1. Ahabw’enki obumwe nitugumirwa kugumizamu tutegyereize?

OBU Obukama bwa Mesia bwateebwaho omuri 1914, nibwo ebiro by’emperu eby’ensi ya Sitaane byatandika. Hakabaho orugamba omu iguru, Yesu yaabinga Sitaane na baadaimoni yaabanaga omu nsi. (Shoma Okushuuruurwa 12:7-9.) Sitaane naamanya ngu “aine omwanya mukye.” (Kush. 12:12) Kwonka “omwanya mukye” ogwo, bamwe nibagureeba nk’obwire buraingwa. Obu tutegyereize Yehova kugira eki yaakora, obumwe nikikugumira kugumizamu otegyereize?

2. Ni bibuuzo ki ebi turaashwijume omu kicweka eki?

² Okutategyereza nikibaasa kuba eky’akabi, ahabw’okuba nikibaasa kutureetera kurahukiiriza kucwamu tutabandize kuteekateeka. Nitubaasa kuguma tuta ‘tutegyereize’? Ekicweka eki nikiija kutuhwera kugarukamu ebibuuzo ebi. (1) Niki eki turikubaasa kwegyera ahari Miika aha bikwatiraine n’okutegyereza? (2) Ni bintu ki ebiraayorekye ngu okutegyereza kwaitu kuri haihi kuhendera? (3) Nitubaasa kworeka tuta ngu nitusiima okugumisiriza kwa Yehova?

3. Omu bunaku bwa Miika Abaisraeli bakaba bari mu mbeera ki?

³Shoma Miika 7:2-6. Nabi Miika akareeba Abaisraeli barikweyongyera kugomera Yehova, kandi omu butegyeki bw’Omugabe Ahazi, bakahindukira kimwe abagomi. Miika akagira ngu Abaisraeli abaabaire batari beesigwa bakaba bari “nk’omukwatangwe” nari “nk’orugo rw’amahwa.” Nk’oku omukwatangwe nari orugo rw’amahwa rurikubaasa kuhutaaza omuntu ori kururaba haihi, nikwo na Abaisraeli abaabaire basiisikaire baabaire bahutaaza buri omwe ou baabaire bakoragana nawe. Bakasiisikara munonga ekyo kyashiisha n’emikago yaabo  omu maka. Miika akaba naakimanya ngu tarikubaasa kuhindura embeera yaabo ahabwe, n’ahabw’ekyo akeeshengyereza Yehova kumuhwera. Bwanyima akategyereza Ruhanga kugira eki yaakora. Akaba nakihamiza kimwe ngu Yehova naija kugira eki yaakora.

4. Ni bureemezi ki obu turikubaasa kutunga?

⁴ Nka Miika, obunaku obu nitutuura omu nsi erimu abantu abarikweyendeza. Abaingi ‘n’entasiima, abatarikwera, kandi abatarikukunda baabo. (2 Tim. 3:2, 3) Nikibaasa kutureetera amaganya ahabw’okugira ngu abu turikukora nabo, abu turikushoma nabo, n’abu turikutuura nabo nibeyendeza. Abaheereza ba Ruhanga abamwe baine oburemeezi oburikukira ahari obwo. Yesu akagira ngu abakuratsi be bakaba nibaija kuhiiganisibwa ab’omu maka gaabo, kandi akakoresa ebigambo nk’ebiri omu Miika 7:6, kworeka ebyabaire nibiija kuruga omu kubuurira. Akagira ati: “Nkaija kutaanisa omwojo na ishe, omwishiki na nyina, omukazi na nyinazaara; abazigu b’omuntu baryaba ab’omu ka ye.” (Mat. 10:35, 36) Ka n’ekintu kigumire kwemera okuhiiganisibwa kw’abanyabuzaare abatari Bajurizi ba Yehova! Twatunga oburemeezi nk’obwo, titushemereire kukuratira ebi abanyabuzaare barikutugambira. Omu mwanya gw’ekyo, twine kuguma turi abeesigwa kandi tukategyereza Yehova kugira eki yaakora. Twaguma nitumushaba obuhwezi, naija kutuha amaani n’obwengye ebiraatuhwere kugumisiriza.

5, 6. Yehova akaha Miika migisha ki, kandi niki eki atarareebire nikihikiirira?

