Gumizamu Nootunguuka Ekiro Kya Yehova Ekikuru Kiri Haihi

“Tugumizemu [nitutunguuka].”​—HEB. 6:1.

1, 2. Abakristaayo ab’omu kyasha ky’okubanza omuri Yerusaalemu na Buyudaaya bakatunga mugisha ki, ku baahuungiire omu nshozi’?

 OBU Yesu yaabaire ari omu nsi, abeegi be bakaija ahu ari bamubuuza bati: ‘Tugambire....akamanyiso k’okwija kwawe oku kariba, n’ak’obunaku obu ensi egi eraahwereho?’ Obunabi obu Yesu yaagambire arikugarukamu ekibuuzo ky’abeegi be bukabanza kuhikiirira omu kyasha ky’okubanza. Yesu akagamba ebyabaire nibiija kubaho kworeka ngu emperu eri haihi. Bwanyima y’okureeba nibihikiirira, ‘abo abaabaire bari Buyudaaya omu bunaku obwo bakaba baine kuhungira aha nshozi’ (Mat. 24:1-3, 15-22) Mbwenu shi abeegi ba Yesu bakaba nibaija kureeba obumanyiso reero bakuratire obuhabuzi bwa Yesu?

² Bwanyima y’ebyasha nka bishatu, omu gwa 61 Y.A.K., entumwa Paulo akahandiikira Abakristaayo Abaheburaayo obutumwa bukuru munonga abaabaire nibatuura omuri Yerusaalemu n’emyanya eheereine nayo. Omu myaka etaano akamanyiso k’okutandika ‘kw’okubonabona kwingi’ aku Paulo naabaikiriza bagyenzi be baabaire batarikumanya gye kakaba nikaija kubaho. (Mat. 24:21) Omu gwa 66 Y.A.K., Cestius Gallus akeebembera amahe g’Abarooma omu kutaahirira Yerusaalemu. Kwonka akacwamu kugarukayo we n’amahe ge goona, kyabaasisa abaabaire bari omu kabi kuhunga.

3. Paulo akeehanangiriza Abakristaayo Abaheburaayo kukora ki, kandi ahabw’enki?

³ Abakristaayo abo bakaba baine kukoresa okwetegyereza n’okumanya okuhikire n’okwetegyereza okuhindahinduka kw’embeera reero bahungye. Kwonka, abamwe bakaba bahindukire “abarikuhurira kubi.” Bakaba bari nk’abeereere omu by’omwoyo barikwetenga “amate.” (Shoma Abaheburaayo 5:11-13.) Nangwa n’abo abaabaire bamazire obwire buraingwa omu mazima bakaba baatandikire kworeka obumanyiso ‘bw’okuruga ahari Ruhanga ohuriire.” (Heb. 3:12) Abamwe bakaba baine “omuze” gw’okwosha enteerane z’Ekikristaayo omu bwire obu ‘ekiro ekyo kyabaire kiri haihi kuhika.” (Heb. 10:24, 25) Paulo akabehanangiriza ati: “N’ahabw’ekyo ka turekye kwegyesa eby’okubandizaho ebya Kristo, tugumizemu [nitutunguuka] tuhikye aha by’obukuru.”—Heb. 6:1.

4. Ahabw’enki ni kikuru kuguma nitureeba omu by’omwoyo, kandi niki ekirikubaasa kutuhwera kukora ekyo?

⁴ Turi omu bwire obw’okuhikiirira kw’aha muheru okw’obunabi bwa Yesu. “Ekiro kya Yehova ekikuru”​ obu ensi ya Sitaane eraacwekyereziibwe ​“kiri haihi.” (Zef. 1:14) Hati, okukira ira twine kuguma nitureeba omu by’omwoyo. (1 Pet. 5:8) Mbwenu shi ekyo nitwija kukikora? Okutunguuka omu by’omwoyo nikwija kutuhwera kuguma tutaire omutima aha kiro ekyo.

Eki Okutunguuka kw’Ekikristaayo Kirikumanyisa

5, 6. (a) Okutunguuka omu by’omwoyo nikutwariramu ki? (b) Ni bintu ki biri ebi oine kuteeraho kukora kubaasa nootunguuka omu by’omwoyo?

