1. Rukundo erikukirayo n’eha, kandi noobaasa kugishoboorora ota? (Reeba ekishushani aha kutandika.)

YEHOVA niwe bukomooko bwa rukundo. (1 Yohaana 4:7) Rukundo erikukirayo neeyegamira aha misingye ehikire. Omu Baibuli, rukundo ey’omuringo ogu neeshoboororwa ekigambo ky’Orugriika a·gaʹpe. Rukundo egi neetwariramu okufayo aha muntu n’okumugirira enyehurira, kwonka neetwariramu ekirikukira aha nyehurira. Nitugyoreka tutarikweyendeza kandi turikukora ebirikugasira abandi. Niyo rukundo erikutuhiga kukorera abandi ebirungi. Rukundo egi neetureetera kushemererwa n’okugira ekigyendererwa.

2, 3. Yehova ayorekire ata ngu ainiire abantu rukundo etarimu kweyendeza?

² Yehova akooreka ngu naakunda abantu ira munonga atakahangire Adamu na Haawa. Akahanga ensi kugira ngu ebemu buri kimwe ekyakutubaasiise kuba abahuriire. Kandi, akagikora nk’eka ahu twakubaasize kutuura twine amagara marungi. Yehova tarahangire ensi kuba eye. Akagihanga kuba eyaitu. Ku yaaherize kugitebeekanisa, akahanga abantu kandi yaabaha amatsiko  g’okutuura omu paradiso y’omu nsi ebiro byona.

³ Bwanyima, Yehova akooreka ngu ainiire abantu rukundo etarimu kweyendeza omu muringo ogurikukirayo. N’obu Adamu na Haawa baagomire, Yehova akaba naahamya ngu bamwe ahari baijukuru baabo nibaija kumukunda n’ahabw’ekyo akatebeekanisa kuhayo Omwana we nk’ekitambo kubajuna. (Okutandika 3:15; 1 Yohaana 4:10) Kuruga obu Yehova yaaraganisa ekitambo, kikaba kiri nk’ekyaheebwayo. Reero bwanyima y’emyaka 4,000, Yehova ahabw’okwenda kucungura abantu akahayo Omwana we omwe ou yaayehangiire. (Yohaana 3:16) Nitusiima munonga rukundo ya Yehova!

4. Nitumanya tuta ngu abantu abatahikiriire nibabaasa kworeka rukundo etarimu kweyendeza?

⁴ Nitubaasa kworeka rukundo etarimu kweyendeza n’obu turaabe tutahikiriire? Eego, nitubaasa. Yehova akatuhanga omu kishushani kye, ekirikumanyisa ngu akatuhanga turikubaasa kumutooreza. Tikirikutworobera butoosha kworeka rukundo etarimu kweyendeza, kwonka nikibaasika. Abeeli akooreka ngu naakunda Ruhanga obu yaahayo ekitambo kirungi aha bi yaabaire aine atarikweyendeza. (Okutandika 4:3, 4) Noa akooreka ngu aine rukundo etarimu kweyendeza obu yaagumizamu naabuurira obutumwa bwa Ruhanga kumara emyaka mingi n’obu abantu baabaire batarikuhurikiza. (2 Petero 2:5) Kandi Abrahamu akooreka ngu rukundo ei yaabaire ainiire Ruhanga n’ey’amaani kukira ekintu ekindi kyona arikwikiriza kuhayo omutabani ou yaabaire naakunda munonga Isaaka. (Yakobo 2:21) Nk’abashaija abo abeesigwa, naitwe nitwenda kugirira abandi rukundo n’obu kyakuba kitoorobi.

5. Ni mu miringo ki ei turikubaasa kworekamu rukundo eyaabuzima?

⁵ Baibuli neegira ngu titwine kworeka rukundo eyaabuzima “omu bigambo nari aha rurimi, kureka tukundane omu bi turikukora n’omu mazima.” (1 Yohaana 3:18) Mbwenu shi eki nikimanyisa ngu titurikubaasa kugambira omuntu ngu nitumukunda? Ngaaha. (1 Abatesalonika 4:18) Nikimanyisa ngu tikirikumara kugamba bugamba ngu “ninkukunda.” Twine kworeka ngu nitumanyisa eki turikugamba. Nk’eky’okureeberaho, ka tugire ngu ab’eishe-emwe tibaine eby’okurya nari eby’okujwara, nibaba nibenda ekirikukira aha bigambo by’embabazi. (Yakobo 2:15, 16) Nikyo kimwe, okukunda Yehova n’abataahi nikituhiga kutashaba ngu abantu baingi baije babuurire naitwe kyonka, beitu naitwe nitwejumbira kimwe omu kubuurira.​—Matayo 9:38.

