Oku Abareeberezi Barikutendeka Abandi
“Ebi waahuriire ningamba . . . , obikwatse abantu abarikwesigwa.”—2 TIM. 2:2.
1. (a) Abaheereza ba Ruhanga batwire nibamanya ki aha kutendeka abandi, kandi eki nikikwata kita aha bunaku obu? (b) Nituza kushwijuma ki omu kicweka eki?
ABAHEEREZA ba Ruhanga batwire nibamanya ngu okutendeka abandi nikurugamu obusinguzi. Abramu akatebeekanisa ‘abashaija be abeegyesiibwe’ kuza kucungura Looti, kandi bakasingura. (Kut. 14:14-16) Omu bunaku bw’Omugabe Daudi, abeeshongozi ‘abaabaire beegyesiibwe okweshongorera,’ bakaba bahimbisa Yehova. (1 Bus. 25:7) Obunaku obu, turi omu rutaro rw’eby’omwoyo niturwana na Sitaane hamwe n’abakuratsi be. (Efe. 6:11-13) Kandi, nitwehayo n’agaitu goona kuhimbisisa Yehova. (Heb. 13:15, 16) N’ahabw’ekyo, nk’abaheereza ba Ruhanga aba ira, kubaasa kuba abasinguzi twine kutendekwa. Yehova ahaire abareeberezi omu kibiina obujunaanizibwa bw’okutendeka abandi. (2 Tim. 2:2) Abareeberezi abahangu nibakoresa miringo ki kutendeka ab’eishe-emwe kuba abahikire kureeberera entaama?
HWERA OMWEGI KUHAMA OMU BY’OMWOYO
2. Omureeberezi atakeegyeise ou arikutendeka aine kubanza kukora ki, kandi n’ahabw’enki?
2 Omureeberezi naabaasa kugyeragyeranisibwa n’omuhingi. Omuhingi atakabyire embibo omu musiri gwe, nikibaasa kumwetengyesa kuta ebiriisa omu itaka kuribaasisa kweza. Nikyo kimwe, omureeberezi atakeegyeise ou arikutendeka, nikibaasa kumwetengyesa kubanza yaamuha ebyahandiikirwe ebiraatebeekanise omutima gwe kwikiriza kutendekwa.—1 Tim. 4:6.
3. (a) Ebigambo bya Yesu ebiri omu Mako 12:29, 30 nibibaasa kukoresibwa bita, omureeberezi yaaba naagaaniira n’ou arikutendeka? (b) Okushaba kw’omureeberezi nikubaasa kuhwera kuta ou arikutendeka?
3 Kubaasa kumanya oku ou orikutendeka arikutwara amazima, noobaasa kumubuuza oti: ‘Okwehayo kwawe ahari Yehova kuhindwire kuta oku orikutwaza?’ Ekibuuzo ekyo nikibaasa kukuhwera kugaaniira nawe aha kuheereza Yehova n’omutima gumwe. (Shoma Mako 12:29, 30.) Obundi aha kuhendera kw’okugaaniira kwanyu, noobaasa kushaba Yehova kuha ou orikutendeka omwoyo gurikwera ogurikwetengyesa omu kutendekwa. Ka nikigaruramu amaani ow’eishe-emwe kuhurira orikumushabira!
4. (a) Ha eby’okureeberaho kuruga omu Baibuli ebirikubaasa kuhwera orikutendekwa kuhama omu by’omwoyo. (b) Abareeberezi nibaba baine kigyendererwa ki baaba nibatendeka abandi?
