1-2. (a) Ahabw’enki kitarikutangaaza kureeba ngu Yesu akatuha omuringo gworobi ogw’okwijuka okufa kwe? (b) Nituza kwega aha mitwarize ki eya Yesu?

NOOBAASA kushoboorora ekirikuba aha mukoro gw’okwijuka okufa kwa Yesu ogurikubaho buri mwaka? Buzima, baingi ahariitwe nitwijuka ebirikuba aha Kiijutsyo. Ahabw’enki? Omukoro ogu ni mukye gworobi, kwonka n’omukoro mukuru munonga. Mbwenu nitubaasa kwebuuza tuti: ‘Ahabw’enki omukoro ogu gworobi munonga?’

² Obu Yesu yaabaire ari omu nsi, akaba naamanywa ahabw’okwegyesa amazima omu muringo gworobi, kandi ogurikwetegyerezibwa gye. (Mat. 7:28, 29) Omu muringo nigwo gumwe, akatuteeraho omuringo gworobi ogw’okukuza * okufa kwe. Ka twetegyereze gye omukoro gw’Ekiijutsyo ogu na bimwe aha bintu ebi Yesu yaagambire n’ebi yaakozire. Nitwija kwetegyereza gye oku yaabaire ari omucureezi, emanzi, aine rukundo, kandi nituza n’okwega oku turikubaasa kumutooreza gye.

3. Nk’oku kiri omuri Matayo 26:26-28, omukoro ogu Yesu yaatandikireho gukaba gworobi guta, kandi ebintu bibiri ebi yaakoreise bikaba nibijwekyera ki?

³ Yesu akaba ari n’entumwa ze 11 abeesigwa obu yaatandikaho omukoro gw’okwijuka okufa kwe. Akakwata ebyabaire bitsigaireho aha Kuhingurwaho reero yaakora omukoro gworobi ogu. (Shoma Matayo 26:26-28.) Akakoresa omugaati gutatumbisiibwe  na viinyo ebyabaire bitsigaireho. Yesu akagambira entumwa ze ngu omugaati na viinyo bikaba nibijwekyera omubiri gwe n’eshagama ye ebihikiriire, ebi yaabaire ari haihi kuhayo ahabwabo. Entumwa bashemereire kuba bataratangaire ahabw’okukora omukoro mukuru kwonka omu muringo gworobi. Ahabw’enki?

4. Obuhabuzi obu Yesu yaahaire Mariza nibutuhwera buta kwetegyereza ahabw’enki Yesu yaakozire omukoro mukye ogw’Ekiijutsyo?

⁴ Yetegyereze ekyabaireho ameezi ashatu enyima, omu mwaka gwa kashatu ogw’obuheereza bwa Yesu, obu yaataayaayira eka ya banywani be Laazaaro, na Mariza, Mariamu. Yesu akatandika kwegyesa omu mbeera y’obuteeka. Mariza akaba ariho, kwonka akaba ahugiibwe okutebeekanisiza Yesu ekiihuro kihango. Eki Yesu ku yaakireebire, yaaha Mariza obuhabuzi omu muringo gw’embabazi, yaamuhwera kureeba ngu ekiihuro kihango obumwe nikiba kitarikwetengyesa. (Luk. 10:40-42) Bwanyima, Yesu akagyendera aha buhabuzi bwe obu, harikuburayo eshaaha nkye akaitwa. Akahamya ngu omukoro gw’okwijuka okufa kwe gworobi. Eki nikitwegyesa ki ahari Yehova?

5. Yesu okukora omukoro mukye nikitwegyesa ki ahariwe, kandi eki nikihikaana kita n’ebiri omu Abafilipi 2:5-7?

⁵ Omu buri kimwe eki Yesu yaagambire n’eki yaakozire, akaba ari omucureezi. N’ahabw’ekyo tikirikutangaaza kureeba ngu akooreka obucureezi bw’amaani omu kiro ky’aha muheru arikuza kwitwa. (Mat. 11:29) Akaba naamanya ngu ari haihi kuba ekitambo ekirikukirayo omu byafaayo by’abantu, kandi ngu Yehova naija kumuzoora amuhe omwanya gw’ekitiinisa omu iguru. N’obu araabe yaabaire naamanya eki, tarayetaireho mutima arikutandikaho omukoro muhango ogw’okwijuka okufa kwe. Omu mwanya gw’ekyo, akagambira abeegi be ngu baaba nibaijuka okufa kwe omurundi gumwe buri mwaka, baine kukora omukoro mukye ogworobi. (Yoh. 13:15; 1 Kor. 11:23-25) Omukoro mukye kwonka oguhikire nigworeka ngu Yesu akaba atarikwetunguura. Nitushemererwa kumanya ngu obucureezi ni gumwe aha mitwarize y’Omugabe waitu ow’omu iguru.​—Shoma Abafilipi 2:5-7.

