Abakazi, Ahabw’enki Mwine Kworobera Emitwe Yaanyu?

‘Omutwe gw’omukazi ni iba.’—1 KOR. 11:3.

1, 2. (a) Entumwa Paulo akahandiika ki aha bikwatiraine n’entebeekanisa ya Yehova ey’obwebembezi? (b) Nituza kugarukamu bibuuzo ki omu kicweka eki?

 YEHOVA akataho entebeekanisa y’obwebembezi ei entumwa Paulo yaahandiikireho arikugira ngu ‘omutwe gw’omushaija ni Kristo’ kandi ‘omutwe gwa Kristo ni Ruhanga.’ (1 Kor. 11:3) Omu kicweka ekihwaire tureebire ngu Yesu akaba naagutwara n’omugisha kweta ahansi y’obwebembezi bw’omutwe gwe Yehova Ruhanga, kandi Yesu niwe mutwe gw’abashaija Abakristaayo. Kristo akaba atarikweyendeza, kureka akaba naatwariza gye abantu kandi abainiire embabazi, n’esaasi. Abashaija nikwo baine kutwariza abandi omu kibiina, na munonga abakazi baabo.

² Kandi shi abakazi? Omutwe gwabo n’oha? ‘Omutwe gw’omukazi ni iba,’ nikwo Paulo yaahandiikire. Mbwenu shi baine kutwara bata ebigambo ebyo? Omusingye ogu shi nigukora n’obu iba yaakuba atari mu mazima? Mbwenu shi nikyetengyesa omukazi kuguma ahunami, kworeka ngu naayeta ahansi y’obwebembezi bw’omushaija? Omukazi naabaasa kukora ki kusiimwa iba?

Naaza Kumukorera “Omuhwezi”

3, 4. Ahabw’enki entebeekanisa y’obwebembezi erikugasira eka?

³ Ruhanga niwe yaatandikireho entebeekanisa ya bamwe kuba emitwe y’abandi. Yehova ku yaaherize kuhanga Adamu akagira ati: “Ti kirungi omuntu kuguma wenka, ka mmukorere omuhwezi omushemereire.” Bwanyima ya Haawa kuhangwa, Adamu akashemererwa munonga ahakuba akatunga omuhwezi omushemereire kandi yaagira ati: “Ogu n’eigufa eryaruga omu magufa gangye, kandi n’omubiri ogwaruga omu mubiri gwangye.” (Kut. 2:18-24) Adamu na Haawa bakaba nibaija kukomookaho oruganda rw’abantu abahikiriire, abaabaire nibaija kutuura omu paradiso ebiro byona bashemereirwe.

⁴ Abazaire baitu ab’okubanza, bakafeerwa omugisha gw’okutuura omu mbeera ezihikiriire omu musiri Edeni ahabw’obugomi. (Shoma Abarooma 5:12.) Kwonka entebeekanisa y’emitwe y’amaka ekagumaho. Twagikuratira nitugasirwa munonga kandi nitutunga okushemererwa omu bushwere. N’ekirikurugamu nitwehurira nk’oku Yesu yaayehuriire ahabw’okworobera omutwe gwe, Yehova. Obu Yesu yaabaire atakaizire omu nsi, akaba ‘naanyesiimira omu maisho ga [Yehova] buri izooba.’ (Enf. 8:30) Ahabw’obutahikiirira, abashaija tibakibaasa kwebembera gye, nari abakazi kweta ahansi y’obushoboorozi bwabo. Abashaija n’abakazi baagumizamu niboorobera entebeekanisa egyo nibahamiranaho omu bushwere.

5. Ahabw’enki abashweraine baine kuta omu nkora obuhabuzi oburi omu Abarooma 12:10?

⁵ Omushaija n’omukazi we nibabaasa kuba abasinguzi baagyendera aha buhabuzi obwahairwe Abakristaayo boona oburikugira ngu “omu kukunda ab’eishe-emwe, mukundane buzima; omu kuhaana ekitiinisa, buri muntu ateekateekye ahari mugyenzi we okumweshumba.” (Rom. 12:10) Kandi, omushaija n’omukazi we baine kutamu amaani, ‘kukorerana gye, kugirirana embabazi, kandi bakasaasirana.’—Efe. 4:32.

