1. Niki ekirikubaasa kutuhwera kugira emitwarize nk’eya Ruhanga?

YEHOVA akatuhanga turikubaasa kweta omu mbeera y’abandi. Nitubaasa kuteeraho kwetegyereza embeera etakatuhikahoga. (Shoma Abaefeso 5:1, 2.) Nitubaasa kukoresa gye tuta ekiconco eki kuruga ahari Ruhanga? Tushemereire kukora ki kureeba ngu ti kyaba ky’akabi ahariitwe?

2. Yehova naakwatwaho ata twaba nitubonabona?

² Hatariho kubanganisa, twine okushemererwa ahabw’okugira ngu Ruhanga aragaaniise abashukirweho amajuta abeesigwa okutunga amagara agatahwaho omu iguru ‘n’ab’entaama ezindi’ bakatuura omu nsi. (Yoh. 10:16; 17:3; 1 Kor. 15:53) Abaraatungye amagara agatahwaho omu iguru nari omu nsi tibarikwija kuba nibabonabona nk’oku turikubonabona hati. Yehova naamanya obusaasi obu twine nk’oku yaabaire naamanya obw’Abaisraeli obu baabaire bari abahuuku omuri Misri. Buzima, “omu kubonabonesibwa kwabo kwona nawe akabonabonesibwa.” (Isa. 63:9) Bwanyima, Abayudaaya bakaba batiinire okuhakanisibwa kw’abazigu  baabo, obu baabaire nibaza kugaruka kwombeka hekalu, kwonka Ruhanga akabagira ati: “Obakoraho aba akozire aha mboni y’eriisho rye.” (Zek. 2:8) Nk’oku nyina omwana arikugirira rukundo omwana we, Yehova nawe naaba naayenda kuhwera abantu be. (Isa. 49:15) Ekirikumanyisa ngu Yehova naayeta omu mbeera ezi abantu be barikuba barimu, kandi naitwe naatuha obushoboorozi bw’okweta omu mbeera z’abandi.—Zab. 103:13, 14.

3. Niki ekirikworeka ngu Yesu akaba aine embabazi?

³ Yesu akaba amanya oburemeezi bw’abandi, otwariiremu n’abo abaabaire bari omu mbeera ezi atakabamuga. Nk’eky’okureeberaho, abantu ba buriijo bakaba nibatiina abeebembezi b’ediini, abaabaire nibababeiha kandi barikubateeraho ebiragiro bingi eby’abantu buntu. (Mat. 23:4; Mak. 7:1-5; Yoh. 7:13) Yesu taratiinire kandi tarabeihirwe, kwonka akaba naabaasa kwetegyereza embeera etakamuhikahoga. N’ahabw’ekyo, “ku yaareebire emitwe y’abantu, yaabagirira esaasi, ahakuba bakaba baburaburiirwe, bashobeirwe nk’entaama ezitaine muriisa.” (Mat. 9:36) Yesu akaba aine rukundo n’embabazi nka Ishe.—Zab. 103:8.

4. Yesu ku yaareebire abantu nibabonabona akakwatwaho ata?

⁴ Yesu ku yaabaire areeba abantu nibabonabona, akaba ayoreka ngu naabakunda. N’ahabw’ekyo, akooreka rukundo nka Ishe. Yesu n’abeegi be bwanyima y’okugyenda orugyendo ruraingwa barikubuurira, bakaba nibenda kwehereera bakahuumuraho. Yesu ahabw’okugirira esaasi abantu abaabaire bamutegyereize, akatwara obwire “yaatandika kubeegyesa bingi.”—Mak. 6:30, 31, 34.

5, 6. Kubaasa kugira rukundo nk’eya Ruhanga, twine kutwariza tuta abataahi? Shoboorora. (Reeba ekishushani aha kutandika.)

⁵ Nitubaasa kworeka rukundo nk’eya Yehova omu muringo ogu turikutwarizamu bataahi baitu. Nk’eky’okureeberaho: Ka tugire ngu Ow’eishe-emwe omunyeeto, orikwetwa Alan, ariyo naateekateeka aha w’eishe-emwe okuzire munonga, ou amaisho ge garikuremesa kureeba gye. Kandi nikimugumira kuza kubuurira enju aha nju. Alan aijuka ebigambo bya Yesu ebi: “oku mwenda abantu kubagirira, naimwe mube nikwo mwabagirira.” (Luk. 6:31) Alan ayebuuza ati: ‘Niki eki ndikwenda ngu abantu baankorere?’ Agarukamu omu mazima ngu, ‘niinyenda ngu bazaane naanye omupiira!’ Kwonka ow’eishe-emwe okuzire munonga tarikubaasa kuzaana omupiira, tikwo? Ebigambo bya Yesu nibimanyisa ngu twine kwebuuza tuti, ‘Niki eki naakwenzire ngu bataahi bangye bankorere ku ogire ngu ndi omu mbeera ezi barimu?’

