1. Niki ekiri hakye kubaho?

 TURI omu bwire obu harikubaho empinduka nyingi. Juba, Yesu naija kucwera buri omwe orubanja. Yesu akaha abeegi be “akamanyiso” k’okwija kwe “n’ak’obunaku obu ensi egi erihweraho.” (Mat. 24:3) Obunabi obu buri omuri Matayo eshuura 24 na 25, Mako eshuura 13 na Luka eshuura 21.

2. Nituza kugamba ahari ki omu kicweka eki, kandi ahabw’enki ekyo kiraatuhwere?

² Yesu akaha okurabura arikukoresa enfumu ishatu. Enfumu ey’entaama hamwe n’embuzi, ey’abaishiki ab’obwengye n’abashema, n’ey’etalanta. Buri emwe neetuhwera kwetegyereza oku emitwarize y’omuntu eine akakwate n’oku araacwerwe orubanja. Twaba nitushwijuma enfumu ezo, ka tuteereho kwetegyereza amashomo agu turikwega, n’oku turikubaasa kugagyenderaho. Ka tutandikye n’enfumu ey’entaama hamwe n’embuzi.

ENTAAMA HAMWE N’EMBUZI

3. Yesu naija kucwera ryari abantu orubanja?

³ Omu nfumu ya Yesu ey’entaama n’embuzi, akagira ngu naija kucwera abantu orubanja arikwihirira aha ku barikutwara amakuru marungi, n’oku barikushagika beene ishe entoore. (Mat. 25:​31-46) Naija kubacwera orubanja omu ‘kubonabona  kwingi,’ Haramagedoni eri haihi kutandika. (Mat. 24:21) Nk’oku omuriisa arikushoroora entaama omu mbuzi, Yesu naija kwiha abarikushagika entoore omuri abo abatarikubashagika.

4. Kurugiirira ahari Isaaya 11:​3, 4, ahabw’enki nitubaasa kuhamya ngu Yesu naija kucwa emanja omu buringaniza? (Reeba n’ekishushani. )

⁴ Obunabi bwa Baibuli nibworeka ngu Yehova akatoorana Yesu kucwa emanja, kandi naija kuzicwa omu kuhikiirira. (Shoma Isaaya 11:​3, 4.) Naija kushwijuma emitwarize y’abantu, emiteekateekyere, n’emigambire yaabo, otwariiremu oku baatwariize entoore. (Mat. 12:​36, 37; 25:40) Yesu naija kuba naamanya owaashagikire beene ishe entoore n’omurimo gwabo. a Omuringo gumwe mukuru ogu abari nk’entaama barikushagika entoore, n’okwejumba omu murimo gw’okubuurira. Abarikwejumba omu murimo ogwo nibaija kucwerwa orubanja ‘nk’abahikiriire,’ kandi bagire omugisha gw’okutunga ‘amagara agatahwaho’ omu nsi. (Mat. 25:46; Kush. 7:​16, 17) Ekyo ka n’ekiconco ky’omuhendo ahabw’abo abarikuguma bari abeesigwa! Abaraagume bari abeesigwa omu kubonabona kwingi na bwanyima yaakwo, amaziina gaabo nigaija kuguma ‘omu kitabo ky’amagara.’—Kush. 20:15.

5. N’eishomo ki eriri omu nfumu y’entaama hamwe n’embuzi, kandi neekwata ahari baahi?

⁵ Yoreka ngu ori omwesigwa. Enfumu ya Yesu ey’entaama hamwe n’embuzi neekwata aha baine amatsiko g’okutuura omu nsi. Nibooreka okwikiriza kwabo barikuhwera beene ishe Kristo omu murimo gw’okubuurira, kandi barikworobera abashaija bakye entoore obu Yesu atooraine kutwebembera. (Mat. 24:45) Kwonka abaine amatsiko g’okuza omu iguru nabo baine kuta omutima aha kurabura okuri omu nfumu egyo. Ahabw’enki? Ahakuba Yesu naafayo aha mitwarize yaabo, emiteekateekyere, n’emigambire yaabo. Nabo baine kworeka ngu n’abeesigwa. Nangwa, Yesu akagamba ezindi nfumu ibiri kurabura abashukirweho omwoyo gurikwera. Kandi nizishangwa omuri Matayo eshuura 25. Hati ka tugambe aha nfumu y’abaishiki ab’obwengye n’abashema.

