Yesigye Yehova Butoosha!
“Imwe abantu, mumwesigye buri kaanya.”—ZAB. 62:8.
1-3. Paulo akoongyera ata kwesiga Yehova? (Reeba ekishushani aha kutandika.)
BUKABA buri obwire bw’akabi Omukristaayo kuba omuri Rooma. Abakuratsi ba Kristo bakaba nibahiiganisibwa ahabw’okuteebwaho orubanja rw’okwanga bantu, n’orw’okuhemba omuriro omu bantu b’orurembo orwo omu gwa 64 Yesu aherize kuzaarwa. Ku ogire ngu okaba ori Omukristaayo obunaku obwo, buri izooba okaba nooba oine kwerarikirira ngu nooza kukomwa nari kubonabonesibwa. Ab’eishe-emwe abamwe bakaba babariisa enyamaishwa, babahanika aha miti kandi babootsya bahuriire reero bakora nk’ekyererezi nyekiro.
2 Paulo naabaasa kuba yaakomirwe omurundi gwa kabiri omuri Rooma omu bwire obu obugumire. Mbwenu shi abandi bakaamuhwereire? Paulo naabaasa kuba yaabandize kwerarikirira, ahakuba akahandiikira Timoseo ati: “Omu kwetonganira kwangye okw’okubanza tihaine waanyemereireho, boona bakantsigaho. Ninshaba ngu batarikiturwa.” Kwonka nabwo, Paulo akamanya ngu haine owaabaire naabaasa kumuhwera. Akahandiika ati: “Kwonka Mukama waitu akanyemerera haihi.” Buzima, Mukama Yesu akaha Paulo amaani agu yaabaire naayenda. Akagasirwa ata omu buhwezi oburikuruga ahari Ruhanga? Naagira ati: “Nkashahurwa omu kanwa k’entare.”—2 Tim. 4:16, 17. *
3 Okwijuka ekyo kishemereire kuba kyahuumuriize Paulo, kikamuhwera kwesiga Yehova ngu naija kumugumya kubaasa kugumisiriza okugyezibwa okwabaire kuriho, n’okwakubaireho omu biro by’omumaisho. Kandi akoongyera yaagira ati: “Mukama waitu aryaguma ankize omu kabi koona.” (2 Tim. 4:18) Buzima, Paulo akeega ngu n’obu obuhwezi bw’abantu buraabe butarikumara, obuhwezi bwa Yehova n’obw’Omwana we nibuba buri obwabuzima!
OBWIRE ‘BW’OKWESIGA YEHOVA’
4, 5. (a) Butoosha n’oha orikubaasa kukuha obuhwezi oburikwetengyesa? (b) Noobaasa kuhamya ota omukago gwawe na Yehova?
4 Obumwe noohurira ori wenka waaba ori omu mbeera egumire? Embeera egyo neebaasa kutwariramu okuburwa omurimo, okugyemeserezibwa aha ishomero, amagara mabi, nari okugira amaganya. Obundi noobaasa kuba nooyenda obuhwezi, kwonka otarikubaasa kubutunga ahabw’okugira ngu abandi tibaine byona ebi orikwenda. Buzima, oburemeezi obumwe tiburikubaasa kumarwaho abantu buntu. Mbwenu shi waaba ori omu mbeera nk’egyo, obuhabuzi bwa Baibuli oburikugira ngu “yesigye” Yehova noobaasa kugira ngu tiburikukora? (Enf. 3:5, 6) Mbwenu shi tibwine makuru? Ngaaha buzima! Obuhwezi bwa Ruhanga n’obwabuzima, nk’oku kirikworekwa omu Byahandiikirwe bingi.
5 N’ahabw’ekyo, omu mwanya gw’okugira enziika abantu baaba batakuhwereire nk’oku orikwenda, reeba embeera egyo nka Paulo owaagireebire nk’omugisha gw’okwesigira kimwe Yehova, kandi akareeba obuhwezi bwe. Eki nikiija kukuhwera kwongyera kumwesiga kandi omukago gwawe nawe nigwija kuba ogwabuzima.
