1, 2. Ahabw’enki Yehova naayegyeragyeranisa n’omuriisa w’entaama?

YEHOVA naayegyeragyeranisa n’omuriisa. (Ezk. 34:11-14) Eki nikituhwera kumwetegyereza gye. Omuriisa w’entaama omurungi aine obujunaanizibwa bw’okureeberera n’okurinda entaama ezi arikuriisa. Naazitwara ahari obunyaatsi burungi n’amaizi (Zab. 23:1, 2); naazirinda nyomushana na nyekiro (Luk. 2:8); naazirinda enyamaishwa ezirikwenda kuzirya (1 Sam. 17:34, 35); naakiikira abaana baazo (Isa. 40:11); naasherura ezibuzire, kandi abuunga ezihendekire.​—Ezk. 34:16.

² Omu bunaku bwa ira, abaheereza ba Ruhanga abaingi bakaba bari abariisa b’entaama nari abahingi. N’ahabw’ekyo bakaba nibeetegyereza gye ahabw’enki Yehova yaayegyeragyeraniise n’omuriisa w’entaama. Abantu abo bakaba nibakimanya ngu baine kureeberera gye entaama zaabo kubaasa kuguma zihuriire kandi ziri gye. Omu muringo nigwo gumwe, abantu kubaasa kuba gye baine kureebererwa kandi bakatunga n’obuhabuzi kuruga ahari Yehova. (Mak. 6:34) Abantu baaba batatungire buhabuzi n’obuhwezi bwa Yehova, nibabonabona. Nibaba batarikumanya ekihikire n’ekitahikire, nibaba bari “nk’entaama ezitaine muriisa” ezitaataine, ahabw’okugira ngu tibaine orikubarinda. (1 Bag. 22:17) Kwonka, Yehova naafayo aha bantu be kandi nabareeberera.

3. Nituza kushwijuma ki omu kicweka eki?

³ N’obunaku obu kihikire kugyeragyeranisa Yehova n’omuriisa w’entaama. Na hati Yehova naareeberera abantu be abari nk’entaama. Ka tureebe oku arikuha entaama ze obuhabuzi kandi akazireeberera. Kandi nitwija kureeba eki twine kukora kubaasa kugasirwa omu buhabuzi bwa Yehova.

4. Yesu aine bujunaanizibwa ki omu kureeberera entaama za Yehova?

⁴ Yehova akatoorana Yesu okuba omutwe gw’ekibiina Ekikristaayo. (Efe. 1:22, 23) Yesu omuriisa murungi, aine emitwarize nk’eya Ishe. Kandi Yesu ‘akahayo amagara ge ahabw’entaama ze.’ (Yoh. 10:11, 15) Ekitambo ka n’ekiconco ky’omuhendo aha bantu boona! (Mat. 20:28) Yehova naayenda ngu omuntu weena orikwikiririza omuri Yesu “arekye kuhwerekyerera, kureka atungye amagara agatahwaho”!​—Yoh. 3:16.

5, 6. (a) Ni baahi abu Yesu atooraine kureeberera entaama ze, kandi entaama ziine kukora ki kubaasa kugasirwa omu ntebeekanisa egi? (b) Ni nshonga ki enkuru eshemereire kutureetera kworobera abareeberezi?

⁵ Entaama nari abari omu kibiina nibooreka bata ngu niboorobera Yesu Kristo Omuriisa Murungi? Yesu akagira ati: “Entaama zangye zihurira eiraka ryangye, naanye nzimanya, nazo zinkuratira.” (Yoh. 10:27) Okuhurikiza eiraka ry’Omuriisa Murungi nikitwariramu okugyendera aha buhabuzi bwe omuri byona. Nikitwariramu n’okugyendera aha buhabuzi bw’abareeberezi omu kibiina. Yesu akooreka ngu entumwa ze n’abeegi be bakaba nibaija kugumizamu barikukora omurimo ogu yaatandikire. Bakaba baine ‘kwegyesa’ kandi ‘bakariisa abaana b’entaama za Yesu.’ (Mat. 28:20; shoma Yohaana 21:15-17.) Amakuru marungi ku gaagumire nigajanjaara n’abeegi barikukanya, Yesu akatoorana Abakristaayo abakuzire omu by’omwoyo kureeberera ebibiina.​—Efe. 4:11, 12.

