HATARIHO kubangaanisa oreebire ngu amadiini maingi nigombeka emyanya y’okushabiramu mihango, kandi nigataho n’obwire bwenyini obw’okushaba. Tugire ngu Baibuli neeyegyesa ngu hariho obwire obu twine kushaba n’emyanya ei twine kushabiramu?

Baibuli neeyoreka ngu hariho obwire buhikire obw’okushaba. Yesu atakariire n’abakuratsi be, akasiima Ruhanga omu kushaba. (Luka 22:17) Kandi abeegi be ku baayeteeraine kuramya, bakashabira hamwe. Baakoreka ngu nibagumizamu n’omucwe gw’Abayudaaya ogw’okushabira omu sinagogi n’aha hekalu omuri Yerusaalemu. Ruhanga akaba agyendereire ngu hekalu ebe “enju y’okuguma neeshabirwamu amahanga goona.”—Mako 11:17.

Abaheereza ba Ruhanga baayerundana kandi bakashabira hamwe, okweshengyereza kwabo nikurugamu ebirungi. Guruupu y’abantu yaaba aine obumwe omu mwoyo kandi okushaba kwabo kurikuhikaana n’emisingye ya Baibuli, Ruhanga naakusiima. Okushaba kwabo nikubaasa kumureetera kukora eki yaaba ataine kukora. (Abaheburaayo 13:18, 19) Abajurizi ba Yehova butoosha nibashaba omu nteerane zaabo. Nitukweta n’okushemererwa kwija aha Kyombeko ky’Obukama ekikuri haihi ohurire oku turikushaba.

Kwonka, Baibuli terikututeeraho obugarukiro aha bikwatiraine n’obwire bw’okushaba n’omwanya. Ira, abaheereza ba Ruhanga bakaba nibashaba obwire bwona kandi ahu baayendera. Yesu akagira ati: “Ku oraaze kushaba, otaahe omu kishengye kyawe, obanze okingye orwigi, oshabe Sho ori omu mubonano; kandi Sho ogwo oreeba eby’omu mubonano, naija kukuha ebihembo.”—Matayo 6:6.

Mbwenu shi eki tikirikushemeza? Noobaasa kushaba omutegyeki wa byona obwire bwona, ori wenka, kandi ogire obwesigye ngu naija kukuhurikiza. Kandi, Yesu akaba agira obwire bw’okwehereera kushaba wenka! Eizooba rimwe, akamara kiro kyona arikushaba Ruhanga, obuhabuzi aha bikwatiraine n’okucwamu kukuru.—Luka 6:12, 13.

Kandi abashaija n’abakazi barikugambwaho omu Baibuli bakaba nibashaba kubaasa kucwamu gye nari baagira oburemeezi. Obumwe bakaba nibashaba omu iraka eririkuhurirwa nari bashabira aha mutima, obundi bakaba bashaba beeteeraine hamwe nari buri omwe ashaba okwe. Enshonga enkuru eri ngu bakaba nibashaba. Ruhanga naahiga abaheereza be ati: “Mushabe obutoosha.” (1 Abatesalonika 5:17) Ayeteekateekire kuhurira okushaba kw’abarikukora ebi arikukunda. Ekyo ka n’ekikorwa kya rukundo?

Buzima, omu nsi egi embi, baingi nibeebuuza yaaba okushaba kwine omugasho. Noobaasa kubuuza, ‘buzima nikwija kungasira?’