1-3. Abashweraine nibatunga buremeezi ki? (Reeba ekishushani aha kutandika.)

“WAAKORA n’amaani ngu obushwere bwawe bube burungi, Yehova naija kukuha omugisha,” nikwo omushaija oherize emyaka 38 omu bushwere ashemereirwe, yaagizire. Buzima, abashweraine nibabaasa kushemererwa kandi bakwatanise omu bwire bugumire.—Enf. 18:22.

² Kwonka, obumwe abashweraine nibagira “obusaasi omu mubiri.” (1 Kor. 7:28) Ahabw’enki? Oburemeezi oburikukira kubaho omu bushwere nibwo burikubaasa kureeta ekyo. Ahabw’okugira ngu abashweraine nibaba batahikiriire, obumwe nibagambirana ebigambo birikusaasa, bagira okutaikirizana, nari obumwe bagaaniira omu muringo gutahikire. (Yak. 3:2, 5, 8) Abashweraine baingi baine emirimo erikubaremesa kureeberera gye abaana baabo. Obujune n’okuruha munonga nibireetera abashweraine abamwe kugumirwa kutunga obwire bw’okuhamya obushwere bwabo. Oburemeezi bw’esente, amagara mabi nari oburemeezi obundi, nabyo nibibaasa kubareetera kutakundana n’okuhaana ekitiinisa. Kandi, obushwere oburikureebeka nk’obuhami nibubaasa kushiishwa “emirimo y’obuzaarwa  bw’omubiri,” nk’obushambani, okurigira okubi, okurwana, eihari, ekiniga, n’empaka.—Gal. 5:19-21.

³ Okwongyerera ahari ekyo, abantu baingi omu ‘biro by’emperu’ n’abarikweyendeza, kandi tibarikukunda Ruhanga, ekirikureetera obushwere kusiisikara. (2 Tim. 3:1-4) Eky’ahamuheru, hariho omuzigu omaririire kushiisha obushwere. Entumwa Petero akarabura ati: “Mwerinde; mugume nimureeba. Sitaane omuzigu waanyu naashooba nk’entare erikutsinda, naasherura ou araarye.”—1 Pet. 5:8; Kush. 12:12.

4. Nikibaasika kita kugira obushwere buhami kandi oburimu okushemererwa?

⁴ Omushaija ori omu bushwere omuri Japan naagira ati: “Nkaba nyine amaganya maingi ahabw’oburemeezi bw’esente. Kandi ahabw’okugira ngu nkaba ntarikugaaniira n’omukazi wangye, nawe akagira amaganya. Nangwa n’omukazi we aherize kutunga endwara y’amaani. Obumwe, amaganya aga nigatureetera kutaikirizana.” Kigumire kwihiraho kimwe oburemeezi omu bushwere, kwonka nitubaasa kubusingura. Abari omu bushwere, Yehova naabaasa kubahwere kugira obushwere buhami kandi oburimu okushemererwa. (Shoma Zaaburi 127:1.) Ka tushwijume emiringo etaano ey’okwombekamu obushwere bwaitu kandi bukahangaara. Kandi nitwija kureeba oku emiringo egi erikubaasa kuhamibwa rukundo.

5, 6. Abashweraine nibabaasa kuta bata Yehova omu bushwere bwabo?

⁵ Obushwere nibuhama ababurimu baahamira ahari ogwo owaabutandikireho kandi bakamworobera. (Shoma Omubuurizi 4:12.) Abashaija n’abakazi nibabaasa kuta Yehova omu bushwere bwabo barikukuratira obuhabuzi bwe obwa rukundo. Abaheereza ba Ruhanga aba ira Baibuli ekabahiga eti: “Ku muritoora aha mukono gwa buryo nari aha gwa bumosho, amatu gaanyu garyaguma nigahurira ekigambo nikibareetwa enyima nikigira kiti: Ogu nigwo muhanda, mube nigwo mwahamya.” (Isa. 30:20, 21) Obunaku obu, abashweraine nibahurira eiraka rya Yehova baaba nibashomera hamwe Ekigambo kye. (Zab. 1:1-3) Kandi nibabaasa kweyongyera kuhamya obushwere bwabo kurabira omu Kuramya kw’Eka okurikushemeza kandi okurikugaruramu amaani omu by’omwoyo. Okushaba buri izooba ni kukuru omu kwombeka obushwere burungi omu nsi Sitaane.

