NKAZAARIRWA omuri Hemsworth 1923, omu rurembo orikushangwa England. Nkaba nyine munyaanyazi omwe orikwetwa, Bob. Obu naabaire nyine emyaka mwenda, tata akatunga ebitabo ebyabaire nibishoboorora oku ediini z’ebishuba ziri kubeiha abantu. Tata akasiima munonga ebi yaashomire. Kikaba kitarikumushemeza kureeba abeegyesa b’amadiini batarikugyendera aha bi barikwegyesa. Bwanyima y’emyaka mikye, Bob Atkinson akaija omuka yaatuteeraho orutambi rw’Ow’eishe-emwe Rutherford arikuha orubazo. Tukeetegyereza ngu orubazo oru rukashohozibwa abantu abaashohoize ebitabo ebi tata yaashomire. Abazaire bangye bakaguma nibataayaayisa Ow’eishe-emwe Atkinson kurya naitwe kyakiro, reero agarukamu ebibuuzo byaitu baingi ebirikukwata aha Baibuli. Akatweta kuza omu nteerane omu ka y’ow’eishe-emwe owaabaire naatuura haihi naitwe. Tukatandika kuza omu nteerane tutarikwosha, kandi hakatandikaho ekibiina omuri Hemsworth. Omu kaire kakye tukatandika kutunga abareeberezi abarikutaayaayira ebibiina na baapayoniya abaabaire nibaruga omu bibiina ebituri haihi barikwija kurya naitwe. Ab’eishe-emwe n’abanyaanyazi-itwe abo bakanteeraho eky’okureeberaho kirungi.

Omu bwire obwo, eka yaitu ekaba etandikireho bizinesi. Kwonka tata akagira munyaanyazi ati: “Waaba nooyenda kuba payoniya egi bizinesi nitubaasa kugikinga.” Bob akaikiriza, kandi akaruga omuka yaaba payoniya aine emyaka 21. Bwanyima y’emyaka ebiri, nkaba nyine emyaka 16, naatandika kuheereza nka payoniya. Omu wiikenda nkaba nkora n’abandi, kwonka obwire obwingi nkaba nkora nyenka. Nkaba nkoresa akooma akariho embazo na kaada eriho obutumwa bugufu, kandi obworobi kwetegyereza kuruga omu Baibuli. Yehova akampwera kutunga omwegi wa Baibuli murungi kandi orikutunguuka. Baingi omu ka ye bwanyima bakaija omu mazima. Omwaka ogwakuratsireho, nkatandika kuheereza nka payoniya ow’omutaano na Mary Henshall. Tukaheebwa ishaaza rya Cheshire eryabaire ritakabuuriirwemu.

Omu Rutaro rw’Ensi Yoona orwa II, abakazi bakaba baine kukora emirimo erikushagika orutaro. Abanyadiini abandi tibaratwirwe omu rutaro nk’oku ebiragiro byabaire nibyoreka, naitwe tukateekateeka ngu obu turi baapayoniya ab’omutaano nibaija kutureka.  Kwonka abaramuzi ekyo tibarakiikiriize bakacwamu kunkoma ebiro 31. Omwaka ogwakuratsireho nyine emyaka 19, nkaba nyine kuza omu maisho g’abaramuzi kabiri ahabw’omuntu wangye w’omunda kutanyikiriza kushagika orutaro. Kwonka, emirundi egi yombi ab’obushoboorozi bakandekura. Kandi omu bi naarabiremu byona, nkaba nimmanya ngu Yehova naampwera arikungumya n’omwoyo ogurikwera.​—Isaaya 41:10, 13.