ABAISHIKI AB’OBWENGYE N’ABASHEMA

6. Abaishiki bataano bakooreka bata ngu n’ab’obwengye? (Matayo 25:​6-10)

⁶ Omu nfumu y’abaishiki, Yesu akagamba aha baishiki ikumi abaagiire kubugana kishwera. (Mat. 25:​1-4) Boona bakaba baine amatsiko g’okugyenda na kishwera aha bugyenyi bwe. Yesu akagira ngu bataano aharibo bakaba bari “ab’obwengye,” kandi abandi bataano bari “abashema.” Abaishiki ab’obwengye bakaba betebeekaniise, kandi barikureeba. Bakaba bamaririire kutegyereza kishwera kuhitsya obu araije, n’obu kyakubaire nikyetengyesa kutegyereza kuhitsya omu itumbi. N’ahabw’ekyo, bakatwara etabaaza kubamurikira omu mwirima, n’amajuta omu cupa kugira ngu kishwera yaakyerererwa etabaaza zaabo zigume nizaaka. (Shoma Matayo 25:​6-10.) Kishwera ku yaizire, abaishiki ab’obwengye bakataaha nawe omu nju omu bugyenyi bwe. Nikyo kimwe, Abakristaayo entoore abarikuguma nibareeba kandi bari abeesigwa kuhitsya obu Kristo araije, nibaija kugira omugisha gw’okutaaha na Yesu omu Bukama bwe omu iguru. b (Kush. 7:​1-3) Kandi shi abaishiki bataano abashema?

7. Niki ekyahikire aha baishiki bataano abashema, kandi ahabw’enki?

 ⁷ Okutashushana n’abaishiki bataano ab’obwengye, abaishiki abashema bakaba batetebeekaniise obu kishwera yaija. Etabaaza zaabo zikaba ziri haihi kuraara, kandi bakaba batareetsire majuta agandi. Ku baamanyire ngu kishwera ari haihi, bakaza kugura amajuta agandi. Ku baabaire batakagarukire, kishwera yaija. Omu bwire obwo, abaishiki ‘abaabaire beetebeekaniise bakataaha nawe omu nju omu bugyenyi bw’okushwera, orwigi rwakingwa.’ (Mat. 25:10) Abaishiki abashema ku baagarukire barikwenda kutaahamu, kishwera akabagira ati: “Tindikubamanya.” (Mat. 25:​11, 12) Bakaba batetebeekaniise kutegyereza kishwera kuhitsya yaija. Entoore nibeega eishomo ki?

8-9. Entoore nibeega eishomo ki omu nfumu y’abaishiki ab’obwengye n’abashema? (Reeba n’ekishushani.)

⁸ Yoreka ngu oyetebeekaniise. Yesu akaba atarikumanyisa ngu nihaija kubaho ebicweka bibiri by’entoore, abeetebeekaniise kutegyereza kuhitsya aha mperu, n’abateetebeekaniise. Kureka, akaba naayoreka ekirikubaasa kubaho entoore baaba bateetebeekaniise kugumisiriza kuhitsya aha muheru. Ekyo kyabaho tibarikwija kutunga ekihembo kyabo. (Yoh. 14:​3, 4) Ekyo ka n’eky’obusaasi! Yaaba twine amatsiko g’okutuura omu iguru nari omu nsi, twine kuta omutima aha kurabura okuri omu nfumu egyo. Buri omwe ahariitwe aine kuguma naareeba, ayetebeekaniise, kandi amaririire kugumisiriza kuhitsya aha muheru.—Mat. 24:13.

⁹ Bwanyima ya Yesu kugamba aha nfumu y’abaishiki kworeka obukuru bw’okwetebeekanisa n’okuguma nitureeba, akagamba n’aha y’etalanta, erikworeka obukuru bw’okuba abeeziriki.