⁵ Yehova akaha Miika emigisha ahabw’okuguma ategyereize. Miika akareeba obutegyeki bubi bw’Omugabe Ahazi burikuhwaho. Akareeba omugabe murungi Hezekia, mutabani wa Ahazi arikuba omugabe kandi akagaruraho n’okuramya okw’amazima. Kandi akareeba n’obunabi obwagambirwe ahari Samaria burikuhikiirira obu Abasiria baataahirira obugabe bwa Israeli obwa bukiizi-bwa-bumosho.​—Mik. 1:6.

⁶ Kwonka, Miika tarareebire byona ebi Yehova yaamuhwereire kuranga birikuhikiirira. Nk’eky’okureeberaho, Miika akagira ati: “Omu biro by’aha muheru orushozi rw’enju ya MUKAMA ruryahamibwa kuba orushozi orurikukira ezindi aha mutwe, rutunguurwe, ruze ahaiguru y’ebibungo; kandi amahanga garyahimintikirayo. N’amahanga maingi garyaija gagire gati: Nimwije twinamukye aha rushozi rwa MUKAMA.” (Mik. 4:1, 2) Miika akaba amaririire kuguma ari omwesigwa ahari Yehova kuhika aha kufa, n’obu omu bunaku bwe abantu baabaire nibatwaza kubi. Akahandiika ati: “Amahanga goona nigagyenda, buri rimwe omu iziina rya ruhanga waaryo; kwonka itwe turyaguma nitugyendera omu iziina rya MUKAMA Ruhanga waitu okuhitsya ryari na ryari.” (Mik. 4:5) Miika akabaasa kuguma ategyereize omu mbeera ezigumire ahabw’okwesigira kimwe Yehova ngu naija kuhikiiriza byona ebi yaaragaaniise.

7, 8. (a) Ahabw’enki twine kwesiga Yehova? (b) Niki ekiraarahutsye obwire oburikuburayo emperu ekahika?

⁷ Mbwenu shi naitwe nitwesiga Yehova? Buzima hariho ekishemereire kutureetera kumwesiga. Nitureeba obunabi bwa Miika burikuhikiirira. “Omu biro by’aha muheru,” abantu baingi kuruga omu mahanga n’endimi nibahimintikira aha rushozi rw’enju ya Yehova. Abaheereza ba Yehova n’obu baraabe nibaruga omu mahanga agatarikushushana, ‘zaarurara zaabo nibaziheeshamu amafuka,’ kandi ‘tibarikwega by’engamba.’ (Mik. 4:3) Ka n’omugisha kuba bamwe aha baheereza ba Yehova ab’obusingye!

⁸ Buzima, nitwenda ngu Yehova acwekyereze ensi egi embi. Kwonka twaba tutegyereize ekyo kubaho, twine kugira emiteekateekyere nk’eya Yehova. Ataireho obunaku obu araacwere abantu orubanja arikukoresa  “omuntu ou yaatooraine” Yesu Kristo. (Byak. 17:31) Kwonka obunaku obwo butakahikire, Ruhanga naaha buri muntu omugisha ‘gw’okumanyira kimwe amazima,’ kandi akakorera aha kumanya okwo kubaasa kucungurwa. Twine kuguma nitwijuka ngu amagara g’abantu gari omu kabi. (Shoma 1 Timoseo 2:3, 4.) Twakora n’obweziriki kuhwera abantu kumanya gye Ruhanga, obwire oburikuburayo emperu ekahika nibwija kurahuka. Ku eraahikye, ka nitwija kushemererwa ahabw’okuguma turi abeeziriki omu kubuurira!

9-11. Ebiri omu 1 Abatesalonika 5:3 byahikiriire? Shoboorora.

⁹Shoma 1 Abatesalonika 5:1-3. Omu biro bitari bya hare, amahanga nigaija kuba nigagira ngu “n’obusingye, tihariho kabi.” Twaba tutarikwenda kubeihwabeihwa, “tugume nitureeba, tutasinda.” (1 Tes. 5:6) Kubaasa kuguma nitureeba, ka tushwijume bimwe aha bintu ebiraatuhitsye aha bunaku obwo.