Omushaija Yaaba Atari mu Mazima

6, 7. Omukazi Omukristaayo yaayorobera iba otari omu mazima, niharugamu ki?

⁶ Mbwenu shi omukundwa waawe ku yaakuba atarikuheereza Yehova? Na munonga yaaba ari omushaija. Omu mbeera egi, omukazi aine kutwaza ata? Baibuli neegaruka eti: “Abakazi, mworobere mutyo baabaroimwe, ku haraabe hariho abatarikworobera kigambo kya Ruhanga, bahindurwe emitwarize y’abakazi baabo, bataine kigambo kyona eki babagambiire, ahabw’okureeba emitwarize yaanyu mirungi ey’okutiina Ruhanga.”—1 Pet. 3:1, 2.

⁷ Ekigambo kya Ruhanga nikihabura omukazi kuguma naayorobera iba otari omu mazima. Omukazi yaaba aine emicwe mirungi nikibaasa kuhiga omushaija kufayo kumanya erikumureetera kutwaza gye atyo. N’ekirikurugamu, naabaasa kwenda kwishwijuma ebi omukazi Omukristaayo arikwikiriza kandi empereruka ayemanyire amazima.

8, 9. Omukazi Omukristaayo naabaasa kukora ki iba otari mu mazima yaaba atarikusiima emitwarize ye mirungi?

⁸ Kandi shi omushaija otari mu mazima ku yaaba atarikusiima emitwarize mirungi y’omukazi we? Ebyahandiikirwe nibihiga omukazi kworeka emitwarize y’Ekikristaayo obwire bwona, n’obu kiraabe kitoorobi kukikora. Nk’eky’okureeberaho, nitushoma omu 1 Abakorinso 13:4: “Okukunda kugumisiriza.” Omukazi Omukristaayo naaba aine kugumizamu ‘ayebundaarize n’obucureezi bwona, naayetwara, naagumisiriza,’ kandi naatwaza omu muringo gwa rukundo. (Efe. 4:2) Arikuhwerwa amaani ga Ruhanga, nigwo omwoyo gurikwera, nikibaasika kugira emitwarize y’Ekikristaayo n’omu mbeera zigumire.

⁹ “Amaani agarikukirira kimwe n’aga Ruhanga, ti gaitu,” nikwo Paulo yaahandiikire. (2 Kor. 4:7) Omwoyo gwa Ruhanga niguhwera omushaija n’omukazi we kukora bingi ebirikureebeka nk’ebitarikubaasika. Nk’eky’okureeberaho, omukundwa waawe naabaasa kutwaza omu muringo gurikukureetera kwenda kweshashuza. Kwonka, Baibuli neehabura Abakristaayo boona eti: “Mutaihura omuntu weena ekibi ahabw’ekibi. . . . N’oku kyahandiikirwe ngu: ‘Okuhoora enzigu n’okwangye, niinye ndizimuura, nikwo [Yehova] arikugira.’” (Rom. 12:17-19) Nikyo kimwe, 1 Abatesalonika 5:15 nihagira hati: “Mwerinde hatagira omuntu weena omuriimwe owaihura ondiijo ekibi ahabw’ekibi, kureka obutoosha mwezirikire okukorerana gye, n’okukorera gye abandi boona.” Twaba twine omwoyo gwa Yehova nitubaasa kukora ebintu ebi tutarikubaasa kuhikiiriza ahabw’amaani gwaitu. Buzima ka kihikire kushaba Yehova kutuha omwoyo gurikwera!

