Omuntu w’okubanza Adamu, akahangaara munonga. Kwonka bwanyima, akakaikura kandi yaafa. Kuruga obwo, abantu batwire nibakoresa emiringo etari emwe kugira ngu batakaikura. Kwonka tihariho n’omwe orabaasize kwetantara okufa. Ahabw’enki? Adamu akakaikura kandi yaafa ahabw’okugomera Ruhanga. Naitwe nitukaikura ahabw’okugira ngu tukahungura ekibi n’okufa kuruga ahari Adamu.​—Shoma Okutandika 5:5; Abarooma 5:12.

Kubaasa kutunga amagara agatahwaho, kikaba nikyetengyesa omuntu ondiijo kuhayo ekitambo ahabwaitu. (Yobu 33:24, 25) Ekitambo n’ekyo ekirikushashurwa kucungura omuntu, naitwe twine kucungurwa kuruga omu kufa. (Okuruga 21:29, 30) Yesu akashashura ekitambo eky’omuringo nk’ogwo obu yaatufeera.​—Shoma Yohaana 3:16.

Ti buri omwe ngu naija kucungurwa kuruga omu kurwara n’okukaikura. Buzima abantu abarikugomera Ruhanga nk’oku Adamu yaakozire, nibaija kufeerwa amagara agatahwaho. Abo bonka abarikusaasirwa ebibi byabo, nibo baraatungye amagara agatahwaho.​—Shoma Isaaya 33:24; 35:3-6.

Kubaasa kusaasirwa, tushemereire kugira eki twakora. Twine kumanya Ruhanga turikwega Ekigambo kye Baibuli. Nikitwegyesa oku turikubaasa kutwaza gye n’oku turikubaasa kusiimwa Ruhanga reero tukatunga amagara agatahwaho.​—Shoma Yohaana 17:3; Ebyakozirwe 3:19.