6, 7. (a) Rukundo ‘etarimu buryarya’ niki? (b) Ni by’okureeberaho ki ebya rukundo erimu oburyarya?

⁶ Entumwa Yohaana akagira ngu twine kukundana ‘omu bi turikukora n’omu mazima.’ Rukundo yaitu eshemereire kuba ‘etarimu buryarya.’ (Abarooma 12:9; 2 Abakorinso 6:6) Obumwe omuntu naabaasa kweshushaniriza nk’orikukunda mugyenzi we. Mbwenu shi rukundo ye neeba eri eyaabuzima? Naaba aine bigyendererwa ki? Rukundo erimu oburyarya neeba etahikire. Rukundo erimu oburyarya neeba etaine mugasho.

 ⁷ Ka tureebe eby’okureeberaho bya rukundo erimu oburyarya. Obu Sitaane yaagamba na Haawa omu musiri Edeni, akeeshushaniriza nk’orikumwendeza ebirungi. Kwonka ebikorwa bye bikaba nibyoreka ekindi. (Okutandika 3:4, 5) Obu Daudi yaabaire ari omugabe, akaba aine munywani we orikwetwa Ahisofeeli. Kwonka Ahisofeeli akareebya Daudi ahabw’okwenda kwegasira. Ebikorwa bye bikaba nibyoreka ngu ti munywani owaabuzima. (2 Samueli 15:31) Obunaku obu, abarikwehagura aha mazima n’abandi abarikureetaho okwebaganisamu omu kibiina, nibakoresa “okugamba gye n’ebigambo by’okuteera ekimama.” (Abarooma 16:17, 18) Nibabaasa kweshushaniriza ngu nibafayo aha bandi, kwonka omu mazima, nibaba nibeeyendeza.

8. Nitubaasa kwebuuza bibuuzo ki?

⁸ Rukundo erimu oburyarya n’ey’akabi munonga ahabw’okuba abantu nibagikoresa kubeihabeiha abandi. Omuntu naabaasa kureetera abantu kureebeka nk’abashema, kwonka ekyo tarikubaasa kukikora ahari Ruhanga. Yesu akagira ngu abantu nk’abo endyarya nibaija kutunga ekiheneso ky’amaani. (Matayo 24:51) Itwe abaheereza ba Yehova titurikwenda kuba endyarya. N’ahabw’ekyo twine kwebuuza tuti, ‘rukundo yangye n’eyaabuzima, nari niinyeyendeza kandi ti ndi mwesigwa?’ Ka tushwijume emiringo mwenda ei turikubaasa kworekamu rukundo ‘etarimu buryarya.’

9. Rukundo eyaabuzima neetuhiga kukora ki?

⁹ Heereza oshemereirwe n’obu abandi baakuba batarikureeba ebi orikukora. Tushemereire kuba tweteekateekire kukorera abandi ebirungi n’obu hakuba hataine oraabimanye. (Shoma Matayo 6:1-4.) Anania na Safira bakaba baine emiteekateekyere etahikire. Obu baahayo bakaba nibenda ngu abandi baakimanye. Bakabeiha aha bikwatiraine n’esente ezi baahaireyo, kandi bakafubirwa ahabw’oburyarya bwabo. (Ebyakozirwe 5:1-10) Kwonka buzima twaba nitukunda ab’eishe-emwe bagyenzi baitu, nitwija kushemererwa kubakorera ebirungi tutarikwenda ngu n’abandi bamanye eki twabakorera. Nitubaasa kwegyera aha b’eishe-emwe abarikuhwera Akakiiko Akareeberezi omu kutebeekanisa eby’okurya eby’omwoyo. Tibarikweyoreka, kandi tibarikugambira abandi eby’omwoyo ebi barikuba nibatebeekanisa.

10. Nitubaasa kuha tuta abandi ekitiinisa?

¹⁰ Ha abandi ekitiinisa. (Shoma Abarooma 12:10.) Yesu akooreka ngu naaha entumwa ze ekitiinisa obu yaabanabisa ebigyere. (Yohaana 13:3-5, 12-15) Twine kuteeraho kuba abacureezi nka Yesu turikuheereza abandi. Entumwa tibarayetegyereize eki Yesu yaakozire kuhitsya obu baatunga omwoyo gurikwera. (Yohaana 13:7) Nitworeka ngu nituha abandi ekitiinisa tutarikuteekateeka ngu nitubakira ahabw’obwegyese burungi, obugaiga, nari obujunaanizibwa bw’omutaano. (Abarooma 12:3) Titurikugirira abandi eihari baasiimwa, kureka nitushemererwa nabo n’obu twakuba nituteekateeka ngu naitwe twine kusiimwa.