⁵ Paulo taraahigire Abakristaayo omu kyasha ky’okubanza kutunguuka omu by’omwoyo kyonka, beitu akabagambira n’ekirikutwarirwamu. (Shoma Abaheburaayo 5:14.) “Abantu abakuzire omu by’omwoyo” tibarikumarwa n’okunywa “amate.” Nibarya “eby’okurya ebigumire.” N’ahabw’ekyo, nibamanya byombi “ebirikutandikirwaho” n’eby’amazima ‘ebitarikumanywa. (1 Kor. 2:10) Nangwa, okubaasa kwabo kw’okwetegyereza kutendekirwe ahabw’okukukoresa n’okugyendera ahari ebyo ebi barikumanya, eki nikibahwera kutaanisa ekirungi n’ekibi. Baaba nibenda kucwamu, okutendekwa oku nikubahwera kushwijuma emisingye ya Baibuli erikubaasa kubahwera n’oku barikubaasa kugigyenderaho.

⁶ Paulo akahandiika ati: “Nikyo tushemerereire kuta omutima aha bi twahuriire, ngu tutahaba tukabirugaho.” (Heb. 2:1) Okuhaba kuruga omu kwikiriza nikubaasa kubaho tutakimanyire. Eki nitubaasa kukyetantara ‘turikutayo omutima’ twaba nitushwijuma amazima g’eby’omwoyo. N’ahabw’ekyo, buri omwe aine kwebuuza: ‘Nkiriyo niinyeyegyesa ebirikutandikirwaho? Nimbaasa kuba nningyendera omu mazima kwonka ntataireyo omutima gwangye gwona? Nimbaasa kutunguuka nta omu by’omwoyo?’ Okugumizamu nootunguuka nikyetengyesa okutamu amaani omu bintu bibiri. Twine kwemanyiiza kwega Ekigambo kya Ruhanga. Kandi tukateeraho kwega kworoba.

Yemanyiize Kwega Ekigambo kya Ruhanga

7. Nitubaasa kugasirwa tuta twayemanyiiza kwega Ekigambo kya Ruhanga?

⁷ Paulo akahandiika ati: “Mumanye ngu omuntu weena otungwa amate aba atakamanyiire kukoresa kigambo ky’okuhikiirira, ahakuba n’omwana.” (Heb. 5:13) Kubaasa kutunguuka, twine kumanya gye Ekigambo kya Ruhanga, n’obutumwa obu arikutuha. Ahabw’okugira ngu obutumwa obu buri omu Kigambo kye Baibuli, twine kuba abeegi barungi b’Ebyahandiikirwe hamwe n’ebitabo ‘by’omwambari omwesigwa kandi ow’obwengye.’ (Mat. 24:45-47) Okwega aha miteekateekyere ya Ruhanga omu muringo ogu, nikutuhwera kutendeka okubaasa kwaitu kw’okwetegyereza. Teekateeka ky’okureeberaho eky’Omukristaayo orikwetwa Orchid. * Naagira ati: “Ekimpwereire munonga n’okweshomesa Baibuli buri izooba. Kinkantwarira emyaka ebiri kuheza kushoma Baibuli yoona, kwonka okaba nooshusha ngu naamanya Omuhangi wangye omurundi gw’okubanza. Nkeega aha mihanda ye, ebi arikukunda n’ebi arikwanga, obwingi bw’amaani ge, n’obwengye bwe. Okushoma Baibuli buri izooba kimpwereire kuraba omu mbeera zigumire omu magara gangye.”

8. Ekigambo kya Ruhanga kiine amaani g’okukora ki?

⁸ Okushoma ekigambo kya Ruhanga buri izooba nikibaasisa obutumwa bwakyo kutukwataho. (Shoma Abaheburaayo 4:12.) Okushoma nk’okwo nikubaasa kutendeka omuntu waitu ow’omunda kandi kitureetere kuba abarikusiimwa ahari Yehova. Okaayenzire kukora entebeekanisa y’okushoma Baibuli kandi okateekateeka aha by’erikugamba.