⁶ Gerhard kuruga Germany naagira ati: “Oburemeezi n’okutaikirizana ku birikwenda kuturemesa kushemererwa, obuhabuzi oburi omu Kigambo kya Ruhanga nibutuhwera kugumisirizana n’okusaasirana.” Abashweraine ku barikuteeraho kuta Yehova omu bushwere bwabo barikwejumba hamwe omu by’omwoyo, nibamwirira haihi kandi nibagira okushemererwa.

7. Abashaija bashemereire kwebembera bata amaka gaabo?

⁷ Oku omushaija arikwebembera eka ye nikubaasa kukora kihango kureetera obushwere kuhama n’okubamu okushemererwa. Baibuli neegira eti: ‘Omutwe gw’omushaija ni Kristo, n’omutwe gw’omukazi ni iba.’ (1 Kor. 11:3) Ebyetooroire ebigambo ebyo nibyoreka oku abashaija baine kwebembera amaka gaabo, nk’oku Kristo arikwebembera abashaija. Yesu akaba atari nshaarizi, kureka akaba atwaza omu muringo gwa rukundo, gw’embabazi, ogw’okwetegyereza, ogw’obucureezi, kandi atarikurahuka kugira ekiniga.—Mat. 11:28-30.

8. Omushaija naabaasa kureetera ata omukazi we kumukunda?

 ⁸ Abashaija tikirikubeetengyesa kuguma nibagambira abakazi baabo ngu babahe ekitiinisa. Omu mwanya gw’ekyo, baine ‘kuguma n’abakazi baabo, nk’abarikwetegyereza ebishemeire.’ Baine ‘kubaha ekitiinisa, ahakuba ni nk’enyabya zitagumire.’ (1 Pet. 3:7) Baaba bari bonka nari bari n’abandi, abashaija nibakoresa ebigambo ebirikworeka ngu nibaha abakazi baabo ekitiinisa, kandi babatwariza omu muringo gw’embabazi kworeka ngu n’ab’omuhendo. (Enf. 31:28) Obwebembezi nk’obwo, nibureetera omukazi kukunda iba n’okumuha ekitiinisa ekirikureetera Ruhanga kuha omugisha obushwere bwabo.

9. Omukazi naabaasa kworobera ata iba?

⁹ Rukundo etarimu kweyendeza ei twiniire Yehova, neetuhwera kwecureeza ahansi y’omukono gwe ogw’amaani. (1 Pet. 5:6) Omuringo gumwe mukuru ogu abakazi barikworeka ngu niboorobera obushoboorozi bwa Yehova, n’okukwatanisa n’abashaija baabo kandi bakabashagika. Baibuli neegira eti: “Abakazi, mworobere baabaroimwe nk’oku kishemereire omuri Mukama.” (Kol. 3:18) Buzima, tikirikumanyisa ngu byona ebi omushaija arikucwamu, nibyo omukazi arikuba naakunda. Kwonka, byaba bitarikuhakanisa ebiragiro bya Ruhanga, omukazi omucureezi naija kworoba.—1 Pet. 3:1.

10. Ahabw’enki okworoba ni kikuru?

¹⁰ Omukazi aine omwanya gw’ekitiinisa ogw’okuba “mugyenzi” wa iba. (Mal. 2:14) Baaba baine kucwamu aha bikwatiraine n’eka yaabo, naahayo ebiteekateeko bye omu muringo ogurikworeka ngu naaha iba ekitiinisa. Omushaija omunyabwengye, naahurikiza n’obwegyendesereza ebi omukazi we arikugamba. (Enf. 31:10-31) Okworoba nikurugamu okushemererwa, obusingye, okukwatanisa omu ka, kandi nikureetera abashaija n’abakazi baabo kumarwa ahabw’okumanya ngu nibashemeza Ruhanga.—Efe. 5:22.