Nyowe na Arthur Matthews tukabugana omuri 1946. Arthur akaba aherize kukomwa kumara ameezi ashatu ahabw’okwanga kuza omu rutaro. Ahonaaho ku baamurekwire yaaza kubuurira na mwene-ishe Dennis, owaabaire ari payoniya ow’omutaano omuri Hemsworth. Ishebo akabeegyesa amazima bakiri bato munonga, kandi bombi bakabatizibwa bakiri eminyeeto. Omu kaanya kakye barikuheereza hamwe, Dennis bakamuha omwanya ogundi gw’okubuuriramu omu Ireland. Kandi Arthur yaatsigara wenka. Abazaire bangye bakakunda munonga obweziriki bwe. Nikwo kumushaba kwija kutuura nabo. Ku naagarukire omu ka, nyowe na Arthur tukaba tukira kwozya kumwe ebintu bwanyima y’okurya. Kandi tukatandika kuhandiikirana amabaruha. Omuri 1948, Arthur akaba aine kugaruka omu kihome kumara ameezi agandi ashatu. Tukagaitwa omu Kwokubanza 1949, kandi ekigyendererwa kyaitu kikaba kiri eky’okuguma omu buheereza obw’obutwire. Tukaba nitukoresa gye esente zaitu, kandi ku twabaire tutunga ekihuumuro tukaba tushaarura ebijuma kubaasa kugira akasente aku twatunga. Tukagumizamu turikuheereza nka baapayoniya ahakuba Yehova akaguma naatuhwera.

Bwanyima y’omwaka nka gumwe, tukabanza kuza Armagh na Newry omu obukiizi-bwa-bumosho bwa Ireland, tauni ezirimu Abakaturiki baingi. Abantu b’omu kicweka ekyo bakaba nibakunda ediini yaabo, n’ahabw’ekyo tukaba twine kwegyendesereza twaba nitubuurira. Enteerane zaitu tukaba tuzigirira omu ka y’ow’eishe-emwe na munyaanyazi-itwe mahiro ikumi kuruga ahu twabaire nitutuura. Omu nteerane tukaba tukira kuba nk’abantu munaana. Obumwe tukaba turaarayo bwanyima y’enteerane. Tukaba turaara ahansi kandi omu kasheeshe turya kyantsya y’amaani. Nikishemeza kureeba ngu hati ekicweka eki kirimu Abajurizi ba Yehova baingi.

Mukuru wangye n’omukazi we, Lottie, bakaba nibaheereza omu obukiizi-bwa-bumosho bwa Ireland nka baapayoniya ab’omutaano, kandi omuri 1952 twena baana tukaza omu ruteerane oruhango omuri Belfast. Ow’eishe-emwe akatuha oburaaro hamwe na Pryce Hughes owaabaire ari omuheereza w’eitaagi rya Britain. Ekiro kimwe tukaba nitugaaniira aha katabo akasya God’s Way Is Love, akaabaire kateirwe kukoresibwa omu kubuurira omu Ireland. Ow’eishe-emwe Hughes akashoboorora ngu kigumire kubuurira Abakaturiki b’omuri Ireland. Ab’eishe-emwe bakaba nibabingwa omu maka gaabo, kandi abeegyesa b’ediini omu bicweka ebyo bakaba nibahiga abantu kutaahirira ab’eishe-emwe. Pryce nikwo kugira ati: “Nitwenda ababuurizi abari omu bushwere kandi abaine emotoka kwejumba omu kampeyini y’okugaba akatabo  aka omu ihanga ryona.” * (Reeba obugambo obw’ahansi.) Obwo nibwo twagarukamu ngu, “ekyo nituza kukikora!”

Eka ya munyaanyazi-itwe Ma Rutland owaabaire amazire emyaka mingi naaheereza Yehova niyo baapayoniya baingi baabaire bakira kuraara baaza Dublin. Naitwe niho twatungire oburaaro kumara akaire, kandi tukaguza n’ebintu byaitu. Reero twena baana tukakoresa pikipiki ya Bob twaza kusherura emotoka. Tukabona emotoka nungi, kandi twashaba omuguzi kugitutwarira omuka ahakuba tihaine owaabaire naamanya kuvuga omuriitwe. Arthur akamara omwabazyo gw’eizooba eryo arikweshushaniriza nk’orikuvuga emotoka aha kitanda. Omu kasheeshe ku yaabaire naateeraho kwihayo emotoka omu garagi, omumiisani orikwetwa Mildred Willett (owaizire kushwerwa John Barr) akaba naarabaho. Ekirungi akaba naamanya kuvuga! Akatwegyesa kuvuga twakwata.