6. Nitubaasa kuba tuta abacureezi nka Yesu twaba nitugyezibwa?

⁶ Nitubaasa kuba tuta abacureezi nka Yesu? Turikwebembeza eby’abandi omu mwanya gw’ebyaitu. (Fil. 2:3, 4) Teekateeka aha byabaireho aha kiro ky’aha muheru Yesu arikuza kufa.  Akaba naamanya ngu naaza kufa omu muringo gw’obusaasi, kwonka akaba naafayo aha ntumwa ze abeesigwa, abaabaire bari haihi kutandika kumucurira. Ekiro ekyo akakimara arikubeegyesa, arikubagaruramu amaani, kandi arikubahamiza. (Yoh. 14:25-31) Yesu omu muringo gw’embabazi akooreka ngu naafayo aha bandi okukira oku yaabaire naayefaho. Ka yaatuteeraireho eky’okureeberaho kirungi!

7. Yesu akooreka ata ngu n’emanzi bwanyima y’okutandikaho omukoro gw’Ekiijutsyo?

⁷ Bwanyima ya Yesu kutandikaho omukoro gw’Ekiijutsyo, akooreka obumanzi bw’amaani. Mu muringo ki? Yesu akacwamu kukora eki Ishe yaabaire naayenda ngu akore, n’obu araabe yaabaire naamanya ngu ekyo nikimanyisa okwitwa omu muringo mubi ogurikuhemurana. (Mat. 26:65, 66; Luk. 22:41, 42) Yesu akataho eky’okureeberaho kirungi eky’obwesigwa kubaasa kuha eiziina rya Ruhanga, Yehova ekitiinisa, kworeka ngu Yehova niwe ahikire kutegyeka, n’okuteeraho abantu abarikweteisa omuhanda gw’okutunga amagara agatahwaho. Omu bwire nibwo bumwe, Yesu akatebeekanisa abakuratsi be ahabw’ebi baabaire bari haihi kutandika kurabamu.

8. (a) Yesu akagambira ki entumwa ze abeesigwa? (b) Abeegi ba Yesu bakamutooreza bata omu kworeka obumanzi bwanyima y’okufa kwe?

⁸ Yesu akooreka ngu n’emanzi arikwehuzya amaganya goona agu arikubaasa kuba yaabaire aine, reero yaata omutima aha byetengo by’entumwa ze abeesigwa. Omukoro mukye ogu yaatandikireho bwanyima y’okubinga Yuda, gukaba nigwija kuguma nigwijutsya abaabaire nibaija kuba abakuratsi be abashukirweho omwoyo gurikwera, obukuru bw’eshagama ye eyaasheeshekire n’obukuru bw’okuba omu ndagaano ensya. (1 Kor. 10:16, 17) Yesu kubaasa kubahwera kuguma bahikire  kuza omu iguru, akabagambira eki we na Ishe barikubenza. (Yoh. 15:12-15) Kandi akagambira entumwa ze okugyezibwa oku baabaire nibaija kurabamu. Akabahiga kutooreza eky’okureeberaho kye reero yaabagira ngu “muhuumure!” (Yoh. 16:1-4a, 33) Bwanyima y’emyaka mingi, abeegi ba Yesu bakaba nibakikuratira eky’okureeberaho kye omu kworeka obumanzi. N’obu baraabe baabaire nibabonabona, bakagumyana omu kugyezibwa kwabo kwingi.​—Heb. 10:33, 34.

