1-2. (a) Musa naashoboororwaho ata, kandi akakora ki? (b) Ni nshonga ki erikutuhiga kuba abacureezi?

BAIBULI neeshoboorora ngu Musa “akaba ari omucureezi, okukira abantu boona ab’omu nsi.” (Kub. 12:3) Mbwenu shi eki nikimanyisa ngu akaba ari omweremwa, atarikucwamu, kandi arikutiina kuhakanisibwa? Okwo nikwo abamwe barikushoboorora omuntu omucureezi. Kwonka emiteekateekyere egi tehikire. Musa akaba ari omuheereza wa Ruhanga ow’amaani, emanzi, kandi orikucwamu. Arikuhwerwa Yehova, akaturukirira omutegyeki wa Misri ow’amaani yaagamba nawe, yaayebembera abantu nka 3,000,000 kuraba omu ihamba, kandi yaahwera n’eihanga eryo kusingura abazigu baaryo.

² Titurikuhikwaho oburemeezi nk’obu Musa yaasingwire, kwonka buri izooba nituhikwaho embeera zigumire nari nitukoragana n’abantu abarikutureetera kugumirwa kuba abacureezi. Kwonka twine okuraganisa kw’amaani okurikutuhiga kugira omutwarize ogu. Yehova naaraganisa ngu ‘abacureezi nibaija kuhungura ensi.’ (Zab. 37:11) Mbwenu shi nooyereeba nk’omuntu omucureezi? Kandi shi abandi nibareeba ngu ori omucureezi? Tutakagarukiremu ebibuuzo bikuru ebyo, twine kumanya eki kirikumanyisa kuba omucureezi.

3-4. (a) Obucureezi nibugyeragyeranisibwa na ki? (b) Ni mitwarize ki ena erikwetengyesa kubaasa kuba abacureezi, kandi n’ahabw’enki?

³ Obucureezi * ni nk’ekishushani kirungi ekihuugirwe. Mu muringo  ki? Nk’oku omuhuugi w’ebishushani arikujwanzya erangi nyingi kukora ekihuugirwe kirungi, naitwe twine kugaita emitwarize mingi mirungi kubaasa kuba abacureezi. Emitwarize mikuru omuri yoona n’okwebundaaza, okworoba, okwetwara, n’obumanzi. Ahabw’enki nitwetenga emitwarize egi yoona kubaasa kushemeza Yehova?

⁴ Abarikwebundaaza nibo bonka barikukora ebi Ruhanga arikukunda. Kimwe aha bi Ruhanga arikukunda n’obucureezi. (Mat. 5:5; Gal. 5:23) Ku turikukora ebi Ruhanga arikukunda, nitureetera Sitaane kugira ekiniga. N’obu twakuba nitutwaza gye kandi turikwebundaaza, abantu baingi abari omu nsi ya Sitaane nibatwanga. (Yoh. 15:18, 19) N’ahabw’ekyo twine kuba emanzi kubaasa kwangira Sitaane.

5-6. (a) Ahabw’enki Sitaane naayanga abantu abacureezi? (b) Ni bibuuzo ki ebi turikuza kugarukamu?

⁵ Omuntu yaaba ataine bucureezi naaba aine amaryo, tarikurinda ekiniga kye, kandi tarikworobera Yehova. Eki nikishoboorora gye Sitaane. Tikirikutangaaza kureeba ngu naayanga abantu abacureezi! Ahabw’okworeka emitwarize mirungi nibasheeshuura emitwarize ye mibi. Kandi ekirikukira ahari ekyo, nibooreka ngu Sitaane n’omubeihi. Ahabw’enki? Ahakuba n’obu yaakugamba ki nari akakora ki, tarikubaasa kuremesa abacureezi kuheereza Yehova!​—Yob. 2:3-5.

⁶ Ni ryari obu kirikubaasa kutugumira kuba abacureezi? Kandi ahabw’enki twine kugumizamu turikuteeraho kuba abacureezi? Kubaasa kugarukamu ebibuuzo ebyo, nituza kushwijuma ebirikukwata ahari Musa, Abaheburaayo bashatu enkwatwa omuri Babulooni, na Yesu.

7-8. Musa akatwaza ata ku baamutwariize omu muringo gutari gw’ekitiinisa?

⁷ Abaine obushoboorozi: Nikibaasa kugumira abaine obushoboorozi kuguma bari abacureezi, na munonga omuntu ou baineho obushoboorozi yaabajooga, nari yaabangaanisa okucwamu kwabo. Ekyo kirakubaireho? Kandi shi ow’omu ka yaawe yaakutwariza atyo? Noobaasa kutwaza ota? Yetegyereze oku Musa yaatwarize omu mbeera egyo.

