1, 2. (a) Shoboorora eky’okureeberaho kya Yesu ekirikukwata ahari mukama w’omusiri gw’emizaabibu. (b) Eky’okureeberaho eki nikyoreka kita omutwarize gw’obufura n’embabazi?

OMUHINGI w’emizaabibu eizooba rimwe akaza omu katare kare omu kasheeshe kupangisa abashaija b’okukora omu mizaabibu ye. Abashaija abu yaaboine bakaikiriza esente ezi yaabagambiire baaza kukora. Kwonka mukama w’omusiri akaba naayenda abakozi baingi, n’ahabw’ekyo akaguma naagaruka omu katare eizooba ryona kupangisa abashaija abandi, boona yaabaha esente zirikwingana. Omu mwabazyo, akarundaana abakozi kubaha omushaara gwabo, kandi boona abaakozire eshaaha nyingi nari emwe yonka, akabaha esente zirikwingana. Abu yaabandize kupangisa ku baakimanyire, bakatongana. Mukama w’omusiri gw’emizaabibu akabagarukamu ati: ‘Ti mwaikiriza esente ezi twaragaana? Tinyine obugabe bw’okuha abakozi bangye boona eki ndikwenda? Mwagira eihari ahabw’obufura bwangye?’​—Mat. 20:1-15.

² Enfumu ya Yesu neetwegyesa ekintu kikuru aha ‘mbabazi za Ruhanga.’ (Shoma 2 Abakorinso 6:1.) Abakozi  abaakozire eshaaha emwe bakaba batashemereire kutunga omushaara ogurikwingana n’ogw’abandi, kwonka mukama w’omusiri gw’emizaabibu akabagirira embabazi z’omutaano. Aha bikwatiraine n’ekigambo “embabazi,” ekirikukira kuvunuurwa ‘nk’okusaasibwa’ omu nvunuura za Baibuli enyingi, omucondooza omwe akahandiika ati: “Okutwarira hamwe ekigambo ekyo nikimanyisa ekiconco eki omuntu arikutungira busha atakikoreire, kandi eki arikuba atashemereire kutunga.”

3, 4. Ahabw’enki Yehova yaagiriire abantu boona embabazi ezitabashemereire, kandi akakikora mu muringo ki?

³ Ebyahandiikirwe nibigamba aha ‘kiconco ky’embabazi za Ruhanga.’ (Efe. 3:7) Yehova naatuha ata ekiconco eki kandi n’ahabw’enki? Ku ogire ngu nituhikiiriza byona ebi Yehova arikwenda omu muringo oguhikire, embabazi ezi arikutugirira tukaabaire tuzishemereire. Kwonka, nituremwa kuhikiiriza gye ebi arikwenda. Niyo nshonga ahabw’enki Sulemaani Omugabe omunyabwengye yaahandiikire ati: “Tihariho ohikiriire omu nsi okora gye atashiishe na kakye.” (Mub. 7:20) Entumwa Paulo nawe akagira ati: “Boona bakashiisha, kandi tibarikuhika aha kitiinisa kya Ruhanga,” kandi “ebihembo by’ekibi n’okufa.” (Rom. 3:23; 6:23a) Eki nikyo tushemereire kutunga.

⁴ Kwonka Yehova akooreka rukundo ei ainiire abantu abaine omuze gw’okushiisha arikukora ekikorwa ky’embabazi. Akoohereza “Omwana we omwe nyamunegyere,” ou yaayehangiire kwija omu nsi kutufeera. (Yoh. 3:16) N’ahabw’ekyo Paulo akahandiika ahari Yesu ati: “Ajwekirwe ekirunga ky’ekitiinisa n’okuhimbisibwa ahabw’okwemera obusaasi bw’okufa, ngu aroze aha kufa omu mwanya gw’abantu boona ahabw’embabazi za Ruhanga.” (Heb. 2:9) Buzima, “ekiconco kya Ruhanga n’amagara agatahwaho omuri Kristo Yesu Mukama waitu.”​—Rom. 6:23b.

5, 6. Niki ekirikurugamu twaba nitutegyekwa (a) ekibi? (b) embabazi za Ruhanga?

