezi wa saketi akooheerereza munyaanyazi-itwe owaabaire aherize kubatizibwa kaada, arikumuhiga kuguma ari omwesigwa. Bwanyima y’emyaka nka munaana, munyaanyazi-itwe akamugarukamu ati: “Naakuhandiikira kukumanyisa ngu ompweraire munonga emyaka egi yoona kukira oku orikuteekateeka.” Akoongyeraho ati: “[Kaada ei waampaire] ekaba eri nungi, kwonka ekyahandiikirwe ekyabaire kirimu nikyo kyankwatsireho kandi tinkakyebwaga.” a Bwanyima y’okugamba bumwe aha buremeezi obu yaarabiremu, akagira ati: “Obumwe nkaba niinyenda kurekyera aho kuheereza Yehova. Kwonka ku naabaire nyijuka ekyahandiikirwe eki waampaire . . . nkaba ngira amaani g’okugumizamu nimpeereza.” Akoongyeraho ati: “Tihaine kintu kyona omu myaka munaana egi ekimpwereire nka kaada n’ekyahandiikirwe ebi waampaire.” Teekateeka aha kushemererwa oku muka omureeberezi wa saketi yaagizire ku yaatungire ebaruha egi “bwanyima y’ebiro bingi.” Naitwe nitubaasa kusiimwa bwanyima y’obwire buraingwa tuherize kukorera omuntu ekintu kirungi.
Nitubaasa kusiimwa bwanyima y’obwire buraingwa tuherize kukorera omuntu ekintu kirungi (Reeba akacweka 20) b
21. Ahabw’enki omaririire kuba efura nka Yehova?
21 Nk’oku kyaba kyagambirweho, Yehova akatuhanga omu muringo gw’omutaano. N’obu turaabe nitukunda kuheebwa, nitwongyera kushemererwa twaha abandi. Nitwehurira gye twahwera Abakristaayo bagyenzi baitu. Kandi nitushemererwa abandi baayoreka ngu nibatusiima. Kwonka, yaaba ou twaha ayoreka ngu naatusiima nari tarikusiima, nitubaasa kushemererwa ahabw’okukora ekihikire. Guma noijuka ngu kyona eki orikuha, ‘[Yehova] naabaasa kukuha bingi munonga kukira ebyo.’ (2 Bus. 25:9) Titurikubaasa kuha abandi ebirikukira ebi Yehova arikutuha. Kandi enshumbuushano ei Yehova arikuha niyo erikukirayo kureeta okushemererwa. Ka tumaririire kugumizamu nituba efura nka Tataitwe ow’omu iguru.
EKYESHONGORO 17 ‘Niinyenda’
a Ekyahandiikirwe eki baahaire munyaanyazi-itwe ni 2 Yohaana 8, ekirikugira kiti: “Mwerinde, mutafeerwa eki mwakoreire, kureka muheebwe ekihembo ekihikire.”
b ENSHOBOORORA Y’EKISHUSHANI: Omu kweshushaniriza oku, muka omureeberezi wa saketi naahandiikira munyaanyazi-itwe eby’okumugumya. Bwanyima y’emyaka mingi, yaatunga kaada y’okusiima.
