1-2. (a) Yehova naareeba ki, abantu baingi baija aha mukoro gw’Ekiihuro kya Mukama Waitu? (Reeba ekishushani ekiri aha mutwe.) (b) Nituza kwega ahari ki omu kicweka eki?

TEEKATEEKA eki Yehova arikureeba, obukaikuru bw’abantu omu nsi yoona baaza aha mukoro gw’Ekiihuro kya Mukama Waitu. Tarikureeba abantu baingi hamwe kwonka, beitu naayetegyereza buri omwe orikuba ariho. Nk’eky’okureeberaho, naareeba abantu abeesigwa abarikwija buri mwaka. Omu bantu abo nihaiziramu n’abo abarikuhiiganisibwa munonga. Abamwe tibarikukira kwija omu nteerane eza butoosha, kwonka nibatwara okwija aha Kiijutsyo nk’ekintu kikuru eki baine kukora. Yehova naareeba n’abo abarikwija aha Kiijutsyo omurundi gwabo gw’okubanza, obundi ahabw’okwenda kureeba ekirikubaho.

² Buzima, Yehova naashemererwa ku arikureeba abantu baingi nibaija aha Kiijutsyo. (Luk. 22:19) Kwonka, omuhendo gw’abantu abarikwija aha Kiijutsyo tikyo arikutwara nka kikuru munonga. Enshonga erikubareetera kwija, niyo arikutwara nka nkuru. Omu kicweka eki, nituza kugarukamu ekibuuzo kikuru munonga eki: Ahabw’enki tutarikwija aha mukoro gw’Ekiijutsyo gwonka, beitu nitwija n’omu nteerane eza buri saabiiti ezi Yehova arikuteeraho abarikumukunda?

3-4. (a) Ahabw’enki nituza omu nteerane? (b) Okuza omu nteerane nikyoreka ki ahariitwe? (c) Kurugiirira aha 1 Abakorinso 11:23-26, ahabw’enki tutaine kufeerwa Ekiijutsyo?

³ Enshonga nkuru ahabw’enki nituza omu nteerane z’ekibiina n’ahabw’okugira ngu n’ekicweka kikuru eky’okuramya kwaitu. Kandi nituza omu nteerane ahabw’okugira ngu nitwegyesibwa  Yehova. Abaine amaryo tibarikwikiriza ngu baine kugira eki baayegyesibwa. (3 Yoh. 9) Okutaana n’ekyo, nituba twine ekihika ky’okwegyesibwa Yehova n’ekibiina kye eki arikukoresa.​—Isa. 30:20; Yoh. 6:45.

⁴ Twija omu nteerane nikyoreka ngu turi abacureezi, kandi ngu tweteekateekire kwegyesibwa. Nituza aha mukoro gw’okwijuka okufa kwa Yesu, tikugira ngu twine kuzayo kyonka, beitu n’ahabw’okwenda kworobera ekiragiro kya Yesu eki: “Mugume mukore muti okuunyijukiraho.” (Shoma 1 Abakorinso 11:23-26.) Omukoro ogu niguhamya amatsiko gaitu ag’ebiro by’omumaisho kandi gutwijutsya ku Yehova arikutukunda munonga. Kwonka Yehova naamanya ngu twine kuhigwa kandi tukagarurwamu amaani emirundi erengire ahari gumwe omu mwaka. N’ahabw’ekyo naatuha enteerane buri saabiiti kandi naatuhiga kuzizamu. Obucureezi nibutuhiga kworoba tukaza omu nteerane. Nitumara eshaaha nyingi buri saabiiti turikwetebeekanisiza enteerane ezi kandi tukazizamu.