¹⁰ Bwanyima y’okuhendera kw’orutaro rw’okubanza n’orwa kabiri, amahanga gakaba nigasherura ekiraagareetere obusingye. Bwanyima y’orutaro rw’okubanza, bakatandikaho ekibiina ekirikwetwa League of Nations barikuteekateeka ngu nikiija kureetaho obusingye. Bwanyima y’orutaro rwa kabiri, abantu bakaba baine amatsiko omu kibiina ky’Amahanga Ageteeraine, ngu nikiija kureetaho obusingye omu nsi. Zaagavumenti n’abeebembezi b’amadiini bataire amatsiko gaabo omu bibiina ebyo kureetaho obusingye omu nsi. Nk’eky’okureeberaho, omu gwa 1986, ekibiina ky’Amahanga Ageteeraine kikaranga ngu omwaka ogwo n’ogw’obusingye. Omu mwaka ogwo, abeebembezi kuruga omu mahanga n’amadiini maingi bakagira oruteerane n’omukuru w’ekereziya y’abakaturiki omuri Assisi, Italy, kushaba hamwe ngu habeho obusingye.

¹¹ Kwonka, ebi ebibiina ebyo byagambire aha bikwatiraine n’okureetaho obusingye, tibyo birikuhikiiriza obunabi oburi omu 1 Abatesalonika 5:3. Ahabw’enki? Ahabw’okuba “okucwekyerera” okwagambirweho tikukabaireho.

12. Niki eki turikumanya aha bigambo “n’obusingye, tihariho kabi”?

 ¹² Ni baahi abaraabe nibagira ngu “n’obusingye, tihariho kabi”? Abeebembezi b’amadiini agarikweyeta Amakristaayo n’agandi nibaija kuba baine mwanya ki omu kugira ngu n’obusingye, tihariho kabi? Abeebembezi b’amahanga agatari gamwe n’agamwe nibaija kwejumbamu bata? Ebyahandiikirwe tibirikutugambira. Kwonka nitumanya ngu omuringo gwona ogu baraakikoremu, tikirikwija kureetaho obusingye. Ensi egi embi neija kuguma neetegyekwa Sitaane. Buzima esiisikaire munonga kandi abantu tibarikubaasa kugihindura. Kikaabaire eky’obusaasi kwikiriza emiteekateekyere ya Sitaane kutureetera kwejwanzya omu rwanju rw’ensi egi!

13. Ahabw’enki baamaraika bakikwaitse emiyaga y’okucwekyereza?

¹³Shoma Okushuuruurwa 7:1-4. Obu tukitegyereize ebiri omu 1 Abatesalonika 5:3 kuhikiirira, baamaraika b’amaani bakwatsire emiyaga y’okucwekyereza ey’okubonabona kwingi. Bategyereize ki? Entumwa Yohaana akahandiika ngu abashukirweho amajuta, ‘abahuuku ba Ruhanga waitu’ baine kubanza baateebwaho akamanyiso k’aha muheru. * Bwanyima y’okuteebwaho akamanyiso ako, baamaraika nibaija kurekura emiyaga y’okucwekyereza. Bwanyima niki ekiraabeho?

14. Niki ekirikworeka ngu Babulooni Orukuru ruri haihi kucwekyerezibwa?

¹⁴ Babulooni Orurembo Orukuru, nigo madiini g’ebishuba goona ag’omu nsi, nirwija kucwekyerezibwa. ‘Abantu b’emiringo mingi n’emitwe mingi n’amahanga n’endimi’ tibarikwija kurushagika. Nitureeba obumanyiso bwona oburikworeka ngu ruri haihi kucwekyerezibwa. (Kush. 16:12; 17:15-18; 18:7, 8, 21) Nangwa na hati obuhame nibworeka ngu obushagiki obwo butuubire, ahakuba eby’amakuru nibisheeshuura ebikorwa by’amadiini n’abeebembezi baago. Kwonka nabwo, abari omu Babulooni Orukuru nibareeba ngu tibari mu kabi. Ka kigwire kuteekateeka batyo! Bwanyima y’okugira ngu “n’obusingye, tihariho kabi!” ab’eby’obutegyeki nibaija kwehindukana amadiini g’ebishuba bagacwekyereze. Babulooni Orukuru nirwija kucwekyererezibwa kimwe. N’ahabw’ekyo, nikiba kiri eky’oburyo kutegyereza ebyo byona kubaho.​—Kush. 18:8, 10.

15. Ahabw’enki Yehova akigumisiriize?

¹⁵ N’obu abantu baraabe nibajumisa eiziina rya Yehova, we ategyereize obunaku bwe kuhika akagira eki yaakora. Yehova tarikwenda ngu abantu ab’emitima mirungi bacwekyerezibwe. (2 Pet. 3:9, 10) Naitwe twine kugira emiteekateekyere nk’egyo. Ekiro kya Yehova kitakahikire, nitubaasa kworeka okusiima kwaitu ahabw’okugumisiriza kwe nk’oku kirikworekwa ahaifo.

