Nkazaarwa 1934. Abazaire bangye bakaruga Switzerland baafurukira Timmins, tauni y’ebirombe omuri Ontario, Canada. Nka 1939, maawe akatandika kushoma magaziini y’Omunaara gw’Omurinzi n’okuza omu nteerane z’Abajurizi ba Yehova, kandi twena abaana akaba atutwara. Omu bwire bukye, akaba Omujurizi wa Yehova.

Maawe ku yaabaire Omujurizi wa Yehova, tata tarashemereirwe, kwonka maawe akaba naakunda amazima, kandi akaba amaririire kugahamiraho. Ekyo akakikora n’omu myaka ya 1940 obu omurimo gw’Abajurizi ba Yehova gwabaire guzibiirwe omuri Canada. Kandi butoosha akaba naatwariza tata omu muringo gw’embabazi n’ekitiinisa, n’obu araabe yaabaire naamujuma. Eky’okureeberaho kye kirungi kikatuhwera twena abaana mushanju kwikiriza amazima. Ekirungi, tata akahindura emitwarize ye mporampora, kandi yaatandika kututwariza omu muringo gw’embabazi.

Omu Kwamunaana 1950, nkaza aha ruteerane oruhango Theocracy’s Increase omu rurembo New York. Bwanyima y’okubugana ab’eishe-emwe na banyaanyazi-itwe kuruga omu mahanga agandi, n’okuhurira abaarugire omu Ishomero rya Gilead barikubuuzibwa, nkagira ekihika ky’okukora bingi omu buheereza. Nkamariirira kuza omu buheereza obw’obutwire. Ahonaaho ku naagarukire omu ka, nkaijuza foomu y’okuba payoniya. Ofiisi y’eitaagi eya Canada ekangarukamu, erikugira ngu nyine kubanza naabatizibwa. Ekyo nkakikora Okwaikumi 1, 1950. Bwanyima y’okwezi kumwe, nkaba payoniya ow’obutwire, kandi nkooherezibwa kuheereza omuri Kapuskasing. Tauni egyo ekaba eri hare n’ahu naabaire niintuura.

 Omuri 1951, ofiisi y’eitaagi ekanshaba ababuurizi abaabaire nibagamba Orufaransa kuza omu kicweka ekirikukoresa orurimi orwo ekya Quebec, ahu ababuurizi baabaire nibeendwa munonga. Nkakura ningamba Orufaransa n’Orungyereza, n’ahabw’ekyo nkaikiriza, kandi nkooherezibwa Rouyn. Tihaine ou naabaire niimanya omu kicweka ekyo. Eki naabaire nyine kyonka n’endagiriro ei naagambaho aha kutandika. Kwonka buri kimwe kikagyenda gye. Nyowe na Marcel tukaba abanywani. Nkakunda kuheereza omuri Quebec kumara emyaka ena, kandi aha muheru gw’emyaka egyo nkaba payoniya ow’omutaano.

Obu naabaire ndi Quebec, nkashemererwa ku naatungire ebaruha erikunyeta omu Ishomero rya Gileadi erya 26 omuri South Lansing, New York. Tukahendera eishomero Okwakabiri 12, 1956, kandi nkooherezibwa, Ghana b, omuri West Africa. Kwonka ntakagyenzire, nkaba nyine kubanza kugaruka Canada kumara “saabiiti nkye” kuhitsya naatunga ebihandiiko ebyabaire nibinyikiriza kuzayo.

Nkategyereza ebihandiiko ebyo kumara ameezi mushanju ndi Toronto. Omu bwire obwo, ab’eka ya Cripps bakanyikiriza kutuura nabo, kandi nyowe na muhara waabo Sheila tukamanyana, twakundana. Ku naabaire ndi hakye kumugamba obugyenyi, ebihandiiko byangye bikaija. Nyowe na Sheila tukashaba aha nshonga egyo, twacwamu ngu nze kuheereza. Kwonka tukaguma nituhandikiirana amabaruha kureeba yaaba kyabaire nikiija kubaasika kutaaha hamwe omu bushwere omu biro by’omumaisho. Okwo kukaba kuri okucwamu kutoorobi, kwonka bwanyima tuketegyereza ngu kukaba kuri okucwamu kuhikire.

