Omu 1913 tata, John Mills, akabatizibwa omu rurembo New York aha myaka 25. Ow’eishe-emwe Russell niwe yaahaire orubazo rw’okubatizibwa. Bwanyima, tata akaza Trinidad, ahu yaatahire omu bushwere na Constance Farmer, owaabaire ari Omwegi wa Baibuli omweziriki. Tata akahwera munywani we William R. Brown kworeka omuzaano gwa “Photo-Drama of Creation.” Bakakikora kuhitsya obu Browns yaaza kuheereza omuri West Africa omu 1923. Tata na Maawe, abaabaire baine amatsiko g’okuza omu iguru, bakagumizamu nibaheereza omuri Trinidad.

Abazaire baitu bakaba baine abaana mwenda, omujigaijo bakamweta Rutherford eiziina eririkushushana n’ery’owaabaire ari purezidenti wa Watch Tower Bible and Tract Society. Nkazaarwa Okwaikumi-n’abiri 30, 1922, reero baanyeta Clayton J. Woodworth, eiziina ry’owaabaire ari omuhandiiki wa magaziini eya Golden Age (nari erikwetwa Awake!). Abazaire baitu bakatuhwera kutunga obwegyese oburikutandikirwaho, kwonka okukira munonga bakatuhiga kutaho ebigyendererwa by’omwoyo. Maawe akaba naamanya kushoboorora gye Ebyahandiikirwe omu muringo ogurikwetegyerezibwa. Tata akaba naakunda kututebeeza ebitebyo by’omu Baibuli arikukoresa ebicweka by’omubiri gwe gwona kutwegyesa.

Okuteeraho kwabo kukarugamu ebirungi. Itwe bashatu aha boojo bataano, tukaza omu Ishomero rya Gileadi. Banyaanyazi bashatu bakaheereza omuri Trinidad na Tobago nka baapayoniya emyaka mingi. Abazaire baitu ahabw’okutwegyesa gye n’okututeeraho eky’okureeberaho kirungi, ‘bakatubyara omu nju ya’ Yehova. Ahabw’okuguma nibatuhiga kikatuhwera kugogyerera “omu bikaari bya Ruhanga waitu.”​—Zab. 92:13.

Entebeekanisa z’okubuurira zikaba nizikorerwa omu ka yaitu. Baapayoniya bakaba bateeranira owaitu, kandi bakaba nibakira kugamba aha  Ow’eishe-emwe George Young, omumiisani kugura Canada owaaheereizeho omuri Trinidad. Abazaire baitu bakaba bagamba gye ahari Brown n’omukazi we abu baaheereizeho nabo obwire obwo abaabaire bari omuri West Africa. Ebi byona bikampiga kutandika kubuurira nyine emyaka ikumi.

Omu bwire obwo magaziini zaitu zikaba nizisheeshuura butunu ediini y’ebishuba, omururu omu by’obushuubuzi, n’ab’obutegyeki abashomankuzi. Ahabw’enshonga egyo, omu 1936 abeebembezi b’ediini bakareetera gavana wa Trinidad kuzibira ebitabo byona ebya Watch Tower omu ihanga eryo. Tukashereka ebitabo ebi twabaire twine kandi twaguma nitubikoresa kuhitsya obu byahwaire. Tukaba nitukoresa ebipande n’egaari, obupapura na kaada eziriho obutumwa. Turikukoresa emotoka y’okurangiirira obutumwa kuruga omu tauni ya Tunapuna, tukaba tubuurira kuhika n’omu byaro bya Trinidad. Buzima eki kikaba nikishemeza! Ebi byona bikampiga kubatizibwa nyine myaka 16.

Obuhunguzi bw’eby’omwoyo obw’eka yaitu n’eby’okureeberaho birungi bikandeetera kwenda kuba omumiisani. Ekyetengo ekyo nkaguma nkyine n’obu naaza Aruba omu 1944 kuheereza n’Ow’eishe-emwe Edmund W. Cummings. Tukashemererwa kugira abantu ikumi abaizire aha Kiijutsyo omuri 1945. Omwaka ogwakuratsireho, ekibiina ky’okubanza kikatandikaho aha kizinga ekyo.

Ku haahingwireho obwire, nkabuurira kitaraariire omukozi mugyenzi wangye Oris Williams. Oris akaba ateeraho kuhoreereza enyikiriza ezi yaabaire ayegyesiibwe. Kwonka kurabira omu kwegyesibwa Baibuli, akeetegyereza eki Baibuli buzima erikwegyesa kandi yaabatizibwa Okwokubanza 5, 1947. Ku hahingwireho obwire, tukakundana kandi twataaha hamwe omu bushwere. Oris akaba payoniya omu Okwaikumi-na-kumwe 1950. Nyine Oris nkatandika embeera nsya.