9, 10. Okwemanyiiza Ekigambo kya Ruhanga nikitwariramu ki? Shoboorora.

⁹ Okwemayiiza Baibuli nikikira aha kumanya eki erikugamba. Abaana omu by’omwoyo ab’omu bwire bwa Paulo bakaba nibamanya ebiri omu kigambo kya Ruhanga. Kwonka, Tibarabigyendeireho omu magara gaabo. Ahabw’okugira bakaba batarikukira kweyegyesa obutumwa kugira ngu bubahwere kucwamu gye.

¹⁰ Okwemanyiiza ekigambo kya Ruhanga nikimanyisa okumanya eki kiri kugamba n’okuta omu nkora okumanya okwo. Eky’okureeberaho kya munyaanyazi-itwe Kyle nikyoreka oku eki kirikubaasa kukorwa. Kyle akaba aine obutaikirizana n’ou arikukora nawe. Akakora ki kushoboorora obutaikirizana obwo? Naagira ati: “Ekyahandiikirwe eki naabandize kuteekateekaho n’eky’Abarooma 12:18, ekirikugira ngu: ‘Ku kiraabe nikibaasika aha rubaju rwanyu, mutuurane n’abantu boona n’obusingye.’ N’ahabw’ekyo nkataho entebeekanisa y’okugonjoora enshonga n’ou ndikukora nawe bwanyima y’okwinuka aha murimo.” Okugaaniira okwo kukarugamu ebirungi kandi Kyle okutwaza atyo kikashemeza omukozi mugyenzi we. “Nkeega ngu twagyendera aha misingye ya Baibuli nikirugamu ebirungi,” nikwo Kyle arikugira.

Yega Kworoba

11. Niki ekirikworeka ngu nikibaasa kuguma kworoba omu mbeera zigumire?

¹¹ Tikyorobi kuta omu nkora ebi turikwega omu Byahandiikirwe, na munonga twaba turi omu mbeera zigumire. Nk’eky’okureeberaho, bwanyima y’obwire bukye Yehova aherize kucungura ihanga rya Israeli kuruga omu bukwatwa omuri Misiri, bakatandika ‘kutonganisa Musa’ kandi bakaguma ‘nibagyeza Yehova.’ Ahabw’enki? Ahabw’okuba bakaburwa amaizi g’okunywa. (Kur. 17:1-4) Bwanyima y’ameezi nk’abiri baherize kukora endagaano na Yehova barikwikiriza kukora ‘ebigambo byona ebi Yehova yaabaire agambire,’ bakagomera ekiragiro kye eky’okuramya ebishushani. (Kur. 24:3, 12-18; 32:1, 2, 7-9) Mbwenu shi Musa okumara obwire buraingwa aha rushozi Horebu kikabareetera kutiina? Obundi bari kuteekateeka ngu Abaamaleki nibabaasa kugaruka kubatahirira kandi ngu nibaza kuba bataine buhwezi bwona Musa yaaba atariho owaabaire yaabahwereire kubasingura arikuguma aimukize emikono ye? (Kur. 17:8-16) Ekyo nikibaasika, kwonka nabwo, Abaisraeli ‘bakanga kworoba.’ (Byak. 7:39-41) Paulo akahiga Abakristaayo ‘kwezirika’ kutagwisibwa ‘okutahurira okw’omuringo nk’ogwo’ oku Abaisraeli baayorekire obu baabaire batiinire kutaaha omu Nsi Eyaaraganisiibwe.—Heb. 4:3, 11.

12. Yesu akeega ata kworoba, kandi akagasirwa ata?

¹² Okugumizamu nootunguuka nikyetengyesa okukora kyona ekirikubaasika kworobera Yehova. Eky’okureeberaho kya Yesu nikyoreka ngu ebi turikurabamu nibitwegyesa okworoba. (Shoma Abaheburaayo 5:8, 9.) Yesu atakaizire omu nsi, akaba naayoroobera Ishe. Kwonka, okukora ebi Ishe arikukunda omu nsi kikaba nikitwarira okubonabonesibwa omu biteekateeko n’omu nyehurira. Ahabw’okugira ngu Yesu akooroba n’omu mbeera zigumire ezo, ‘akahikiirizibwa’ kuheebwa omwanya musya ogu Ruhanga yaabaire amuteekateekyeire, ogw’okuba Omugabe kandi Omunyamurwa Omukuru.