ETALANTA

10. Abambari babiri bakooreka bata ngu n’abeesigwa? (Matayo 25:​19-23)

¹⁰ Omu nfumu y’etalanta, Yesu akagamba aha bambari babiri abaabaire bari  abeesigwa ahari mukama waabo, n’omwe owaabaire atari mwesigwa. (Mat. 25:​14-18) Abambari babiri bakooreka ngu n’abeesigwa barikukora n’amaani kukanyitsa obutungi bwa mukama waabo. Mukama waabo atakagiire omu nsi endiijo, akabatsigira etalanta nari esente nyingi. Abambari abo bakaba bari abeeziriki, kandi bakazikoresa gye. Niki ekyarugiremu? Mukama waabo ku yaagarukire, akashanga bashagizemu kabiri etalanta ezi yaabatsigiire. Akabasiima munonga, kandi ‘baataaha omu kushemererwa kwa mukama waabo.’ (Shoma Matayo 25:​19-23.) Kandi shi omwambari owa kashatu? Akakoresa ki etalanta ei mukama we yaamuhaire?

11. Niki ekyahikire aha mwambari “omweremwa,” kandi ahabw’enki?

¹¹ Omwambari owa kashatu akatunga etalanta emwe, kwonka akaba ari “omweremwa.” Mukama we akaba naayenda ngu agikorese gye. Omu mwanya gw’ekyo, akagiziika omu itaka. Mukama we ku yaagarukire akaba ataine magoba goona g’okumuha. Akaba ataine miteekateekyere mirungi. Omu mwanya gw’okushaba okusaasirwa ahabw’okutakanyitsa butungi bwa mukama we, akamweta “omuntu ogumire.” Omwambari ogwo tarasiimirwe mukama we, kandi etalanta bakagimwaka, baamunaga aheeru.—Mat. 25:​24, 26-30.

12. Abambari babiri abeesigwa nibajwekyera baahi obunaku obu?

¹² Abambari babiri abeesigwa nibajwekyera Abakristaayo entoore abeesigwa. Mukama waabo, Yesu naabeeta ‘kutaaha omu kushemererwa kwe.’ Nibatunga omugabo gwabo omu iguru omu kuzooka kw’okubanza. (Mat. 25:​21, 23; Kush. 20:5b) Kandi eky’okureeberaho kibi ky’omwambari omweremwa, nikirabura abashukirweho omwoyo gurikwera. Kita shi?

13-14. Entoore nibeegyera ki aha nfumu y’etalanta? (Reeba n’ekishushani.)

¹³ Yoreka ngu ori omweziriki. Omu nfumu y’etalanta, n’ey’abaishiki ikumi, Yesu akaba atarikugira ngu entoore bakaba nibaija kuba abeeremwa. Kureka, akaba naayoreka ekyabaire nikiza kubaho omujinya  gwabo gwatuuba. Bakaba nibaija kuremwa ‘kuhamya okwetwa kwabo n’okutooranwa kwabo,’ kandi bakaba batarikwija kwikirizibwa kutaaha omu Bukama bw’omu iguru.—2 Pet. 1:10.

¹⁴ Enfumu ya Yesu ey’abaishiki ikumi hamwe n’ey’etalanta, nizooreka butunu ngu Abakristaayo entoore baine kuba betebeekaniise, nibareeba, kandi bari abeeziriki. Kwonka shi haine ekindi eki Yesu yaagambire kurabura entoore? Eego! Ebi yaagambire omuri Matayo 24:​40, 41 biine akakwate n’okucwera entoore orubanja okw’ahamuheru.

N’OHA ‘ORAATWARWE’?

15-16. Matayo 24:​40, 41 nihooreka hata ngu ni kikuru entoore kuguma nibareeba?

¹⁵ Yesu atakagambire enfumu ishatu ezo, akagamba aha kucwera entoore orubanja okw’ahamuheru okwabaire nikwija kworeka orikusiimwa. Akagamba aha bashaija babiri abarikukora hamwe omu musiri n’abakazi babiri abarikusa aha rubengo. Omu mbeera zombi, abantu abo bakaba nibareebeka nk’abarikukora omurimo gurikushushana, kwonka Yesu akagira ngu ‘omwe naija kutwarwa ondiijo atsigweho.’ (Shoma Matayo 24:​40, 41.) Reero akahiga abakuratsi be ati: “Mugume nimureeba, ahakuba timurikumanya kiro eki Mukama waanyu ariiziraho.” (Mat. 24:42) Yesu akagaruka yaagamba ekintu nikyo kimwe bwanyima y’okugamba enfumu ey’abaishiki ikumi. (Mat. 25:13) Mbwenu shi ebi yaagambire biine akakwate? Obundi. Entoore abaabuzima, kandi abaraagume bari abeesigwa nibaija ‘kutwarwa’ Yesu omu Bukama bw’omu iguru.—Yoh. 14:3.

