Abantu baingi ebiro ebi tibarikukunda kukora emirimo y’amaani nka Alex. “Baingi nibateekateeka ngu tikihikire okukora emirimo ey’ahansi etarikushemeza” nikwo makanika orikwetwa Aaron yaagizire. “Nibaba nibateekateeka bati: Ninkora omurimo ogu okuhitsya obu ndatungye omurungi.”

Ahabw’enki abantu baingi nibateekateeka ngu tibashemereire kukora n’amaani? Nibabaasa kuba nibabeihwabeihwa ebi barikureeba omu makuru, ebirikworeka ngu kubaasa kushemererwa baine kugira buri kintu ekihangire kandi batarikukora munonga. “Abantu nibateekateeka ngu waaba nookora emirimo y’amaani, nooyeyongyera kugaruka enyima omu kutunguuka,” nikwo Matthew orikuhunduuza ebintu yaagizire. Shane orikurinda ebyombeko nawe areebire abantu baine emiteekateekyere niyo emwe. Naagira ati: “Abantu tibarikwenda kukora nk’oku barikushashurwa.”

Kwonka, abantu baingi abasinguzi nibakunda emirimo yaabo. “Ninteekateeka ngu okukora n’amaani nikurugamu ebirungi, okukira munonga waaba oine ebigyendererwa birungi ebi orikwenda kuhikiiriza,” nikwo Danieli omwombeki w’emyaka 25-yaagizire. Andre, ow’emyaka 23, nawe naagira ati: “Niinyikiriza ngu ebirungi n’okushemererwa nibiruga omu kukora. Okukora kakye tikurikureeta okushemererwa okw’obutwire kureka okutamwa okw’obutwire!”

Niki ekibaasiise abantu nka Danieli na Andre kugira emiteekateekyere mirungi aha kukora? Okugyendera aha misingye ya Baibuli nikyo kibahwereire. Baibuli omu mwanya gw’okugira ngu okukora n’amaani ni kibi, neehiga abantu kukora n’obweziriki baine okugumisiriza. Kwonka Baibuli neetugambira ekirikukira ahari ekyo. Neeyoreka n’oku turikubaasa kukunda emirimo yaitu.

Ni misingye ki eya Baibuli erikubaasa kukuhwera kutunga okumarwa omu bi orikukora? Nitukushaba kureeba emwe ahariyo, nk’oku ekicweka ekirikukurataho kirikworeka.