10. Yesu akakora ki abantu ku baamutwariize kubi?

¹⁰ Yesu akataho eky’okureeberaho kirungi arikutwariza gye abaamukozire ebintu bibi. 1 Petero 2:23, nihagira hati: ‘Ku yaajumirwe, tiyaabagaruriza, ku yaabonabonesiibwe, tiyaabahayira, kureka akeehayo ahari ogwo orikucwa emanja z’amazima.’ Nituhigwa kukuratira eky’okureeberaho kye kirungi. Abandi bakutwariza kubi otakaayeshashuza. Abakristaayo twena nituhigwa ‘kugirirana embabazi n’omutima omucureezi. Kureka kwihurana ebibi, nari kugarurirana ebijumo.’—1 Pet. 3:8, 9.

Abakazi shi Baine Kuguma Bahunami Kyonka?

11. Ni mugisha ki ogw’omuhendo ogu abakazi Abakristaayo abamwe baraije kuheebwa?

¹¹ Mbwenu shi omukazi okworobera iba omutwe gwe nikimanyisa ngu taine kugira eki yaagamba omu nshonga z’eka? Ngaaha buzima. Yehova ahaire abashaija n’abakazi obujunaanizibwa bwingi. Teebereza ekitiinisa eki 144,000 baaragire baaba abagabe n’abanyamurwa omu iguru Yesu yaaba naategyeka ensi egi! Omubaro ogwo nigutwariramu n’abakazi. (Gal. 3:26-29) Buzima, Yehova ahaire abakazi omwanya omu ntebeekanisa ye y’ebintu.

12, 13. Ha eky’okureeberaho ekirikworeka ngu hakaba hariho abakazi abaagambire obunabi.

¹² Nk’eky’okureeberaho, omu bwire bwa Baibuli, hakaba hariho baanabikazi. Yoeli 2:28, 29 nihagira hati: “Bwanyima obunaku ku burihika, ndyashuka [o]mwoyo wangye aha bantu boona, batabani baanyu na bahara baanyu baryaragura. . . . Nangwa n’abahuuku bangye n’abazaana bangye ndyabashukaho Omwoyo wangye omu biro ebyo.”

¹³ Bamwe aha beegi ba Yesu 120 bakashukwaho omwoyo gurikwera obu baabaire beerundaniire omu kishengye ky’ahaiguru omuri Yerusaalemu aha Pentekoote 33 Y.A. kandi hakaba harimu abashaija n’abakazi. Petero akajuriza obunabi bwa Yoeli kworeka ngu abashaija n’abakazi nibaingana. Petero akagira ati: ‘Eki nikyo kyaragwirwe nabi Yoeli, ngu omu biro by’aha muheru, Ruhanga naija kushuka omwoyo gwe aha bantu boona, batabani baabo na bahara baabo nibaija kuragura, kandi bahuuku be n’abazaana be, nibaija kuragura.’—Byak. 2:16-18.

14. Abakazi bakeejumba bata omu kubuzya Obukristaayo omu kyasha ky’okubanza?

¹⁴ Omu kyasha ky’okubanza abakazi bakakora kihango omu kubuzya Obukristaayo. Bakabuurira abandi aha Bukama bwa Ruhanga kandi bakakora ebintu ebiine akakwate n’omurimo gw’okubuurira. (Luk. 8:1-3) Nk’eky’okureeberaho, entumwa Paulo akagamba ahari Foibe munyaanyazi-itwe omuheereza w’ekibiina kya Kenkerea. Kandi omu kuramutsya okwo, Paulo akagamba aha maziina g’abakazi abeesigwa nka “Trufaina na Trufoosa abarikukorera omuri Mukama.” Kandi akaramutsya na “Peresi orikukundwa, owaayezirikire kukorera omuri Mukama.”—Rom. 16:1, 12.

15. Obunaku obu abakazi nibeejumba bata omu kubuzya Obukristaayo?

¹⁵ Ebiro ebi, omu bantu abarikurenga obukaikuru munaana barikubuurira amakuru marungi g’Obukama bwa Ruhanga omu nsi yoona abakazi nibo bakizireyo kukora omurimo ogwo. (Mat. 24:14) Baingi bari omu buheereza bw’obutwire, abamiisani, kandi abandi nibaheereza aha Beseeli. Daudi omuhandiiki wa zaaburi akeeshongora ati: Yehova “aha ekiragiro, abakazi abarikutwara amakuru n’eihe rihango.” (Zab. 68:11) Kandi buzima ebigambo ebi bibaasize kuhikiirira! Yehova naasiima omurimo ogu abakazi barikukora barikurangirira amakuru marungi n’okuhikiiriza ebigyendererwa kye. N’ahabw’ekyo okworoba kw’abakazi Abakristaayo tikirikumanyisa ngu tibaine kugira eki baagamba.

