1. Omusamaria ou Yesu yaakirize endwara akooreka ata ngu yaasiima?

ABASHAIJA ikumi bakaba bari omu mbeera mbi munonga. Bakaba baine ebibembe, kandi bataine amatsiko aha biro by’omumaisho. Kwonka izooba rimwe, bakareeba Yesu Omwegyesa Mukuru, ari hangahari. Bakaba bahuriire ngu Yesu naakiza endwara zoona, kandi bakaba nibamanya ngu nabo naabaasa kubakiza. N’ahabw’ekyo bakagira bati: “Yesu Mwegyesa, otugirire embabazi.” Abashaija aba ikumi bakakirira kimwe endwara yaabo. Hatariho kubangaanisa boona bakashemererwa ahabw’okugira ngu Yesu akabagirira embabazi. Kwonka omwe aharibo, tarashemereirwe kyonka, kureka akooreka ngu naasiima * Yesu. Bwanyima y’Omusamaria ogwo kutambirwa, kikamuhiga kuhimbisa Ruhanga “n’eiraka rihango.”​—Luk. 17:12-19.

2-3. (a) Niki ekirikubaasa kuturemesa kusiima abandi? (b) Omu kicweka eki nituza kwega ki?

² Nk’oku Omusamaria yaakozire, naitwe nitwenda kworeka ngu nitusiima abarikutugirira embabazi. Kwonka obumwe, nitubaasa kwebwa kusiima abandi omu bigambo n’omu bikorwa.

³ Omu kicweka eki, nituza kureeba ahabw’enki ni kikuru kusiima abandi omu bigambo n’omu bikorwa. Nituza kwegyera aha barikugambwaho omu Baibuli abaabaire nibasiima abandi n’abaabaire bari entasiima. Reero nituza kureeba oku turikubaasa kusiima abandi omu miringo etari emwe n’emwe.

4-5. Ahabw’enki twine kworeka ngu nitusiima abandi?

⁴ Yehova naatuteeraho eky’okureeberaho omu kusiima abandi. Omuringo gumwe ogu arikukikoramu n’okuha omugisha abarikumushemeza. (2 Sam. 22:21; Zab. 13:6; Mat. 10:40, 41) Kandi Ebyahandiikirwe nibituhiga kutooreza “Ruhanga nk’abaana abarikukundwa.” (Efe. 5:1) N’ahabw’ekyo enshonga nkuru erikutuhiga kusiima abandi n’okwenda kutooreza Yehova.

⁵ Teekateeka aha nshonga endiijo ahabw’enki twine kusiima abandi. Okusiima ni nk’ekiihuro kirungi. Ekiihuro nikishemeza munonga twakirya hamwe n’abandi. Twamanya ngu abandi nibasiima ebi turikukora, nitushemererwa. Naitwe twayoreka ngu nitusiima abandi, nabo nibashemererwa. Twasiima omuntu naamanya ngu okuteeraho kwe kutuhwera, nari ekintu eki yaatuha kyatugasira. N’ekirikurugamu, omukago gwaitu n’omuntu ogwo nigweyongyera kuhama.

6. Ebigambo by’okusiima nibishushana bita n’apo ekozirwe omu zaabu?

⁶ Okusiima abandi n’eky’omuhendo munonga. Baibuli neegira eti: “Ekigambo kihikire, ekigambirwe omu bunaku bwakyo, ni nk’amapeera g’ezaabu agari omu kiibo ky’efeeza.” (Enf. 25:11) Teera akashushani amapeera nari apo ekozirwe omu zaabu yaateebwa aha kintu ekikozirwe omu feeza oku erikureebeka gye! Kandi teekateeka aha ku erikuba eri ey’omuhendo! Noobaasa kwehurira ota waatunga ekiconco nk’ekyo? Nikyo kimwe, ebigambo by’okusiima ebi orikugambira abandi nabyo nibiba biri eby’omuhendo. Kandi teekateeka aha mazima aga: Apo ekozirwe omu zaabu neebaasa kugumaho kumara obwire bwingi munonga. Nikyo kimwe, omuntu ou waasiima naabaasa kuguma naijuka ebigambo byawe by’okusiima, kandi abitware nk’eby’omuhendo ebiro byona eby’amagara ge.

