1-2. Niki ekirikureetera abaheereza ba Ruhanga okushemererwa? (Yakobo 1:​22-25)

 YEHOVA n’Omwana we omukundwa nibenda ngu tushemererwe. Omuhandiiki wa Zaaburi 119:2 akagira ati: “Baine [okushemererwa] abarinda ebi yaahamize, abamusherura n’omutima gwabo gwona.” Yesu nawe akatuhamiza ati: “Okukira abaine [okushemererwa] n’abahurira ekigambo kya Ruhanga bakakyorobera.”—Luk. 11:28.

² Itwe abaheereza ba Yehova twine okushemererwa. Ahabw’enki? Ahabw’enshonga nyingi, kwonka enshonga emwe nkuru n’ahabw’okugira ngu nitushoma Ekigambo kya Ruhanga buri izooba, kandi tugyendera aha bi turikushoma.—Shoma Yakobo 1:​22-25.

3. Nitugasirwa tuta twagyendera aha bi turikushoma omu Kigambo kya Ruhanga?

³ Hariho emiringo mingi oku turikugasirwa ‘twayorobera Ekigambo.’ Ogw’okubanza, nitumanya ngu ni kimwe aha bintu bikuru ebi twine kukora kusiimwa Yehova. Ekyo nikitureetera okushemererwa. (Mub. 12:13) Twagyendera aha bi turikushoma omu Kigambo kya Ruhanga, nitugira amaka marungi, kandi tugira enkoragana nungi n’Abakristaayo bagyenzi baitu. Ekyo noobaasa kuba okyereebeire butunu. Kandi,  nitwetantara oburemeezi oburikuhika aha batarikworobera obuhabuzi bwa Yehova. Buzima, nitwikirizana n’Omugabe Daudi owaagizire ngu okworobera ebiragiro bya Yehova, eby’okwegyesa bye, n’ebi yaaragiire “harimu ebihembo bingi.”—Zab. 19:​7-11.

4. Ahabw’enki kigumire kworobera Ekigambo kya Ruhanga?

⁴ Amazima gari ngu, butoosha tikyorobi kworobera Ekigambo kya Ruhanga. N’obu turaabe twine bingi by’okukora twine kutaho obwire bw’okushoma n’okwega Baibuli kubaasa kumanya eki Yehova arikwenda ngu tukore. Ka tushwijume obuhabuzi oburikubaasa kutuhwera kushoma Baibuli buri izooba. Nituza n’okureeba ekirikubaasa kutuhwera kuteekateeka aha bi turikushoma, n’oku turikubaasa kubigyenderaho.

TAHO OBWIRE BW’OKUSHOMA EKIGAMBO KYA RUHANGA

5. Ni bintu ki ebirikukira kutwara obwire bwaitu?

⁵ Abaheereza ba Yehova abaingi baine bingi by’okukora. Nitumara obwire turikuhikiiriza obujunaanizibwa bukuru. Nk’eky’okureeberaho, baingi ahariitwe nitukora kwebaisaho n’ab’eka yaitu. (1 Tim. 5:8) Abakristaayo abaingi nibareeberera abanyabuzaare abarwaire nari abakaikwire. Kandi okureeberera amagara gaitu nakyo nikyetengyesa obwire. Oyihireho ebyo byona, twine obujunaanizibwa omu kibiina, n’obujunaanizibwa oburikukira obukuru obw’okubuurira amakuru marungi. Mbwenu shi noobaasa kutunga ota obwire bw’okushoma Baibuli buri izooba, okagiteekateekaho kandi okagyendera aha bi waashoma?

6. Noobaasa kworeka ota ngu nooyebembeza okushoma Baibuli? (Reeba n’ekishushani.)

⁶ Okushoma Baibuli ni kimwe aha ‘birikukira’ obukuru aha Abakristaayo. (Fil. 1:10) Zaaburi ey’okubanza neegamba aha mushaija oine okushemererwa eti: ‘Ashemerererwa ebiragiro bya [Yehova], kandi ebiragiro ebyo, nibyo ateekateekaho nyomushana na nyekiro.’ (Zab. 1:​1, 2) Buzima, ekyo nikyoreka ngu twine kutaho obwire bw’okushoma  Baibuli. Ni bwire ki burungi bw’okugishoma? Nikirugiirira ahari buri muntu. Kwonka, bwine kuba buri obwire oburikukubaasisa kukikora butoosha. Ow’eishe-emwe Victor naagira ati: “Ninkunda kushoma Baibuli kare omu kasheeshe. Tindikukunda kukyera, kwonka omu bwire obwo nibwo harikuba hariho ebintu bikye ebirikuhuzya. Nimba ninteekateeka gye kandi ndikubaasa kutaho omutima.” Kandi iwe? Yebuuze oti: ‘Ni bwire ki burungi obu ndikubaasa kushoma Baibuli?’

