1. Yehova aine miteekateekyere ki aha kukora, kandi eki nikimureetera kukora ki?

 YEHOVA n’omukozi orikukunda munonga ebi arikukora. (Zab. 135:6; Yoh. 5:17) Yehova kubaasa kureetera ebihangirwe bye eby’obwengye kutunga okushemererwa, naabiha emirimo erikureeta okumarwa. Nk’eky’okureeberaho, akabaasisa Omwana we kwejumba omu kuhanga. (Shoma Abakolosai 1:15, 16.) Baibuli neetugira ngu obu Yesu yaabaire ekiri omu iguru, akaba ari aha rubaju rwa Ruhanga ari “omukozi mukuru.”​—Enf. 8:30.

2. Niki ekirikworeka ngu Ruhanga atwire naaha ebyahangirwe eby’omwoyo emirimo?

² Kuruga aha kutandika kuhika aha muheru, Baibuli erimu eby’okureeberaho ebirikworeka ngu Yehova atwire naaha ebihangirwe bye eby’omwoyo emirimo. Bwanyima ya Adamu na Haawa kushiisha reero bakabingwa omu Paradiso, Ruhanga “akata baakerubi aha rubaju rw’oburugwa-izooba bw’ekibanja kya Edeni, na rurara erikumurinkana kandi erikuhindahinduka embaju zoona, okurinda omuhanda ogurikuza aha muti gw’amagara.” (Kut. 3:24) Kandi Okushuuruurwa 22:6 nihooreka ngu Yehova “akatuma maraika we kworeka abaheereza be ebishemereire kubaho juba.”

3. Obu Yesu yaabaire ari omu nsi, akatooreza ata ishe?

³ Obu Yesu yaabaire ari omu nsi, akakora omurimo ogu Yehova yaabaire amuhaire. Yesu arikutooreza ishe, akaha entumwa ze omurimo mukuru. Arikubareetera kugira omuhimbo ahabw’eki baabaire nibaija kukora, akagira ati: “Buzimazima nimbagambira nti; orikuunyikiriza, emirimo ei nkora nawe aryagikora, kandi aryakora nawe erikukira eyangye obuhango, ahabw’okuba nyowe ningyenda ahari Tata.” (Yoh. 14:12) Yesu arikworeka obukuru bw’omurimo nk’ogwo, akashoboorora ati: “Tushemereire kukora emirimo y’Ogwo owantumire, bukiri nyomushana; ekiro nikiija, eki omuntu ataribaasa kukoreramu.”​—Yoh. 9:4.

4-6. (a) Ahabw’enki twine okushemererwa ngu Noa na Musa bakahikiiriza obujunaanizibwa obu baahairwe Yehova? (b) Emirimo yoona ei Ruhanga arikuha abantu neeshushana mu muringo ki?

⁴ Nangwa na Yesu atakaizire mu nsi, abantu bakaba baheebwa emirimo y’okukora. N’obu Adamu na Haawa baraabe baremirwe kukora omurimo ogu baabaire bahairwe, abandi bo bakagikora nk’oku Ruhanga yaabaire abaragiire. (Kut. 1:28) Noa akaheebwa obuhabuzi aha bikwatiraine n’okwombeka obwato kubaasa kukiza amagara omu bwire bw’Omwegyemure. Akahikiiriza gye eki Yehova yaamushabire. Turi abahuriire ahabw’okugira ngu Noa akakuratira obuhabuzi bwa Ruhanga!​—Kut. 6:14-16, 22; 2 Pet. 2:5.

⁵ Musa akaheebwa obuhabuzi aha ku yaabaire aine kwombeka eihema n’okutebeekanisa abanyamurwa, kandi akabukuratira gye. (Kur. 39:32; 40:12-16) Nangwa n’obunaku obu, nitugasirwa ahabw’okugira ngu Musa akaba omwesigwa. Mu muringo ki? Entumwa Paulo akashoboorora ngu ebiragiro bikaba nibyoreka “ebirungi ebyabaire nibyenda kwija.”​—Heb. 9:1-5, 9; 10:1.