OBWESIGWA NI BUKURU OMU MUKAGO GWAITU NA RUHANGA
6. Ahabw’enki kirikubaasa kuguma kwesiga Yehova omu bwire bw’oburemeezi?
6 Ekirikukwerarikiriza noobaasa kukigambira Yehova omu kushaba, reero bwanyima ogire obusingye, orikumanya ngu waakora kyona ekirikubaasika aha mbeera egyo? Buzima, noobaasa! (Shoma Zaaburi 62:8; 1 Petero 5:7.) Okwega kukora ekyo ni kikuru omu kugira omukago murungi na Yehova. Kwonka, okwesiga Yehova ngu naija kukuha eki orikwenda, nikibaasa kuguma. Ahabw’enki? Enshonga emwe neebaasa kuba eri ngu Yehova tarikugarukamu okushaba kwawe ahonaaho.—Zab. 13:1, 2; 74:10; 89:46; 90:13; Hab. 1:2.
7. Ahabw’enki Yehova atarikugarukamu buri kushaba kwaitu kwona ahonaaho?
7 Ahabw’enki Yehova atarikutugarukamu ahonaaho buri kyona eki turikumushaba? Ijuka ngu naagyeragyeranisa omukago gwaitu nawe nk’ogw’omuzaire n’omwana we. (Zab. 103:13) Omwana tashemereire kuteekateeka ngu kyona eki arikushaba ishe naija kukimuha ahonaaho. Abaana ebi barikushaba obumwe nibiba bitari bikuru. Ebimwe ebi barikushaba nibabaasa kutabiheebwa kuhitsya obwire obuhikire. Kandi ebindi nibibaasa kuba bitarikugasira abaana abo, nari abandi abu kirikukwataho. Okwongyera ahari ekyo, okuha omwana buri kimwe eki arikushaba nikibaasa kureetera omwana kuteekateeka ngu niwe mukama w’omuzaire we. Nikyo kimwe, Yehova naabaasa kureka obwire kuhinguraho atakagarukiremu kushaba kwaitu ahabw’oburungi bwaitu. Omuhangi waitu ow’obwengye kandi Tataitwe, naamanya obwire burungi bw’okutuha ebi turikuba tumushabire. Yaahikiiriza buri kimwe eki turikumushaba ahonaaho, nikibaasa kushiisha omukago ogu twine nawe.—Gyeragyeranisa Isaaya 29:16; 45:9.
8. Yehova naatuhamiza ki aha bikwatiraine n’obugarukiro bwaitu?
8 Enshonga endiijo eri ngu Yehova naamanya obugarukiro bwaitu. (Zab. 103:14) N’ahabw’ekyo, naamanya ngu titurikubaasa kugumisiriza ahabw’amaani gaitu, kureka naatuha obuhwezi nk’omuzaire. Kwonka, obumwe nitubaasa kwehurira ngu titurikubaasa kweyongyera omu maisho. Yehova naatuhamiza ngu tarikwija kureka abaheereza be kuhikwaho eki batarikubaasa kwemera. Buzima, naija kututeeraho “oburyo bw’okuhunga.” (Shoma 1 Abakorinso 10:13.) N’ahabw’ekyo, twine enshonga ehikire kwesiga Yehova ahakuba naamanya eki turikubaasa kugumisiriza.
9. Twine kukora ki twaba tutatungire buhwezi ahonaaho twaheza kushaba?
9 Twaba tutatungire buhwezi ahonaaho bwanyima y’okushaba, ka tuteereho kutegyereza Ogwo orikumanya obu aine kutugarukamu. Ijuka ngu Yehova aine ekyetengo ky’okutuhwera, kwonka naaba ategyereize obwire burungi kutuha eki turikwenda. Nikyo Yehova arikugumisiririza “ngu abagirire embabazi, kandi nikyo ariheerwa ekitiinisa, ngu abagirire esaasi; ahabw’okuba” Yehova “ni Ruhanga ocwa emanja z’oburyo, abarikumutegyereza boona baine omugisha.”—Isa. 30:18.
‘AKANWA K’ENTARE’
10-12. (a) Embeera nizibaasa kuguma zita Omukristaayo yaaba arwarize omunyabuzaare oine endwara etarikurahuka kukira? (b) Okwesiga Yehova omu bwire bugumire nikukwata kuta aha mukago gw’omuntu na Yehova? Shoboorora.
