1-2. (a) Obutumwa oburi omu Isaaya 41:10 bukahwera buta munyaanyazi-itwe Yoshiko? (b) Yehova akahandiikisa obutumwa obu kugasira baahi abandi?

MUNYAANYAZI-ITWE omwesigwa Yoshiko akatunga amakuru mabi. Omushaho akamugambira ngu atsigaize ameezi makye akafa. Akatwaza ata? Yoshiko akaijuka ekyahandiikirwe eki arikukunda munonga, Isaaya 41:10. (Kishome.) Akagarukamu omushaho aikaikaine ngu tatiinire, ahakuba Yehova akaba naamukwata aha mukono. * Obutumwa oburikuhuumuriza oburi omu kyahandiikirwe eki bukamuhwera kwesigira kimwe Yehova. Naitwe ekyahandiikirwe eki nikibaasa kutuhwera kuguma twikaikaine twaba twine oburemeezi bwingi. Okwetegyereza oku kirikubaasa kutuhuumuriza, ka tubanze twetegyereze ahabw’enki Ruhanga yaahaire nabi Isaaya obutumwa obu.

² Omu kubanza, Yehova akagambira Isaaya ebigambo ebyo kubihandiikira Abayudaaya abaabaire nibaija kutwarwa nk’enkwata omuri Babulooni. Kwonka Yehova akabuhandiikisa kuhwera Abayudaaya enkwatwa n’abantu boona abatwire nibabaho kuruga obwo. (Isa. 40:8; Rom. 15:4) Obunaku obu, turi omu “biro by’akabi kaingi,” ebigumire kwemera okira ira, kandi nitwenda okuhuumuriza okuri omu kitabo kya Isaaya.​—2 Tim. 3:1.

3. (a) Ni kuraganisa ki okuri omu Isaaya 41:10, ekyahandiikirwe kyaitu eky’omwaka 2019? (b) Ahabw’enki nitwetenga okuhamizibwa oku?

³ Omu kicweka eki, nituza kureeba ebiraganiso bya Yehova  bishatu ebirikuhamya okwikiriza kwaitu ebiri omu Isaaya 41:10: (1) Yehova naija kuba naitwe, (2) ni Ruhanga waitu, kandi (3) naija kutuhwera. Nka Yoshiko nitwetenga okuhamizibwa * oku ahakuba twine oburemeezi. Kandi twine kwemera okugyemeserezibwa kwingi okuri omu nsi. Bamwe omuriitwe twine kwemera okuhiiganisibwa okurikuruga omu gavumenti z’amaani. Ka tushwijume okuhamizibwa oku okw’emiringo eshatu, buri kumwe okwakwo.

4. (a) Ni kuhamizibwa ki okw’okubanza oku turaashwijume? (Reeba obugambo obw’ahansi.) (b) Yehova naayoreka ata enyehurira ezi atwiniire? (c) Ebigambo bya Yehova nibikureetera kwehurira ota?

⁴ Yehova naatuhamiza n’ebigambo ebi: ‘Otatiina ahabw’okuba nkwine.’ * Yehova naayoreka ngu ari hamwe naitwe arikutufaho kandi akatukunda. Yetegyereze oku arikukyoreka ngu naatufaho. ‘Okambeera enkora mutima.ʼ Kandi naayongyeraho ngu okaba ‘ow’okuheebwa ekitiinisa, naanye naakukunda.ʼ (Isa. 43:4) Tihariho ekirikubaasa kuremesa Yehova kukunda abarikumuheereza, naaguma abahamiireho. (Isa. 54:10) Ahabw’okutukunda kandi akatunywana nikituha obumanzi bwingi. Naija kuturinda n’omu bunaku obu nk’oku yaarinzire Abramu (Abrahamu) munywani we. Yehova akamugambira ati: “Abramu, otatiina. Niinye ngabo yaawe.”​—Kut. 15:1.

5-6. (a) Nitumanya tuta ngu Yehova naayenda kutuhwera omu kugyezibwa kwaitu? (b) Niki eki turikwegyera ahari Yoshiko?

⁵ Nitumanya ngu Yehova naayenda kutuhwera omu kugyezibwa kwaitu ahakuba naaraganisa abantu be ati: ‘Ku oriraba omu maizi, ndyaba nkwine; ku oriraba omu migyera, terikutwara; ku origyendera omu muriro, torisya, n’ebirimi byagwo tibirikubabura.’ (Isa. 43:2) Ebigambo ebi nibimanyisa ki?