7. Kurugiirira ahari Zaaburi 30:12 Daudi akooreka ata ngu naasiima, kandi ni baahi abandi abaayorekire ngu nibasiima?

⁷ Baingi aha baheereza ba Ruhanga aba ira bakaba nibasiima. Omwe aharibo ni Daudi. (Shoma Zaaburi 30:12.) Akaba naasiimira kimwe okuramya okw’amazima, kandi akooreka enyehurira ze omu muringo ogurikureebwa. Akahayo eby’obugaiga bingi ahabw’omurimo gw’okwombeka hekalu. Baijukuru ba Asafu bakooreka okusiima kwabo barikuhandiika zaaburi nari ebyeshongoro by’okuhimbisa. Omu kyeshongoro kimwe, bakasiima Ruhanga kandi baayoreka ngu nibakunda “eby’okutangaaza ebi” yaakozire. (Zab. 75:1) Buzima, Daudi na baijukuru ba Asafu bakaba nibenda kworeka ngu nibasiima Yehova ahabw’emigisha ei yaabaire abahaire. Mbwenu shi noobaasa kuteekateeka aha miringo ei orikubaasa kutoorezamu abahandiiki ba zaaburi abo?

8-9. Entumwa Paulo akooreka ata ngu naasiima Abakristaayo bagyenzi be, kandi eki kiine kuba kyarugiremu ki?

⁸ Entumwa Paulo akasiima ab’eishe-emwe bagyenzi be, kandi akakyoreka omu muringo ogu yaabagambireho. Butoosha omu kushaba akaba asiima Ruhanga ahabwabo. Kandi akaba ayoreka ngu naabasiima yaaba naabahandiikira. Omu mishororongo 15 ey’okubanza ey’Abarooma eshuura ya 16, Paulo naagamba amaziina 27 g’ab’eishe-emwe. Paulo akaijuka Priska na Akula “abaabaire beehaireyo kucuubwaho ebitsya” ahabwe, kandi akagamba n’ahari Foibe nk’owaabaire “naahwera baingi,” otwariiremu na Paulo. Akasiima abashaija n’abakazi Abakristaayo abakundwa, abaabaire nibakora n’obweziriki.​—Rom. 16:1-15.

⁹ Paulo akaba naamanya ngu Abakristaayo abo tibahikiriire, kwonka omu kuhendera ebaruha ei yaahandiikiire Abarooma, akacwamu kuta omutima aha mitwarize yaabo mirungi. Teekateeka aha ku kyagumize Abakristaayo abo ku baahurire ebi Paulo yaabahandiikireho birikushomwa omu kibiina! N’ekyarugiremu, omukago gwabo na Paulo hatariho kubangaanisa gukeeyongyera kuhama. Mbwenu shi nookira kusiima abari omu kibiina kyawe ahabw’ebirungi ebi barikugamba n’ebi barikukora?

10. Nitubaasa kwegyera ki ahari Yesu aha bikwatiraine n’okusiima abakuratsi be?

¹⁰ Omu butumwa obu Yesu yaahandiikiire ebibiina ebimwe omuri Asia, akasiima ebi abakuratsi be baabaire nibakora. Nk’eky’okureeberaho, akatandika obutumwa bwe obu yaahandiikiire ekibiina kya Suatira arikugira ati: “Nimmanya emirimo yaawe, n’okukunda kwawe n’okwikiriza n’okuheereza n’okugumisiriza kwawe, kandi nimmanya ngu emirimo yaawe eya bwanyima neekira eby’okubanza.” (Kush. 2:19) Taragambire aha kwongyera aha buheereza bwabo kyonka, beitu akabasiima n’ahabw’okworeka emitwarize mirungi eyaabahigire kukora ebirungi. N’obu Yesu araabe yaabaire aine kuha bamwe obuhabuzi omu kibiina kya Suatira, nabwo akatandika n’ebigambo birungi, kandi yaahendera n’ebirikugaruramu amaani. (Kush. 2:25-28) Teekateeka aha bushoboorozi bwa Yesu omutwe gw’ekibiina obu aine. Tihaine ekishemereire kumugyemesereza kutusiima ahabw’omurimo ogu turikumukorera. Kwonka n’obu kiraabe kiri kityo, naafayo munonga kutusiima. Ka naateeraho abareeberezi eky’okureeberaho kirungi!

11. Nk’oku kirikworekwa omu Abaheburaayo 12:16, Esau akaba aine miteekateekyere ki aha bintu ebikuru?

¹¹ Eky’obusaasi, abamwe abarikugambwaho omu Baibuli bakooreka ngu n’entasiima. Nk’eky’okureeberaho, n’obu Esau araabe yaayoroirwe abazaire abarikukunda Yehova kandi abarikumutiina, akaba atarikusiima ebintu ebirikwera kandi ebikuru. (Shoma Abaheburaayo 12:16.) Obutasiima bwe bukeeyoreka  buta? Esau akarahukiriiza kuguza obuhunguzi bwe, omurumuna yaamuhamu eby’okurya. (Kut. 25:30-34) Bwanyima, Esau akeefuuza ahabw’okucwamu atyo. Kwonka akooreka ngu tarikusiima eki yaabaire aine, n’ahabw’ekyo akaba ataine ah’okwihirira kwetomboita ahabw’okutatunga omugisha gw’obuhunguzi bwe nk’omujigaijo.