10 Waaba oine oburemeezi, noobaasa kuba nka Paulo oyehurire nk’ori “omu kanwa k’entare” nari nk’ori haihi nako. Obu nibwo bwire obu kirikuba kigumire kwesiga Yehova, kandi nibwo kirikuba kiri kikuru kumwesiga. Nk’eky’okureeberaho, noobaasa kuba orwarize omwe aha b’omu ka yaawe oine endwara etarikukira juba. Obundi oshabire kutunga obwengye n’amaani. * Bwanyima y’okukora kyona ekirikubaasika omu nshonga egi, noohurira waatunga obusingye ahabw’okumanya ngu Yehova naakureeba kandi ngu naija kukuhwera kugumisiriza?—Zab. 32:8.
11 Embeera ezimwe nizibaasa kukureetera kuteekateeka ngu Yehova tarikukuhwera. Noobaasa kutunga ebiteekateeko bitarikushushana kuruga aha bashaho. Nari abanyabuzaare abu orikuteekateeka ngu nibaija kukuhuumuriza, nibabaasa kureetera embeera kweyongyera kuguma. Guma nooyesiga Yehova kukuha amaani. Yeyongyere kumwirira haihi. (Shoma 1 Samueli 30:3, 6.) Waatunga obuhwezi, omukago gwawe na Yehova nigwija kuhama.
12 Linda * akeetegyereza ngu eki kihikire bwanyima y’okumara emyaka arikureeberera abazaire batakafiire. “Omu mbeera egyo, nyowe, ibanyi, na munyaanyazi, tukaba tushanga kigumire kumanya eky’okukora. Obumwe tukaba tuhurira tutaine buhwezi. Kwonka ku turikureeba enyima, nitwetegyereza gye ngu Yehova akaba ari naitwe. Akatugumya kandi yaatuha ebi twabaire nitwetenga byenyine, nangwa n’obu twabaire tuba tutarikumanya eky’okukora.”
13. Okwesiga Yehova kukahwera kuta munyaanyazi-itwe omwe kugumisiriza oburemeezi bukurataine?
13 Okwesigira kimwe Yehova nikubaasa kuhwera n’omu bwire bw’okugwerwa akagwe. Obu iba Rhonda otari Mujurizi wa Yehova yaabaire naagambira Rhonda ngu bagaitururwe, munyaanya akaba aceebeirwe ashangirwe aine endwara y’amaani erikwetwa lupus erikushiisha oruhu rw’omubiri. Bwanyima y’ameezi makye, munyaanya akafa. Rhonda ku yaatandikire kuruga omu buremeezi obu, akaba payoniya ow’obutwire. Kwonka bwanyima, nyina akafa. Niki ekyahwereire Rhonda kugumisiriza? Naashoboorora ati: “Nkaba ngamba na Yehova buri izooba, nangwa na naaba nyine obuntu bukye bw’okucwamu. Okukora ekyo kukandeetera kureeba Yehova nk’owaabuzima. Nkeega kwesiga Yehova omu mwanya gw’okweyesiga nari okwesiga abantu. Obuhwezi obu yaampaire bukaba buri obwabuzima, kandi ebi naabaire niinyenda byona akabimpa. N’ekyarugiremu, nkabaasa kukora hamwe na Yehova.”
Nangwa n’omu ka, nitubaasa kutunga oburemeezi oburikugyeza omukago gwaitu na Yehova (Reeba akacweka 14-16)
14. Omukristaayo ou omunyabuzaare we abingirwe naabaasa kugira bwesigye ki?
14 Yetegyereze embeera endiijo. Ka tugire ngu omunyabuzaare omukundwa abingirwe omu kibiina. Kuruga omu kweyegyesa Baibuli, noomanya oku ababingirwe bashemereire kutwarizibwa. (1 Kor. 5:11; 2 Yoh. 10) Kwonka, obumwe okukuratira obuhabuzi oburikukwata aha kubingwa nikibaasa kuguma, nangwa kireebekye nk’ekitarikubaasika. * Noobaasa kwesiga Sho ow’omu iguru ngu naija kukuha amaani kumariirira kuha ekitiinisa obuhabuzi bwa Baibuli oburikukwata aha kubingwa? Omu nshonga egi nooreeba omugisha gw’okwongyera kuhamya omukago gwawe na Yehova orikumwirira haihi?