Omuri 1955 tukatunga omugisha gw’okuza omu ishomero rya Gilead. Okubaasa kuzayo, nyowe na Oris tukaba twine kurekura emirimo yaitu, kuguza enju yaitu n’ebintu, kandi tukafuruka twaruga omuri Aruba. Omu Kwamushanju 29, 1956, tukaheza emishomo ya Gileadi eya 27 reero twayoherezibwa Nigeria.

Oris arikwijuka eby’enyima akagira ati: “Omwoyo gwa Yehova nigubaasa kuhwera omuntu kwemera emirabanamu omu buheereza bw’obumiisani. Okutashushana na ibanyi nyowe nkaba ntarikwenda kuheereza nk’omumiisani. Ahabwangye kikaabaire kirungi kugira eka nkazaara abaana. Nkahindura emiteekateekyere yangye bwanyima y’okwetegyereza oku kiri kikuru okwejumba omu murimo gw’okubuurira amakuru marungi. Eishomero rya Gileadi ku ryagire kuhendera nkaba nyeteekateekire kandi mmaririire kuheereza nk’omumiisani. Ku twagiire omu meeri erikwetwa Queen Mary, Worth Thornton, kuruga omu ofiisi y’Ow’eishe-emwe Nathan Knorr, akatwendeza orugyendo rurungi. Akatugira ngu nituza kuheereza aha Beseeli. ‘Ai bambe!’ Nikwo naataangaire ntyo. Kwonka omu kaire kakye nkatandika kukunda kuheereza aha Beseeli, ahu naatungire obujunaanizibwa butari bumwe. Obujunaanizibwa obu naakunzire munonga n’obw’okwakiira abagyenyi. Ninkunda abantu, kandi obuheereza obu bukambaasisa kumanya ab’eishe-emwe baingi omuri Nigeria. Baingi aharibo bakaba baija baine omucucu mwingi, baruhire, baine eriho, n’enjara. Kikaba nikinshemeza munonga kubaha eby’okurya n’eby’okunywa n’okubahuumuriza. Obwo nabwo bukaba buri obuheereza oburikwera, kandi eki kikandeetera kugira okumarwa n’okushemererwa.” Eego, buri buheereza bukatureetera okushemererwa.

Ku twabaire turi hamwe nk’eka omu 1961 omuri Trinidad, ow’eishe-emwe Brown akatugambira ebirungi ebi yaatungire omu buheereza bwe omuri Africa. Reero naanye nkabagambira aha kweyongyera kw’omubaro gw’ababuurizi omuri Nigeria. Ow’eishe-emwe Brown akankwata ah’eibega omu muringo gwa rukundo, reero yaagambira tata ati: “Johnny, torabaasize kuheereza omuri Africa, kwonka Woodworth abaasize kuzayo!” Reero tata, yaagarukamu ati: “Ogumizemu, Worth! Ogumizemu!” Okuhigwa nk’okwo kuruga aha b’eishe-emwe abaaheereize Yehova baine omujinya, kukoongyera aha kyetengo kyangye ky’okuheereza gye.

Omuri 1962, nkeetwa omurundi ogundi kuza omu ishomero rya Gileadi erya 37 kwongyera  kutendekwa kumara ameezi ikumi. Ow’eishe-emwe Wilfred Gooch, owaabaire naareeberera ofiisi y’eitaagi omuri Nigeria akaza omu ishomero erya Gileadi erya 38 byanyima yaatwarwa England. Eitaagi erya Nigeria niinye naatsigaire ndikurireeberera. Nk’ow’eishe-emwe Brown, naanye nkaza omu bicweka bingi omuri Nigeria kyampwera kumanya ab’eishe-emwe n’okubakunda. N’obu baraabe baabaire bataine bintu bingi nk’ab’omu mahanga agatunguukire, okushemererwa kwabo n’okumarwa bikaba nibyoreka gye ngu okugira ekigyendererwa n’okumarwa tikurikurugiirira aha kugira esente nyingi nari eby’obugaiga. Omu mbeera ei baabaire barimu, kikaba nikishemeza munonga kureeba beecumire gye, kandi bajwaire gye omu nteerane. Bakaba baija omu nteerane empango aha roore na bolekajas * (baasi ziigwire omu mbaju ezi abantu baayekoreire). Kaingi baasi ezi zikaba ziba ziriho ebigambo by’enfumu. Kimwe aharibyo n’eki: “Amatondo g’amaizi nigurugamu enyanja mpango.”