Ekindi, tukaba twine kutunga oburaaro. Ab’eishe-emwe bakaba baatugambiire kutaraara omu kaju k’emotoka ahakuba abantu bakaba nibabaasa kukyotsya. N’ahabw’ekyo tukasherura enju y’okuraaramu kwonka yaabura. Ekiro ekyo twena baana tukaraara omu motoka. Ku bwaseesire twagumizamu kusherura, kwonka twabona akaju k’emotoka akarimu obutanda bubiri. Akaju ako niko twahindwire amaka gaitu. Eky’okutangaaza, akaju kaitu tukaba nitubaasa kukeemereza omu myanya etari emwe n’emwe ey’abahingi b’emicwe mirungi. Tukaba tutsigaho akaju aka tuza kubuurira mahiro 10 nari 15. Bwanyima y’okuza kubuurira omu kicweka kisya ekya hare, tukaba tugaruka kubuurira omu kicweka eki twatsigamu akaju kaitu.

Omu kubuurira tukataayaayira amaka maingi omu bukiizi-bwa-bumosho bwa Ireland tutahiganiisiibwe munonga. Tukagaba obutabo nka 20,000 kandi twayohereza amaziina g’abo abaayorekire ngu nibenda kumanya ebirikukiraho aha ofiisi y’eitaagi Britain. Ka nikishemeza kureeba Abajurizi ba Yehova baingi omu kicweka kya Ireland hati!

Bwanyima y’emyaka, tukoherezibwa kuza kubuurira omu bukiizi-bwa-buryo bwa London. Omu saabiiti nkye, ab’eishe-emwe aha ofiisi y’eitaagi eya Britain bakateerera Arthur esimu baarikumushaba kutandika kutaayaayira ebibiina bwasheesha! Bakatuteendeka kumara saabiiti emwe, reero twaza kutaayaayira ebibiina omu omuri Scotland, ekirikumanyisa ngu Arthur taratungire bwire bw’okutebeekanisa embazo. Kwonka akaba atuura ayeteekateekire kukora omurimo gwona ogurikumuheebwa, n’obu gwakuba gugumire. Eky’okureeberaho kye kirungi kikangaruramu amaani. Tukakunda munonga obuheereza bw’okutaayaayira ebibiina. Bwanyima y’okumara emyaka mingi omu kicweka ekitarimu babuurizi baingi kikaba nikishemeza kuba n’ab’eishe-emwe.

Obu Arthur yaashabwa kuza aha Gileadi omu 1962, tukaba twine eky’okucwamu ky’amaani. Akaba naaza kumarayo ameezi ikumi, kandi nyowe nkaba ntarikubaasa kugyenda nawe ahakuba bakaba batanyetsire. Tukacwamu ngu Arthur aikirize agyende. Ahabw’okugira ngu nkaba ntaine payoniya w’okubuurira nawe, ofiisi y’eitaagi ekacwamu kungarura omuri Hemsworth nka payoniya ow’omutaano. Arthur  ku yaagarukire bwanyima y’omwaka gumwe, yaaba omureeberezi wa disiturikiti omuri Scotland, omu bukiizi-bwa-bumosho bwa England, n’obwa Ireland.

