Tihariho ekindi kitabo ky’ediini ekiri nka Baibuli. Tihariho ekindi kitabo eki abantu baingi batwire nibeegamizaho enyikiriza zaabo kumara obwire buraingwa nka Baibuli. Kandi nabwo, tihariho ekitabo eki bakizire kushwijuma kandi bakajuma munonga nka Baibuli.

Nk’eky’okureeberaho, abacondooza abamwe nibabangaanisa yaaba Baibuli ez’obunaku obu nizihikaana n’ebihandiiko ebyabandize. Omuhangu omwe omu by’ediini akagira ati: “Titurikubaasa kuhamya ngu ebi tuhandiikire nibihikaanira kimwe n’ebihandiiko ebyabandize. Ebi twine bijwiiremu enshobe, kandi bingi aharibyo bikahandiikwa hahingwireho emyaka mingi bwanyima y’ebyabandize kandi nibitaanira kimwe omu miringo enkumi n’enkumi.”

Abamwe nibateekateeka ngu Baibuli tehikire ahabw’ediini ezi baakuriiremu. Nk’eky’okureeberaho Faizal, eka ye eyaabaire etari y’Abakristaayo ekamwegyesa ngu Baibuli n’ekitabo kirikwera kwonka ngu ekahindurwa. Naagira ati: “N’ekyarugiremu, nkaba nyine okwekyengyera abantu ku baabaire baba nibenda kugamba naanye aha bya Baibuli. Ahakuba nkaba nnimanya ngu tibaine Baibuli eyaabandize. Kureka baine ehindwirwe!”

Mbwenu shi ni kikuru kumanya yaaba Baibuli yaahindwire nari etarahindwirwe? Teekateeka aha bibuuzo ebi: Noobaasa kwesiga ebi Baibuli erikuraganisa aha biro by’omumaisho waaba otarikumanya yaaba ebiraganiso ebyo bikaba biri omu bihandiiko ebyabandize? (Abarooma 15:4) Mbwenu shi okaikiriize kukoresa emisingye ya Baibuli waaba nooza kucwamu aha nshonga nkuru nk’emirimo, eka, nari okuramya, Baibuli eziriho ku ziraabe zaahandiikirwe abantu kandi zirimu n’enshobe?

N’obu ebitabo bya Baibuli ebyabandize biraabe bitakiriho, nitubaasa kujuriza ebihandiiko bya ira otwariiremu n’ebirikukwata aha Baibuli. Ebihandiiko ebyo bikakira bita okusiisikara, okuhiiganisibwa, n’okuhindurwamu? Ahabw’okugira ngu bikahonokaho ekyo nikikuhamiza kita ngu Baibuli ezi twine zihikire? Yetegyereze eby’okugarukamu by’ebibuuzo ebyo omu kicweka ekirikugarukaho.