4 Waaba nootandika kumutendeka, yetegyereze Ebyahandiikirwe ebirikubaasa kumuhwera kureeba ngu aine kugira ekihika ky’okuheereza, kuba orikwesigwa, kandi omucureezi. (1 Bag. 19:19-21; Neh. 7:2; 13:13; Byak. 18:24-26) Orikutendekwa aine kugira emitwarize erikwetengyesa nk’oku itaka ririkwetenga ebiriisa. Emitwarize nk’egyo neemuhwera kurahuka kuhama omu by’omwoyo. Jean-Claude, omureeberezi omuri France naagira ati: “Ekigyendererwa kyangye n’okuhwera ou ndikutendeka kuta omutima aha by’omwoyo. Ninsherura obwire burungi obu ndikubaasa kumushomera ekyahandiikirwe ‘kwigura amaisho ge’ kureeba ‘eby’okutangaaza’ ebiri omu Kigambo kya Ruhanga.” (Zab. 119:18) Noobaasa kukoresa miringo ki endiijo kugumya ou orikutendeka?
GAMBA EBIGYENDERERWA KANDI OHE ENSHONGA
5. (a) Okugaaniira aha bigyendererwa by’omwoyo n’ou orikutendeka ni kikuru kita? (b) Ahabw’enki abareeberezi nibatendeka abo abakiri bato? (Reeba obugambo obw’ahansi.)
5 Buuza ou orikutendeka oti: ‘Oine bigyendererwa ki eby’omwoyo?’ Yaaba ataine bigyendererwa byona, muhwere kutaho ekigyendererwa eki arikubaasa kuhikiiriza. Mugambire ekigyendererwa ky’omwoyo eki waataireho, kandi oine omuhimbo omugambire oku waashemereirwe ku waakihikiriize. Ogu n’omuringo gworobi, kwonka nigukora. Victor, omureeberezi kandi payoniya omuri Africa, naagira ati: “Obu naabaire ndi muto, omu muringo murungi omureeberezi akambuuza ebigyendererwa byangye. Ebibuuzo ebyo bikampwera kutandika kuteekateeka aha buheereza bwangye.” Abareeberezi abahangu nibamanya obukuru bw’okutandika kutendeka ab’eishe-emwe abakiri bato barikubaha eby’okukora omu kibiina ebirikuhikaana n’emyaka yaabo. Okutendeka abato omu muringo nk’ogwo, nikibaasa kubahwera kuguma bateire omutima aha bigyendererwa by’omwoyo, nangwa n’obu barikweyongyera kukura kandi hariho na bingi ebirikubaasa kubahuzya.—Shoma Zaaburi 71:5, 17. *
Shoboorora ahabw’enki omurimo gwine kukorwa, kandi oyebaze omuntu yaaheza kugukora (Reeba akacweka 5-8)
6. Yesu akaba naakoresa muringo ki omukuru omu kutendeka abandi?
6 Noohiga ou orikutendeka kugira ekyetengo ky’okuheereza waamugambira eky’okukora n’enshonga ahabw’enki aine kukikora. Waamushoboororera enshonga ahabw’enki, nooba nootooreza Omwegyesa Mukuru, Yesu. Nk’eky’okureeberaho, Yesu atakaragiire entumwa ze kuhindura abantu abeegi, akabagambira enshonga ahabw’enki baine kworoba. Akagira ati: “Mpairwe obushoboorozi bwona omu iguru n’omu nsi.” Bwanyima yaayongyeraho ati: “N’ahabw’ekyo mugyende omu mahanga goona, muhindure abantu abeegi.” (Mat. 28:18, 19) Noobaasa kutooreza ota Yesu omu kutendeka abandi?
7, 8. (a) Abareeberezi nibabaasa kutooreza bata Yesu omu kutendeka abandi? (b) Okwebaza ou orikutendeka ni kikuru kita? (c) Ni buhabuzi ki oburikuhwera abareeberezi kutendeka abandi? (Reeba akabokisi “ Oku Abandi Barikutendekwa.”)
