OKUSHABA kwona nikuhurirwa Ruhanga oyihireho omuringo gwona ogu orikushabamu? Omu nsi egi, kyorobi kuteebereza otyo. Emiteekateekyere egyo eine akakwate n’amadiini agarikugira ngu okuramya kwona kuhikire n’obu garaabe gatarikushushanisa enyikiriza. Mbwenu shi ekyo kihikire?

Baibuli neeyegyesa ngu abantu baingi nibashaba omu muringo gugwire. Obu Baibuli yaabaire neehandiikwa, abantu bakaba nibakira kuramya ebishushani. Kwonka, Ruhanga akabarabura emirundi mingi aha bikwatiraine n’ekikorwa ekyo. Nk’eky’okureeberaho, Zaaburi 115:4-6 neegira ngu: “Bigira amatu, kwonka tibihurira.” Eky’okwega nikireebwa butunu. Ahabw’enki nooshaba ruhanga otarikubaasa kukuhurira?

Eky’okureeberaho ky’omu Baibuli nikishoboorora enshonga egi. Eliya nabi wa Yehova akagambira baanabi ba Baali kushaba ruhanga waabo, bwanyima Eliya nawe akashaba Ruhanga owe. Eliya akagira ngu Ruhanga ow’amazima naija kugarukamu kandi ow’ebishuba naija kuremwa. Baanabi ba Baali bakashaba obwire buraingwa barikugambira ahaiguru, kwonka tihaine ekyabaireho! Baibuli neegira eti: “Tihaabaho iraka, nari ow’okubagarukamu, n’obu yaakuba ow’okubeetaho.” (1 Abagabe 18:29) Kwonka Eliya bikamugyendera bita?

Bwanyima ya Eliya kushaba, Ruhanga we akamugarukamu ahonaaho, arikwohereza omurimo kuruga omu iguru gwayotsya ekitambo eki yaabaire ahaireyo. Entaaniso n’eha? Hariho akashonshorekye kamwe akari omu kushaba kwa Eliya, kurugiirira aha 1 Abagabe 18:36, 37. N’okushaba kugufu munonga kurimu ebigambo nka 30 eby’Oruheburaayo. Omu mishororongo egyo, Eliya, akakoresa eiziina rya Ruhanga, Yehova emirundi eshatu.

Baali, ekirikumanyisa “mukama w’ekintu” nari “mukama w’omuntu,” akaba ari ruhanga wa Banyakanaani, kandi hakaba hariho baaruhanga b’emiringo mingi. Eiziina Yehova, n’ery’omutaano n’erye wenka tihaine oriine omu nsi yoona. Ruhanga ogu akagambira abaheereza be ati: “Ndi [Yehova]; eryo niryo eiziina ryangye, ekitiinisa kyangye tindikiha ondiijo.”—Isaaya 42:8.

Mbwenu shi okushaba kwa Eliya n’okwa baanabi ba Baali kukaza omu mwanya gumwe? Okuramya Baali kukaba nikugarura abantu ahansi barikukora emigyenzo y’ekikaafiire otwariremu n’okutamba abantu. Kwonka, okuramya Yehova kukabaasisa abaheereza be, Abaisraeli kwetantara ebikorwa ebirikubagarura ahansi. Kiteekateekyeho: Ka tugire ngu waahandiikira munywani waawe ou orikuha ekitiinisa ebaruha, noogira ngu neija kuheebwa omuntu ou otarikumanya eiziina, kandi oine emitwarize mibi erikutaana n’eyaawe? Ngaaha buzima!

Ku oraabe nooshaba Yehova, gira obwesigye ngu noogamba n’Omuhangi, Tataitwe. * “Iwe [Yehova] niiwe Tataitwe,” nikwo nabi Isaaya yaagambire omu kushaba. (Isaaya 63:16) Ogu niwe wenyini ou Yesu Kristo yaagambiire abakuratsi be: ‘Niintemba omu iguru ahari Ishe kandi Shoimwe, ahari Ruhanga we, kandi Ruhanga waanyu.’ (Yohaana 20:17) Yehova niwe Ishe wa Yesu. Niwe Ruhanga ou Yesu yaabaire naashaba kandi niwe yaayegyeise abakuratsi be kushaba.—Matayo 6:9.

Mbwenu shi Baibuli neeyegyesa ngu twine kushaba Yesu, Mariamu, abarikwera, nari baamaraika? Ngaaha twine kushaba Yehova wenka. Yetegyereze enshonga ibiri ahabw’enki kiri kityo. Ey’okubanza, okushaba n’omuringo gw’okuramya, kandi Baibuli neegira ngu okuramya kwona kushemereire kuza ahari Yehova wenka. (Okuruga 20:5) Ekya kabiri, Baibuli neeyoreka ngu Yehova niwe aine ekitiinisa ‘Orikuhurira okushaba.’ (Zaaburi 65:2) N’obu Yehova arikureekurira abantu obujunaanizibwa, kwonka niwe wenka ou twine kushaba. Niwe Ruhanga orikuraganisa kuhurira okushaba kwaitu.

N’ahabw’ekyo waaba nooyenda ngu okushaba kwawe kuhurirwe Ruhanga, ijuka okwehanangiriza oku: ‘Omuntu weena oritakira eiziina rya [Yehova] naija kujunwa.’ (Ebyakozirwe 2:21) Kwonka shi Yehova naahurira okushaba kwona atataireho bushonshorekye? Nari hariho ekindi kintu eki twine kumanya twaba nitwenda ngu Yehova agarukyemu okushaba kwaitu?