“MUKAMA Ruhanga yaatwara ogwo muntu, yaamuta omu kibanja ky’omuri Edeni okukihinga n’okukirinda. MUKAMA Ruhanga yaaragiira ogwo muntu, naagira ati: Omuti gwona ogw’omu kibanja noikirizibwa kuryaho nk’oku orikwenda; kwonka omuti gw’okumanya oburungi n’obubi otariguryaho, ahabw’okuba eizooba eri origuryaho, buzimazima oryafa.”—Okutandika 2:15-17.

Ruhanga akata omuntu w’okubanza, Adamu, omu musiri Edeni, paradiso omu nsi, gukaba gurimu enyamaishwa nyingi n’ebimera birungi munonga. Hakaba harimu emiti erikwana ebijuma ebi Adamu yaabaire naaryaho nk’oku arikwenda. Kwonka, Yehova Ruhanga akagambira Adamu kutarya aha muti gumwe, yaamurabura ngu yaaguryaho naija kufa.

Mbwenu shi Adamu akeetegyereza ekiragiro ekyo? Akaba naamanya eki okufa kirikumanyisa; akaba yaareebire enyamaishwa nizifa. Ku ogire ngu Adamu akahangwa ari ow’okufa, ekiragiro kya Ruhanga kikaabaire kitaine makuru maingi. Kwonka, Adamu akeetegyereza ngu yaayorobera Ruhanga akareka kurya aha muti, naija kugumaho ebiro byona.

Bamwe nibateekateeka ngu omuti nigujwekyera okuteerana, kwonka tikwo kiri. Ahakuba Yehova akaba naayenda ngu Adamu n’omukazi we Haawa ‘bazaare, bakanye, baijure ensi, ebe eyaabo.’ (Okutandika 1:28) Eki baazibiirwe gukaba guri omuti gwenyine. Yehova akagweta “Omuti gw’okumanya oburungi n’obubi” ahabw’okuba gukaba nigujwekyera obushoboorozi bwa Ruhanga bw’okworeka omutindo ogurikukwata aha kirungi n’ekibi. Adamu ku ataraariire aha muti ogwo akaba naija kworeka ngu naasiima ogwo owaamuhangire akamuha ebirungi.

‘Ruhanga akagira Adamu ati: Ahabw’okurya aha muti ogu naakuzibiire kuryaho, ebi orirya, biryakutuutura aha maisho, okuhitsya obu origaruka omu itaka; ahakuba nimwo waihirwe; ahabw’okuba ori omucuucu, n’omu mucuucu nimwo origaruka.’—Okutandika 3:17, 19.

Adamu akarya aha muti ogu yaabaire azibiirwe. Ekikorwa ky’obugomi ekyo kikaba kiri kibi munonga. Obugomi nibwo bwamureeteire kutasiima ebirungi ebi Yehova yaabaire amukoreire. Adamu okurya aha kijuma ekyo, akagomera Yehova yaacwamu kwetegyeka ekyabaire nikiija kurugamu ebintu bibi.

Nk’oku Yehova yaabaire agambire, Adamu akahika yaafa. Ruhanga akaba ahangire Adamu “kuruga omu mucuucu” kandi akaba yaamugambiire ngu naija “kugaruka omu mucuucu.” Adamu ku yaafiire taragumireho ari omu muringo ogundi nari kuza omu mwanya ogundi. Ku yaafire, akahinduka otaine magara nk’omucuucu ogu yaarugiremu.—Okutandika 2:7; Omubuurizi 9:5, 10.

‘Ekibi kikaija omu nsi ahabw’okushiisha kw’omuntu omwe, kandi kyarugamu okufa, nikwo n’okufa kwabugire omu bantu boona, ahakuba boona bakashiisha.’—Abarooma 5:12.2

Obugomi bwa Adamu bukarugamu oburemeezi bwingi. Adamu akafeerwa amatsiko g’okutuuraho ebiro byona, beitu kutari kutuuraho emyaka 70 nari 80. Kandi Adamu ku yaasiisire, yaafeerwa okuhikiirira kandi yaahunguza oruzaaro rwe rwona okutahikiirira.

Twena tukakomooka ahari Adamu. Kutari kukunda kwaitu, tukamuhunguraho omubiri ogutahikiriire ogurikukora ebibi gukarugaho gukafa. Paulo akagamba aha buremeezi bwaitu ati: “Ndi ow’obuzaarwa bw’obuntu, nkagurwa kutegyekwa ekibi. Ai bambe, kandi omuntu enshoberwa! N’oha orinjuna omubiri ogu ogw’okufa?” Paulo akagarukamu ekibuuzo kye arikugira ati: “Ruhanga asiimwe, ahabwa Yesu Kristo Mukama waitu.”—Abarooma 7:14, 24, 25.

‘Isheboona akatuma Omwana we kuba Omujuni w’ensi.’—1 Yohaana 4:14.