⁸ Yehova akatoorana Musa kwebembera Israeli, kandi yaamwikiriza kuhandiikira eihanga eryo ebiragiro. Hakaba hatariho kubangaanisa ngu Yehova naashagika Musa. N’obu kiraabe kiri kityo, munyaanya Miriamu,  n’omurumuna Arooni, bakamugambuura kandi baamucwera orubanja ahabw’omukazi ou yaashweire. Abashaija abaabaire baine obushoboorozi omu bunaku bwa Musa nibabaasa kuba baayenzire kuhoora enzigu, kwonka Musa tikwo yaatwarize. Tararahukire kuguubwa kubi. Nangwa akeeshengyereza na Yehova kuhendera okufubirwa kwa Miriamu. (Kub. 12:1-13) Ahabw’enki Musa yaatwariza atyo?

9-10. (a) Yehova akahwera Musa kwetegyereza ki? (b) Emitwe y’amaka n’abareeberezi nibabaasa kwegyera ki ahari Musa?

⁹ Musa akaba aikiriize okutendekwa oku Yehova yaamuhaire. Emyaka 40 enyima, obu Musa yaabaire naatuura omu kikaari ky’Omugabe wa Misri akaba atari mucureezi. Nangwa akaba naarahuka kugira ekiniga, ekyamureeteire kwita omushaija ou yaareebire ngu ti muringaaniza. Musa akateekateeka ngu Yehova naija kwikirizana n’ebikorwa bye. Hakahinguraho emyaka 40 Yehova arikuhwera Musa kwetegyereza ngu akaba aine kugira omutwarize ogurikukira aha kugira obumanzi kubaasa kwebembera Abaisraeli. Akaba aine kugira obucureezi. Kandi kubaasa kuba omucureezi, akaba aine kwebundaaza, kworoba, kandi akatwaza gye. Akeega gye eishomo eryo kyamubaasisa kuba omwebembezi murungi.​—Kur. 2:11, 12; Byak. 7:21-30, 36.

¹⁰ Obunaku obu, emitwe y’amaka n’abareeberezi baine kutooreza Musa. Omutwe gw’eka baakutwariza omu muringo gutari gw’ekitiinisa, otarahuka kugira ekiniga. Ba omucureezi oikirize enshobe zaawe. (Mub. 7:9, 20) Yoroba okuratire obuhabuzi bwa Yehova omu kushoboorora oburemeezi. Kandi butoosha garukamu omu muringo murungi. (Enf. 15:1) Emitwe y’amaka n’abareeberezi abarikugyendera aha buhabuzi obwo, nibashemeza Yehova, nibareetaho obusingye, nibataho n’eky’okureeberaho kirungi eky’okuba abacureezi.

11-13. Abaheburaayo bashatu bakatuteeraho ky’okureeberaho ki?

¹¹ Omu kuhiiganisibwa: Omu byafaayo byona, abantu batwire nibahiiganisa abaheereza ba Yehova. Nibabaasa kututaho emishango mingi, kwonka enshonga enkuru erikubareetera kutuhiiganisa n’okugira ngu ‘nitworobera Ruhanga okukira abantu.’ (Byak. 5:29) Nitubaasa kuhemangurwa, kukomwa, nari kutwarizibwa kubi. Kwonka turikuhwerwa Yehova, titurikweshashuza kureka nituguma twikaikaine omu kugyezibwa.

¹² Teekateeka aha ky’okureeberaho ky’Abaheburaayo bashatu enkwatwa, Hanania, Mishaeli, na Azaria. * Omugabe wa Babulooni akabaragiira kwinamira ekishushani kihango ky’ezaabu. Omu muringo gw’obucureezi bakamugira ngu  tibarikubaasa kuramya ekishushani. Bakaguma niboorobera Ruhanga n’obu omugabe yaabatiinatiiniise kubanaga omu kikoomi ky’omuriro. Yehova akacwamu kujuna abashaija abo ahonaaho, kwonka bakaba batarikukora binkwatiire ki barikuteekateeka ngu naija kubarinda. Kureka bakaba beeteekateekire kugyenda na kyona eki Yehova araikirize kubaho. (Dan. 3:1, 8-28) Baakoreka ngu abantu abacureezi buzima n’emanzi, ngu tihariho mugabe, okutiinatiinisibwa, nari ekifubiro ekirikubaasa kuturemesa kumariirira kuramya Yehova Ruhanga wenka.​—Kur. 20:4, 5.

¹³ Twagyezibwa kutahamira ahari Ruhanga, nitubaasa kutooreza tuta Abaheburaayo bashatu? Nitwecureeza turikumanya ngu Yehova naija kutuhwera. (Zab. 118:6, 7) Nitugarukamu omu muringo gw’obucureezi kandi ogw’ekitiinisa baatutaho emishango. (1 Pet. 3:15) Buzima nitwangira kimwe kukora ekintu kyona ekirikubaasa kushiisha omukago gwaitu na Tataitwe ow’omu iguru.