12-13. Abaisraeli bakooreka bata ngu n’entasiima, kandi hakarugamu ki?

¹² Abaisraeli bakaba baine enshonga nyingi ezaabaire zishemereire kubareetera kusiima. Bakacungurwa kuruga omu buhuuku bwanyima ya Yehova kureetaho Ebiheneso ikumi omuri Misri. Bwanyima akagaruka yaabacungura arikucwekyereza eihe ryona erya Misri aha Nyanja Erikutukura. Abaisraeli bakashemererwa kandi baayeshongora n’ekyeshongoro ky’obusinguzi barikuhimbisa Yehova. Kwonka shi bakaguma baine okusiima okwo?

¹³ Abaisraeli ku baahikirweho embeera zigumire ezindi, ahonaaho bakeebwa ebirungi byona ebi Yehova yaabaire abakoreire. N’ahabw’ekyo bakooreka ngu n’entasiima. (Zab. 106:7) Mu muringo ki? ‘Eihanga ryona ery’Abaisraeli bakeetomboitera Musa na Arooni’ kwonka buzima, bakaba bariyo nibeetomboitera Yehova. (Kur. 16:2, 8) Bakareetera Yehova kubaihamu obwesigye ahabw’obutasiima bwabo. Bwanyima Yehova akagira ngu ab’obusingye obwo boona bakaba nibaija kufeera omu ihamba, kureka Yoshua na Kalebu. (Kub. 14:22-24; 26:65) Ka tureebe oku turikubaasa kwetantara eby’okureeberaho ebi ebibi tukatooreza ebirungi.

14-15. (a) Ori omu bushwere naabaasa kworeka ata ngu naasiima mugyenzi we? (b) Abazaire nibabaasa kwegyesa bata abaana baabo kusiima abandi?

¹⁴ Omu ka. Eka yoona neegasirwa buri omwe ogirimu yaaba naasiima bagyenzi be. Ori omu bushwere yaasiima ou aburimu nawe, omukago gwabo nigweyongyera kuhama. Kandi nikiboorobera n’okusaasirana enshobe zaabo. Omushaija orikusiima tarikureeba bureeba ebirungi ebi omukazi we arikugamba n’ebi arikukora, beitu naimuka kandi amusiima. (Enf. 31:10, 28) Kandi omukazi w’obwengye naagambira iba kyenyine eki arikumusiimaho.

¹⁵ Abazaire nimubaasa kwegyesa muta abaana baanyu kusiima abandi? Ijuka ngu abaana baawe nibatooreza ebi orikugamba n’ebi orikukora. N’ahabw’ekyo taho eky’okureeberaho kirungi orikwebaza abaana baawe baagira eki baakukorera. Kandi yegyesa abaana baawe kusiima abantu, baagira ebi baabakorera.  Hwera abaana baawe kwetegyereza ngu okusiima abandi nikiruga aha mutima, kandi ngu ebigambo byabo nibibaasa kuba eby’omugasho munonga. Nk’eky’okureeberaho, omwishiki orikwetwa Clary naagira ati: “Maawe obu yaabaire aine emyaka 32, akatsigara wenka kureeberera abaana bashatu ataine kihwera. Ku naahikize emyaka 32, nkateekateeka aha kishemereire kuba kyabaire kimugumiire aha myaka egyo. Nkamugambira ngu nkaba ninsiima munonga byona ebi yaayefeerereize kuunyorora hamwe na banyaanyazi. Juba, aherize kungambira ngu ebigambo byangye na hati bikiri eby’omuhendo ahariwe, kandi naakira kubiteekateekaho, reero asiiba ashemereirwe eizooba ryona.”

16. Ha eky’okureeberaho ekirikworeka oku okusiima kurikugaruramu abandi amaani.

¹⁶ Omu kibiina. Twasiima ab’eishe-emwe na banyaanyazi-itwe, ekyo nikibagaruramu amaani. Nk’eky’okureeberaho, Jorge omureeberezi w’emyaka 28, akarwara munonga. Akaba atarikubaasa kuza omu nteerane kumara okwezi kumwe. Nangwa n’obu yaagarukire kuza omu nteerane, akaba atarikubaasa kwebembera ebicweka. Jorge naagira ati: “Nkeehurira nk’otaine mugasho ahabw’okugira amaani makye, n’ahabw’okutabaasa kuhikiiriza obujunaanizibwa omu kibiina. Kwonka bwanyima y’oruteerane rumwe, ow’eishe-emwe akangira ati: ‘Niinyenda kukusiima ahabw’eky’okureeberaho eki oteereireho eka yangye. Buzima nitusiima munonga embazo zaawe ezi waahaire emyaka mikye enyima. Zituhwereire kuhamya okwikiriza kwaitu.’ Nkakwatwaho munonga, reero naatandika kurira. Ebigambo bye nibyo naabaire niinyenda kuhurira.”