⁶ Paulo arikugambira abareeberezi b’omu kibiina kya Efeso omu kyasha ky’okubanza, akagira ngu kurabira omu mwoyo gurikwera abareeberezi bakatooranwa kuriisa ekibiina kya Ruhanga. (Byak. 20:28) Nikyo kimwe n’abareeberezi omu kibiina obunaku obu, nibatooranwa baaba nibahikiiriza ebirikwetengyesa nk’oku birikworekwa omu Byahandiikirwe ebyahandiikisiibwe omwoyo ogurikwera. N’ahabw’ekyo, twayorobera abareeberezi nitworeka ngu nituha ekitiinisa abariisa babiri abarikukirayo, Yehova na Yesu. (Luk. 10:16) Egi niyo nshonga nkuru ahabw’enki tushemereire kworobera abareeberezi. Kwonka, hariho n’enshonga ezindi ahabw’enki twine kugyendera aha buhabuzi bwabo.

7. Abareeberezi nibakuhwera bata kuguma oine omukago murungi na Yehova?

⁷ Abareeberezi baaba nibaha obuhabuzi abaheereza ba Ruhanga bagyenzi baabo, nibakikora barikwegamira ahari Baibuli nari emisingye yaayo. Ekigyendererwa kyabo eky’okuha obuhabuzi tikuragiira ab’eishe-emwe oku bashemereire kutwaza. (2 Kor. 1:24) Kureka, ekigyendererwa kyabo n’okuha ab’eishe-emwe obuhabuzi kuruga omu Byahandiikirwe kubahwera kucwamu gye, kugira ngu habeho obusingye omu kibiina. (1 Kor. 14:33, 40) Abareeberezi ‘nibarinda amagara gaitu’ ahabw’okugira ngu nibateeraho kuhwera buri omwe omu kibiina kuguma aine omukago murungi na Yehova. N’ahabw’ekyo, bashemereire kurahuka kuha obuhabuzi ow’eishe-emwe weena ou barikureeba ngu naatwaza omu muringo gutahikire. (Gal. 6:1, 2; Yud. 22) Mbwenu ezi t’enshonga nungi ezishemereire kutureetera kworobera abareeberezi baitu?​—Shoma Abaheburaayo 13:17.

8. Abareeberezi nibarinda bata entaama za Ruhanga?

⁸ Entumwa Paulo akahandiikira ab’eishe-emwe b’omu kibiina ky’omuri Kolosai ati: “Mwerinde hatagira omuntu owaabanyagisa obwengye bw’abantu n’oburyarya obutaine mugasho, omu kukuratira emigyenzo y’abantu n’okukuratira eby’okubanza  eby’omu nsi egi, okutakuratira Kristo.” (Kol. 2:8) Ebigambo ebi nibituhwera kureeba enshonga endiijo ahabw’enki twine kugyendera aha buhabuzi bw’Ebyahandiikirwe obu turikuheebwa abareeberezi. Nibahwera ab’eishe-emwe kwetantara abo abarikwenda kubaiha ahari Yehova. Entumwa Petero akarabura ngu hakaba nihaija kubaho “baanabi ab’ebishuba” hamwe ‘n’abeegyesa ab’ebishuba’ abaakubaire nibateeraho ‘kwosya ab’emitima etahamire’ kukora ebibi. (2 Pet. 2:1, 14) Abareeberezi ab’obunaku obu nabo bashemereire kurabura ab’eishe-emwe kyaba nikyetengyesa. Abareeberezi n’abashaija abakuzire omu by’omwoyo. Batakatoorainwe, nibaba boorekire ngu nibetegyereza gye Ebyahandiikirwe kandi ngu nibabaasa kwegyesa gye enyegyesa ez’amazima. (1 Tim. 3:2; Tit. 1:9) Ahabw’okugira ngu bakuzire omu by’omwoyo, tibarikugwera rubaju, kandi okwetegyereza gye Ebyahandiikirwe, nikubabaasisa kuha abari omu kibiina obuhabuzi omu muringo murungi.