⁶ Emirimo ei Ruhanga arikuha abantu be neeba etarikushushana omu bwire butari bumwe na bumwe, kurugiirira aha kigyendererwa kye. Kwonka, emirimo yoona ei abantu batwire nibakora neehimbisisa Yehova, kandi neegasira abarikwikiriza. Eki nikibaasa kuba nikikwata aha bintu ebi Yesu yaakozire obu yaabaire akiri omu iguru, na bwanyima y’okwija omu nsi. (Yoh. 4:34; 17:4) Nikyo kimwe naitwe, omurimo ogu tuhairwe obunaku obu niguhimbisisa Yehova. (Mat. 5:16; shoma 1 Abakorinso 15:58.) Ahabw’enki kiri kityo?

7, 8. (a) Gamba emirimo ei Abakristaayo obunaku obu barikwejumbamu. (b) Tushemereire kutwara tuta obuhabuzi bwa Yehova?

⁷ Nikitangaaza kureeba ngu Yehova ahaire abantu abatahikiriire omugisha gw’okuba abakozi abarikukora hamwe nawe. (1 Kor. 3:9) Abarikwejumba omu kwombeka Ebyombeko by’Obukama, ebyombeko ebirikubamu enteerane empango, na ofiisi z’amataagi nibaba nibakora omurimo gw’okwombeka nk’oku Noa na Musa baakozire. Abo abarikuhunduuza Ekyombeko ky’Obukama nari abarikwejumba omu kwombeka ofiisi enkuru omuri Warwick, New York, baine kusiima omugisha ogwo. (Reeba ekishushani aha kutandika ekirikworeka oku haraabe nihashusha.) Obu n’obuheereza oburikwera. Kwonka ekirikukira obukuru, Abakristaayo nibeetwa kwejumba omu kwombeka okw’eby’omwoyo. Omurimo ogu nagwo gutebeekanisiibwe kugasira abantu abarikworobera Ruhanga. (Byak. 13:47-49) Ekibiina kya Ruhanga nikyo kirikuha obuhabuzi aha ku turikubaasa kukora gye omurimo ogu. Eki obumwe nikibaasa kwetengyesa kuheebwa obujunaanizibwa obundi.

⁸ Abaheereza ba Yehova batwire niboorobera entebeekanisa ya Yehova ey’okutegyeka. (Shoma Abaheburaayo 13:7, 17.) Nitubaasa kuba tutarikwetegyereza gye enshonga ahabw’enki twine kukora omurimo  nanka. Kwonka, nitumanya gye emigisha erikuruga omu kwikiriza empindahinduka ezi Yehova arikureetaho.

9. Abareeberezi omu kibiina nibateeraho abandi ky’okureeberaho ki aha bikwatiraine n’okukora?

⁹ Ekyetengo ky’amaani eky’okukora ebi Yehova akunda nikireebekyera aha ku abareeberezi barikwebembera omu kibiina. (2 Kor. 1:24; 1 Tes. 5:12, 13) Nibooreka ngu beeteekateekire kukora n’amaani n’okuguma nibagyenda n’empindahinduka ezirikubaho. Nibakora empindahinduka kubaasa kukoresa emiringo misya y’okubuurira aha Bukama bwa Ruhanga. N’obu bamwe baraabe baabandize kweziringa kukoresa esimu omu kubuurira, nari okubuurira omu myanya erimu abantu baingi, bwanyima bakaija baareeba ebirungi ebirikurugamu. Nk’eky’okureeberaho, baapayoniya bana omuri Germany bakacwamu kubuurira omu kicweka ekirikukorerwamu eby’obushuubuzi ekyabaire kitarikukira kubuurirwamu. Michael naagira ati: “Tukaba tumazire obwire bwingi tutarikukoresa omuringo gw’okubuurira ogu, n’ahabw’ekyo tukaba twine ekitengo omunda. Yehova ashemereire kuba yaamanyire eki, n’ahabw’ekyo akatuha akasheeshe karungi ngu tubaase kubuurira. Ka twashemereirwe ahabw’okugira ngu tukakuratira obuhabuzi oburi omu Obuheereza Bwaitu obw’Obukama kandi tukeesiga Yehova kutuhwera!” Oyeteekateekire kwejumba omu miringo y’okubuurira emisya etandikireho omu kicweka kyanyu?