7 Shoboororera ou orikutendeka kuruga omu Byahandiikirwe ahabw’enki aine kukora eki arikushabwa kukora. Omu muringo ogwo nooba noomwegyesa kugyendera aha misingye ya Baibuli. Nk’eky’okureeberaho, noobaasa kushaba ow’eishe-emwe kuguma naaboneza aha muryango gw’Ekyombeko ky’Obukama kugira ngu abantu bagume nibarabaho gye. Noobaasa kuteekateeka aha biri omu Tito 2:10 kandi omushoboororere oku omurimo ogwo gurikwija “kusiimisa enyegyesa ya Ruhanga Omujuni waitu.” Kandi muhwere kuteekateeka aha bakaikwire omu kibiina, n’oku obujunaanizibwa bwe burikwija kubagasira. Mwagaaniira omu muringo nk’ogwo, nikibaasa kuhwera ou orikutendeka kuta omutima aha bantu omu mwanya gw’ebiragiro. Naija kushemererwa kureeba ab’eishe-emwe na banyaanyazi-itwe barikugasirwa omu buheereza bwe.
8 Kandi siima ou orikutendeka ahabw’okuteeraho kugyendera aha buhabuzi obu orikumuha. Ahabw’enki ekyo kiri kikuru? Okwebaza nikuhwera ou orikutendeka nk’oku amaizi garikuhwera ekimera kukura gye.—Gyeragyeranisa Matayo 3:17.
EKINDI EKIGUMIRE
9. (a) Aha bikwatiraine n’okutendeka abandi, abareeberezi abari omu mahanga amagaiga nibatunga buremeezi ki? (b) Ahabw’enki eminyeeto abamwe batarikwebembeza by’omwoyo?
9 Abareeberezi abari omu mahanga amagaiga nibabaasa kushanga kigumire kuhiga ab’eishe-emwe abari omu myaka 20 nari 30 kwejumba omu mirimo y’ekibiina. Tukabuuza abareeberezi abamazire obwire nibaheereza omu mahanga 20 nk’ago ahabw’enki ab’eishe-emwe abamwe nibanga obujunaanizibwa omu kibiina. Omu bi baagarukiremu harimu ekikuru eki: Abato abamwe tibarahigirwe kutaho ebigyendererwa by’omwoyo. Obumwe, abato abaabaire baine ebigyendererwa by’omwoyo, abazaire baabo bakabahiga kutaho ebigyendererwa ebitari by’omwoyo! Abato nk’abo tibakateerahoga kwebembeza eby’omwoyo.—Mat. 10:24.
10, 11. (a) Omureeberezi naabaasa kuhwera ata ow’eishe-emwe orikureebeka nk’otaine kihika ky’okuheereza? (b) Ni Byahandiikirwe ki ebi omureeberezi arikubaasa kuhikaanisaho ebiteekateeko n’ow’eishe-emwe, kandi n’ahabw’enki? (Reeba obugambo obw’ahansi.)
10 Ow’eishe-emwe yaaba ataine kihika ky’okuheereza, kubaasa kuhindura emiteekateekyere ye nikyetengyesa amaani n’okugumisiriza, kwonka nikibaasika. Nk’oku omuhingi arikuhwera ebimera ebimwe kukura gye arikubitsimbirira, noobaasa kuhwera ab’eishe-emwe mporampora kureeba ekyetengo ky’okuhindura emiteekateekyere yaabo aha bikwatiraine n’okwikiriza obujunaanizibwa. Kwonka mu muringo ki?
11 Gira obwire bw’okukora omukago n’ow’eishe-emwe nk’ogwo. Muhamize ngu naayetengwa omu kibiina. Haahinguraho obwire, noobaasa kushutama nawe kuhikaanisa ebiteekateeko aha byahandiikirwe ebimwe, kandi omuhwere kuteekateeka aha kwehayo kwe ahari Yehova. (Mub. 5:4; Isa. 6:8; Mat. 6:24, 33; Luk. 9:57-62; 1 Kor. 15:58; 2 Kor. 5:15; 13:5) Noobaasa kumubuuza oti: ‘Okaraganisa ki Yehova obu waayehayo ahariwe?’ Teeraho kumuhiga orikumubuuza oti: ‘Nooteekateeka ngu Yehova akeehurira ata obu waabatizibwa?’ (Enf. 27:11) ‘Sitaane we akeehurira ata?’ (1 Pet. 5:8) Ebyahandiikirwe nk’ebyo biine amaani kandi nibibaasa kuhika aha mutima gw’ow’eishe-emwe.—Shoma Abaheburaayo 4:12. *
ABARIKUTENDEKWA, MWOREKYE NGU MURI ABEESIGWA
12, 13. (a) Obu Elisa yaabaire naatendekwa akooreka miteekateekyere ki? (b) Yehova akaha ata Elisa emigisha ahabw’obwesigwa bwe?