Buzima ebigambo ebyo bihikire! Okuteeraho kwangye na Oris kukoongyera aha kuteeraho kw’ab’eishe-emwe omuri Nigeria. Omwaka 1974 gurikuza kuhika, Nigeria niryo ihanga ry’okubanza aheeru ya United States kuhitsya ababuurizi 100,000. Buzima omurimo gukaba gweyongyeire!

Obu abantu baingi baabaire nibaija omu mazima, nibwo orutaro rw’enganda rwatandika kuruga 1967 kuhika 1970. Okumara ameezi maingi, ab’eishe-emwe omu Biafran seeri y’Omugyera Niger bakaba batakihurizana na ofiisi y’eitaagi. Tukaba twine kubatwarira eby’okurya by’omwoyo. Nk’oku kirikworekwa aha kutandika, tukabaasa kuguma nitwambuka enyanja emirungi mingi ahabw’okwesiga Yehova n’okuguma nitushaba.

Ninyijuka gye akabi aku twabaire turimu turikwambuka omugyera Niger, turikwoga amagara gaitu kuraba aha baserukare batiinire abarikubaasa kurahuka kurasha, endwara n’ebindi bihikiirizi. Kikaba kigumire kuraba aha baserukare ab’orubaju rwa gavumenti, kwonka okukira munonga kikaba kigumiire kimwe kuraba aha baheekyera seeri y’omugyera. Eizooba rimwe nkambuka omugyera Niger nyekiro ndi aha bwato ndikuruga omu rurembo Asaba kuhika Onitsha, reero naaza omuri Enugu kugumya abareeberezi. Omu rugyendo orundi nkagumya abareeberezi ba Aba ahu kyabaire kitarikwikirizibwa kwasya amashanyarazi nyekiro. Aha mwaro gwa Harcourt, oruteerane rwaitu rukahendera ahonaaho bwanyima y’abaserukare ba Nigeria kutaahirira aba Biafran aheeru y’orurembo.

Okutaayaayira ab’eishe-emwe abo kikabahamiza ngu Yehova naabafaho n’obu baraabe baabaire baine kuheebwa obuhabuzi aha bikwatiraine n’okutejumba mu by’obutegyeki n’okugira obumwe. Ab’eishe-emwe omuri Nigeria bakagumisiriza baaba abasinguzi baaraba omu ntaro ezo. Bakooreka ngu okukundana kwabo nikukirira kimwe entaro z’enganda, reero baaguma baine obumwe bw’Ekikristaayo. Ka gwabaire guri omugisha gw’amaani kubahwera omu bwire bugumire obwo!

Omuri 1969, Ow’eishe-emwe Milton G. Henschel niiwe yaabaire ari ceyamaani w’oruteerane oruhango “Obusingye omu Nsi” omu kishaayi Yankee, omuri New York, kandi nkeega bingi ndikukora nk’omuhwezi we aha ruteerane oru. Nkatunga okutendekwa oku omu bwire buhikire, ahakuba omuri 1970 omuri Nigeria Lagos tukagira oruteerane oruhango orwine omutwe “Abantu Abarikusiimwa.” Eki kikabaho bwanyima y’orutaro rw’enganda, kandi rukagyenda gye ahabw’obuhwezi bwa Yehova. Oruteerane oru rukaba nirutangaaza, ahakuba rukabaho omu ndimi 17, kandi abantu 121,128 nibo baarwizireho. Ow’eishe-emwe Knorr na Henschel n’abandi abaarugire omu United States na England bakareeba kumwe aha kubatizibwa kw’abantu baingi 3,775 okwabaire kutakabahoga kuruga aha Pentekoote! Okuhwera omu kutebeekanisa oruteerane oru ningira nibwo naakirayo kugira bingi by’okukora. Omubaro gw’ababuurizi gukaba gutarikweyongyera bweyongyera, kureka gukaba nigushandaara!

Emyaka erikurenga 30 ei naamazire omu Nigeria, nkashemererwa n’okutunga omugisha gw’okutaayaayira ebibiina na ofiisi z’amataagi obumwe n’obumwe omuri West Africa. Abamiisani ka baabaire nibashemererwa ahabw’okubafaho n’okubagumya! Ka gwabaire guri omugisha gw’amaani kubahamiza ngu tibatsigirweho! Omurimo ogu gukanyegyesa ngu okufayo aha bandi nikibahwera kugumizamu omu buheereza, nikihamya n’ekibiina kya Yehova kireetamu n’obumwe.