⁵ Abantu boona bakahungura bata okufa? Baibuli neeshoboorora ngu ‘ekicumuro ky’omuntu omwe [Adamu] kikareetera rufu’ baijukuru ba Adamu. (Rom. 5:12, 14, 17) Kwonka ekirikushemeza, hati nitubaasa kucwamu kwanga kutegyekwa ekibi. Twaikiririza omu kitambo kya Kristo, nitweta ahansi y’obutegyeki bwa Yehova obw’embabazi ze ezi tutashemereire kugirirwa. Mu muringo ki? “Ei ekibi kyagarukiire kukanya, embabazi zikakiraho kukanya munonga. Ngu nk’oku ekibi kyategyekire kikareeta okufa, embabazi zibe nikwo zaategyekyesa okuhikiirira okuhitsya omu magara agatahwaho ahabwa Yesu Kristo.”​—Rom. 5:20, 21.

⁶ N’obu turaabe tukiri abasiisi, titurikwenda kwikiriza ekibi kikatutegyeka. Twakora ekibi, nitushaba Yehova kutusaasira. Paulo akarabura Abakristaayo ati: “Ekibi tikiribategyeka, ahabw’okuba timurikutegyekwa Biragiro kureka embabazi.” (Rom. 6:14) N’ahabw’ekyo, turi ahansi y’obutegyeki bw’embabazi za Ruhanga. Eki nikirugamu ki? Paulo akashoboorora ati: “Embabazi za Ruhanga . . . nizituhabura okwanga okutatiina Ruhanga n’okwetenga eby’ensi, ngu tubone kugumaho omu busingye obu obwa hati, nitwerinda turi abahikiriire, abarikutiina Ruhanga.”​—Tit. 2:11, 12.

7, 8. Nikimanyisa ki okugira ngu Yehova naayoreka embabazi ze omu miringo mingi? (Reeba ebishushani aha kutandika.)

⁷ Entumwa Petero akahandiika ati: “Nk’oku omuntu weena yaahairwe ekiconco, mube nikwo mwabihweresana, nk’ababiiki barungi ab’embabazi za Ruhanga” ezirikworekwa omu miringo mingi. (1 Pet. 4:10) Ekyo nikimanyisa ki? Okugyezibwa kwona oku turikubaasa kutunga, Yehova naatubaasisa kukwemera. (1 Pet. 1:6) Butoosha Ruhanga naatugirira embabazi ezirikuhikaana na buri kigyezo.

⁸ Buzima, embabazi za Yehova nizoorekwa omu miringo mingi. Entumwa Yohaana akahandiika ati: “Ebiri omuriwe byona nibyo twahairweho twena, n’embabazi ezongyererwa aha zindi.” (Yoh. 1:16) Emiringo mingi ei Yehova arikworekamu embabazi ze neeturugiramu emigisha mingi. Ni migisha ki emwe ahariyo?

9. Nitugasirwa tuta omu mbabazi za Yehova, kandi nitubaasa kworeka tuta okusiima kwaitu?

⁹ Okusaasirwa ebibi byaitu. Ahabw’embabazi za Yehova, nitusaasirwa ebibi byaitu, twaheza kweteisa kandi tukateeraho munonga kwetantara okushiisha. (Shoma 1 Yohaana 1:8, 9.) Embabazi za Ruhanga zishemereire kutureetera kumusiima kandi tukamuhimbisa. Paulo arikuhandiikira Abakristaayo bagyenzi be abashukirweho amajuta, akagira ati: “[Yehova] niwe yaatwihire omu butegyeki bw’omwirima, akatutaasya omu bukama bw’Omwana we ou akunda, ou twatungiiremu okucungurwa, nikwo kusaasirwa ebibi byaitu.” (Kol. 1:13, 14) Okusaasirwa ebibi byaitu nikutubaasisa n’okutunga emigisha endiijo mingi.