11. Ahabw’enki okwebaza kwaitu kushemereire kuba nikuruga aha mutima?

 ¹¹ Yebaza abandi oyihire aha mutima. Guma nooteeraho kwebaza abandi. Twena nitumanya ngu okwebaza abandi ni kirungi ahakuba nikibombeka. (Abaefeso 4:29) Kwonka twine kuhamya ngu ebi turikugambira abandi nibiruga aha mutima, kandi titurikubigamba kuteera ekimama. Titushemereire kugamba eki tutarikumanyisa nari kwetantara obujunaanizibwa bwaitu obw’okuha abandi obuhabuzi. (Enfumu 29:5) Nituba turi endyarya twayebaza abandi reero bwanyima tukabagambuura baaba batariho. Entumwa Paulo akaba aine rukundo eyaabuzima. Obu yaahandiikira Abakristaayo omuri Korinso, akabasiima ahabw’ebi baabaire nibakora gye. (1 Abakorinso 11:2) Kwonka ku kyayetengyeise kubahana, akabashoboororera enshonga omu muringo gw’embabazi.​—1 Abakorinso 11:20-22.

12. Twayoreka abandi obufura nitworeka tuta ngu tubainiire rukundo eyaabuzima?

¹² Ba efura. Yehova naayenda ngu tube efura omu kuhwera ab’eishe-emwe. (Shoma 1 Yohaana 3:17.) Kwonka tushemereire kuba twine ekigyendererwa kirungi omu kuba efura. Nitubaasa kwebuuza tuti: ‘Niinyeta omu ka yangye banywani bangye ab’aha mara nari abo abu ndikutwara nk’ab’omuhendo omu kibiina? Niinyeta abo abu ndikuteekateeka ngu nabo nibaija kugira eki baankorera? Nari ndi efura aha b’eishe-emwe abu ntarikumanya gye nari abatarikubaasa kugira eki baankorera?’ (Luka 14:12-14) Teekateeka aha mbeera ezi: Ka tugire ngu ow’eishe-emwe naayetenga obuhwezi ahabw’okugira ngu akacwamu kubi? Nari ka tugire ngu omuntu ou waayetsire omu ka yaawe tarakwebarize? Yehova naatugambira ati: “Mukunirane mutarikunyomwa” nari mutarikwetomboita. (1 Petero 4:9) Nitwija kushemererwa twaha abandi twine ekigyendererwa kirungi.​—Ebyakozirwe 20:35.

13. (a) Ni ryari obu kirikubaasa kwetengyesa okugumisiriza munonga? (b) Nitubaasa kukora ki kuhwera abahweiremu maani?

¹³ Hwera abahweiremu amaani. Ekiragiro ekiri omu Baibuli ekirikugira ngu “muramire abataine maani, mugumisiririze boona” nikibaasa kutugyeza kureeba yaaba rukundo yaitu eri eyaabuzima. (1 Abatesalonika 5:14) Ab’eishe-emwe baingi abaabaire bahweiremu amaani omu kwikiriza bwanyima bakagira okwikiriza kuhami. Kwonka abandi twine kubagumisiririza munonga n’okubahwera omu muringo gwa rukundo. Nitubaasa kubahwera tuta? Nitubaasa kukoresa Baibuli kubagaruramu amaani, nitubaasa kubeeta kubuurira nabo, nari nitubaasa kubahurikiza baaba nibatugambira. Kandi titushemereire kuteekateeka aha b’eishe-emwe bagyenzi baitu nk’abaine  amaani nari nk’abahweiremu amaani kyonka. Omu mwanya gw’ekyo, tushemereire kumanya ngu twena twine amaani n’obweremwa. Nangwa n’entumwa Paulo akaikiriza ngu akaba aine obweremwa. (2 Abakorinso 12:9, 10) Twena twine kuhwerahwerana kandi tukagaruranamu amaani.