5. Ahabw’enki abantu abacureezi nibaikiriza kwija Yehova yaabeeta kubeegyesa?

⁵ Buri mwaka, Yehova naayeta abantu baingi abacureezi kandi nibaikiriza kwija akaba niwe yaabeegyesa. (Isa. 50:4) Ku barikwija aha Kiijutsyo nibasiima, kandi nibatandika n’okwija omu nteerane ezindi. (Zek. 8:20-23) Itwe hamwe n’abasya nitushemererwa kwegyesibwa n’okwebemberwa Yehova, ‘Omuhwezi waitu kandi omujuni waitu.’ (Zab. 40:17) Mbwenu shi niki ekirikubaasa kushemeza nari kuba kikuru okukira okwikiriza kwegyesibwa Yehova na Yesu Omwana we ou arikukunda munonga?​—Mat. 17:5; 18:20; 28:20.

6. Obucureezi bukahwera buta omushaija omwe kwija aha Kiijutsyo?

⁶ Buri mwaka, nituteeraho munonga kweta abantu baingi nk’oku kirikubaasika kwija aha mukoro gw’okwijuka okufa kwa Yesu. Abantu baingi abacureezi bagasiirwe ahabw’okwikiriza bakaija aha mukoro ogu. Teekateeka aha ky’okureeberaho eki. Emyaka mingi enyima, omushaija akatunga akapapura k’okumweta aha Kiijutsyo, beitu akagambira ow’eishe-emwe owaakamuhaire ngu tarikubaasa kwija. Kwonka aha mwabazyo gw’Ekiijutsyo, ow’eishe-emwe akatangaara kureeba omushaija ogwo arikutaaha omu Kyombeko ky’Obukama. Omushaija ogwo akashemererwa munonga ahabw’oku baamwakiire yaatandika kwija n’omu nteerane eza buri saabiiti. Omu mwaka ogwo gwona akooshamu enteerane ishatu zonka. Niki ekyamuhwereire kugira emiteekateekyere mirungi nk’egyo? Akeecureeza munonga yaahindura aha miteekateekyere ye. Ow’eishe-emwe owaamwetsire, bwanyima akagira ati: “Omushaija ogu n’omucureezi munonga.” Hatariho kubangaanisa Yehova akeiriza haihi omushaija ogu, kandi hati n’ow’eishe-emwe obatiziibwe.​—2 Sam. 22:28; Yoh. 6:44.

7. Ebi turikwega omu nteerane n’ebi turikushoma omu Baibuli nibibaasa kutuhwera bita kuba abacureezi?

⁷ Ebi turikwega omu nteerane n’ebi turikushoma omu Baibuli nibibaasa kutuhwera kuba abacureezi. Saabiiti nkye Ekiijutsyo kitakahikire, enteerane zaitu niziba nizigamba munonga ahari Yesu n’oku yaabaire omucureezi akahayo amagara ge nk’ekitambo. Kandi omu biro bikye Ekiijutsyo kirikuza kuhika, nituhigwa kushoma Ebyahandiikirwe ebirikukwata aha kufa kwa Yesu n’okuzooka kwe. Ebi turikwega omu nteerane ezo n’ebi turikushoma omu Baibuli, nibituhwera kwongyera kusiima okwefeerereza kwa Yesu kutubeera ekitambo. Eki nikituhiga kumutooreza tukaba abacureezi turikukora ebi Ruhanga arikukunda, n’obu kirikuba kitugumiire.​—Luk. 22:41, 42.

8. Yesu akooreka ata obumanzi?

⁸ Kandi naitwe nituteeraho kutooreza Yesu omu kworeka obumanzi. Teekateeka aha bumanzi obu yaayorekire omu biro ebyahererukireyo arikuza kufa. Akaba naayetegyereza gye ngu abazigu be nibaija kumuhemura, bamuteere, kandi bamwite. (Mat. 20:17-19) Kwonka akeehayo ayekundiire kwemera okufa. Obwire ku bwahikire, akagambira entumwa ze abeesigwa abu yaabaire aine omuri Gesesemaani ati: “Mwimukye, tugyende; reeba, orikundeebya ari haihi.” (Mat. 26:36, 46) Kandi abantu baingi ku baizire kumukwata, akaija omu maisho yaayeyoreka, kandi yaaragiira abaserukare kureka abeegi be bakagyenda. (Yoh. 18:3-8) Yesu ka yaayorekire obumanzi bw’amaani! Obunaku obu, abashukirweho omwoyo gurikwera n’ab’entaama ezindi nibateeraho kutooreza Yesu omu kworeka obumanzi. Mu muringo ki?