10. Ahabw’embabazi za Ruhanga twine mugisha ki?

¹⁰ Okugira omukago murungi na Ruhanga. Turi abatahikiriire, n’ahabw’ekyo kuruga aha kuzaarwa nituba turi abazigu ba Ruhanga. Paulo akeetegyereza ngu tukagarukana na Ruhanga n’obu twabaire tukiri abazigu be ahabw’okufa kw’Omwana we. (Rom. 5:10) Okugarukana na Ruhanga oku nikutubaasisa kugira obusingye na Yehova. Paulo naayoreka ngu omugisha ogu gwine akakwate n’embabazi za Yehova arikugira ati: “Nk’oku [beene Ishe Kristo abashukirweho amajuta] twihirweho orubanja ahabw’okwikiriza, twine obusingye ahari Ruhanga ahabwa Mukama waitu Yesu Kristo, kandi ahabw’Ogwo tureebire oburyo bw’okutaaha omu mbabazi ezi, ezi tuhamiiremu ahabw’okwikiriza.” (Rom. 5:1, 2) Ogu ka n’omugisha gw’amaani!

11. Abashukirweho amajuta nibareeta bata ‘ab’entaama’ ezindi omu kuhikiirira?

¹¹ Okureetwa omu kuhikiirira. Twena nituzaarwa tutahikiriire. Kwonka nabi Danieli akagira ngu omu biro by’emperu, “abaine obwengye,” nibo bashukirweho amajuta, nibaija ‘kureeta baingi omu kuhikiirira.’ (Shoma Danieli 12:3.) Kurabira omu murimo gw’okubuurira n’okwegyesa abantu Baibuli, babaasize kureeta obukaikuru ‘bw’ab’entaama’ ezindi omu kuhikiirira baagira omukago murungi na Yehova. (Yoh. 10:16) Kwonka, eki kibaasize kubaho ahabw’embabazi za Yehova. Paulo akashoboorora ati: “Baihirwaho busha orubanja ahabw’embabazi ze [Ruhanga], naabacunguza okucungurwa okuri omuri Yesu Kristo.”​—Rom. 3:23, 24.

12. Ni mu muringo ki ogu okushaba kwine akakwate n’embabazi za Ruhanga?

¹² Okwirira haihi n’ekitebe kya Ruhanga kurabira omu kushaba. Yehova ahabw’embabazi  ze nyingi naatuha omugisha gw’okwirira haihi n’ekitebe kye eky’omu iguru kurabira omu kushaba. Nangwa na Paulo akagira ngu ekitebe kya Yehova “n’ekitebe ky’embabazi” kandi naatweta kwirira haihi nakyo “tutaine bwoba” nari tutarikwekyengyera. (Heb. 4:16a) Yehova atuhaire omugisha ogu, kurabira omu Mwana we, ahakuba “omuri ogwo twine obumanzi n’obwesigye okuhika ahari Ruhanga ahabw’okwikiriza Yesu.” (Efe. 3:12) Okugamba na Yehova kurabira omu kushaba buzima nikyoreka embabazi ezi atwiniire.

13. Embabazi za Ruhanga nizibaasa kutuhwera zita ahu turikuzeetengyera hoona?

¹³ Okutunga obuhwezi omu bwire obuhikire. Paulo akatuhiga kushaba Yehova tutaine kutiina, “tubone kuheebwa okusaasirwa, n’okugirirwa embabazi z’okutuhwera ahu turaazeetengyere hoona.” (Heb. 4:16b) Obwire bwona haagira ekyatugyeza nari twatunga oburemeezi, nitubaasa kushaba Yehova kutugirira embabazi atuhwere. N’obu turaabe turi abatashemeire, naagarukamu okushaba kwaitu, kurabira omu Bakristaayo bagyenzi baitu, “nikyo turikugambira, tutarikubanganisa, tuti: Mukama niwe muhwezi wangye, tinditiina; omuntu naabaasa kungira ata?”​—Heb. 13:6.

14. Embabazi za Yehova nizigasira zita emitima yaitu?

¹⁴ Okutunga okuhuumurizibwa omu mitima yaitu. Omugisha gw’amaani ogu turikutunga ahabw’embabazi za Ruhanga n’okuhuumurizibwa omu mitima yaitu eine amaganya. (Zab. 51:17) Paulo akahandiikira Abakristaayo b’omuri Tesalonika abaabaire nibahiiganisibwa ati: “Mukama waitu Yesu Kristo na Ruhanga Tataitwe owaatukunzire akatuha okuhuumura okutahwaho n’amatsiko marungi ahabw’embabazi ze, ahuumuze emitima yaanyu.” (2 Tes. 2:16, 17) Ka nikihuumuriza kumanya ngu Yehova naatufaho ahabw’okuba efura omu kugira embabazi!