9. Nitubaasa kutooreza tuta Yesu omu kworeka obumanzi?

⁹ Naitwe obunaku obu, nitutooreza Yesu omu kworeka obumanzi. Nk’eky’okureeberaho, nikyetengyesa obumanzi kuhwera ab’eishe-emwe bagyenzi baitu abarikuhiiganisibwa ahabw’okwikiriza kwabo. Obumwe, nibabaasa kuteebwa omu kihome bataine rubanja. Ekyo kyabaho, twine kukora kyona ekirikubaasika ahabwabo, otwariiremu n’okubahorereza. (Fil. 1:14; Heb. 13:19) Omuringo ogundi ogu turikworeka ngu turi emanzi n’okuguma nitubuurira twine ‘obumanzi.’ (Byak. 14:3) Nka Yesu tumaririire kubuurira amakuru g’Obukama, n’obu abantu baakutuhakanisa kandi bakatuhiiganisa. Kwonka obumwe, nitubaasa kushanga tutaine bumanzi. Nitubaasa kukora ki?

10. Saabiiti nkye Ekiijutsyo kitakahikire twine kukora ki, kandi ahabw’enki?

¹⁰ Nitubaasa kwongyera aha bumanzi bwaitu turikuteekateeka aha matsiko agu twine ahabw’ekitambo kya Kristo. (Yoh. 3:16; Efe. 1:7) Harikuburayo saabiiti nkye Ekiijutsyo kikahika, twine omugisha gw’omutaano ogw’okwongyera kusiima ekitambo. Omu bwire obwo, otoosha kushoma Ebyahandiikirwe ebirikukwata aha Kiijutsyo, shaba kandi oteekateekye aha bi Yesu yaarabiremu kuhika aha kufa. Reero twaija aha mukoro gw’okwijuka okufa kwe, nitwija kwongyera kwetegyereza gye obukuru bw’obumanyiso oburikukoresibwa aha  Kiijutsyo n’ekitambo ky’omuhendo eki burikujwekyera. Twayetegyereza eki Yehova na Yesu baatukoreire, tukeetegyereza n’oku ekyo kirikutugasira n’abakundwa baitu, amatsiko gaitu nigeeyongyera, kandi nikituhiga kugumisiriza kuhitsya aha muheru.​—Heb. 12:3.

11-12. Ni bintu ki ebi twaherize kwega?

¹¹ Hati twaherize kwega ngu Ekiihuro kya Mukama Waitu nikitwijutsya ekitambo ky’omuhendo n’emitwarize ya Yesu ey’omutaano nk’obucureezi n’obumanzi. Ka nikitushemeza kumanya ngu Yesu Omunyamurwa Omukuru, kandi orikutweshengyerereza aine emitwarize egi! (Heb. 7:24, 25) Kubaasa kworeka okusiima kwaitu, twine kuza aha mukoro gw’okwijuka okufa kwe, nk’oku yaaragiire. (Luk. 22:19, 20) Eki nitukikora aha izooba eririkuhikaana na Nisani 14, eizooba eririkukirayo obukuru omu mwaka.

¹² Omukoro gworobi ogw’Ekiihuro kya Mukama waitu nigutuhwera kumanya omutwarize ogundi ogwahigire Yesu kutufeera. Obu yaabaire ari omu nsi akaba naamanywa ahabw’omutwarize ogu. Ni mutwarize ki ogu?

13. Ebiri omuri Yohaana 15:9 na 1 Yohaana 4:8-10 nibishoboorora bita rukundo ei Yehova na Yesu baayorekire, kandi neegasira baahi?

¹³ Yesu akooreka gye rukundo nk’eya Yehova omuri buri kimwe eki yaakozire. (Shoma Yohaana 15:9; 1 Yohaana 4:8-10.) Okukira byona, Yesu ayekundiire akahayo amagara ge kutufeera. Yaaba turi ab’obusyo obukye nari ‘ab’entaama ezindi,’ nitugasirwa omuri rukundo ei Yehova n’Omwana we baatworekire kurabira omu kitambo. (Yoh. 10:16; 1 Yoh. 2:2) Kandi teekateeka n’aha bumanyiso oburikukoresibwa aha Kiijutsyo, nibworeka ngu Yesu naakunda abeegi be kandi naabafaho. Mu muringo ki?

14. Yesu akooreka ata ngu naakunda abeegi be?

¹⁴ Yesu akooreka ngu naakunda abakuratsi be abashukirweho omwoyo gurikwera arikutandikaho omukoro gworobi ogu baabaire baine kuguma nibakuza. Bwanyima y’obwire, abeegi be abashukirweho omwoyo gurikwera bakaba baine kugira Ekiijutsyo buri mwaka, omu mbeera zitarikushushana otwariiremu n’abakomirwe. (Kush. 2:10) Mbwenu shi bakabaasa kworobera Yesu? Eego buzima!