Omuri 1964, Arthur akatandika kuheereza nk’omuheereza w’eitaagi omuri Ireland. Nkabanza kutiina kuza aha Beseeli, ahakuba nkaba ninkunda omurimo gw’okutaayaayira ebibiina. Hati ku ndikureeba enyima, ninshemererwa ahabw’omugisha gw’okuheereza aha Beseeli. Niinyikiriza ngu Yehova naakuha emigisha waikiriza obuheereza bwona n’obu waakuba otarikubukunda. Aha Beseeli nkakora omu ofiisi, okuta ebitabo omu bokisi, nk’omuteeki, n’okuboneza. Kumara obwire tukareeberera disiturikiti, kandi tukamanya ab’eishe-emwe baingi omu ihanga ryona. Eki, hamwe n’okureeba abeegi beitu nibatunguuka omu mazima, kikatureetera kugira omukago guhami n’ab’eishe-emwe omuri Ireland. Ogu n’omugisha buzima!

Oruteerane oruhango orw’okubanza omuri Ireland rukaba ruri omu Dublin 1965. * (Reeba obugambo obw’ahansi.) N’obu haraabe haabaireho okuhiiganisibwa kw’amaani oruteerane rukahwa gye. Abantu 3,948 bakaija aha ruteerane, kandi 65 baabatizibwa. Ab’eishe-emwe 3,500 kuruga omu mahanga agandi bakatunga oburaaro omu maka g’ab’eishe-emwe omuri Dublin. Boona abaaraarize ab’eishe-emwe bakatunga ebaruha z’okubasiima. Kandi ab’eishe-emwe abaararize baakasiima emitwarize mirungi y’abagyenyi. Eki kikaba kiri ekintu kirungi omuri Ireland.

Omuri 1966 omu bukiizi-bwa-bumosho n’obwa-buryo bwa Ireland bakaza ahansi y’eitaagi erya Dublin. Tukaba twine obumwe bw’omutaano aha kirwa eki, ahakuba abandi bakaba babaganisiibwemu ediini n’eby’obutegyeki. Kikaba nikishemeza kureeba Abakaturiki baingi barikwikiriza amazima bakaheereza n’ab’eishe-emwe bataahi baabo abaabaire bari Abaporotesitanti.

Omu 2011 hakabaho empinduka y’amaani obu Britain na Ireland baazigaita bakakoramu eitaagi rimwe omuri London. Omu bwire obwo, amagara ga Arthur nibwo gaatandika kunyerarikiriza. Bakashanga arwaire endwara ya Parkinson. Eky’obusaasi, omu Kwakataano 20, 2015, akafa mmazire nawe emyaka 66.

Emyaka ehingwire, ngizire obusaasi n’amaganya maingi. Arthur niwe yaabaire akira kumpwera. Mwiniire orushusho! Kwonka ku orikuraba omu mbeera nk’ezi, nizikureetera kwirira haihi na Yehova. Kandi nikishemeza kumanya ngu Arthur akaba naakundwa baingi. Ntungire amabaruha kuruga omu b’eishe-emwe omuri Ireland, Britain, na United States. Amabaruha aga n’okuhuumurizibwa kuruga ahari mwene-ishe Dennis, n’omukazi we Mavis n’abaana baabo Ruth na Judy, bimpwereire munonga.

Ekyahandiikirwe ekirikungumya ni Isaaya 30:18. Ahari kugira ngu nikyo Yehova “aritegyerereza, ngu abagirire embabazi, kandi nikyo ariheerwa ekitiinisa, ngu abagirire esaasi.” Ahabw’okuba Yehova “ni Ruhanga ocwa emanja z’oburyo, abarikumutegyereza boona baine omugisha.” Nikimpumuriza kumanya ngu Yehova aine ekihika ky’okwihaho oburemeezi bwaitu bwona, kandi akatuha obuheereza oburikushemeza omu nsi ensya.

Ku ndikuteekateeka aha by’enyima, nnindeeba oku Yehova atuhwereire n’oku ahaire omugisha omurimo gw’okubuurira omuri Ireland! N’omugisha gw’amaani kureeba ngu nkahwera omu murimo ogu. Buzima okukora ebi Yehova arikushaba nikireeta emigisha mingi.