12 Kandi shi imwe eminyeeto abu ekibiina kirikwetenga obuhwezi bwanyu? Ni miteekateekyere ki eraabahwere kuba abasinguzi? Kubaasa kugarukamu ebibuuzo ebi, ka tushwijume ebirikukwata aha muntu owaabaire naatendekwa ira.
13 Emyaka nka 3,000 enyima, nabi Eliya akeeta Elisa kuba omuheereza we. Ahonaaho Elisa akaikiriza yaija yaaheereza omushaija mukuru ogwo arikukora emirimo y’ahansi. (2 Bag. 3:11) Elisa bwanyima y’okumara emyaka mukaaga arikutendekwa, akamanya ngu obuheereza bwa Eliya omuri Israeli bukaba buri haihi kuhendera. Eliya akahiga Elisa ou yaabaire atendekire ngu arekye kuguma naamukurata, kwonka Elisa emirundi eshatu akagira Eliya ati: “Tindikwija kukurugaho.” Akaba amaririire kuguma n’omutendeki we nk’oku kirikubaasika. Yehova akaha Elisa emigisha ahabw’okuhamira ahari Eliya omu bwesigwa, yaareeba Eliya arikutwarwa.—2 Bag. 2:1-12.
14. (a) Abarikutendekwa nibabaasa kutooreza bata Elisa? (b) Ahabw’enki kiri kikuru munonga orikutendekwa kuba omwesigwa?
14 Noobaasa kutooreza ota Elisa? Orikwikiriza obujunaanizibwa ahonaaho, otwariiremu n’emirimo ey’ahansi. Orikukutendeka mutware nka munywani waawe, kandi mworekye ngu noosiima okuteeraho kwe kukutendeka. Waaba noosiima okutendekwa okwo, nooba ori nk’orikumugira oti: “Tindikwija kukurugaho.” Ekirikukira obukuru, ba omwesigwa waaba nookora emirimo ei arikukuha. Ahabw’enki eki kiri kikuru? Ahakuba bwanyima y’okworeka ngu ori omwesigwa nibwo abareeberezi barikumanya ku Yehova arikwenda ngu oyongyerwe obujunaanizibwa omu kibiina.—Zab. 101:6; shoma 2 Timoseo 2:2.
HA ABAREEBEREZI EKITIINISA EKISHEMEIRE
15, 16. (a) Elisa akooreka ata ngu naaha omwegyesa we ekitiinisa? (Reeba ekishushani aha kutandika.) (b) Ahabw’enki baanabi abandi baagizire obwesigye omuri Elisa?
15 Ebirikukwata aha Elisa owaahunguriire Eliya, nibyoreka oku ab’eishe-emwe barikubaasa kuha ekitiinisa abareeberezi. Bwanyima ya Eliya na Elisa kutaayaayira baanabi omuri Yeriko, bombi bakaza aha Mugyera Yorudani. Ku baahikireyo, “Eliya yaajuura omunagiro gwe, yaagukubamu, yaateera amaizi; ahonaaho amaizi gaayecwamu habiri.” Bwanyima y’okwambukira ahoomire, bakagumizamu ‘baagyenda nibagaaniira.’ Hatariho kubanganisa, Elisa tarateekateekire ngu hati naamanya byona. Kuhitsya obu Eliya yaatwarwa, Elisa akaguma naata omutima aha buri kigambo eki omwegyesa we yaabaire agamba. Eliya akatwarwa omuyaga gw’akasooroora. Bwanyima, Elisa akaza aha mugyera Yorudani, yaateera omunagiro gwa Eliya aha maizi arikweta ngu, Yehova “Ruhanga wa Eliya arahi?” Amaizi gakagaruka gaayebaganisamu habiri.—2 Bag. 2:8-14.