⁶ Yehova tarikuraganisa kwihaho embeera zigumire hati, kureka tarikwija kwikiriza oburemeezi oburi ‘nk’emigyera’ kututwara nari okugyezibwa okuri ‘nk’omuriro’ kutukora kubi ebiro byona. Naatuhamiza ngu naija  kuba hamwe naitwe atuhwere “kuraba” omu mbeera zigumire. Yehova naija kukora ki? Naija kutuhuumuriza arikutuhwera kutatiina tubaase kuguma tumuhamiireho, n’obu twakuhika aha kufa. (Isa. 41:13) Yoshiko, owaaba yaagambirweho akareeba ngu eki kihikire. Omuhara naagira ati: “Kikaba nikitushemeza kureeba maaweitwe aikaikaine. Buzima tukaba nitureeba ngu Yehova akamuha obuhuumure. Okuhitsya obu maawe yaafa, akaba aganiira n’abashaho n’abarwaire ebirikukwata ahari Yehova n’ebi arikuraganisa.” Yoshiko nitumwegyeraho ki? Twayesiga ebigambo bya Ruhanga ebirikugira biti: ‘Niinyija kuba nkwine,’ naitwe nitwija kugira obumanzi bw’okwemera okugyezibwa.

7-8. (a) Okuhamizibwa kwa kabiri oku Yehova yaagambire ni kuuha kandi kwine makuru ki? (b) Ahabw’enki Yehova yaagambiire Abayudaaya enkwatwa ‘kutahahaaza omutima’? (c) Omuri Isaaya 46:3, 4 harimu bigambo ki, ebirikubaasa kuba byahwererire abantu ba Ruhanga kutatiina?

⁷ Yetegyereze ekindi ekirikuhuumuriza eki nabi Isaaya yaahandiikire: ‘Otahahaaza omutima, ahabw’okuba Ndi Ruhanga waawe.’ Ebigambo ebi ebirikukwata aha kwerarikirira nibimanyisa ki? Omu mushororongo ogu ebigambo ‘okuhahaaza omutima’ biine amakuru “g’okuguma nooraanzya enyima ahabw’akabi aku otiinire” nari “okumagamaga waahurira enduuru.”

⁸ Ahabw’enki Yehova yaagambiire Abayudaaya abaabaire nibaija kuba enkwatwa omuri Babulooni ‘okutahahaaza omutima’? N’ahabw’okuba akaba naamanya ngu abatuuzi ba Babulooni nibaija kutiina. Niki ekyabaire nikiija kubareetera kutiina? Emyaka 70 y’obukwatwa bw’Abayudaaya eri haihi kuhendera, Babulooni ekaba neija kutaahirirwa eihe ry’Abameedi n’Abaperesi. Yehova akaba naija kukoresa eihe eri kwiha abantu be omu bukwatwa bwa Babulooni. (Isa. 41:2-4) Abababulooni n’ab’amahanga agandi abaabaire bariho omu bunaku obwo, ku baareebire barikuza kutaahirirwa, bakagumyana barikugambirana bati: “Guma.” Kandi bakongyera kukora ebishushani ebirikuramibwa, barikuteekateeka ngu nibiija kubarinda. (Isa. 41:5-7) Kwonka Yehova akahuumuriza emitima y’Abayudaaya enkwatwa arikubagira ati: ‘Iwe Israeli omwiru wangye [okutashushana n’abataahi baawe] . . . otahahaaza omutima, ahabw’okuba ndi Ruhanga waawe.” (Isa. 41:8-10) Yetegyereze ngu Yehova akagira ngu: ‘Ndi Ruhanga waawe.’ Yehova arikukoresa ebigambo ebi akahamiza abaheereza be abeesigwa ngu naakibaijuka, ngu akaba akiri Ruhanga waabo, kandi ngu bakaba bakiri abantu be. Akabagambira ati: ‘Niinyija kubaheeka kandi mbajune.’ Hatariho kubangaanisa ebigambo ebi ebirikuhuumuriza bikabagaruramu amaani.​—Shoma Isaaya 46:3, 4.

9-10. Ahabw’enki tutashemereire kutiina? Ha eky’okureeberaho.