11. Ahabw’enki okusaasirana ni kikuru?

¹¹ Ekintu kimwe aha bikuru ebirikuhamya obushwere n’okusaasirana. Omushaija n’omukazi we ‘baagumisiririzana kandi bakasaasirana,’ obushwere bwabo nibuhama. (Kol. 3:13) Kwonka, obushwere nibubaasa kubamu oburemeezi, omushaija n’omukazi we baaba batarikwebwa enshobe eza ira nari baaba nibazikoresa omu kutongana. Nk’oku obwatika burikubaasa kureetera ekyombeko kuhwa amaani, abashweraine nibabaasa kubiika enziika omu mitima, kibareetere kugumirwa kusaasirana. Okutaana n’ekyo, obushwere nibubaasa kuhama omushaija n’omukazi we baaba nibasaasirana nk’oku Yehova arikubasaasira.—Mik. 7:18, 19.

12. Rukundo neeshweka eta “ebibi bingi”?

¹² Rukundo eyaabuzima terikureetera muntu kuguma naijuka ebibi ebi bamukoreire. Hatariho kubanganisa, “okukunda kushweka ebibi bingi.” (1 Kor. 13:4, 5; shoma 1 Petero 4:8.) Ekirikumanyisa ngu rukundo teine bugarukiro aha bibi ebi turikubaasa kusaasira. Obu entumwa Petero yaabuuza emirundi ei ashemereire kusaasira omuntu, Yesu akamugarukamu ngu asaasire emirundi 77. (Mat. 18:21, 22) Yesu akaba naayoreka ngu tihariho obugarukiro aha mirundi ei Omukristaayo ashemereire kusaasira abandi.—Enf. 10:12. *

13. Nitubaasa kusingura tuta omuze gw’okutasaasira?

¹³ Annette naagira ati: “Abashweraine baaba batarikwenda kusaasirana, enziika n’okuteesigana nibyeyongyera, kandi obwo n’obutwa omu bushwere. Okusaasirana nikuhamya omukago gw’abashweraine kandi beeyongyera kwirirana haihi.” Kubaasa kusingura omuze gw’okutasaasirana, teeraho kugira omutima gw’okwebaza n’okusiima. Yemanyiize kusiima omukundwa waawe kuruga aha mutima. (Kol. 3:15) N’ekiraarugyemu, noija kugira obumwe, okukwatanisa, n’emigisha kuruga ahari Ruhanga, ebirikutungwa abo abarikusaasira.—Rom. 14:19.

14, 15. Ni kiragiro ki ekirikukwata aha mitwarize, kandi nikibaasa kugasira kita abari omu bushwere?

¹⁴ Hatariho kubanganisa nooyenda ngu abandi bakutwarize omu muringo gw’ekitiinisa. Nooshemererwa abandi baafayo aha biteekateeko byawe n’enyehurira yaawe. Kwonka noobaasa kuba oraahuriireho omuntu arikugira ngu, “niinyija kumukorera eki yaankoreire”? N’obu emiteekateekyere egyo erikubaasa kuba neeyetegyerezibwa, Baibuli neetugira eti: ‘Otarigira oti: Ndyamugira nk’oku yangizire.’ (Enf. 24:29) Nangwa na Yesu akatuhwera kwetegyereza omuringo murungi ogw’okushoboororamu okutaikirizana. Akaha ekiragiro ekirikukwata aha mitwarize arikugira ati: “Nk’oku mwenda abantu kubagirira, naimwe mube nikwo mwabagirira.” (Luk. 6:31) Yesu akaba naamanyisa ngu twine kutwariza abandi nk’oku turikwenda ngu batutwarize beitu kutari kushashura ekibi n’ekibi. Eki nikimanyisa ngu omu bushwere twine kutamu ekirikwingana n’eki turikwenda kwihamu.

¹⁵ Abashweraine nibahamya omukago gwabo buri omwe yaaba naafayo aha nyehurira za mugyenzi we. Omushaija omuri  South Africa naagira ati: “Nituteeraho kugyendera ha kiragiro ekirikukwata aha mitwarize. N’amazima hariho obu turikugira ekiniga, kwonka nituteeraho munonga kutwarizana nk’oku turikwenda ngu batutwarize, turikuhaana ekitiinisa.”