⁶ Alan n’omunyeeto, kwonka naabaasa kwetegyereza embeera ezi atakabamuga. Naayetegyereza ow’eishe-emwe ogwo okuzire munonga kandi amuhurikiza arikumufaho. Mporampora, Alan naayetegyereza embeera y’omuntu orikuba akuzire munonga orikugumirwa kushoma Baibuli nari kugyenda enju aha nju. Alan ku arikumanya amaganya agu ow’eishe-emwe ogwo aine, naareeba eki arikwetenga, kandi ayenda kumuhwera. Naitwe ekyo nikyo twine kukora. Kubaasa kugira rukundo nk’eya Ruhanga, twine kwetegyereza embeera ei ab’eishe-emwe barimu.—1 Kor. 12:26.

7. Nitubaasa kumanya gye tuta embeera z’ab’eishe-emwe?

⁷ Butoosha tikyorobi kwetegyereza embeera ei abandi barikuba barimu.  Abantu baingi nibatunga oburemeezi obu itwe tutakatungaga. Abamwe baine oburemeezi ahabw’obuhuta obu baine, endwara nari okukura munonga. Abandi nibeehurira kubi ahabw’amaganya, okutaahirirwa, nari ahabw’okutwarizibwa kubi. Kandi abandi bari omu ka ei batarikushushanisa diini nari baine omuzaire omwe. Abantu boona nibaba baine oburemeezi, kandi obumwe oshanga iwe otakatungahoga oburemeezi nk’obwo. Omu mbeera nk’ezo, nitubaasa kworeka tuta rukundo nk’eya Ruhanga? Twine kuhurikiza gye kuhitsya obu turaamanye enyehurira y’abandi. Eki nikiija kutuhiga kworeka rukundo nk’eya Yehova turikugira eki twakora. Abantu baine ebyetengo bitarikushushana, kwonka nitubaasa kubaha obuhabuzi kandi tugire n’eki twakora.—Shoma Abarooma 12:15; 1 Petero 3:8.

8. Niki ekyahwereire Yesu kworeka embabazi?

⁸ Omwana wa Ruhanga akagira ati: “Rukira-boona . . . akorera gye abatasiima n’ababi.” (Luk. 6:35) Buzima, Yesu akaba aine embabazi nk’eza Ruhanga. Niki ekyamuhwereire kukora ekyo? Akaba atwariza abantu n’embabazi arikufayo oku ebigambo bye n’ebikorwa bye biraakwate aha nyehurira zaabo. Nk’eky’okureeberaho, omukazi owaabaire naamanywa nk’enkozi y’ebibi akaija ahari Yesu, arikurira kandi yaajubya ebigyere bye n’amarira ge. Yesu akeetegyereza ngu ayeteisize, kandi akaba naamanya oku arikubaasa kwehurira yaamubinga. Omu mwanya gw’ekyo, akamusiiima kandi y’amusaasira. Omufarisaayo ku yaayorekire ngu tarikusiima ekyabaho, Yesu nawe akamugarukamu n’embabazi.—Luk. 7:36-48.

9. Niki ekirikubaasa kutuhwera kugira embabazi nk’eza Ruhanga? Ha eky’okureeberaho.

⁹ Nitubaasa kugira tuta embabazi nk’eza Ruhanga? Entumwa Paulo akahandiika ati: “Omuhuuku wa Mukama tashemereire kuba entongani, kureka orikutwaza gye ahari boona.” (2 Tim. 2:24) Abantu abaine okwetegyereza, omu mbeera egumire nibateeraho kutagwisa kubi abandi. Teekateeka aha ku turikubaasa kworeka embabazi, ka tugire ngu aha murimo orikutwebembera tarikukora gye murimo gwe. Nitubaasa kutwaza tuta? Ow’eishe-emwe omazire ameezi maingi atarikwija mu nteerane. Nitwija kugamba nawe tuta? Omu kubuurira, ou orikubuurira yaagira ati, “Nyine bingi by’okukora hati tindikubaasa kugaaniira naimwe.” Nitwija kworeka ngu nitufayo? Omuka, ou ori nawe omu bushwere yaabuuza ati: “Noobaasa kungambira entebeekanisa yaawe y’Orwamukaaga?” Noija kumugarukamu n’embabazi? Twayeta omu mwanya gw’abandi tukateekateeka oku ebigambo byaitu birikubaasa kubakwataho, nitubaasa kwetegyereza oku turaagambe kandi tukatwaza omu muringo ogurikworeka ngu twine embabazi nka Yehova.—Shoma Efumu 15:28.