⁹ Omu bunaku obu okukira ira, baingi nibeerarikirira ahabw’embeera kweyongyera kusiisikara omu nsi. Kandi naitwe nituhikwaho embeera ezi. Kwonka titushemereire kutiina. Yehova naatuhamiza ati: “Ndi Ruhanga waawe.” Ahabw’enki ebigambo ebyo bishemereire kutureetera kuguma twikaikaine?

¹⁰ Teekateeka aha ky’okureeberaho eki: Jim na Ben bombi bari omu nyonyi erikuteeganisibwa omuyaga gw’amaani. Omuyaga gwaba niguzoonzya enyonyi oku n’oku, bahurira eiraka nirigira riti: “Muhamye enkoba zaanyu ahu mushutami. Nitwija kugyendera omu muyaga ogu kumara akaire.” Jim atandika kwerarikirira munonga. Kwonka omuvugi w’enyonyi agaruka agira ati: “Niinye muvugi waanyu  orikubagambira: Mutahahaaza emitima.” Jim azongoza omutwe arikugira ati: “Oku nikuhamizibwa ki?” Kwonka, areeba ngu Ben we tayerarikiriire na kakye. Amubuuza ati: “Ahabw’enki oikaikaine?” Ben amwenya reero amugira ati: “Ahakuba omuvugi ogu nimumanya gye. Ni tata!” Reero Ben ayongyeraho ati: “Ka nkugambire ebirikumukwataho. Nimpamya ngu ku oraamumanye gye n’okubaasa kwe naiwe noija kwikaikana.”

11. Eky’okureeberaho ky’abantu babiri abari omu nyonyi nitukyegyeraho ki?

¹¹ Eky’okureeberaho kya Ben na Jim nitukyegyeraho ki? Nka Ben, twikaikaine ahakuba nitwetegyereza gye Yehova Tataitwe ow’omu iguru. Nituhamya ngu naija kuturabya omu buremeezi bwona oburi nk’eihunga oburikubaasa kutuhikaho omu biro ebi eby’emperu. (Isa. 35:4) Nitwesiga Yehova, n’ahabw’ekyo nitubaasa kuguma twikaikaine abandi omu nsi baaba batiinire. (Isa. 30:15) Kandi nitwenda kutwaza nka Ben turikugambira bataahi baitu enshonga ezirikutureetera kwesiga Ruhanga. Nabo nibabaasa kugira obuhame ngu n’obu baakuhikwaho mbeera ki, Yehova naija kubahwera.

12. (a) Nituza kushwijuma kuhamizibwa ki okw’emiringo eshatu? (b) Ekigambo “omukono” gwa Yehova nikitwijutsya nshonga ki?

¹² Teekateeka aha kuhamizibwa kwa kashatu oku nabi Isaaya yaahandikire: ‘Niinyija kukuha amaani, nkuhwere.’ Omu shuura ey’enyima Isaaya naayoreka oku Yehova arikwija kugumya abantu be nari kubaha amaani arikugira ngu ‘naija n’amaani, nintegyekyesa omukono’ gwangye. (Isa. 40:10) Baibuli neekira kukoresa ekigambo “omukono” omu muringo gw’akamanyiso kumanyisa amaani. N’ahabw’ekyo ebigambo ebirikugira ngu Yehova naija kutegyekyesa “omukono gwe”  nibitworeka ngu Yehova n’Omugabe w’amaani maingi. Akakoresa amaani ge agataine bugarukiro kuhwera abaheereza be aba ira n’okubarinda, kandi n’omu bunaku obu naagumizamu kugumya abarikumwesiga n’okubarinda.​—Bir. 1:30, 31; Isa. 43:10.

13. (a)  Ni ryari obu Yehova arikuhikiiriza okuraganisa kwe kw’okutuha amaani? (b) Ni buhame ki oburikutugaruramu amaani kandi bukatuha n’obumanzi?

¹³ Yehova naahikiiriza okuraganisa kwe ngu ‘niinyija kukuha amaani,’ na munonga abazigu baaba nibatuhiiganisa. Omu bicweka ebimwe obunaku obu, abazigu baitu nibateeraho kuzibira omurimo gw’okubuurira nari kutaikirizayo ekibiina kyaitu. N’obu ekyo kyakubaho titurikwerarikirira munonga. Yehova naatuhamiza ngu naija kutugumya kandi atuhe n’okweyikiririzamu. Naaturaganisa ati: ‘Tihariho ky’okurwanisa, eki baaheesire kukurwanisa’ ekirikwija kusingura. (Isa. 54:17) Ebigambo ebi nibitwijutsya enshonga nkuru ishatu. 