16, 17. (a) Ahabw’enki twine kuhwera abo abamazire obwire batakibuurira? (b) Ahabw’enki abamazire obwire batakibuurira baine kugarukira Yehova?

¹⁶Hwera abo abamazire obwire batakibuurira. Yesu akagira ngu nihabaho okushemererwa kwingi omu iguru, omusiisi omwe ku arikweteisa. (Mat. 18:14; Luk. 15:3-7) Hatariho kubanganisa, Yehova naafayo munonga ahari abo abaabaire nibakunda eiziina rye, n’obu baraabe batarikumuheereza hati. Twahwera abantu nk’abo kugaruka omu kibiina, nikishemeza Yehova na baamaraika.

¹⁷ Mbwenu shi naiwe ori omwe ahari abo abatarikuheereza Yehova hati? Shana obundi haine owaakugwisize kubi, kandi ekyo kikakureetera kurekyera aho kushagika  entebeekanisa z’ekibiina. Obu hahingwireho obwire, yebuuze oti: ‘Ntungire omuhimbo, n’okushemererwa obwire obwo bwona? Yehova niwe yaangwisize kubi, nari n’omuntu otahikiriire? Haine ekintu kyona eki Yehova arakozire agyendereire kunsaasa?’ Buzima, atwire naatukorera ebirungi. N’obu omuntu yaakuba atarikukora ebirikuhikaana n’okwehayo kwe hati, Yehova naakimwikiriza kugasirwa omu birungi ebi arikuha abantu. (Yak. 1:16, 17) Kwonka, ekiro kya Yehova kiri haihi kuhika. Obu nibwo bwire obu twine kugarukira Yehova tukagaruka n’omu kibiina kye, nigwo mwanya murungi gwonka ogw’okubamu omu biro by’emperu ebi.​—Bir. 33:27; Heb. 10:24, 25.

18. Ahabw’enki twine kushagika abo abarikureeberera ekibiina?

¹⁸Shagika abo abarikureeberera ekibiina. Nk’omuriisa w’entaama, Yehova naatuha obuhabuzi kandi aturinda. Atooraine Omwana we kuba Omuriisa Omukuru. (1 Pet. 5:4) Abareeberezi omu bibiina ebirikurenga 100,000, nibareeberera buri emwe aha ntaama za Yehova. (Byak. 20:28) Twashagika abatoorainwe kureeberera ekibiina, nitworeka ngu nitusiima ebi Yehova na Yesu batukoreire.

19. Nitubaasa kwirirana tuta haihi?

¹⁹Mwirirane haihi. Ekyo nikimanyisa ki? Amahe agatendekirwe gye gaataahirirwa omuzigu, abaserukare nibashagikana barikwirirana haihi. Eki nikibahwera kutunga oburinzi bw’amaani. Sitaane naayeyongyerera kimwe kutaahirira abaheereza ba Ruhanga. Obu tibwo bwire bw’ab’eishe-emwe kwebaganisamu. Kureka obu n’obwire bw’okwirirana haihi, tukehuzya enshobe za bagyenzi baitu, kandi tukeesiga obwebembezi bwa Yehova.

20. Niki eki tushemereire kukora hati?

²⁰ Twena ka tuteereho kuguma nitureeba omu by’omwoyo kandi twine omutima gw’okutegyereza. Ka tugume tutegyereize kuhitsya obu ebigambo “n’obusingye, tihariho kabi!” biraagambwe n’obu abatoorainwe baraateebweho akamanyiso ak’aha muheru. Bwanyima y’ekyo, baamaraika bana nibaija kurekura emiyaga y’okucwekyereza, ecwekyereze Babulooni Orukuru. Obu tukitegyereize ebyo byona kubaho, ka tugume nitwikiriza obuhabuzi kuruga ahari abo abatoorainwe kureeberera ekibiina kya Yehova. Ka tugume niturwanisa Omuregi na baadaimoni be! Obu nibwo bwire bw’okugyendera aha buhabuzi bw’omuhandiiki wa Zaaburi obu: “Mugire amaani, mugume omutima, imwe mwena abategyereza MUKAMA.”​—Zab. 31:24.