Abakazi Abaagizire Obumanzi bw’Okugamba

16, 17. Saara akateeraho ata abakazi eky’okureeberaho oku baine kuhunama omu bushwere?

¹⁶ Yehova ku araabe naabaasa kuha abakazi obujunaanizibwa bwingi, mbwenu abashaija tibashemereire kwehabuza aha bakazi batakacwiremu? Baakikora nibaija kugasirwa. Ebyahandiikirwe nibyoreka emirundi mingi obu abakazi baagamba kandi bakakora ebintu batabandize kushaba baibabo rusa. Yetegyereze babiri aharibo.

¹⁷ Saara muka Abrahamu akaguma naamuhiga kubinga muka iba n’omutabani ahabw’okumugaya. “Ekyo kyagwisa kubi Abrahamu,” kwonka atari Ruhanga. Yehova akagambira Abrahamu ati: “Otaguubwa kubi ahabw’omwana n’ahabw’omuzaanakazi waawe. Kyona eki Saara araakugambire, omworobere.” (Kut. 21:8-12) Abrahamu akoorobera Yehova, yaata omu nkora eki Saara yaamushabire.

18. Abigaili akeehabura kukora ki?

¹⁸ Kandi teekateeka n’ahari Abigaili, muka Nabali. Obu Daudi yaabaire ahungire Saulo Omugabe w’eitima, akamara bwire acumbiikire haihi n’obusyo bwa Nabali. Omu mwanya gw’okutwara bimwe aha by’obugaiga by’omushaija ogwo, Daudi n’abashaija be bakacwamu kubirinda.  Kwonka, Nabali “akaba ari omunyamwanga, aine emicwe mibi,” kandi ‘akajuukirira’ abashaija ba Daudi. Akaba ataine mugasho nakye kandi ‘obushema bukaba butuura bumwezingiriire.’ Abashaija ba Daudi ku bamushabire eby’okurya omu muringo gw’ekitiinisa, Nabali akanga kubibaha. Mbwenu shi Abigaili akatwaza ata ku yaakihuriire? Atabuurize Nabali, akatebeekanisa “emigaati magana abiri, n’efurebe ibiri za viinyo, n’enyama y’entaama itaano eteekire gye n’encuro itaano z’engano ezikarangire, n’emitsitsa igana y’emizaabibu eyomire, kandi n’ebiihuro magana abiri by’ebijuma by’emitiini” yaabitwarira Daudi n’abashaija be . Abigaili shi akakora ekihikire? Yehova ‘akateera Nabali,’ nikwo Baibuli erikugira, “yaafa.” Bwanyima Daudi akatwara Abigaili yaaba omukazi we.—1 Sam. 25:3, 14-19, 23-25, 38-42.

‘Ekirikureetera Omukazi Kusiimwa’

19, 20. Niki erikureetera omukazi kuba orikusiima buzima?

¹⁹ Baibuli neesiima omukazi orikukora ebintu omu muringo gwa Yehova. Ekitabo ky’Enfumu nikihimbisa “omukazi w’omutima,” kirikugira kiti: “Omukazi w’omutima, n’oha owaakumuzoora? Ahakuba naakira amabaare g’obuguzi bwingi. Omutima gwa iba gumwesiga kandi omushaija we taribura kutunga. Ebiro byona eby’amagara ge akora gye iba, tamukora kubi.” Kandi “akanwa ke kagamba eby’obwengye, kandi okwegyesa eby’embabazi tikumuruga mu kanwa. Areeberera gye emicwe y’ab’omu ka ye, kandi tariira koya. Abaana be baimuka, bamweta ow’omugisha; kandi na iba amusingiza.”—Enf. 31:10-12, 26-28.