14-15. (a) Niki ekirikubaasa kubaho twaba twine amaganya? (b) Kurugiirira ahari Isaaya 53:7, 10, ahabw’enki turikubaasa kugira ngu Yesu niwe yaakizireyo kuba omucureezi omu bwire bw’amaganya?

¹⁴ Omu bwire bw’amaganya: Twena nitugira amaganya ahabw’enshonga nyingi. Nitubaasa kuba twagizire okwerarikirira turikuza kukora ekigyezo ah’eishomero, nari obu twabaire twine ekindi eki turikuza kukora. Nari nitubaasa kugira amaganya ahabw’okuteekateeka aha bujanjabi obu turikuza kutunga. Twaba twine amaganya, nikiba kigumire kuguma turi abacureezi. Ebintu ebitarikukira kutugwisa kubi nibibaasa kutandika kutukora kubi. Ebigambo byaitu nibibaasa kutaba by’embabazi kandi tutwarize kubi abandi. Ku oraabe oragizireho amaganya, yetegyereze eky’okureeberaho kya Yesu.

¹⁵ Yesu akaba aine amaganya maingi, omu meezi agaahererukireyo ari omu nsi. Akaba naamanya ngu naija kwitwa kandi arabe omu busaasi bwingi. (Yoh. 3:14, 15; Gal. 3:13) Ameezi makye atakafiire, akagira ngu akaba aine obusaasi bwingi. (Luk. 12:50) Kandi ebiro bikye atakafiire, akagira ati: “Omutima gwangye gwine obusaasi.” Nitubaasa kwetegyereza gye obucureezi bwe n’okworoba kwe kurugiirira aha ku yaagambiire Ruhanga enyehurira ze kurabira omu kushaba. Akabuuza ati: “Ngire nti, Taata, njuna ntahika aha bunaku obu? Ngaaha, ahakuba eki naiziire n’okubuhikaho. Taata, himbisa eiziina ryawe.” (Yoh. 12:27, 28) Obwire ku bwahikire, omu muringo gw’obumanzi Yesu akeehayo aha bazigu ba Ruhanga, abaamwitsire omu muringo gw’obusaasi kandi ogurikuhemurana. N’obu Yesu araabe yaabaire aine amaganya, akakora ebi Ruhanga arikwenda omu bucureezi. Hatariho kubangaanisa, nitubaasa kugira ngu Yesu niwe yaakizireyo kworeka obucureezi omu bwire bw’amaganya!​—Shoma Isaaya 53:7, 10.

16-17. (a) Banywani ba Yesu bakagyeza bata obucureezi bwe? (b) Nitubaasa kutooreza tuta Yesu?

¹⁶ Omu kiro ekyahereerukireyo Yesu atakafiire, banywani be ab’aha mara bakagyeza obucureezi bwe. Teebereza amaganya agu Yesu yaabaire aine ekiro ekyo. Mbwenu shi akaba naija kuguma ari omwesigwa kuhitsya aha kufa? Amagara g’obuhumbi bw’abantu gakaba gari aha rutezyo. (Rom. 5:18, 19) Kandi ekikuru munonga, eiziina rya Ishe rikaba niritwarirwamu. (Yob. 2:4) Bwanyima ku baabaire nibarya hamwe kyakiro y’aha muheru, entumwa ze bakatandika kuteera “empaka, ngu n’oha omuribo orikuteekateekwaho kuba mukuru.” Yesu akaba yaahabwire banywani be aba emirundi erengire ahari gumwe, nangwa n’omu shaaha nkye enyima omu izooba eryo ryenyine! Kwonka Yesu tarabaasize kuguubwa kubi. Omu mwanya gw’ekyo, akabagarukamu omu muringo gw’obucureezi. Acureire kwonka ahamiire aha kihikire, akagaruka yaabashoboororera emiteekateekyere ei baabaire baine kugira. Kandi  akasiima banywani be abo ahabw’okumuhamiraho.​—Luk. 22:24-28; Yoh. 13:1-5, 12-15.

¹⁷ Okaba noija kutwaza ota ku ogire ngu naiwe waabaire ori omu mbeera nk’egyo? Nitubaasa kutooreza Yesu kandi tugume tutaine kiniga n’obu twakuba twine amaganya. Oyekundiire yorobera ekiragiro kya Yehova ekirikugira ngu mugumizemu “nimugumisiririzana.” (Kol. 3:13) Nitwija kworobera ekiragiro eki, twaijuka ngu twena nitugamba nari nitukora ebintu ebirikugwisa kubi abandi. (Enf. 12:18; Yak. 3:2, 5) Kandi twine kuteeraho kusiima abandi ahabw’ebirungi ebi barikukora.​—Efe. 4:29.