9. (a) Ahabw’enki nituba twine kuza omu nteerane tutarikwosha? (b) Eky’okureeberaho kyaitu nikibaasa kukwata kita aha b’eishe-emwe abari omu kihome ahabw’okwikiriza kwabo?

⁹ Okubaasa kuza omu nteerane tutarikwosha, nikibaasa kutwetengyesa kuba emanzi omu mbeera zigumire. Ab’eishe-emwe abamwe nibaija omu nteerane n’obu barikuba baine amaganya, baine ebirikubateganisa, nari baine amagara mabi. Abandi nibagira obumanzi bw’okuza omu nteerane n’obu baakuba nibahiiganisibwa munonga ab’omu maka gaabo nari ab’obushoboorozi omu gavumenti. Twara akaire oteekateekye aha ku eky’okureeberaho kyaitu kirikukwata aha b’eishe-emwe abari omu bihome ahabw’okwikiriza kwabo. (Heb. 13:3) Ku barikuhurira ngu nitugumizamu nituramya Yehova n’obu turaabe nitugyezibwa, nikibahiga kuguma baine okwikiriza, obumanzi, n’obwesigwa. Entumwa Paulo nawe akaraba omu mbeera nk’egyo. Obu yaabaire ari omu kihome omuri Rooma, akaba ashemererwa ku yaabaire ahurira ngu ab’eishe-emwe bagyenzi be nibaheereza Ruhanga omu bwesigwa. (Fil. 1:3-5, 12-14) Obwire bukye Paulo atakarekwirwe nari aherize kurekurwa, akahandiikira Abaheburaayo ebaruha. Omu baruha egyo, akahiga Abakristaayo abo abeesigwa ngu rukundo yaabo y’eishe-emwe egumeho n’okutareka kuguma nibateeranira hamwe.​—Heb. 10:24, 25; 13:1.

10-11. (a) Ni baahi abu twine kweta aha Kiijutsyo? (b) Kurugiirira aha Abaefeso 1:7, niki ekirikutuhiga kweta abantu?

¹⁰ Nitworeka obumanzi twayeta abanyabuzaare, abu turikukora nabo, n’abataahi aha Kiijutsyo. Ahabw’enki nitubeeta? Nitusiima munonga Yehova na Yesu ahabw’eki batukoreire ekirikutuhiga kweta abandi kwija aha Kiijutsyo. Naitwe nitwenda ngu beegye oku nabo barikubaasa kugasirwa omu ‘mbabazi’ za Yehova kurabira omu kitambo.​—Shoma Abaefeso 1:7; Kush. 22:17.

¹¹ Twagira obumanzi turikuza omu nteerane, nitworeka n’ogundi mutwarize gw’omuhendo, ogu Yehova n’Omwana we barikworeka omu miringo y’omutaano.

12. (a) Enteerane nizihamya zita rukundo ei twiniire Yehova na Yesu? (b) Ebiri omu 2 Abakorinso 5:14, 15 nibituhiga bita kutooreza Yesu?

¹² Rukundo ei twiniire Yehova na Yesu neetuhiga kuza omu nteerane. Bwanyima, ebi turikwega omu nteerane nibihamya rukundo ei twiniire Yehova n’Omwana we. Omu nteerane zaitu nitukira kwijukibwa ebi batukoreire. (Rom. 5:8) Na munonga Ekiijutsyo nikitwijutsya rukundo mpango ei batwiniire, nangwa n’abo abatakamanyire obukuru bw’ekitambo. Ahabw’okusiima kwingi oku turikuba twine, nituteeraho kutooreza Yesu omu mitwarize yaitu buri izooba. (Shoma 2 Abakorinso 5:14, 15.) Kandi emitima yaitu neetuhiga kuhimbisa Yehova ahabw’okutuha ekitambo. Omuringo gumwe ogu turikubaasa kumuhimbisa n’okugarukamu omu nteerane twihire aha mutima.