10, 11. Niki ekirikubaasa kutuhwera kugira obwengye nka Yehova? Ha eky’okureeberaho.

¹⁰ Okubaasa kwaitu kw’okumanya embeera ei tutakabamuga nikubaasa n’okutuhwera kugira obwengye nka Yehova, reero tumanye kare ebirikubaasa kuruga omu bi turikukora. Yehova aine obwengye bwingi, kandi yaayenda naabaasa n’okureeba ebirikubaasa kubaho omu biro by’omumaisho. Itwe titwine bushoboorozi bw’okumanya ebiraabeho omu biro by’omumaisho, kwonka nituba twine kuteekateeka aha kirikubaasa kuruga omu bi turiyo nituza kukora. Abaisraeli tibarateekateekire aha byabaire nibibaasa kuruga omu kugomera Ruhanga kwabo. N’obu Ruhanga araabe yaabaire abakoreire bingi, Musa akaba naamanya ngu bakaba  nibaija kukora ebi Yehova arikwanga. Omu maisho g’eihanga ryona erya Israeli, akagarukamu ebigambo by’ekyeshongoro ebi: “N’eihanga ry’abantu abatagira naama; kandi abataine kwetegyereza. Kuri baabaire baine obwengye! Bakaayetegyereize eki. Bateekateeka aha by’omuheru gwabo.”—Bir. 31:29, 30; 32:28, 29.

¹¹ Kubaasa kutooreza Ruhanga omu kugira obwengye, twine kuteekateeka nari tukateera akashushani aha birikubaasa kuruga omu bikorwa byaitu. Nk’eky’okureeberaho, waaba nooriima, ijuka ngu waakunda omuntu munonga kigumire kurinda enyehurira yaawe n’ekyetengo ky’okuteerana. N’ahabw’ekyo yerinde kukora ekintu kyona ekirikubaasa kushiisha omukago gwawe na Yehova! Omu mwanya gw’ekyo, gyendera aha bigambo ebi: “Omwerinzi ku areeba akabi kaija, ayeshereka; kwonka otaine bwengye akeegyema, kamwita.”—Enf. 22:3.

12. Okuteekateeka nikubaasa kuba kuta okw’akabi ahariitwe?

¹² Omwerinzi naaba naamanya ngu okuteekateeka nikubaasa kugyeragyeranisibwa n’omuriro. Omuriro gwakoresibwa gye, niguba ogw’omugasho nk’omu kuteeka eby’okurya. Kwonka omuriro nigubaasa kuba ogw’akabi gwaba gutakoresiibwe gye, nigubaasa kwotsya enju abantu bafe. Omu muringo nigwo gumwe, ni kirungi okuteekateeka aha kintu ekirikubaasa kutuhwera kutooreza Yehova. Kwonka nikiba kiri eky’akabi kyakureetera kugira ebyetengo bibi. Nk’eky’okureeberaho, ku turikuguhindura omuze kuguma nituteekateeka aha kukora ebibi, nikibaasa kutureetera kuhikiiriza ekyo eki tutwire nituteekateekaho. Buzima, okuguma nituteekateeka aha bintu bibi nikibaasa kuba eky’akabi omu by’omwoyo!—Shoma Yakobo 1:14, 15.

13. Haawa akateera akashushani arikubaasa kutuura mu mbeera ki?

¹³ Teekateeka ahari Haawa omukazi w’okubanza, akagira ekyetengo ky’okurya aha muti ogu baabaire bazibiirwe, ‘ogw’okumanya oburungi n’obubi.’ (Kut. 2:16, 17) Enjoka ekamugira eti: “Okufa kwo, buzima timurifa; Ahabw’okuba Ruhanga naamanya ngu eizooba rimuriguryaho, amaisho gaanyu garyaiguka, naimwe mube nka Ruhanga, mumanye oburungi n’obubi. Omukazi ku yaarebire omuti guri murungi kurya, nigushemeza amaisho.” Niki ekyarugiremu? Akacwa “aha bijuma byagwo yaarya yaahaho na iba nawe yaarya.” (Kut. 3:1-6) Haawa akareeba hariho ekintu ekirikushemeza omu bi Sitaane yaamugambiire. Omu mwanya gw’okugambirwa ekiri kibi n’ekirungi, akaba naabaasa kwecweramu. Ka yaacwiremu kubi  buzima! Kurabira omuri Adamu, omushaija we owaasiisire, ‘ekibi kikaija omu nsi kandi kyarugamu okufa.’—Rom. 5:12.