Yehova Ruhanga akatuteeraho entebeekanisa y’okutucungura kuruga omu kibi n’okufa. Ata? Akoohereza Omwana we kuruga omu iguru kuzaarwa nk’omuntu ohikiriire nka Adamu. Kwonka okutashushana na Adamu, Yesu “tarakozire kibi.” (1 Petero 2:22) Ahabw’okugira ngu akaba ahikiriire, taraizire aine orubanja rw’okufa, kandi akaba naabaasa kugumaho nk’omuntu ohikiriire.

Kwonka Yehova akaikiriza omwana we kwitwa abazigu be. Bwanyima y’ebiro bishatu, Yehova akamuzoora kuruga omu bafu nk’ekihangirwe ky’omwoyo kugira ngu bwanyima abaase kugaruka omu iguru. Ku yaahikire omu iguru omu maisho ga Ruhanga n’omuhendo gw’amagara ge agahikiriire, akashashurira eki Adamu yaayefeerereize na baijukuru be.—Abarooma 3:23, 24; 1 Yohaana 2:2.

Yesu akagaruraho eki Adamu yaatufeerereize. Akafa ahabwaitu ngu tubaase kugumaho ebiro byona. Baibuli neegira eti: ‘Yesu akeemera obusaasi bw’okufa, ngu aroze aha kufa omu mwanya gw’abantu boona ahabw’embabazi za Ruhanga.’—Abaheburaayo 2:9.

Entebeekanisa egi neeyoreka bingi ahari Yehova. Abantu abatahikiriire bakaba batarikubaasa kwecungura ahabw’omutindo gwe gw’oburingaaniza ogw’ahaiguru. Kwonka embabazi ze na rukundo ye bikamureetera kugira eky’amaani eki yaayefeerereza, nikwo kuhayo Omwana we kutucungura.—Abarooma 5:6-8.

“Kristo akazoorwa omu bafu, niwe muganuro gw’abaagwejegyeire. Ahakuba nk’oku okufa kwareetsirwe omuntu, nikwo n’okuzooka kw’abafu kwareetsirwe omuntu. Nk’oku boona bafa omuri Adamu, nikwo n’omuri Kristo boona barihindurwa abahuriire.”—1 Abakorinso 15:20-22.

Hatariho kubanganisa Yesu akabaho kandi yaafa, kwonka shi hariho obuhame oburikworeka ngu akazooka omu bafu? Obuhame oburiho n’okugira ngu akeeyoreka abantu baingi emirundi etari emwe n’emwe n’omu myanya etarikushushana bwanyima y’okuzooka. Omuringo gw’okubanza, akeeyoreka abantu barikuhika 500. Omu baruha ei entumwa Paulo yaahandiikiire Abakorinso, akooreka ngu bamwe ahari bakareebi abo bakaba bakiriho batakafiire, arikumanyisa ngu bakaba nibabaasa kuha obuhame aha ki baareebire n’eki baahuriire.—1 Abakorinso 15:3-8.

Paulo obu yaahandiika ngu Yesu “niwe muganuro” nari ow’okubanza omu baazoirwe, akaba naahamya ngu n’abandi nibaija kuzoorwa. Yesu akagira ngu obwire nibwija “abari omu bituuro boona” obu “barirugamu.”—Yohaana 5:28, 29.

“Oku nikwo Ruhanga yaakunzire atyo ensi, akahayo Omwana we omwe nyamunegyere, ngu omuntu weena orikumwikiriza arekye kuhwerekyerera, kureka atungye amagara agatahwaho.”—Yohaana 3:16.

Ekitabo ky’okubanza omu Baibuli nikyoreka obu abantu baatandika kufa n’oku twafeereirwe Paradiso. Ekitabo ekirikuhereerukayo omu Baibuli nikigamba aha bwire obu okufa kurihwaho kandi Ruhanga akagaruraho Paradiso omu nsi. Obwo abantu nibaija kutuuraho bashemereirwe kandi bakore ebirikubagasira ebiro byona. Okushuuruurwa 21:4 nihagira ngu “tiharibaho kufa bundi.” Kubaasa kuhamya ebigambo ebyo omushororongo 5 nigugira guti: “Ebigambo ebi n’eby’okwesigwa kandi eby’amazima.” Ebi Yehova arikuraganisa naija kubihikiiririza kimwe.

Noikiriza ngu “ebigambo ebi n’eby’okwesigwa kandi eby’amazima”? Ku kiraabe nikwo kiri, yega bingi ebirikukwata ahari Yesu Kristo, kandi omwikiririzemu. Waakora otyo noija kusiimwa Yehova. Noija kutunga emigisha hati n’amatsiko g’okutuura omu Paradiso ebiro byona, ‘etarimu kufa, n’obu kwakuba okucura nari okurira nari obusaasi.’