13. Nitubaasa kworeka tuta rukundo mpango ei twiniire Yehova na Yesu? Shoboorora.

¹³ Nitubaasa kworeka rukundo mpango ei twiniire Yehova n’Omwana we, turikuba tweteekateekire kwefeerereza ekintu kyona ahabwabo. Obwire obwingi nitwefeerereza ebintu bingi kubaasa kuza omu nteerane. Ebibiina bingi nibigira enteerane aha muheru gw’eizooba obu abantu barikuba baruhire munonga. Kandi oruteerane orundi nirubaho omu wiikenda obu abantu baingi barikuba bahuumwire. Mbwenu shi Yehova naakireeba ngu nituza omu nteerane n’obu turikuba turuhire? Eego buzima naakireeba! Nangwa, twaba nituteeraho kuza omu nteerane n’obu kirikuba kigumire, Yehova naayongyera kusiima rukundo ei turikumworeka.​—Mak. 12:41-44.

14. Yesu akataho ky’okureeberaho ki omu kworeka rukundo y’okwefeerereza?

¹⁴ Yesu akatuteeraho eky’okureeberaho omu kworeka rukundo erimu okwefeerereza. Eki akakikora arikwehayo kufeera abeegi be, kandi arikwebembeza n’ebyetengo byabo okukira ebye. Nk’eky’okureeberaho, akagira obwire bw’okugaaniiraho n’abakuratsi be n’okubahabura n’obu araabe yaabaire aruhire, nari aine amaganya. (Luk. 22:39-46) Kandi akaba ata omutima aha bi arikubaasa kuha abandi, beitu bitari ebi abandi barikubaasa kumuha. (Mat. 20:28) Rukundo ei twiniire Yehova n’ab’eishe-emwe yaaba eri mpango, nitwija kukora kyona ekirikubaasika kubaho aha Kiijutsyo n’omu nteerane ezindi.

15. Okukira munonga ni baahi abu turikwenda kuhwera?

 ¹⁵ Turi omu kibiina Ekikristaayo kyonka eky’amazima, kandi nitukunda kumara obwire turikweta abasya kutwegaitaho. Okukira munonga nituta omutima aha kuhwera abaine akakwate naitwe omu kwikiriza, kwonka abarekyeire aho kubuurira n’okuza omu nteerane. (Gal. 6:10) Nitworeka ngu nitubakunda turikubahiga kuza omu nteerane, na munonga aha Kiijutsyo. Nka Yehova na Yesu, nitushemererwa munonga abarekyeire aho okubuurira baagarukira Yehova Tataitwe kandi Omuriisa waitu.​—Mat. 18:14.

16. (a) Nitubaasa kugumyana tuta, kandi enteerane zaitu niziija kutuhwera zita? (b) Ahabw’enki hati n’obwire burungi bw’okwijuka ebigambo bya Yesu ebiri omuri Yohaana 3:16?

¹⁶ Omu saabiiti ezirikwija, teeraho kweta abantu baingi nk’oku kirikubaasika kwija aha Kiijutsyo aha Rwakataano omu mwabazyo, Okwakana 19, 2019. (Reeba akabokusi “ Noija Kubeeta?”) Omu mwaka ogu gwona ka tuteeraho kugumyana turikwija omu nteerane ezi Yehova arikutuha, tutarikwosha. Emperu y’obusingye obu yaaguma neirira haihi, enteerane zaitu niziija kwetengyesa munonga kutuhwera kuguma turi abacureezi, emanzi, kandi twine rukundo. (1 Tes. 5:8-11) N’omutima gwaitu gwona, ka tworekye ngu nitusiima Yehova na Yesu ahabw’okutukunda munonga!​—Shoma Yohaana 3:16.