¹⁶ Yoreka ngu nooreeba. Abashukirweho omwoyo gurikwera abataraagume nibareeba omu by’omwoyo tibaraateeranwe hamwe ‘n’entoore.’ (Mat. 24:31) Kandi, n’abaheereza ba Ruhanga abaine amatsiko g’okutuura omu nsi, baine kugyendera aha kurabura kwa Yesu okwo, bakaguma nibareeba, kandi bari abeesigwa.

17. Ahabw’enki tutaine kwehurira kubi Yehova yaashuka omwoyo gurikwera aha muntu omu bunaku obu?

¹⁷ Hati nitumanya gye Yehova kandi nitwesiga emicwere ye y’emanja. Titurikwehurira kubi ahabw’okugira ngu Yehova atooraine abeesigwa omu bunaku bwaitu kuba entoore. c Nitwijuka eki Yesu yaagambire aha bakozi abaizire aha shaaha y’eikumi-n’emwe omu ky’okureeberaho ky’omusiri gw’emizaabibu. (Mat. 20:​1-16) Abaayesirwe bwanyima kukora omu musiri, bakashashurwa esente ezirikwingana n’eza baabandizeyo. Nikyo kimwe, oyihireho obu entoore barikutooranwa, baaguma bari abeesigwa nibaija kuheebwa omugabo gwabo omu iguru.

TA OMUTIMA AHA KURABURA

18-19. Twayega mashomo ki na kuraburwa ki?

¹⁸ Twayega ki? Enfumu y’entama n’embuzi neeyoreka ngu abaine amatsiko g’okutuuraho ebiro byona omu nsi, baine kuguma bari abeesigwa kandi bahamiire ahari Yehova hati, n’omu kubonabona kwingi okuri haihi kubaho. Omu bwire obwo, Yesu naija kucwera abeesigwa orubanja nk’abahikire ‘kutaaha omu magara agatahwaho.’—Mat. 25:46.

¹⁹ Kandi twashwijuma enfumu ibiri ezaaba nizirabura entoore. Omu nfumu ya Yesu ey’abaishiki ikumi, bataano bakooreka ngu n’ab’obwengye. Bakaba betebeekaniise kandi barikureeba, bategyereize kishwera kuhitsya obu araije. Kwonka abaishiki abashema bakaba batetebeekaniise. N’ahabw’ekyo kishwera  akanga kubaikiriza kutaaha omu bugyenyi bwe. Naitwe twine kuba twetebeekaniise kutegyereza kuhitsya obu Yesu araamareho entebeekanisa y’obusingye obu. Kandi, omu nfumu y’etalanta twareeba abambari babiri abeesigwa abaabaire nibakora n’amaani kandi abeeziriki. Bakakorera munonga mukama waabo kandi akabasiima. Kwonka, omwambari omweremwa akabingwa. Eky’okwega? Twine kuguma twine bingi by’okukora omu kuheereza Yehova kuhitsya aha muheru. Kandi, twahendera turikureeba oku entoore baine kuguma nibareeba, kugira ngu Yesu ‘abatware’ omu iguru kutunga omugabo gwabo. Bainiire ekihika okuteeranwa kwabo omu iguru. Bwanyima y’orutaro rwa Haramagedoni, nibaija kuba omu bugyenyi bwa Yesu, Omwana gw’entaama.—2 Tes. 2:1; Kush. 19:9.

20. Yehova naija kukorera ki abarikwikiriza okurabura kwe?

²⁰ N’obu okucwa orubanja kuri haihi kubaho, tihaine ekiine kututiinisa. Twaguma turi abeesigwa, Tataitwe ow’omu iguru naija kutuha “amaani agarikukirira kimwe” kugira ngu tubaase kusingura “n’okwemerera omu maisho g’Omwana w’omuntu.” (2 Kor. 4:7; Luk. 21:36) Yaaba twine amatsiko g’okutuura omu iguru nari omu nsi, nitwija kushemeza Tataitwe twaikiriza okurabura okuri omu nfumu za Yesu. Ahabw’embabazi za Yehova ezitatushemereire, amaziina gaitu nigaija ‘kushangwa gahandiikirwe omu kitabo’ ky’amagara.—Dan. 12:1; Kush. 3:5.