15. Ahabw’enki Adamu yaagomiire ekiragiro kya Yehova omuri Edeni?
15 Omu nshonga egi, banza oteekateekye aha mushaija w’okubanza, Adamu. Mbwenu shi akaba naateekateeka ngu naabaasa kugomera Yehova kandi agumeho ahuriire? Ngaaha, ahakuba Ebyahandiikirwe nibitworeka ngu Adamu “tiwe yaabeihabeihirwe.” (1 Tim. 2:14) Mbwenu shi ahabw’enki yaagomire? Adamu naabaasa kuba yaariire aha kijuma eki Haawa yaamuhaire ahabw’okugira ngu akaba naakunda omukazi we. Akahurikiza eiraka ry’omukazi we omu mwanya gw’erya Ruhanga we Yehova.—Kut. 3:6, 17.
16. N’oha ou tushemereire kukunda munonga, kandi n’ahabw’enki?
16 Mbwenu shi eki nikimanyisa ngu titwine kugirira abanyabuzaare rukundo mpango? Ngaaha buzima! Kwonka Yehova niwe tushemereire kukunda munonga kukira abandi. (Shoma Matayo 22:37, 38.) Ahakuba eki n’eky’oburungi bw’abanyabuzaare baitu, yaaba hati nibaheereza Yehova nari batarikumuheereza. N’ahabw’ekyo yeyongyere kukunda Yehova n’okumwesiga. Kandi ku oraabe oine obusaasi ahabw’okugira ngu omunyabuzaare akabingwa, kigambire Yehova omu kushaba. * (Rom. 12:12; Fil. 4:6, 7) Koresa embeera egi egumire kwongyera kugira omukago ogwabuzima na Yehova. Eki nikikuhwera kwesiga Yehova ngu niwe arikubaasa kukuha ebirungi.
OKUGUMA TUTEGYEREIZE
Yoreka ngu nooyesiga Yehova orikuguma oine bingi by’okukora omu murimo gwe (Reeba akacweka 17)
17. Twaguma turi abeeziriki omu kubuurira aha Bukama, nitworeka tuta ngu nitwesiga Yehova?
17 Ahabw’enki Paulo yaashahwirwe “omu kanwa k’entare”? Naagira ati: “Ngu mbone kugambira kimwe ekigambo kya Ruhanga, Abanyamahanga boona bakihurire.” (2 Tim. 4:17) Naitwe nka Paulo, twagira bingi by’okukora omu murimo gw’okubuurira, nitwesiga ngu Yehova naija kuhamya ngu ebindi “byona” ebirikwetengyesa twabyongyerwaho. (Mat. 6:33) Ahabw’okugira ngu turi ababuurizi b’Obukama, tukwatsiibwe amakuru marungi kandi nitubarwa ‘nk’abarikukora kumwe’ na Yehova. (1 Tes. 2:4; 1 Kor. 3:9) Twaguma turi abeeziriki omu murimo gwa Ruhanga, nikiija kutworobera kutegyereza kuhitsya obu turaatungye oburuhuuko.
18. Nitubaasa kwongyera tuta kwesiga Yehova n’okuhamya omukago gwaitu nawe?
18 Hati ka tukorese obwire obu twine kuhamya omukago gwaitu na Ruhanga. Haagira ekyakwerarikiriza, koresa omugisha ogwo kwirira haihi na Yehova. Buzima, twayega Ekigambo kya Ruhanga, tukaguma nitushaba, tukaba abeeziriki omu buheereza, nituba twine kwesiga Yehova ngu naareeba ebi turikukora, kandi naija kuturabya omu mbeera ezi turimu hati n’ezo eziri omumaisho.
^ rup. 2 ‘Akanwa k’entare’ aku Paulo yaashahwirwemu nikabaasa kuba kaabaire kari ak’entare yenyine nari shi akaba naagambira omu nfumu.
^ rup. 10 Hashohoziibwe ebicweka bingi kuhwera Abakristaayo kugumisiriza endwara hamwe n’obuhwezi bw’abo abarikubareeberera. Reeba Awake! eya Febwari 8, 1994; Febwari 8, 1997; Mei 22, 2000; na Jenwari 22, 2001,
^ rup. 12 Amaziina gahindwirwe.
^ rup. 14 Reeba ekicweka, “Ekirikureetera Okubingwa Kuba Entebeekanisa ya Rukundo,” omu munaara ogu.
^ rup. 16 Hashohoziibwe ebicweka bingi kuhwera abo abu abanyabuzaare baabo barugire ahari Yehova. Reeba Watchtower eya Seputemba 1, 2006 orupapura 17-21, n’eya Jenwari 15, 2007 orupapura 17-20.