13. Niki ekirikworeka yaaba twegire kworoba?

¹³ Kandi shi itwe? Tumariirire kworobera Yehova n’obu twakuhikwaho oburemeezi bugumire munonga? (Shoma 1 Petero 1:6, 7.) Obuhabuzi bwa Yehova oburikukwata aha micwe, obwesigwa, okukoresa gye orurimi, okushoma n’okweyegyesa Ebyahandiikirwe, okuza omu nteerane z’Ekikristaayo, n’okubuurira nibiba nibireebwa butunu. (Yosh. 1:8; Mat. 28:19, 20; Efe. 4:25, 28, 29; 5:3-5; Heb. 10:24, 25) Mbwenu shi nitworobera Yehova omu nshonga ezi n’obu kyakuba kigumire? Okworoba kwaitu n’akamanyiso akarikworeka ngu tutunguukire omu by’omwoyo.

Ahabw’enki ni Kikuru Kutunguuka omu by’Omwoyo?

14. Shoboorora oku okugumizamu nootunguuka kiri eky’oburinzi.

¹⁴ N’eky’oburinzi Omukristaayo okugira okubaasa kw’okwetegyereza okutendekirwe kutaanisa ekirungi n’ekibi omu nsi egi esiisikaire omu micwe. (Efe. 4:19) Nk’eky’okureeberaho, ow’eishe-emwe orikwetwa James, owaabaire naashoma kandi akateekateeka aha bitabo ebirikushoboorora Ebyahandiikirwe, akaikiriza omurimo ahu buri omwe aha barikukora nabo yaabaire ari omukazi. James naagira ati: “N’obu baingi baabaire bataine micwe, omwe aharibo akaba naatwaza gye kandi arikworeka ekihika ky’okwega amazima ga Baibuli. Kwonka ku twabaire tuba turi twenka omu ofiisi, akaba akora ebintu ebirikworeka ngu naandigira. Nkabanza kuteekateeka ngu naazaana kwonka kikangumira kumwangira. Omu mbeera egyo nkaijuka eky’okureeberaho ky’ow’eishe-emwe owaabaire aine okugyezibwa nikwo kumwe ahari kukorera, ekiziire omu Munaara gw’omurinzi. Ekicweka ekyo kikaba nikigamba ahari Yosefu na muka Potifari. * Ahonaaho nkasindika omwishiki ogwo, yairuka yaaza aheeru.” (Kut. 39:7-12) James kikamushemeza kureeba ngu tihaine ekyagarukire kubaho kandi akaguma aine omutima ogutarikweshinja—1 Tim. 1:5.

15. Omutima gwaitu ogw’akamanyiso nigubaasa kuhama guta twagumizamu nitutunguuka?

¹⁵ Okutunguuka n’okw’omugasho ahakuba nikuhamya omutima gaitu ogw’akamanyiso tureka “[kuhabisibwa] enyegyesa ezihangire ez’emiringo mingi.” (Shoma Abaheburaayo 13:9.) Twateeraho kutunguuka omu by’omwoyo, ebiteekateeko byaitu nibiguma bihamiire ahari ebyo ‘ebirikukira obukuru.’ (Fil. 1:9, 10) Eki nikituhwera kwongyera kusiima Ruhanga n’ebyo ebi atuhaire kutuhwera. (Rom. 3:24) Omukristaayo ‘okuzire omu kwetegyereza’ naakwesiimisa kandi naagira omukago murungi na Yehova.—1 Kor. 14:20.