14. Tushemereire kuba tweteekateekire kukora ki okugira obusingye n’ab’eishe-emwe?

¹⁴ Gira obusingye n’abandi. Okugira obusingye n’ab’eishe-emwe n’eky’omuhendo munonga. N’obu twakuteekateeka ngu abandi tibaatwetegyereza nari ngu baatutwariza kubi, tushemereire kukora kyona ekirikubaasika kugaruraho obusingye. (Shoma Abarooma 12:17, 18.) Haaba hariho omuntu ou tugwisize kubi, nikibaasa kwetengyesa okumushaba okusaasirwa. Kwonka twine kukikora twihire aha mutima. Nk’eky’okureeberaho, omu mwanya gw’okugira ngu, “nikinshaasha kureeba ngu noohurira otyo,” nikiba kiri kirungi kwikiriza enshobe zaawe, reero okagira oti, “Nsaasira kureeba ngu nkugwisize kubi ahabw’ebi ngambire.” Okukira munonga obusingye ni bukuru omu bushwere. Nikiba kigwire omushaija n’omukazi we kutwaza nk’abarikukundana baaba bari omu bantu, reero baaba bari bonka bakanga kugamba hamwe, bakagambirana ebirikusaasa, nari bakaba enshaarizi.

15. Nitubaasa kworeka tuta ngu okusaasira kwaitu n’okwabuzima?

¹⁵ Saasira abandi. Omuntu yaatugwisa kubi, nitumusaasira kandi turekyera aho kugira ekiniga. Twine kukora eki n’obu yaakuba atarikukimanya ngu atugwisize kubi. Nitusaasira abandi ‘turikugumisiririzana omuri rukundo, turikwezirika kurinda obumwe bw’omwoyo, tuteerainwe omurunga gw’obusingye.’ (Abaefeso 4:2, 3) Kubaasa kusaasira omuntu omu muringo ogwabuzima, twine kurekyera aho kuteekateeka aha ki omuntu arikuba atukozire. Okukunda “tikuteekateeka kibi aha muntu” nari kuguma nikubiika  ebishobyo by’abandi. (1 Abakorinso 13:4, 5) Nangwa twabiika enziika, nitubaasa kushiisha omukago gwaitu n’ab’eishe-emwe bagyenzi baitu na Yehova. (Matayo 6:14, 15) Nitworeka ngu okusaasira kwaitu n’okwabuzima twashabira omuntu otukozire kubi.​—Luka 6:27, 28.

16. Tushemereire kutwara tuta obujunaanizibwa bw’omutaano omu kuheereza Yehova?

¹⁶ Yefeerereze ebi orikukunda. Twatunga obujunaanizibwa bw’omutaano omu kuheereza Yehova, nitubaasa kworeka ngu rukundo yaitu n’eyaabuzima ‘turikureka kwesherurira ebyaitu ahabwaitu, kureka tusherure eby’okuhwera bataahi baitu.’ (1 Abakorinso 10:24) Nk’eky’okureeberaho, omu nteerane zaitu empango ez’ekiro kimwe n’ez’ebiro bishatu, abarikwakiira abantu nibabanza aha mwanya gw’oruteerane abandi batakahikireho. Kandi nibabaasa kwohibwa kwekwatira emyanya mirungi n’ab’omu maka gaabo. Omu mwanya gw’ekyo, abaingi nibatoorana emyanya etari mirungi ahu barikuba nibakiirira abantu. Baakora batyo, nibooreka ngu tibaine rukundo ey’okweyendeza. Noobaasa kutooreza ota eky’okureeberaho kyabo kirungi?

17. Omukristaayo yaakora ekibi ky’amaani, rukundo eyaabuzima neemuhwera kukora ki?

¹⁷ Yatura ebibi ebi orikukora bwesherekye kandi obirekye. Abakristaayo abamwe abarikukora ebibi by’amaani nibateeraho kubishereka. Obundi nibatiina kuhemuka nari nibaba batarikwenda kureebya abandi. (Enfumu 28:13) Kwonka okushereka ekibi ti kikorwa kya rukundo ahakuba n’eky’akabi aha muntu orikuba akikozire n’abandi. Mu muringo ki? Yehova naabaasa kurekyera aho kuha omwoyo gurikwera ekibiina, kandi tikirikubaasa kugira obusingye. (Abaefeso 4:30) N’ahabw’ekyo omuntu yaakora ekibi ky’amaani, rukundo eyaabuzima neija kumuhiga kugambira abareeberezi kandi atungye obuhwezi oburikwetengyesa.​—Yakobo 5:14, 15.

18. Rukundo eyaabuzima ni nkuru eta?

¹⁸ Rukundo nigwo mutwarize ogurikukira emitwarize endiijo yoona. (1 Abakorinso 13:13) Neehwera abantu kumanya abakuratsi ba Yesu ab’amazima n’okureeba abo abarikutooreza Yehova obukomooko bwa rukundo. (Abaefeso 5:1, 2) Paulo akagira ngu yaaba ataine rukundo naaba ari busha. (1 Abakorinso 13:2) Buri omwe ahariitwe ka agumizemu naayoreka rukundo, ti mu bigambo byonka kureka n’omu bikorwa “n’omu mazima”!