9. Yesu naariisa kandi areeberera ata ekibiina Ekikristaayo obunaku obu?

⁹ Yehova naaha ab’eishe-emwe omu nsi yoona eby’okurya bingi by’omwoyo. Nitutunga obuhabuzi bw’Ebyahandiikirwe kurabira omu bitabo byaitu. Kandi obumwe, ekibiina kya Yehova nikiha abareeberezi obuhabuzi butunu, kurabira omu mabaruha nari kurabira omu bareeberezi abarikutaayaayira ebibiina. Omu miringo egyo, entaama nizitunga obuhabuzi burungi.

10. Abareeberezi baine bujunaanizibwa ki aha bikwatiraine n’entaama ezirikuba zihabire kuruga aha zindi?

 ¹⁰ Abareeberezi baine obujunaanizibwa bw’okurinda n’okureeberera abari omu kibiina, okukira munonga abo abahweiremu amaani omu by’omwoyo nari abo abakozire ebibi eby’amaani. (Shoma Yakobo 5:14, 15.) Bamwe ahari abo nibabaasa kuba bahabire batakyejumba mu ntebeekanisa z’ekibiina. Omu mbeera nk’ezo, omureeberezi orikufayo naaba aine kusherura entaama ezo kandi akazihwera kugaruka omu kitsibo, nikyo kibiina. Yesu akashoboorora ati: ‘Tata ori omu iguru tarikwenda omwe ahari aba abato kuhwerekyerera.’​—Mat. 18:12-14.

11. Ahabw’enki abamwe nibabaasa kugumirwa kugyendera aha buhabuzi bw’abareeberezi?

¹¹ Yehova na Yesu n’abariisa abahikiriire. Kwonka abareeberezi abahairwe obujunaanizibwa bw’okureeberera ebibiina bo tibahikiriire. Eki nikibaasa kureetera abari omu kibiina kugumirwa kugyendera aha buhabuzi bw’abareeberezi. Nibabaasa kuteekateeka bati: ‘N’abantu abatahikiriire nkaitwe. Ahabw’enki twine kugyendera aha buhabuzi bwabo?’ N’amazima abareeberezi tibahikiriire. Kwonka, titushemereire kuta omutima aha nshobe zaabo n’obweremwa bwabo.

12, 13. (a) Ni nshobe ki ezi bamwe aha baabaire nibeebembera abaheereza ba Yehova ira baakozire? (b) Ahabw’enki enshobe z’abashaija abaabaire baine obujunaanizibwa zaahandiikirwe omu Baibuli?

¹² Ebyahandiikirwe nibyoreka gye enshobe ezaakozirwe abo abu Yehova yaabaire atooraine kwebembera abaheereza be ira. Nk’eky’okureeberaho, Daudi akaba naayebembera eihanga rya Israeli. Kwonka, akoohibwa yaayejumba omu bushambani n’okwita. (2 Sam. 12:7-9) Kandi teekateeka n’ahari Petero. N’obu araabe yaabaire ahairwe obujunaanizibwa bw’amaani omu kibiina Ekikristaayo omu kyasha ky’okubanza, akakora enshobe z’amaani. (Mat. 16:18, 19; Yoh. 13:38; 18:27; Gal. 2:11-14) Kuruga omu bunaku bwa Adamu na Haawa, tihaine muntu oraabaireho ohikiriire kureka Yesu wenka.

¹³ Ahabw’enki Yehova yaikiriize abahandiiki ba Baibuli kuhandiika enshobe z’abantu abu yaabaire naakoresa? Emwe aha nshonga ahabw’enki Ruhanga yaakikozire, n’okwenda kworeka ngu naabaasa kukoresa abantu abatahikiriire kwebembera abaheereza be. Kandi buzima, eki atwire naakikora. N’ahabw’ekyo, titushemereire kwekwatsa enshobe z’abareeberezi, kubeetomboitera nari kwanga kuboorobera. Yehova naayenda ngu ab’eishe-emwe abo tubahe ekitiinisa kandi tuboorobere.​—Shoma Okuruga 16:2, 8.

14, 15. Nitubaasa kwegyera ki aha muringo ogu Yehova yaabaire ahamu abaheereza be obuhabuzi?