14. Baibuli neetuhwera eta kwetantara emitwarize mibi?

¹⁴ Ekibi eki Haawa yaakozire omu musiri Eden bukaba butari bushambani. Kwonka, Yesu akarabura aha kuteekateeka aha by’obushambani. Akagira ati: “Orikureeba omukazi akamwetenga, biri aherize kumushambanaho omu mutima gwe.” (Mat. 5:28) Paulo nawe akarabura ati: “Mutaha omubiri rwekwatso kukora ebi gurikwetenga.”—Rom. 13:14.

15. Twine kwebiikira eitungo rya muringo ki, kandi ahabw’enki?

¹⁵ Emiteekateekyere ey’akabi endiijo n’okuteekateeka aha kuba omugaiga otarikufayo ahari Ruhanga. Kwonka, obugaiga bw’omuntu omu kuteekateeka kwe “ni nk’orugo ruraingwa rw’amabaare orurikumurinda.” (Enf. 18:11) Yesu akaha eky’okureeberaho kworeka embeera mbi y’omuntu orikwebiikira “obutungi, haza atari mutungi ahari Ruhanga.” (Luk. 12:16-21) Yehova naashemererwa twakora ebintu ebirikumushemeza. (Enf. 27:11) Ka nitushemererwa twaba nitusiimwa Yehova ahabw’okwebiikira “eitungo omu iguru”! (Mat. 6:20) Kandi okugira omukago murungi na Yehova niryo eitungo rikuru eritushemereire kugira.

16. Nitubaasa kutuubya tuta okwerarikirira?

¹⁶ Teekateeka aha ku turikubaasa kwerarikirira twaba nituteeraho kwebiikira “eitungo omu nsi.” (Mat. 6:19) Yesu akakoresa eky’okureeberaho kworeka ngu “amaganya g’ensi n’okubeihwabeihwa obutungi bwayo” nibibaasa kuremesa ekigambo ky’Obukama. (Mat. 13:18, 19, 22) Yaaba nitwerarikirira aha sente nari ngaaha, abantu abamwe nibateekateeka aha bintu bibi ebirikubaasa kubaho. Kwonka, okwerarikirira ekirenga nikibaasa kuba eky’akabi aha magara gaitu n’omu by’omwoyo. Ka twesigye Yehova kandi twijukye ngu “amaganya g’omutima gw’omuntu gaamureetera okweyinamirira, kwonka ekigambo kirungi kigushemeza.” (Enf. 12:25) Ebigambo birungi ebirikuhuumuriza kuruga aha muntu orikutwetegyereza, nibibaasa kutureetera kushemererwa. Okwesiga abazaire baitu, abu turi nabo omu bushwere, nari abanywani abaine emiteekateekyere nk’eya Ruhanga nikibaasa kutuhwera kutuubya okwerarikirira.

17. Yehova naatuhwera ata kusingura okwerarikirira?

¹⁷ Tihariho orikwetegyereza okwerarikirira kwaitu kukira Yehova. Paulo akahandiika ati: “Muteemereza omutima aha kintu kyona, kureka omuri byona mumanyise Ruhanga ebi murikwetenga omu kushaba n’okweshengyereza, kandi musiime. Kandi obusingye bwa Ruhanga oburengire okwetegyereza kw’omuntu weena, buryaguma burinde emitima yaanyu n’obwengye bwanyu omuri Kristo Yesu.” (Fil. 4:6, 7.) Teekateeka ahari abo abarikuteeraho kuturinda akabi k’eby’omwoyo nk’ab’eishe-emwe bagyenzi baitu, abareeberezi, omwambari omwesigwa, baamaraika, Yesu, na Yehova.

18. Okuteekateeka nikubaasa kutuhwera kuta?

¹⁸ Nk’oku twareeba, okuteekateeka nikubaasa kutuhwera kutooreza Ruhanga omu kugira emitwarize nka rukundo. (1 Tim. 1:11; 1 Yoh. 4:8) Nitwija kushemererwa twagira rukundo, tukateekateeka aha birikubaasa kuruga omu bi turikukora, kandi tukeetantara okwerarikirira okurikuturemesa kushemererwa. N’ahabw’ekyo ka tukorese gye okubaasa kwaitu okw’okuteekateeka aha biri omumaisho oku Ruhanga atuhaire, kandi tumutooreze omu kugira rukundo, embabazi, obwengye, n’okushemererwa.—Rom. 12:12.