Bwanyima y’okumara nk’okwezi omu rugyendo ndikugyendera omu gaari y’omwika, omu meeri erikutwara ebintu, n’omu nyonyi, nkahika Accra, Ghana. Ku naahikireyo nkatooranwa kuheereza nk’omureeberezi wa disiturikiti. Ekyo kikaba nikitwariramu okugyenda omuri Ghana yoona n’omuri Ivory Coast (hati erikumanywa nka Côte d’Ivoire) na Togoland (hati erikumanywa nka Togo).  Nkaba nkira kugyenda nyenka omu motoka ei ofiisi yaabaire empaire. Kandi nkashemererwa munonga ndikutaayaayira ab’eishe-emwe.

Aha wiikenda, nkaba mba nyine obujunaanizibwa aha nteerane empango. Tukaba tutaine Byombeko by’okugiriramu enteerane ezo. N’ahabw’ekyo, ab’eishe-emwe bakaba bombekyesa emigano, reero bashakaaza amataagi g’emikindo kugira ngu abantu batateerwa omushana. Ahabw’okugira ngu aha nteerane ezo hakaba hatariho furiigi, ab’eishe-emwe bakaba barindira amatungo haihi, agu baabaire babaaga kuriisa abantu.

Aha nteerane ezo hakaba habaho ebintu birikushetsya. Eizooba rimwe Herb Jennings c omumiisani mugyenzi wangye ku yaabaire naaha orubazo, enimi ekaruga ow’eiteekyero yaayemerera omu maisho ga siteegi. Ow’eishe-emwe Herb akarekyera aho kugamba, n’enimi yaashoberwa. Kwonka ab’eishe-emwe bana b’amaani bakagikwata baagigarura ow’eiteekyero, abaabaire bahurikiize barikubateerera akaari.

Omu saabiiti ey’enteerane empango, nkaba nyoreka vidiyo The New World Society in Action omu byaro ebyabaire biba biri haihi. Kubaasa kukora ekyo, nkaba mpanika omwenda gurikwera aha bikoondo bibiri nari emiti ebiri, reero mboreka vidiyo. Abantu bakakunda vidiyo egyo. Baingi aharibo, gukaba guri omurundi gwabo gw’okubanza kureeba vidiyo. Bakaba bateera engaro, ku baabaire baareeba abantu nibabatizibwa. Vidiyo egyo ekahwera abantu abaagireebire kwetegyereza ngu omu nsi yoona turi ekibiina ekiine obumwe.

Bwanyima y’okumara emyaka ebiri omuri Africa, nkaba nyine ekihika ky’okuba aha ruteerane oruhango orurikubamu ab’amahanga agandi orwa 1958 omu rurembo New York. Nkashemererwa kureeba Sheila, owaarugire Quebec, ahu yaabaire naaheereza nka payoniya ow’omutaano. Tukaba tutwire nituhandiikirana amabaruha, kwonka ahabw’okugira ngu tukagaruka twareebana, nkamushaba kuza nawe omu bushwere, kandi akaikiriza. Nkahandiikira ow’eishe-emwe Knorr d ndikumushaba kwikiriza Sheila kuza omu Gileadi, kandi anyegaiteho omuri Africa. Akaikiriza. Bwanyima Sheila akaija omuri Ghana, kandi tukagaitirwa Accra, Okwaikumi 3, 1959. Tukareeba ngu Yehova akatuha emigisha ahabw’okwebembeza okumuheereza.