10. Ni mpindahinduka ki ezikozirwe omu kibiina kya Yehova obunaku obu?

¹⁰ Obumwe, ekibiina kya Yehova nikiba kiine kukora empindahinduka. Omu myaka egi, ofiisi z’amataagi ezimwe zigaitsirwe hamwe. N’obu kiraabe nikyetengyesa ngu ab’eishe-emwe na banyaanyazi-itwe abarikuheereza omu ofiisi ezi bagire empindahinduka ezi baakora, kwonka bwanyima abo abu kirikukwataho nibareeba ebirungi ebirikurugamu. (Mub. 7:8) Ka nikireetera okushemererwa abakozi nk’abo abarikwehayo beekundiire kugira eki baakora omu byafaayo by’abaheereza ba Yehova!

11-13. Ni buremeezi ki obu bamwe batungire ahabw’empindahinduka ezi ekibiina kya Yehova kikozire?

¹¹ Haine eki turikubaasa kwegyera ahari abo abaabaire nibaheereza aha ofiisi z’amataagi agamwe obu zaagaitwa hamwe. Abamwe bakaba batwire nibaheereza aha Beseeli omu mahanga gaabo kumara obwire buraingwa. Omushaija n’omukazi we abaabaire nibaheereza omu Beseeli nkye omu Central America, bakashabwa kuza kuheereza omu Beseeli empango erikukira ei baabaire barimu emirundi nka 30 omuri Mexico. Rogelio naagira ati: “Okutsigaho omwanya ogu twabaire turimu na banywani baitu kikaba kigumire munonga.” Juan, ow’eishe-emwe ondiijo owaashabirwe kuza omuri Mexico, naagira ati: “Nooba ari nk’owaazaarwa omurundi gwa kabiri; oine kusherura abanywani abasya. Nikikwetengyesa kumanyiira entwaza y’abantu basya n’oku barikuteekateeka.”

¹² Ababeseeli abaashabirwe kuza omuri Germany barikuruga omu mahanga agandi aga Buraaya, nabo bakatunga oburemeezi. Abo abarikukunda enshozi, nibakimanya ngu kikaba kitoorobi kuruga Switzerland omu mwanya murungi gw’enshozi. Kandi abo abaarugire Austria omu kubanza bakahurira bainiire orususo omwanya gw’owaabo ogucureire.

¹³ Abo abarikuza omu mahanga agandi, kikaba nikibeetengyesa kumanyiira oburaaro busya, ab’eishe-emwe na banyaanyazi-itwe abu batarikumanya, kandi obundi kikaba nikibeetegyesa kwega n’omurimo musya. Kikaba nikibeetengyesa kumanyiira ekibiina kisya, okubuurira omu kicweka kisya, obundi n’omu rurimi rusya. Okukora empindahinduka nk’ezi nikiba kitoorobi. Kwonka, Ababeseeli baingi baikiriize empindahinduka ezi. Ahabw’enki baikiriize kuzikora?

14, 15. (a) Baingi boorekire bata ngu nibasiima omugisha gwabo gw’okukora na Yehova, ahu omurimo gurikuba guri hoona? (b) Nibatuteeraho ky’okureeberaho ki ekirungi?

 ¹⁴ Grethel naagira ati: “Nkaikiriza kuza omu ihanga erindi ahabw’okugira ngu nkaba niinyenda kworeka Yehova ngu rukundo ei mwiniire neekira aha ihanga eri ndimu, okwombeka, nari obujunaanizibwa bwona obu nyine.” Dayska naagira ati: “Ku naijukire ngu Yehova niwe arikwenda ngu nzeyo, nkaikiriza nshemereirwe.” André na Gabriela nibaikirizana n’ekyo barikugira bati: “Omu muringo ogu, tukatunga omugisha ogundi ogw’okuheereza Yehova turikuta ebyetengo byaitu enyima.” Nibaikiriza ngu ni kirungi kwikiriza empindahinduka ezi ekibiina kya Yehova kirikukora omu mwanya gw’okuzihakanisa.”