TEEKATEEKA AHA BI WAASHOMA

7-8. Niki ekirikubaasa kuturemesa kugasirwa omu bwijwire omu bi turikushoma? Ha eky’okureeberaho.

⁷ Amazima gari ngu nitubaasa kushoma ebintu bingi buri izooba, kwonka tutarikutunga bwire bw’okubiteekateekaho. Oraashomire ekintu, kwonka bwanyima y’akaire okaba otarikwijuka ebi waashoma? Twena ekyo kiratubaireho. Eky’obusaasi, eki nikibaasa n’okubaho twaba nitushoma Baibuli. Nitubaasa kuba tutaireho ekigyendererwa ky’okugira eshuura za Baibuli ezi twashoma buri izooba. Ekyo ni kirungi. Twine kutaho ebigyendererwa, kandi tukabihamiraho. (1 Kor. 9:26) Kwonka kubaasa kugasirwa omu bwijwire omu kushoma Baibuli, twine kukora ekirikukira aha kugishoma.

⁸ Teekateeka aha kugyeragyeranisa oku: Amaizi g’enjura nigetengyesa kubaisaho amagara. Kwonka enjura yaagwa nyingi omu bwire bukye, eitaka nirigira amaizi maingi. Ekyo kyabaho, enjura nyingi neeba etaine mugasho. Nikiba nikyetengyesa obwire amaizi kushenshera omu itaka kugira ngu ebimera bigagasirwemu. Nikyo kimwe, twine kwetantara kushoma Baibuli turikurahukiiriza, tukabura kuteekateeka, kwijuka, n’okugyendera aha bi twashoma.—Yak. 1:24.

9. Twine kukora ki twaba twine omuze gw’okushoma Baibuli turikurahukiiriza?

⁹ Obumwe nooyeshanga orikurahukiriza waaba nooshoma Baibuli? Mbwenu shi oine kukora ki? Yetware. Teeraho kuteekateeka aha bi orikushoma nari ebi waashoma. Eki tikigumire kukora. Noobaasa kwongyera aha bwire obu orikumara nooyeyegyesa kugira  ngu obaase kuteekateeka aha bi waashoma. Nari noobaasa kushoma emishororongo mikye kugira ngu otungye obwire bw’okugiteekateekaho. Victor owaaba yaagambirweho naagira ati: “Ninshoma ebintu bikye, obundi nk’eshuura emwe. Kandi ahabw’okugira ngu ninshoma kare omu kasheeshe, nimbaasa kuguma ninteekateeka aha bi naashoma eizooba ryona.” Kyona eki oraacweramu kukora, ni kikuru kushomera aha rurengo oru orikubaasa kugasirwa omu bi orikushoma.—Zab. 119:97; reeba akabokusi “ Ebibuuzo by’Okuteekateekaho.”

10. Ha eky’okureeberaho kworeka oku orikubaasa kugyendera aha bi orikwega. (1 Abatesalonika 5:​17, 18)

¹⁰ Waacwamu kushoma Baibuli, okataho n’obwire obu oraamare noogishoma, hamya ngu waasherura n’oburyo bw’okugyendera aha bi orikushoma. Waaba nooshoma Baibuli yebuuze oti: ‘Nimbaasa kugyendera nta aha bi naashoma hati nari omu biro by’omumaisho?’ Ka tugire ngu waashoma 1 Abatesalonika 5:​17, 18. (Kishome.) Bwanyima y’okushoma emishororongo egyo, noobaasa kwemereramu oteekateekye aha mirundi ei orikushaba, n’omuringo ogu orikushabamu. Kandi noobaasa n’okuteekateeka aha bintu ebi orikwesiimira. Reero ocwemu kusiima Yehova ahabw’ebintu bishatu aha bi waateekateekaho. N’obu waakumara obwire bukye orikuteekateeka, nikiija kukuhwera kuhurira n’okworobera Ekigambo kya Ruhanga. Teekateeka oku orikugasirwa waagumizamu nookora ekintu nikyo kimwe buri izooba aha mishororongo endiijo ya Baibuli ei orikushoma. Buzima, noija kwongyera kworobera Ekigambo kya Ruhanga. Kwonka shi ku waakuba nooreeba ngu oine kukora empinduka nyingi?