14. Ahabw’enki tutarikutangaara kureeba abazigu ba Ruhanga nibatutaahirira?

¹⁴ Eky’okubanza, nk’abakuratsi ba Kristo nitumanya ngu nitwija kwangwa. (Mat. 10:22) Yesu akagira ngu abakuratsi be bakaba nibaija kuhiiganisibwa munonga omu biro by’emperu. (Mat. 24:9; Yoh. 15:20) Ekya kabiri, obunabi bwa Isaaya nibuturabura ngu abazigu baitu nibaija kukora ekirikukira aha kutwanga, beitu nibaija n’okukoresa ebirwaniso bitari bimwe. Ebirwaniso ebi nibitwariramu ebishuba ebirikushiisha eiziina ryaitu nari okuhiiganisibwa kw’amaani. (Mat. 5:11) Yehova tarikuzibira abazigu baitu kukoresa ebirwaniso ebi kuturwanisa. (Efe. 6:12; Kush. 12:17) Kwonka titushemereire kutiina. Ahabw’enki?

15-16. (a) Enshonga ya kashatu ei twine kwijuka n’eha, kandi ebiri omu Isaaya 25:4, 5 nibihamya bita eki? (b) Kurugiirira aha biri omu Isaaya 41:11, 12 niki ekiraahikye aha abarikutuhiiganisa boona?

¹⁵ Teekateeka aha kindi eki twine kuguma nitwijuka. Yehova akagira ngu “tihariho ky’okurwanisa” eki baraakorese kuturwanisa  ekirikwija ‘kusingura.’ Nk’oku ekisiika kirikuturinda haabaho eihunga ry’amaani, nikwo Yehova arikuturinda “eihunga” ry’abategyeki abataine saasi. (Shoma Isaaya 25:4, 5.) Abazigu baitu tibarikwija kutuhitsyaho akabi ak’ebiro byona.​—Isa. 65:17.

¹⁶ Kandi Yehova naatugumya arikutushoboororera ekiraahikye ahari abo ‘abatwiniire ekiniga.’ (Shoma Isaaya 41:11, 12.) N’obu abazigu baitu baakuturwanisa bata nari hakabaho orutaro rurikushusha ki, ekiraabahikyeho ni kimwe: Boona nibaija ‘kucweka busha, bahwerekyerere.’

17-18. (a) Okushoma Baibuli nikuhamya kuta obwesigye bwaitu omuri Yehova? Ha eky’okureeberaho. (b) Okuteekateeka aha kyahandiikirwe ky’omwaka 2019 nikituhwera kita?

¹⁷ Nituhamya obwesigye bwaitu omuri Yehova turikwongyera kumumanya. Kandi omuringo gwonka ogurikutuhwera kumumanya n’okushoma Baibuli n’obwegyendesereza kandi tukateekateeka aha bi turikushoma. Baibuli erimu obutumwa oburikworeka oku Yehova yaarinzire abantu be ira. Ekyo nikituhamiza ngu naija kutuhwera n’omu bunaku obu.

¹⁸ Teekateeka aha ky’okureeberaho kirungi eki nabi Isaaya yaakoreise kutworeka oku Yehova arikuturinda. Naagamba ahari Yehova nk’omuriisa kandi abaheereza be nk’entaama. Isaaya naagamba ahari Yehova ati: ‘Naija kukiikira abaana b’entaama ze omu mikono, abatwarire omu kifuba kye.’ (Isa. 40:11) Twamanya ngu Yehova naatukiikira omu mikono ye y’amaani, nituhurira twagira oburinzi kandi twikaikana. Okutuhwera kuguma twikaikaine n’obu twakuhikwaho oburemeezi, omwambari omwesigwa kandi ow’obwengye atooraine Isaaya 41:10 kuba ekyahandiikirwe ky’omwaka 2019, ‘Otahahaaza omutima, ahabw’okuba Ndi Ruhanga waawe.’ Guma nooteekateeka aha bigambo ebi ebirikuhuumuriza. Nibiija kukugaruramu amaani kwemera embeera zigumire eziri haihi kubaho.