16. Niki ekyahweraire munyaanyazi-itwe omwe kugira ‘omutima guhami’?

¹⁶ Munyanyaazi-itwe orikwetwa Louise naikiriza ngu bwanyima y’okubatizibwa akamara obwire arikufayo munonga aha ku abandi barikumureeba. “Tihaine kibi eki naabaire ninkora,” nikwo arikugira, “kwonka omu omutima gwangye nkaba ntaine kihika ky’okuheereza Yehova. Nketegyereza ngu nkaba nyine kukora empindahinduka naaba niinyenda kuhurira ngu ninkundwa Yehova. Empindahinduka ey’amaani ei naabaire nyine kukora n’okuta omutima gwangye gwona omu kumuramya.” Ahabw’okuteeraho kwe, Louise akabaasa kugira ‘omutima guhami,’ kandi eki kikamuhwera n’obu yaagizire amagara mabi. (Yak. 5:8) Louise akagira ati: “Nkateeraho munonga, kwonka buzima nkairira haihi na Yehova.”

‘Yoroba Kuruga aha Mutima’

17. Ahabw’enki okworoba kwabaire kuri kukuru munonga omu kyasha ky’okubanza?

¹⁷ Obuhabuzi bwa Paulo ‘obw’okugumizamu nootunguuka’ bukacungura Abakristaayo ab’omu kyasha ky’okubanza abaabaire nibatuura omuri Yerusaalemu na Buyudaaya. Abaayorobire obuhabuzi obwo bakaba baine kukoresa okubaasa kwabo okw’okwetegyereza kureeba akamanyiso aku Yesu yaagambire ngu “bahungire aha nshozi.” N’ahabw’ekyo ku bareebire “ekirikuzira ekirikuhwerekyereza. . . kyemereire omu mwanya ogurikwera,” nigo mahe g’Abarooma geehinguririze Yerusaalemu garikwenda kugitahirira, bakamanya ngu obu nibwo bwire bw’okuhunga. (Mat. 24:15, 16) Abakristaayo bakoorobera okurabura kwa Yesu, bahunga omuri Yerusaalemu etakacwekyereziibwe kandi, kurugiirira aha munyabyafaayo Eusebius, bakahungira omu rurembo Pella omu nshozi za Gileadi. N’ahabw’ekyo bakakira akabi k’amaani akarahikire ahari Yerusaalemu omu byafaayo.

18, 19. (a) Ahabw’enki omu obunaku obu ni kikuru kworoba? (b) Nituza kugamba ahari ki omu kicweka ekirikukurataho?

¹⁸ Okworoba oku turikwega ahabw’okugumizamu nitutunguuka nikwija kutukiza obunabi bwa Yesu oburikugira ngu ‘nihaija kubaho okubonabona kwingi okutakabahoga’ bwaba nibuhikiirira omu bwijwire. (Mat. 24:21) Mbwenu shi nitwija kworobera obuhabuzi bwona obu turaatungye kuruga aha ‘mwambari omwesigwa kandi ow’obwengye’? (Luk. 12:42) Ka ni kikuru kwega kworoba twihire aha mutima!​—Rom. 6:17.

¹⁹ Okubaasa kutunguuka twine kutendeka okubaasa kwaitu kw’okuteekateeka. Eki nitukikora turikuteeraho kwemanyiiza kwega Ekigambo kya Ruhanga kandi tukakyorobera. Okutunguuka omu by’omwoyo nikibaasa kugumira eminyeeto. Ekicweka ekirikukurataho nikiza kworeka oku oburemeezi obwo burikubaasa kusingurwa.

[Obugambo obw’Ahansi]

Waayega ki?

• Okutunguuka omu by’omwoyo niki, kandi nitubaasa kukikora tuta?

• Okwemanyiiza kwega Ekigambo kya Ruhanga nikituhwera kita kugumizamu nitutunguuka?

• Nitubaasa kwega tuta kworoba?

• Okutunguuka omu by’omwoyo nikutugasira kuta?

[Ebibuuzo by’obucweka]

[Ekishushani]

Okugyendera aha buhabuzi bwa Baibuli nikutuhwera kushoboorora oburemeezi omu muringo murungi

[Ekishushani]

Okukuratira obuhabuzi bwa Yesu kikacungura Abakristaayo ab’omu kyasha ky’okubanza