15-16. Abamwe babaasize bata kukuza Ekiijutsyo n’omu mbeera zigumire?

¹⁵ Kuruga omu kyasha ky’okubanza kuhitsya na hati, Abakristaayo ab’amazima batwire nibateeraho kwijuka okufa kwa Yesu. Nibateeraho kutooreza oku Ekiihuro kya Mukama waitu kyatebeekanisiibwe, obundi omu mbeera zigumire. Yetegyereze eby’okureeberaho ebi. Obu Ow’eishe-emwe Harold King yaabaire ari omu kihome akomiirwe omu kashengye wenka omuri China, akaba aine kugira eki yaakora kwijuka okufa kwa Yesu. Bwesherekye akatebeekanisa obumanyiso bw’Ekiijutsyo arikukoresa ebi yaabaire aine. Akabara n’ebiro by’Ekiijutsyo n’obwegyendesereza nk’oku yaabaire naabaasa. Obwire bw’Ekiijutsyo ku bwahikire, ari wenka omu kashengye ke k’ekihome akeeshongora, yaashaba, yaaha n’orubazo rw’Ekiijutsyo.

¹⁶ Eki n’eky’okureeberaho ekindi. Banyaanyazi-itwe abaabaire bakomiirwe omu nkambi omu Rutaro rw’Ensi Yoona II, bakooga amagara gaabo kubaasa kukuza Ekiihuro kya Mukama Waitu. Kwonka ahabw’omukoro ogu kuba mukye, bakabaasa kukuza Ekiijutsyo bwesherekye. Bakagira bati: “Tukeemerera hamwe omu saako, aha gati hakaba hariho akameeza kashwekirwe ekitambaara kirikwera, reero hariho omugaati na viinyo. Tukakoresa kanduro kubaasa kuhweeza, ahabw’okugira  ngu etaara y’amashanyarazi ekaba neebaasa kwaka munonga batureebe. . . . Tukagarukamu twagamba ebi twabaire turaganiise Tataitwe kukoresa amaani gaitu goona kujuririra eiziina rye eririkwera.” Ka baayorekire okwikiriza kw’omutaano! Buzima Yesu ka yaayorekire rukundo mpango kutandikaho omukoro gworobi kugira ngu n’omu mbeera zigumire tubaase kugukuza!

17. Nitubaasa kwebuuza bibuuzo ki?

¹⁷ Obu Ekiijutsyo kiri haihi kuhika, ni kirungi kwebuuza ebibuuzo ebi: ‘Nimbaasa kwongyera nta kutooreza Yesu omu kugirira abandi rukundo? Ninteekateeka aha byetengo by’abaheereza ba Ruhanga bagyenzi bangye okukira ebyangye? Ninteekateeka ngu ab’eishe-emwe nibaija kunkorera bingi kukira ebi barikubaasa kunkorera, nari ninfayo kumanya obugarukiro bwabo?’ Butoosha ka tuteereho kutooreza Yesu turikufayo ahari bagyenzi baitu.​—1 Pet. 3:8.

18-19. (a) Nitubaasa kugira buhame ki? (b) Omaririire kukora ki?

¹⁸ Omukoro gw’okwijuka okufa kwa Yesu tigurikwija kugumaho ebiro byona. Yesu ku ‘araije’ omu kubonabona kwingi, naija kurundaana “entoore ze” nari ab’obusyo obukye abaraabe bakiriho abatware omu iguru. Obwo, omukoro gw’Ekiijutsyo tigurikwija kugaruka kubaho.​—1 Kor. 11:26; Mat. 24:31.

¹⁹ Nangwa na bwanyima y’omukoro gw’Ekiijutsyo kuhendera, twine obuhame ngu abaheereza ba Yehova nibaija kuguma nibaijuka ngu ekiihuro kikye eki, kikaba nikyoreka obucureezi, obumanzi, na rukundo ebirikukirirayo kimwe omu byafaayo by’abantu. Omu bwire obwo, abaabaire nibakuza omukoro ogu, nibaija kutebeza abaraabe bariho kugira nabo bagasirwe. Kwonka kubaasa kugasirwa hati omu mukoro ogu, twine kumariirira kutooreza Yesu tube abacureezi, emanzi, tugire na rukundo. Twakora tutyo, nitubaasa kugira obuhame ngu Yehova naija kutuha ekihembo.​—2 Pet. 1:10, 11.