16. Ni bintu ki ebi abashweraine bashemereire kwetantara?

¹⁶ Ti kirungi mwaba muri omu bantu kugamba aha bweremwa bw’ou ori nawe omu bushwere nari emitwarize ye ei otarikukunda, nangwa n’obu waakuba ori nk’orikuzaana. Ijuka ngu obushwere ti mpaka z’okusherura orikumanya kwegumya, orikugamba munonga, nari orikumanya kugamba ebigambo ebirikusaasa. N’amazima, twena obumwe nitushobya, kandi nitugwisa kubi abandi. Kwonka tihariho ekishemereire kureetera omushaija nari omukazi kukoresa ebigambo ebirikugarura ahansi, ebirikuhemura, kutsindika mugyenzi we nari akamuteera.—Shoma Enfumu 17:27; 31:26.

17. Abashaija nibabaasa kugyendera bata aha kiragiro ekirikukwata aha mitwarize?

¹⁷ Omu nganda ezimwe abashaija nibabonabonesa abakazi nari babateera kworeka ngu baine amaani, kwonka Baibuli neegira eti: “Otarikurahuka kugira ekiniga naakira emanzi, kandi orikutegyeka omutima gwe naakira okwatsire orurembo.” (Enf. 16:32) Nikyetengyesa okuteeraho munonga kubaasa kwerinda nk’oku Yesu Kristo omushaija rugambwa oraabaireho, yaakozire. Omushaija orikujuma nari orikuteera omukazi we naaba naayoreka ngu taine maani, kandi naija kufeerwa omukago gwe na Yehova. Daudi omuhandiiki wa zaaburi, owaabaire aine amaani kandi ari emanzi akagira ati: “Mugire ekiniga, kwonka murekye kushiisha; Muhanuure n’emitima yaanyu mubyami, mucecekye.”—Zab. 4:4.

18. Ahabw’enki ni kikuru kuteeraho kugira rukundo?

¹⁸ Shoma 1 Abakorinso 13:4-7. Rukundo nigwo mutwarize ogurikukirayo obukuru omu bushwere. “Mujware omutima gw’esaasi, embabazi, okutwaza gye, obucureezi n’okugumisiriza. Mujware okukunda, nikwo kukomerana byona bikakwatanisibwa kimwe.” (Kol. 3:12, 14) Abashaija n’abakazi baine kworeka ngu nibakundana kandi bakatooreza Kristo, owaabaire ayeteekateekire kufeera abandi. Obushwere bwaba burimu rukundo nk’egyo, nibwija kuguma buhami n’obu omwe yaakuba naagwisa kubi mugyenzi we, aine amagara mabi, mwagira oburemeezi omu by’esente, nari mwatunga oburemeezi n’abazaire baanyu.

19, 20. (a) Abashweraine nibabaasa kuhamya bata obushwere bwabo? (b) Nituza kugaaniira ahari ki omu kicweka ekirikukurataho?

¹⁹ N’amazima, nikyetengyesa okumariirira, okwehayo, n’okukora n’amaani obushwere kubaasa kuba burungi. Omu mwanya gw’okuruga omu bushwere oburimu oburemeezi, ababurimu baine kumariirira kuhamya omukago gwabo, beitu kutari kwemera buremeezi kwonka. Abakristaayo abashweraine abarikukundana kandi bakakunda Yehova baine kumariirira kumaraho okutaikirizana, ahakuba “okukunda” tikuremwa.—1 Kor. 13:8; Mat. 19:5, 6; Heb. 13:4.

²⁰ Okugira obushwere obuhami kandi oburimu okushemererwa kigumire omu biro ebi ‘eby’akabi kaingi.’ (2 Tim. 3:1) Kwonka twaba twine obuhwezi bwa Yehova, nikibaasika. Abashweraine nabo baine kurwanisa obushambani obujanjaire munonga omu nsi. Ekicweka ekirikukurataho nikiija kworeka eki abashweraine baine kukora kubaasa kuguma bahami omu by’omwoyo bakeerinda obushambani.