 Ahabw’okuhwerwa Yehova tukabaasa kwemera oburemeezi obwaretsirweho orutaro n’endwara. Kikaba kyorobi kureeba emigisha ya Yehova. Oris akagira ati:

“Twembi tukarwara omushwija gw’ensiri emirundi mingi. Omurundi gumwe, Worth akatwarwa omu irwariro omuri Lagos ataine eki arikumanya. Bakangira ngu naabaasa kutakira, kwonka ninsiima kureeba ngu akakira! Ku yaagarukire kwetegyereza, abashaho abaabaire nibamureeberera akababuurira aha Bukama bwa Ruhanga. Bwanyima nkagyenda na Worth kutaayaayira omushaho orikwetwa Nwambiwe, kumuhwera kukunda kwega Baibuli. Akeega amazima kandi bwanyima yaaba omureeberezi omuri Aba. Naanye nkabaasa kuhwera baingi kuheereza Yehova otwariiremu Abasiraamu enkomba. Tukashemererwa munonga kumanya abantu ba Nigeria, entwaza yaabo, eby’obuhangwa byabo, n’orurimi rwabo.”

Eishomo erindi eri twayegire n’eri: Kubaasa kushemererwa omu buheereza bw’eihanga erindi, tukaba twine kwega kukunda ab’eishe-emwe, n’obu entwaza y’oruganda rwabo yaabaire neetaana n’eyaitu.

Omuri 1987 bwanyima y’okuheereza aha Beseeli omuri Nigeria, tukatandika kuheereza nk’abamiisani aha kirwa kya St. Lucia ekya Caribbean. Obu bukaba buri obuheereza burungi munonga kwonka bukaba bwine oburemeezi bwabwo busya. Okutashushana na Africa, ei abashaija baabaire baine abakazi baingi, oburemeezi omuri St. Lucia, bukaba buri ngu omushaija n’omukazi nibatuura kumwe batagaitsirwe. Ekigambo kya Ruhanga ekiine amaani kikahwera abeegi ba Baibuli kukora empindahinduka ezirikwetengyesa.

Ahabw’okwongyera kukura n’okugira amaani makye, ab’Akakiiko akareeberezi bakatugirira embabazi baatweta aha ofiisi enkuru omuri Brooklyn, New York, omuri U.S.A., omu 2005. Buri izooba ninsiima Yehova ahabw’okumpa Oris. Omu 2015 akasingurwa omuzigu rufu, kandi obusaasi obu naagizire tiburikugambwa. Akaba ari enkundwakazi owaabaire aine emitwarize mirungi mingi. Okumara emyaka 68 ei twamazire omu bushwere nkaba nimukunda munonga. Tuketegyereza ngu kubaasa kutunga okushemererwa omu bushwere n’omu kibiina, twine kworobera abaine obushoboorozi, kusaasira, kuguma turi abacureezi, n’okugira emitwarize y’omwoyo gurikwera.

Ku twabaire tuhikwaho ebirikutumaramu amaani, tukaba twesiga Yehova turikumanya ngu naaza kutuha emigisha ahabw’okwefeerereza kwaitu. Ku twaikiriize kugumizamu nituhaburwa, tukareeba ebintu nibyeyongyera kuba gye, kandi twagira n’amatsiko aha biro by’omumaisho!​—Isa. 60:17; 2 Kor. 13:11.

Omuri Trinidad na Tobago, Yehova akaha omugisha omurimo gw’abazaire bangye n’abandi, ekireeteire ripoota eherize kushohora kworeka ngu hati hariyo ababuurizi 9,892. Omuri Aruba, baingi bakahwera kuhamya ekibiina eki naabaire ndimu. Ekirwa ekyo hati kiine ebibiina 14 ebirikwongyera kutunguuka. Omuri Nigeria, omubaro gw’ababuurizi gweyongyeire gwahika 381,398. Kandi omu kirwa kya St. Lucia, ababuurizi 783 nibo barikushagika Obukama bwa Yehova.

Hati ndengize emyaka 90. Zaaburi 92:14 neegamba ahari abo ababyairwe omu nju ya Yehova eti: ‘Nibaija kuguma nibaana ebyana baakuzire, bagume baine amaizi nibabengyeya.’ Ninsiima embeera ezi ndabiremu omu kuheereza Yehova. Obuhunguzi burungi bw’Ekikristaayo bumpwereire kuheereza Yehova omu bwijwire. Kandi Yehova ahabwa rukundo ye etarikuhwaho, ambasiise ‘kugogyerera omu bikaari bye.’​—Zab. 92:13.