18. Yehova naahwera ata abacureezi kucwamu gye, kwonka shi baine kukora ki?

¹⁸ Nibutuhwera kucwamu gye. Twaba twine eby’okucwamu ebigumire, Yehova naija kutuhwera kucwamu gye, beitu obwo twaba turi abacureezi. Akaraganisa ngu naija kuhurira okushaba “kw’abacureezi.” (Zab. 10:17) Kandi naija kukora ekirikukira aha kuhurira okushaba kwaitu. Baibuli neeraganisa eti: “Abacureezi abeebembera omu by’oburyo, kandi abeegyesa omuhanda gwe.” (Zab. 25:9) Yehova naatuha obuhabuzi obwo kurabira omu Baibuli n’omu bitabo byaitu * n’omu ntebeekanisa ezindi ‘ez’omwambari omwesigwa kandi ow’obwengye.’ (Mat. 24:45-47) Twine kwikiriza obuhwezi bwa Yehova turikuba abacureezi tukeega eby’omwoyo ebi arikutuha, kandi twekundiire tukagyendera aha bi turikwega.

19-21. Musa akakora nshobe ki omuri Kadeshi, kandi nitubaasa kumwegyeraho ki?

¹⁹ Nibutuhwera kutakora enshobe. Teekateeka ahari Musa. Kumara emyaka mingi, akaba ari omucureezi kandi arikushemeza Yehova. Kwonka bwanyima Musa ari haihi kuhendera orugyendo rugumire orw’emyaka 40 omu ihamba, akaremwa kworeka obucureezi. Munyaanya, obundi owaamuhweraire kucungura amagara ge omuri Misri, akaba yaaheza kufa n’okuziikwa omuri Kadeshi. Na hati Abaisraeli bakaba nibeetomboita ngu tibarikureebererwa gye. Aha murundi ogu bakaba ‘nibatonganisa Musa’ ahabw’okuburwa amaizi. N’obu Yehova araabe yaahweraire Musa kukora eby’okutangaaza, n’okwebembera gye abantu, kwonka nabwo bakeetomboita. Tibarayetomboitsire ahabw’okubura amaizi kyonka, beitu baketomboitera na Musa, orikushusha ngu okugira eiriho ekaba eri enshobe ye.​—Kub. 20:1-5, 9-11.

 ²⁰ Musa akagira ekiniga kingi kyamuremesa kuguma ari omucureezi. Omu mwanya gw’okugira okwikiriza akagambira orukiri nk’oku Yehova yaabaire amuragiire, akagambira abantu aine ekiniga, kandi yaabooreka ngu niwe yaakora eky’okutangaaza. Bwanyima, akateera orukiri emirundi ebiri, amaizi gaashandaara. Omwetunguuro n’ekiniga bikamureetera kukora enshobe y’amaani. (Zab. 106:32, 33) Musa ahabw’okuremwa kuguma ari omucureezi, taraikiriziibwe kutaaha omu Nsi Eyaaraganisiibwe.​—Kub. 20:12.

²¹ Eky’okureeberaho eki nitukyegyeraho amashomo makuru. Eishomo ry’okubanza, twine kugumizamu nituteeraho kuguma twine omutwarize gw’obucureezi. Twarekyera aho kuba abacureezi, ahonaaho nitubaasa kugira omwetunguuro gutureetere kugamba kubi n’okutwaza omu muringo gw’obushema. Eishomo rya kabiri, amaganya nigabaasa kutumaramu amaani, n’ahabw’ekyo omu bwire obwo nituba twine kuteeraho munonga kuba abacureezi n’obu twakuba nitugyemeserezibwa.

22-23. (a) Ahabw’enki twine kugumizamu nituteeraho kuba abacureezi? (b) Ebigambo ebiri omu Zefania 2:3 nibyoreka ki?

²² Nibwija kuturinda. Obwire butari bwa hare Yehova naija kwihaho ababi boona omu nsi, reero hagumeho abacureezi bonka. Bwanyima y’ekyo ensi buzima neija kubamu obusingye. (Zab. 37:10, 11) Mbwenu shi noija kuba omwe aha bacureezi abo? Ekyo nikibaasika, waagyendera aha kwehanangiriza oku Yehova yaahweraire nabi Zefania kuhandiika.​—Shoma Zefania 2:3.

²³ Ahabw’enki Zefania 2:3 nihagira ngu, “obundi mukaasherekwa”? Ebigambo ebyo tibirikumanyisa ngu Yehova naabanganisibwaho yaaba aine amaani g’okurinda abarikumushemeza n’abarikumukunda. Kureka, nibimanyisa ngu twine kugira eki twakora kubaasa kurindwa. Twine omugisha gw’okuhonokaho “aha izooba ry’ekiniga kya” Yehova, n’okugumaho ebiro byona twateeraho hati kuguma turi abacureezi kandi turikushemeza Yehova.