15. Twine matsiko ki ahabw’embabazi za Ruhanga?

 ¹⁵ Okugira amatsiko g’amagara agatahwaho. Titurikubaasa kugira amatsiko ahabwaitu ahabw’okugira ngu turi abasiisi. (Shoma Zaaburi 49:7, 8.) Kwonka Yehova naatuha amatsiko g’omuhendo. Yesu akaraganisa abakuratsi be ati: “Eki Tata akunda n’eki, ngu weena orikureeba omwana, akamwikiriza, atungye amagara agatahwaho.” (Yoh. 6:40) Buzima, amatsiko g’okutunga amagara agatahwaho n’ekiconco, kandi eki nakyo n’ekikorwa ky’embabazi za Ruhanga. Paulo owaabaire naasiima embabazi ezi, akagira ati: “Embabazi za Ruhanga zireebikire nizireetera abantu boona okujunwa.”​—Tit. 2:11.

16. Bamwe aha Bakristaayo aba ira bakakoresa bata kubi embabazi za Ruhanga?

¹⁶ N’obu embabazi za Ruhanga ziraabe nizitubaasisa kutunga emigisha mingi, titushemereire kuteekateeka ngu naashwekyerera emitwarize mingi. Bamwe aha Bakristaayo aba ira bakaba nibateeraho kuhindura “embabazi za Ruhanga orwekwatso ngu bashambane.” (Yud. 4) Abashaija aba abatari beesigwa buzima bakaba nibateekateeka ngu nibabaasa kushiisha, reero Yehova abasaasire. Ekibi munonga, bakateeraho kushendashenda ab’eishe-emwe bagyenzi baabo kubeegaitaho omu micwe mibi yaabo. Na hati, omuntu orikutwaza atyo, naaba naagwisa kubi ‘omwoyo gw’embabazi.’​—Heb. 10:29.

17. Petero akaha kuhana ki okw’amaani?

¹⁷ Obunaku obu, Sitaane ahabiise Abakristaayo abamwe baateekateeka ngu ahabw’embabazi za Ruhanga nibabaasa kukora ebibi bagume batafubiirwe. Kwonka n’obu Yehova araabe ayeteekateekire kusaasira abasiisi abeeteisize, naayenda ngu tuteereho munonga kurwanisa omuze gw’okukora ebibi. Akahwera Petero kuhandiika ati: “N’ahabw’ekyo naimwe, abarikukundwa, nk’oku mushangirwe nimumanya ebyo, mwerinde mutahabisibwa obuhabe bw’abantu babi, mukaruga omu kuhama kwanyu. Kureka mukurire omu mbabazi za Mukama waitu kandi Omujuni Yesu Kristo.”​—2 Pet. 3:17, 18.

18. Twine bujunaanizibwa ki ahabw’embabazi za Yehova?

¹⁸ Nitusiima embabazi za Yehova. N’ahabw’ekyo twine kukoresa ebiconco byaitu kuha Yehova ekitiinisa n’okuhwera abandi. Mu miringo ki? Paulo naagarukamu ati: “N’oku twine ebiconco ebitari bimwe, nk’embabazi ezi twahairwe oku ziine omutaano . . . okuheereza, twezirikye kuheereza; nari orikwegyesa, ayezirikye kwegyesa; orikuhabura, ayezirikye kuhabura; . . . n’orikugira embabazi, azigire ashemereirwe.” (Rom. 12:6-8) Embabazi ezi Yehova yaatugiriire nizituha obujunaanizibwa bw’okugira bingi by’okukora omu buheereza bw’Ekikristaayo, kwegyesa abandi Baibuli, kugaruramu Abakristaayo bagyenzi baitu amaani, n’okusaasira omuntu weena oraatukore kubi.

19. Ni bujunaanizibwa ki obu twine oburikuza kugambwaho omu kicweka ekirikukurataho?

¹⁹ Itwe abarikusiima rukundo ei Ruhanga yaatworekire, tushemereire kukora kyona ekirikubaasa kubuurira amakuru ‘g’embabazi za Ruhanga.’ (Byak. 20:24) Ebirikukiraho nibiija kugambwaho omu bwijwire omu kicweka ekirikukurataho.