¹⁴ Okworobera abo abarikwebembera ekibiina obunaku obu ni kikuru. Teekateeka aha ku Yehova yaabaire agamba n’abaheereza be ira omu bwire bw’oburemeezi. Abaisraeli ku baarugire Misri, Ruhanga akaba abaha obuhabuzi kurabira omuri Musa na Arooni. Kubaasa kukira ebiheneso ikumi, Abaisraeli bakaba baine kworobera obuhabuzi oburikukwata aha kugira ekiihuro ky’omutaano kandi bakasiiga emwe aha shagama y’entaama aha biti by’emiryango y’enju zaabo. Obuhabuzi obwo tibarabutungire barikuhurira eiraka kuruga omu iguru. Bakabutunga kurabira omu bakuru ba Israeli, kandi nabo bakabuheebwa Musa. (Kur. 12:1-7, 21-23, 29) Omu muringo ogwo, Yehova akakoresa Musa n’abakuru abandi kwebembera abaheereza be. Obunaku obu, Yehova naakoresa abareeberezi kuhikiiriza obujunaanizibwa obwo.

¹⁵ Noobaasa kuteekateeka aha mirundi endiijo obu Yehova yaakoresa abantu nari baamaraika kuha abaheereza be obuhabuzi kubahwera kucungurwa. Emirundi egi  yoona, Yehova akaba aha abantu obushoboorozi kumujwekyera kugambira abaheereza be eki baabaire baine kukora kubaasa kuhonokaho omu bwire bw’akabi. Mbwenu shi, Yehova tarikwija kukora nikyo kimwe omu bwire bwa Haramagedoni? N’ahabw’ekyo, obunaku obu buri mureeberezi orikuheebwa obujunaanizibwa bw’okujwekyera Yehova nari ekibiina kye, aine kwegyendesereza kutakoresa kubi obushoboorozi obu ahairwe.

16. Ni ‘kigambo’ ki eki twine kuhurikiza?

¹⁶ Abaheereza ba Yehova ‘n’obusyo bumwe’ ahansi ‘y’omuriisa omwe’ Yesu Kristo. (Yoh. 10:16) Yesu akooreka ngu akaba naija kuba n’abeegi be “ebiro byona okuhitsya obu ensi egi erihwaho.” (Mat. 28:20) Nk’omugabe omu iguru, niwe araabe aine obushoboorozi ahari byona ebiraabeho ku araagaruke kucwekyereza ensi ya Sitaane. Kubaasa kuguma twine obumwe n’oburinzi bwa Ruhanga, twine kuhurikiza ‘ekigambo ekirikureetwa enyima,’ ekirikubagira ngu ogu nigwo muhanda ogu mwine kutoora. “Ekigambo” eki nikitwariramu ebi omwoyo gurikwera gurikugamba nk’oku bihandiikirwe omu Baibuli hamwe n’ebi Yehova na Yesu barikugamba kurabira omuri abo abatoorainwe kuba abareeberezi.​—Shoma Isaaya 30:21; Okushuuruurwa 3:22.

17, 18. (a) Ni buremeezi ki obu entaama zirikubugana, kwonka twine buhame ki? (b) Niki eki turikuza kushwijuma omu kicweka ekiraakurateho?

¹⁷ Sitaane naagambwaho ‘nk’entare erikutsinda, arikusherura ou araarye.’ (1 Pet. 5:8) Nk’enyamaishwa eine enjara, naateeraho kurya entaama ezitaine maani nari ezirikuba zihabire. Niyo nshonga ahabw’enki tushemereire kuguma haihi n’entaama ezindi hamwe ‘n’omuriisa kandi Omureeberezi w’amagara gaitu.’ (1 Pet. 2:25) Aha bikwatiraine n’abaraahonokeho omu kubonabona kwingi, Okushuuruurwa 7:17 nihagira hati: “Omwana gw’entaama [Yesu] . . . aryaba omuriisa waabo; aryabeebembera abahitsye aha nshuro z’amaizi g’amagara; kandi Ruhanga aryaragaza amarira goona aha maisho gaabo.” Oku ka n’okuraganisa kurungi!

¹⁸ Bwanyima y’okureeba obujunaanizibwa bukuru obu abareeberezi baine, twine kwebuuza tuti: Abashaija aba abatoorainwe nibabaasa kuhamya bata ngu nibatwariza entaama za Yesu omu muringo murungi? Nitwija kutunga eky’okugarukamu ky’ekibuuzo eki omu kicweka ekiraakurateho.