Omuri 1961 tukooherezibwa omu eihanga rya Cameroon. Nkaba nyine bingi by’okukora n’okwega, ahabw’okugira ngu nkaba nshabirwe kutandikaho ofiisi y’eitaagi ensya n’okureeberera emirimo y’Obukama omu eihanga eryo. Omuri 1965 tukamanya ngu Sheila aine enda. Amazima gari ngu, ku naamanyire ngu twaza kuba abazaire kikantwarira obwire kukiikiriza. Kwonka ku twatandikire kugirira ekihika obujunaanizibwa bwaitu obusya n’okukora entebeekanisa z’okugaruka Canada, tukagwerwa akagwe.

Sheila akarugwamu enda. Omushaho akatugira ngu omwana waitu owaabaire atakazairwe akaba ari omwojo. Ekyo kikabaho emyaka erikurenga 50 enyima, kwonka titukakyebwaga. N’obu turaabe twayehuriire kubi ahabw’ekyabaireho tukaguma omu buheereza bwaitu, obu twabaire nitukunda munonga.

Ab’eishe-emwe omuri Cameroon bakaba nibakira kuhiiganisibwa ahabw’okutagwera rubaju omu by’obutegyeki. Embeera ekongyera kuba mbi omu bwire bw’okuteerera mukuru w’eihanga akaruuru. Okwakataano 13, 1970,hakabaho ekintu eki twabaire tutarikuteekateeka. Omurimo gw’Abajurizi ba Yehova gukazibirwa. Gavumenti ekeegaruriza ofiisi y’eitaagi ensya ei twabaire tumaziremu ameezi ataano gonka. Omu Saabiiti emwe, abamiisani boona omu ihanga bakabingwa otwariremu nyowe na Sheila. Kikaba kigumire kutsigaho ab’eishe-emwe na banyaanyazi-itwe ahakuba tukaba nitubakunda munonga kandi twerarikirire aha kyabaire nikiija kubahikaho.

Tukamara ameezi mukaaga agaakuratsireho aha ofiisi y’eitaagi eya France. Nkagumizamu ninkora kyona eki naabaire nimbaasa kuhwera ab’eishe-emwe bagyenzi baitu omuri Cameroon. Omu Kwaikumi-na-ebiri okw’omwaka ogwo, tukooherezibwa aha ofiisi y’eitaagi eya Nigeria, eyaatandikire kureeberera omurimo gw’obukama omuri Cameroon. Ab’eishe-emwe na banyaanyazi-itwe omuri Nigeria bakatwakira gye, kandi tukashemererwa kuheereza nabo kumara emyaka mingi.

Omuri 1973 tukaba twine kucwamu aha nshonga egumire munonga. Sheila akaba atwire aine amagara mabi. Ku twabaire turi omuri New York aha ruteerane oruhango orw’ebiro bishatu, Sheila akangambira aine obusaasi ati: “Tindikubaasa kugumizamu! Nduhire, kandi obwire obwingi nimba ndwaire.” Tukaba tuheereize hamwe omuri West Africa emyaka erikurenga 14. Nkaba nimwesiimisa ahabw’okuheereza omu bwesigwa, kwonka tukaba twine kukoramu empinduka. Bwanyima y’okugaaniira n’okushaba munonga aha mbeera egyo, tukacwamu kugaruka Canada, ahu yaabaire naabaasa kureebererwa gye. Okuruga omu bumiisani n’omu buheereza obw’obutwire, nikwo kucwamu okwakizireyo kutugumira.

Ku naahikire Canada, nkatandika kukora n’owaabaire atwire ari munywani wangye, turikuguza emotoka omu tauni eri bukiizi-bwa-bumosho bwa Toronto. Tukapangisa enju, twagura ebintu ebyabaire byakozesiibwe, kandi tukabaasa kutandika embeera nsya tutaine eibanja. Tukaba  nitwenda kuguma tworobize embeera zaitu, twine amatsiko ngu omu biro by’omumaisho nitubaasa kugaruka omu buheereza bw’obutwire. Ekyatutangaarize, ekyo kikabaho juba kukira oku twabaire nituteekateeka.