17. Nk’oku kirikworekwa omu Abakolosai 3:15, nitubaasa kworeka tuta ngu nitusiima Yehova ahabw’obufura bwe?

¹⁷ Okusiima Ruhanga waitu efura. Yehova atuhaire eby’okurya by’omwoyo bingi munonga. Nk’eky’okureeberaho, nitutunga obuhabuzi bw’omugasho kurabira omu nteerane, magaziini zaitu, n’aha mukura gwaitu. Orahuriireho orubazo, nari okashoma ekicweka, nari okareeba entebeekanisa ya broadcast reero okagira oti: ‘Eki buzima nikyo naaba niinyenda’? Nitubaasa kworeka tuta ngu nitusiima Yehova? (Shoma Abakolosai 3:15.) Omuringo gumwe n’okumwebaza kurabira omu kushaba ahabw’okutuha ebiconco birungi ebyo.​—Yak. 1:17.

18. Nitubaasa kworeka tuta ngu nitusiima Yehova ahabw’okutuha Ekyombeko ky’Obukama?

¹⁸ Kandi nitworeka ngu nitusiima Yehova twarinda omwanya gwaitu gw’okuramizamu kuguma nigureebeka gye. Twine kuguma nituboneza Ebyombeko by’Obukama butoosha,  kandi abo abarikukora aha vidiyo n’ebyoma by’amaraka eby’ekibiina, baine kwegyendesereza kutabishiisha. Twareeberera gye Ebyombeko byaitu eby’Obukama, nibiija kuhangaara munonga kandi nibiija kuba bitarikwetengyesa kuguma nitubihunduuza buri kaire. Omu muringo ogwo, nitushazya esente zirikumara ez’okwombeka Ebyombeko by’Obukama ebindi nari kubiboneza omu nsi yoona.

19. Waayegyera ki aha kyahikire aha mureeberezi omwe orikutaayaayira ebibiina n’omukazi we?

¹⁹ Abarikukora n’obweziriki ahabwaitu. Twasiima abandi, ebigambo byaitu nibibaasa kubareetera kuhindura emiteekateekyere ei baine aha buremeezi bwabo. Teekateeka aha kyahikire aha mureeberezi orikutaayaayira ebibiina n’omukazi we. Bwanyima y’okubuurira aha izooba ry’obutiti, bakagaruka ahu baabaire nibaraara baruhire. Hakaba hariho obufuki, omukazi yaahika n’aha kubyama ajwaire kabuuti ye. Omu kasheeshe, akagambira iba ngu naahurira atarikubaasa kugumizamu n’obuheereza bw’okutaayaayira ebibiina. Bwanyima omu kasheeshe ako, bakamureetera ebaruha kuruga aha ofiisi, ehandiikireho amaziina ge. Ebaruha ekaba neemusiima ahabw’obuheereza bwe n’okukugumisiriza kwe. Ekaba neeyoreka ngu tikyorobi buri saabiiti kuraara omu mwanya musya. Iba akagira ati: “Akakwatwaho okusiima oku kyamureetera kutagaruka kugamba aha kuruga omu buheereza bw’okutaayaayira ebibiina. Nangwa, emirundi mingi akaba ampiga kugumizamu ku naabaire nteekateeka kuruga omu buheereza obu.” Ow’eishe-emwe ogu n’omukazi we bakagumizamu nibataayaayira ebibiina kumara emyaka nka 40.

20. Niki eki twine kuteeraho kukora buri izooba, kandi n’ahabw’enki?

²⁰ Buri izooba ka tuteereho kworeka ngu nitusiima abandi kurabira omu bigambo n’ebikorwa byaitu. Ebikorwa n’ebigambo byaitu kuruga aha mutima nibibaasa kuba nibyo omuntu arikwenda kubaasa kwemera oburemeezi omu nsi egi etarimu kusiima. Kandi ebigambo byaitu by’okusiima nibireetaho emikago erikubaasa kugumaho ebiro byona. Ekikuru munonga, nitwija kuba nitutooreza Tataitwe Yehova Ruhanga efura.