¹⁵ Ahabw’okugira ngu ofiisi z’amataagi nizigaitwa hamwe, Ababeseeli abamwe nibashabwa kuheereza nka baapayoniya. Eki kikaba aha Babeseeli baingi aha ofiisi y’eitaagi eya Denmark, Norway, na Sweden obu baagaitwa hamwe kuza aha ofiisi y’eitaagi eya Scandinavia. Bamwe aharibo ni Florian na Anja, abaagizire bati: “Nitureeba obuheereza bwaitu obusya nk’obutoorobi, kwonka nibureeta okushemererwa. Ni kirungi ahariitwe kuheereza Yehova omu myanya yoona ei turikuzamu. Buzima nitubaasa kugira ngu tutungire emigisha!” N’obu twakuba tutarikuza kukora empindahinduka ezo, nitubaasa kutooreza ab’eishe-emwe n’abanyaanyazi-itwe abo, ahabw’okugira ngu beeteekateekire kwebembeza eby’Obukama. (Isa. 6:8) Yehova butoosha naaha omugisha abo abarikusiima omugisha gwabo gw’okukora nawe, ahu omurimo gurikuba guri hoona.

16. (a) Tushemereire kukora ki kurugiirira aha Abagalatia 6:4? (b) Ni mugisha ki ogurikukira obukuru ogu omuntu arikubaasa kutunga?

¹⁶ Abantu abatahikiriire nibakunda kwegyeragyeranisa, kwonka Ekigambo kya Ruhanga nikituhiga kuta omutima aha bintu ebi turikubaasa kukora. (Shoma Abagalatia 6:4.) Twena omu kibiina titurikubaasa kuba abareeberezi, baapayoniya, abamiisani, nari  Ababeseeli. N’obu obu buraabe buri obujunaanizibwa burungi, hariho omugisha ogurikukirayo obukuru ogu twena twine. Okuba abakozi abarikukora hamwe na Yehova omu buheereza obw’Ekikristaayo, nikyo kirikukirayo obukuru. Ogu n’omugisha ogu twine kusiima!

17. Ni buremeezi ki oburikwija kugumaho Sitaane yaaba akiriho, kwonka ahabw’enki eki kitashemereire kutumaramu amaani?

¹⁷ Obu Sitaane akiriho, nitubaasa kutaheereza gye Yehova nk’oku turikwenda. Hariho embeera ezi tutaineho bushoboorozi, nk’ezirikukwata aha bujunaanizibwa omu maka, nari okutagira magara marungi. Kwonka ekyo tikishemereire kukumaramu amaani. Oshemereire kukimanya ngu noobaasa kukora na Ruhanga orikubuurira aha iziina rye n’Obukama bwe, buri kutunga omugisha. Ekikuru munonga n’okugira ngu nookora kumwe nawe nk’oku orikubaasa, kandi noomushaba ngu ahe omugisha ab’eishe-emwe bagyenzi baawe abarikukora ebirikukira aha bi orikukora. Ijuka ngu buri muntu orikuhimbisa eiziina rya Ruhanga Yehova, n’ow’omuhendo omu maisho ge!

18. Niki eki twine kuta omu mwanya gw’aha muheru, kandi n’ahabw’enki?

¹⁸ N’obu turaabe twine obweremwa kandi tutahikiriire, Yehova aine ekihika ky’okutuhindura abakozi bagyenzi be. Ka nitusiima omugisha gw’okukora hamwe na Ruhanga omu biro ebi eby’emperu! N’ahabw’ekyo, ebyaitu ebi turikukunda tushemereire kubita omu mwanya gw’aha muheru, turikumanya ngu omu nsi ensya, Yehova naija kutwikiriza “kutunga amagara aga buzima,” nigo magara agatahwaho, obwo twine okushemererwa n’obusingye.​—1 Tim. 6:18, 19.

19. Ni birungi ki ebi Yehova atubiikiire omu biro by’omumaisho?

¹⁹ Obu ensi ensya ei Ruhanga yaaturaganiise eri haihi, ka tuteekateekye aha bi Musa yaagambiire Abaisraeli abu baabaire bari haihi kutaaha omu Nsi Eyaaraganisiibwe: “Kandi MUKAMA Ruhanga waanyu aryabaha omugisha, abagogyeze omu bi murikukora byona.” (Bir. 30:9) Haramagedoni ku eraahwe, abo abaraabe nibakora na Ruhanga, nibaija kutaaha omu nsi ensya ei yaabaraganiise. Reero nitwija kuta omutima aha murimo musya, ogw’okuhindura ensi ekaba paradiso!