Buri Rwamukaaga nkaba nza kuhwera aha kwombeka ekyombeko ky’okugiriramu enteerane empango ekisya omuri Norval, Ontario. Bwanyima, nkashabwa kureeberera ekyombeko ekyo. Sheila akaba naayongyera kuba gye, kandi tukaba nitureeba ngu nitubaasa kuhikiiriza obujunaanizibwa busya obwo. N’ahabw’ekyo, omu Kwamukaaga 1974 tukafuruka twaza aha kyombeko eky’okugiriramu enteerane empango. Tukashemererwa munonga kugaruka kuba omu buheereza obw’obutwire!

Ekirungi, amagara ga Sheila gakaguma nigaba gye. Bwanyima y’emyaka ebiri, tukaikiriza kuza omu buheereza bwa saketi. Saketi ekaba eri Manitoba, ekicweka eky’obutiti bwingi omuri Canada. Kwonka, tukashemererwa munonga kuba n’ab’eishe-emwe na banyaanyazi-itwe omu kicweka ekyo. Tukeega ngu ekikuru ti ahu turikuheereza, kureka n’okugumizamu nituheereza Yehova buri hamwe ahu turi.

Bwanyima y’okumara emyaka omu buheereza bwa saketi, tukeetwa kuheereza aha Beseeli ya Canada omuri 1978. Bwanyima y’obwire bukye, nkeega eishomo rikuru kwonka omu muringo gugumire. Nkashabwa kuha orubazo rw’eshaaha emwe n’ekicweka omu Rufaransa aha ruteerane rw’omutaano omuri Montreal. Eky’obusaasi, orubazo rwangye tirurahigire abahurikiize kutaho omutima, n’ahabw’ekyo ow’eishe-emwe owaabaire naakora aha by’obuheereza aha ofiisi y’eitaagi akampa obuhabuzi. Okuba ow’amazima, nkaba nyine kwetegyereza ngu tindi mugambi murungi munonga. Kwonka obuhabuzi obu naahairwe tindabwikiriize. Okugaaniira okwo tikuragyenzire gye. Kandi nkateekateeka ngu akaba naansheruramu enshobe omu mwanya gw’okunsiima. Nkakora enshobe y’okwanga obuhabuzi ahabw’omuringo ogu bwahairwemu, n’oku naabaire nindeeba owaampabwire.

Bwanyima y’ebiro bikye, omwe aha b’Akakiiko k’Eitaagi akagamba naanye aha nshonga egyo. Nkaikiriza ngu tindatwarize gye obu naaheebwa obuhabuzi, kandi nkashaba okusaasirwa. Nkagamba n’ow’eishe-emwe owaabaire ampaire obuhabuzi, kandi akaikiriza kunsaasira. Ekyo kikanyegyesa obukuru bw’okuba omucureezi, kandi tinkeebwaga. (Enf. 16:18) Nshabire Yehova emirundi mingi kumpwera omu nshonga egi, kandi mmaririire kutagaruka kwanga obuhabuzi.

Hati naahitsya emyaka erikurenga 40 aha Beseeli ya Canada, kandi kuruga 1985, ntwire nyine omugisha gw’okuheereza aha Kakiiko k’Eitaagi. Omu Kwakabiri 2021, omukazi wangye omukundwa Sheila akafa. Okwongyerera aha maganya g’okufeerwa, nyine amagara mbi. Kwonka okuheereza Yehova nikimpwera kugira bingi by’okukora n’okushemererwa ‘ntarikutongyeza munonga ebiro by’amagara’ gangye. (Mub. 5:20) N’obu ndaabe mpikirweho oburemeezi butari bumwe, okushemererwa oku ntungire nikubkirira kimwe. Ntungire okumarwa ahabw’okuta Yehova omu mwanya gw’okubanza, n’okumara emyaka 70 omu buheereza obw’obutwire. Ninshaba ngu ab’eishe-emwe na banyaanyazi-itwe eminyeeto nabo bate Yehova omu mwanya gw’okubanza, ahakuba nimpamiza kimwe ngu nibaija kutunga okushemererwa, n’okumarwa ebirikuruga omu kuheereza Yehova honka.