²⁰ Niki ekirikureetera omukazi kuba orikusiimwa buzima? “Karimi karungi n’oburyarya; kandi oburungi ni busha,” nikwo Enfumu 31:30, ‘kwonka omukazi orikutiina [Yehova] aba ow’okusiimwa.’ Omu kutiina Yehova nihatwariramu okweta ahansi y’entebeekanisa y’omutwe gw’eka eteirweho. ‘Omutwe gw’omukazi ni iba,’ ’omutwe gw’omushaija ni Kristo,’ kandi ‘omutwe gwa Kristo ni Ruhanga.’—1 Kor. 11:3.

Yoreka ngu Noosiima Ekiconco kya Ruhanga

21, 22. (a) Niki ekiraahwere Abakristaayo abashweraine kusiima ekiconco ky’obushwere? (b) Ahabw’enki twine kuha ekitiinisa entebeekanisa ya Yehova ey’emitwe y’amaka?

²¹ Hariho enshonga nyingi ahabw’enki omushaija n’omukazi abagaitsirwe baine kusiima Ruhanga! Nibabaasa kukorera hamwe kugira obushwere oburimu okushemererwa. Okukira munonga nibabaasa kusiima Ruhanga ahabw’enki kiconco ky’obushwere ekirikubahwera kugyenda hamwe na Yehova. (Rus. 1:9; Mik. 6:8) Owaatandikireho obushwere, naamanya kyenyini ekirikureeta okushemererwa. Butoosha twaza nk’oku arikwenda, reero obwo okushemerererwa omuri [Yehova] nigaija kuba amaani gaawe nangwa n’omu ensi egi ey’okushoberwa.—Neh. 8:10.

²² Omushaija Omukristaayo orikukunda omukazi we n’oku arikwekunda naayebembera gye eka ye. Kandi omukazi we yaaba naatiina Ruhanga naija kukunda iba, kumushagika kandi naamuha ekitiinisa ayihire aha mutima. Okukira byona, obushwere bwabo burungi, nibwija kuhimbisisa Yehova, Ruhanga.

Noijuka?

• Entebeekanisa ya Yehova ey’obwebembezi n’eha?

• Ahabw’enki omushaija n’omukazi we baine kuhaana ekitiinisa?

• Omukazi Omukristaayo aine kutwariza ata omushaija we otari mu mazima?

• Ahabw’enki abashaija baine kwehabuza aha bakazi baabo batakacwiremu aha nshonga nkuru?

[Ebibuuzo by’obucweka]

[Akabokusi]

Ahabw’enki Twine Kworobera Entebeekanisa y’Emitwe?

Yehova akateeraho ebihangirwe ebiine obwengye entebeekanisa y’okugira emitwe yaabyo. Ekateebwaho kugasira ebihangirwe eby’omwoyo n’abantu. Neebibaasisa kukoresa obugabe bwabyo obw’okwecweramu n’okuhaisa Ruhanga ekitiinisa birikuheereza omu bumwe.—Zab. 133:1.

Abakristaayo entoore nibeeta ahansi y’obushoboorozi bwa Yesu Kristo. (Efe. 1:22, 23) ‘Omwana nawe naija kuteebwa omu butegyeki bw’Ogwo owaataire byona ahansi ye, Ruhanga abone kuba byona.” kworeka ngu nawe naashagika obwebembezi bwa Yehova. (1 Kor. 15:27, 28) Buzima ka kihikire abantu abeehaireyo ahari Ruhanga kworobera entebeekanisa y’obwebembezi omu kibiina n’omu ka! (1 Cor. 11:3; Heb. 13:17) Baakikora, Yehova naija kusiima kandi atuhe n’emigisha.—Isa. 48:17.

[Ekishushani]

Okushaba nikubaasa kuhwera omukazi Omukristaayo kugira emitwarize y’Ekikristaayo

[Ekishushani]

Yehova naasiima ebi abakazi barikukora kwenegyeza emirimo y’Obukama