EKIBUUZO ekyo nikireeta okushemererwa kwingi n’ekihika. Baibuli neeyoreka ngu Yehova naahurira okushaba obunaku obu. Yaaba naakuhurira nari atarikuhurira nikirugiirira ahariitwe.

Yesu akagambira butunu abeebembezi b’ediini endyarya; abaabaire nibafa kushaba barikweyoreka. Akagira ngu abashaija nk’abo nibaija “kuheebwa ebihembo byabo,” omu bwijwire ekirikumanyisa okutunga eki baabaire nibenda, okusiimwa abantu, beitu atari Ruhanga. (Matayo 6:5) Nikyo kimwe n’omu bunaku obu, baingi nibashaba ebi barikwenda, bitari ebi Ruhanga arikukunda. Nibeehuzya emisingye ya Baibuli ei twaheza kushwijuma, Ruhanga atarikuhurira okushaba kwabo.

Kandi iwe nookikora ota? Mbwenu shi Ruhanga naija kuhurira kushaba kwawe kandi akugarukyemu? Tarikukugarukamu arikwihirira aha rangi, eihanga, nari obukomooko. Baibuli neetuhamiza eti: ‘Ruhanga tarikushoroora mu bantu, kureka omu mahanga goona orikumutiina, akakora eby’okuhikiirira, ogwo niwe arikusiimwa.’ (Ebyakozirwe 10:34, 35) Ebigambo ebyo nibyoreka eki ori? Waaba nootiina Ruhanga, nooyoreka ngu nooyetantara kukora ekintu ekirikumugwisa kubi. Waakora eby’okuhikiirira, nooteeraho kukora eki Ruhanga arikugira ngu kihikire omu mwanya gw’okukuratira ebyetengo ebyawe nari eby’abantu abandi. Buzima nooyenda ngu Ruhanga ahurire okushaba kwawe? Baibuli neekuhwera kuhika ahari ekyo. *

Baingi nibaba nibenda ngu Ruhanga agarukemu okushaba kwaba omu muringo gw’eky’okutangaaza. Nangwa n’omu bwire bwa ira, Ruhanga akaba atarikukira kukugarukamu omuringo nk’ogwo. Bwanyima y’eky’okutangaaza hakaba hahinguraho ebyasha bingi reero habona kubaho ekindi. Ekindi, Baibuli neeyoreka ngu eby’okutangaaza bikaheendera omu bwire bw’entumwa. (1 Abakorinso 13:8-10) Mbwenu shi eki nikimanyisa ngu tarikugarukamu okushaba obunaku obu? Ngaaha buzima! Yetegyereze kumwe aha kushaba oku arikugarukamu.

Ruhanga naaha obwengye. Yehova niwe Bukomooko bw’obwengye oburikukirayo. N’efura aha barikwenda ngu abahabure kandi bakagyenda aha buhabuzi bwe.—Yakobo 1:5.

Ruhanga naaha abantu omwoyo gurikwera n’emigasho yaagwo. Omwoyo gurikwera n’amaani ga Ruhanga agarikukora. Tihariho maani agandi agarikugakira. Nigubaasa kuhwera kwemera okugyezibwa. Nigubaasa kutureetera obusingye bw’omu biteekateeko twaba twine amaganya. Nigutuhwera kugira emitwarize mirungi endiijo erikushemeza. (Abagalatia 5:22, 23) Yesu akeegyesa abakuratsi be ngu Ruhanga n’efura omu kuha ekiconco eki.—Luka 11:13.

Ruhanga naayemanyisa abo abarikumusherura. (Ebyakozirwe 17:26, 27) Omu nsi yoona, harimu abantu abacureezi abarikusherura amazima. Nibenda kumanya ebirikukwata ahari Ruhanga, amakuru g’eiziina rye, ekigyendererwa eki ainiire ensi n’abantu, n’oku barikubaasa kumwirira haihi. (Yakobo 4:8) Abajurizi ba Yehova nibakira kushanga abantu nk’abo, kandi nibakunda kubagana nabo eby’okugarukamu by’ebibuuzo ebyo barikukoresa Baibuli.

Tugire ngu shi niyo nshonga ahabw’enki otungire magaziini egi? Oriyo noosherura Ruhanga? Obundi nigwo muringo ogu arikugarukamu okushaba kwawe.