OBUSHAARIZI OMU KA N’OMU KUTEERANA: Ekibiina ky’Amahanga Ageteeraine nikigira kiti: “Omukazi omwe ahari bashatu naatwarizibwa omu muringo gw’obushaarizi aha mubiri gwe nari omu kuteerana obwo arikutwarizibwa atyo ou ari nawe omu bushwere.” Eky’obusaasi, “nikiteeberezibwa ngu, omu nsi yoona omukazi omwe ahari bataano naija kuhambwa nari nibaija kuteeraho kumuhamba.”

OBWINAZI BW’AHA NGUUTO: Nikigambwa ngu abainazi enshaarizi abarikurenga 30,000 nibo bari omuri United States. Omuri Latin America, omuntu nk’omwe ahari bashatu naatwarizibwa omu muringo gw’obushaarizi.

OBWITSI: Nikiteeberezibwa ngu abantu nk’emitwaro makumi ataano bakaitwa omu mwaka gumwe, abantu abarikukira abaitiirwe omu ntaro. Amahanga g’obukiizi-bwa-buryo bwa Africa n’aga rwagati ya America nigo garikukira kubamu obwitsi, emirundi erikurenga ena aha bwitsi oburi omu nsi yoona. Abantu abarikurenga 100,000 bakaitwa omuri Latin America omu mwaka gumwe, kandi abantu 50,000 bakaitwa omuri Brazil yonka. Mbwenu shi hariho ekirikubaasa kwihiraho kimwe obushaarizi?

Ahabw’enki obushaarizi bujanjaire munonga? Ebintu bingi ebirikubureeta nibitwariramu, empaka ezirikubaho ahabw’abantu kuba batarikwingana omu by’entaasya, okutwara abandi nk’ab’ahansi, okukoresa kubi amaarwa n’emibazi erikutokooza obwongo, abaana okureeba emitwarize y’obushaarizi ey’abantu bakuru, n’abantu enshaarizi okutakira kufubirwa.

Ekirungi, omu bicweka ebimwe eby’ensi babaasize kuteeraho kutuubya obushaarizi. Omu rurembo orurimu abantu baingi orwa São Paulo, Brazil, omu myaka ehingwire obwitsi bubaasize kutuuba ebicweka 80 ahari 100. Kwonka, emishango y’obushaarizi ni mingi omu rurembo orwo, kandi abantu 10 aha 100,000 nibaitwa. Niki ekirikwija kumaraho obushaarizi okutagaruka kubaho?

Ekiraamareho obushaarizi nikitwariramu abantu, emiteekateekyere yaabo, n’emitwarize yaabo. Abantu enshaarizi kubaasa kuhinduka, baine kugira emitwarize nka rukundo, okuha abandi ekitiinisa, n’okufayo aha bandi omu mwanya gw’okugira okwetunguura, omururu, n’okweyendeza.

Niki ekirikubaasa kuhiga omuntu kukora empindahinduka nk’ezi? Teekateeka aha ki Baibuli erikwegyesa:

• “Oku nikwo kukunda Ruhanga, itwe okworobera ebiragiro bye.”​—1 Yohaana 5:3.

• “Okutiina Mukama nikwo kwanga ebibi.” *​—Enfumu 8:13.

Okukunda Ruhanga n’okutenda kumugwisa kubi,  biine amaani g’okuhiga omuntu akahindurira kimwe emitwarize ye. Eki buzima nikibaasa kubaho?

Teekateeka aha ky’okureeberaho kya Alex, * owaabaire amazire emyaka 19 omu kihome kya Brazil ahabw’emishango mingi. Akaija yaaba Omujurizi wa Yehova omu mwaka 2000, bwanyima y’okwega Baibuli n’Abajurizi ba Yehova. Mbwenu shi ahinduriire kimwe emitwarize ye y’obushaarizi? Buzima, Alex naayefuuza ahabw’ebintu bibi ebi yaakozire. Naagira ati: “Nkatandika kukunda Ruhanga ahabw’okumpwera kwehurira ngu nsaasiirwe. Okusiima n’okukunda Yehova bimpwereire kuhindura aha emitwarize yangye.”

César, nawe kuruga Brazil, akaba naayejumba omu kwibisa embundu. Akaguma naatwaza atyo kumara emyaka 15. Niki ekyamureeteire kuhinduka? Omurundi gumwe ku yaabaire ari omu kihome, Abajurizi ba Yehova bakamutaayaayira baamwegyesa Baibuli. César naashoboorora ati: “Nigwo gwabaire guri omurundi gwangye gw’okubanza kugira ekigyendererwa. Nkeega kukunda Ruhanga. Kandi nkeega n’okumutiina ndikwetantara kukora ekibi ngu ntamugwisa kubi. Nkaba ntarikwenda kworeka ngu tindikusiima embabazi ze. Rukundo egyo n’okutiina bikandeetera kuhinduka.”

Eby’okureeberaho ebi nibyoreka ki? Nibyoreka ngu Baibuli eine amaani g’okuhindurira kimwe abantu bakahindura emitwarize yaabo n’emiteekateekyere yaabo. (Abaefeso 4:23) Alex, owaaba yaagambirweho, naayongyeraho ati: “Ebi naayegire omu Baibuli bikaba biri nk’amaizi marungi munonga garikunyeshukaho, mporampora gakanyozyaho ebiteekateeko bibi. Ebi nibyo bintu ebi naabaire ntarikuteekateeka ngu nimbaasa kureka ahabwangye.” Buzima, ku turikwijuza ebiteekateeko byaitu obutumwa burungi bwa Baibuli, nibubaasa kutwozyaho obubi bwaitu. Ekigambo kya Ruhanga kiine amaani g’okwozya. (Abaefeso 5:26) Ekirikurugamu, abantu babi kandi abarikweyendeza nibabaasa kuhindura emitwarize yaabo bagire embabazi n’obusingye. (Abarooma 12:18) Nibagira obusingye baagyendera aha misingye ya Baibuli.​—Isaaya 48:18.

Abajurizi ba Yehova abarikurenga obukaikuru munaana abari omu mahanga 240 babaasize kumanya ekirikuhezaho obushaarizi. Abantu b’erangi zoona kandi abarikuruga omu mahanga goona beegire kukunda Ruhanga n’okumutiina kandi nabo nibakundana, ekirikubareetera kutuurana omu busingye nk’eka emwe omu nsi yoona. (1 Petero 4:8) Ekyo nikyoreka ngu obushaarizi nibubaasa kuhwaho omu nsi.

Baibuli neeraganisa ngu Ruhanga ari haihi kuboneza ensi akaihamu obushaarizi. Obushaarizi oburiho hati nibwija kuhwaho aha “kiro ky’orubanja eki abantu abatatiina Ruhanga baricwekyerezibwaho.” (2 Petero 3:5-7) Kuruga obwo tiharikwija kugaruka kubaho abantu abashaarizi kutubonabonesa. Nitubaasa kuhamya tuta ngu Ruhanga naayenda kumaraho obushaarizi?

Baibuli neegira ngu Ruhanga naayanga ‘abakunda endwano.’ (Zaaburi 11:5) Omuhangi naakunda obusingye n’oburingaaniza. (Zaaburi 33:5; 37:28) Ekirikumanyisa ngu tarikwija kwemera abantu enshaarizi kugumaho ebiro byona.

Buzima, ensi ensya erimu obusingye eri haihi kubaho. (Zaaburi 37:11; 72:14) Ahabw’enki otarikwega bingi aha ku orikubaasa kuba ohikire kutuura omu nsi etarimu bushaarizi?