TAHO EBIGYENDERERWA BIRINGANIIRE

11. Ahabw’enki obumwe noobaasa kureeba ngu oine kukora empinduka nyingi? Ha eky’okureeberaho.

¹¹ Waashoma Baibuli, kandi okasherura oburyo bw’okugyendera aha buhabuzi bwayo, noobaasa kureeba ngu oine kukora empinduka nyingi. Teekateeka aha mbeera egi. Ka tugire ngu eri izooba omu kushoma Baibuli waayega aha kushoroora. (Yak. 2:​1-8) Oyetegyereza ngu oine kwongyera kutwariza gye abandi, reero ocwamu kukora empinduka zimwe. Buzima ekyo ni kirungi. Kandi nyenkyakare oshoma emishororongo erikukwata aha bukuru bw’okurinda emigambire yaawe. (Yak. 3:​1-12) Oyetegyereza ngu obumwe emigambire yaawe ti mirungi. N’ahabw’ekyo omaririra kugamba ebirikwombeka. Reero omu kushoma Baibuli eizooba eririkukurataho oyega aha kurabura kw’okutaba  munywani w’ensi. (Yak. 4:​4-12) Oyetegyereza ngu oine kwegyendesereza waaba nootoorana eby’okweshemeza. Aha kiro kya kana, noobaasa kureeba ngu oine kukora empinduka nyingi.

12. Ahabw’enki otaine kuhwa amaani waaba nooshoma Baibuli okeegyereza ngu oine kukora empinduka? (Reeba n’obugambo obw’ahansi.)

¹² Otahwa amaani waareeba ngu oine kukora empinduka nyingi. Ekyo nikyoreka ngu oine ebigyendererwa birungi. Omuntu omucureezi, kandi ow’amazima naashoma Ebyahandiikirwe n’ekigyendererwa ky’okumanya ahu aine kukora empinduka. a Kandi, ijuka ngu okujwara “omuntu omusya” n’ekintu eki oine kugumizamu n’okukora. (Kol. 3:10) Niki ekiraakuhwere kuguma nooyorobera Ekigambo kya Ruhanga?

13. Noobaasa kutaho ota ebigyendererwa biringaniire? (Reeba n’ekishushani.)

¹³ Omu mwanya gw’okuteeraho kugyendera ahari byona ebi waashoma, cwamu kutaho ebigyendererwa biringaniire. (Enf. 11:2) Teeraho kukora eki: Handiika ebi orikwenda kuhinduramu, bwanyima tooranamu kimwe nari bibiri, reero ebindi obikoreho obundi. Niki eki orikubaasa kutandikana nakyo?

14. Noobaasa kutandika na bigyendererwa ki?

¹⁴ Noobaasa kucwamu kutandika n’ekigyendererwa ekyorobi kuhikaho, nari ekirikwetengyesa munonga. Waaheza kucwamu eki oraakoreho condooza omu bitabo byaitu, obundi orikukoresa Watch Tower Publications Index nari Akatabo k’Okucondooza ak’Abajurizi ba Yehova. Shaba Yehova kukuha ekyetengo n’amaani g’okukora aha kigyendererwa kyawe. (Fil. 2:13) Reero oteereho kugyendera aha bi waayega. Waahika aha kigyendererwa  kimwe noija kugira ekihika ky’okukora n’aha kindi. Kandi, nikiija n’oku kworobera kukora empinduka ezindi omu mitwarize y’Ekikristaayo.

MWIKIRIZE EKIGAMBO KYA RUHANGA ‘KUKORA OMURIIMWE’

15. Abaheereza ba Yehova nibataana bata aha bantu abandi abarikushoma Baibuli? (1 Abatesalonika 2:13)

¹⁵ Abantu abamwe nibagira ngu bashomire Baibuli emirundi mingi. Kwonka shi nibaikiriza ebihandiikirwemu? Nibagyendera aha buhabuzi bwayo, kandi baakora empinduka? Ngaaha, tikwo kiri. Kwonka abaheereza ba Yehova bo, okushushana n’Abakristaayo ab’ekyasha ky’okubanza, nitwikiriza Baibuli “nk’Ekigambo kya Ruhanga.” Kandi, nituteeraho nk’oku turikubaasa kugyendera aha buhabuzi bwayo.—Shoma 1 Abatesalonika 2:13.

16. Niki ekirikubaasa kutuhwera kworobera Ekigambo?

¹⁶ Butoosha tikyorobi kushoma n’okugyendera aha Kigambo kya Ruhanga. Nitubaasa kugumirwa kutunga obwire bw’okukishoma. Nari nitubaasa kushoma turikurahukiiriza tubure kuteekateeka aha bi twashoma. Kandi obumwe nitubaasa kushanga ngu twine kukora empinduka nyingi. Kwonka, nitubaasa kusingura oburemeezi obwo bwona turikuhwerwa Yehova. Ka tumariirire kwikiriza obuhwezi obu arikutuha kugira ngu tutaba abarikuhurira baakeebwa, kureka abarikukyorobera. Hatariho kubangaanisa twayongyera kushoma Ekigambo kya Ruhanga, kandi tukagyendera aha bi turikushoma nitwija kushemererwa.—Yak. 1:25.