16 Waayetegyereza ngu eky’okutangaaza kya Elisa eky’okubanza, kikaba kiri nk’eki Eliya yaahereerukireyo kukora? Eki nikitwegyesa ki? Elisa tarateekateekire ngu hati obu niwe arikwebembera, aine kutandika kukora ebintu omu muringo gwe ogurikutaana aha gwa Eliya. Omu mwanya gw’ekyo, Elisa ku yaagumiizemu arikukora nk’oku Eliya yaabaire naakora omu buheereza bwe, akooreka ngu naaha omwegyesa we ekitiinisa, ekyareeteire baanabi abandi kumutamu obwesigye. (2 Bag. 2:15) Kwonka omu myaka 60 ei nabi Elisa yaamazire omu buheereza, Yehova akamuhwera kukora eby’okutangaaza bingi kukira ebi Eliya yaakozire. Ku oraabe nootendekwa niki eki orikwega?
17. (a) Abarikutendekwa nibabaasa kutooreza bata Elisa? (b) Haahinguraho obwire, Yehova naabaasa kukoresa ata abarikutendekwa abeesigwa?
17 Otakaateekateeka ngu ahonaaho waaheza kutunga obujunaanizibwa omu kibiina, oine kubukoresa kukora ebintu omu muringo ogurikutaanira kimwe aha ku bibaire nibikorwa. Empindahinduka tizirikukorwa ahabw’okugira ngu iwe nooyenda zikorwe, kureka nizikorwa kurugiirira aha byetengo by’ekibiina na kurugiirira aha buhabuzi obu turikuheebwa ekibiina kya Yehova. Nk’oku Elisa yaareeteire baanabi abandi kumwesiga, kandi akooreka ngu naaha Eliya ekitiinisa ahabw’okukora nk’oku yaakozire, naiwe abaheereza ba Yehova bagyenzi baawe nibaija kukutamu obwesigye, waayoreka ngu nooha abareeberezi ekitiinisa orikukoresa emiringo eri omu Baibuli. (Shoma 1 Abakorinso 4:17.) Kwonka waaheza kumanya bingi, naiwe noija kwejumba omu kuta omu nkora empindahinduka ezirikubaho omu kibiina, kuhikaana n’ekibiina kya Yehova ekirikugyenda omumaisho. Buzima nk’oku kyabaire ahari Elisa, haahinguraho obwire Yehova naabaasa kuhwera imwe abarikutendekwa kukora ebintu by’amaani kukira abaabatendekire.—Yoh. 14:12.
18. Ahabw’enki okutendeka ab’eishe-emwe nikwetengyesa munonga obunaku obu?
18 Twine amatsiko ngu obuhabuzi oburi omu kicweka eki n’ekihweire nibwija kuhiga abareeberezi kutaho obwire bw’okutendeka abandi. Kandi nitushaba ngu ab’eishe-emwe abandi baikirize kutendekwa, kandi bakorese gye okutendekwa okwo baaba nibareeberera entaama za Yehova. Ekyo nikiija kuhamya ebibiina omu nsi yoona, kandi kihwere buri omwe ahariitwe kuguma ari omwesigwa omu biro by’omumaisho ebirikushemeza.
^ rup. 5 Omutsigazi yaayoreka ngu akuzire omu by’omwoyo, ngu n’omucureezi, kandi ngu aine n’ebindi ebirikwetengyesa, abareeberezi nibabaasa kumuhamya ngu ahikire kuba omuheereza n’obu yaakuba atarikuhitsya emyaka 20.—1 Tim. 3:8-10, 12; reeba Watchtower eya Gyuraayi 1, 1989, orupapura 29.
^ rup. 11 Omu kugaaniira kwanyu noobaasa kukoresa ebiri omu Watchtower, eya Apuri 15, 2012, orupapura 14-16, akacweka 8-13; n’omu katabo “Mwerindire omu Kukunda kwa Ruhanga,” eshuura 16, akacweka 1-3.
