Okumara emyaka mingi, ebitabo byaitu bitwire nibishoboorora ngu Googi owa Magoogi n’eiziina eryahairwe Sitaane Omuregi bwanyima y’okubingwa omu iguru. Enshoboorora egi ekaba neihirira aha buhame oburi omu kitabo kya Okushuuruurwa oburikworeka ngu Sitaane Omuregi niwe arikwebembera okutaahirira abaheereza ba Ruhanga omu nsi yoona. (Kush. 12:1-17) N’ahabw’ekyo, kikaba nikiteekateekwa ngu Googi n’eiziina erindi ery’obunabi erya Sitaane.

Kwonka, enshoboorora egi ekareetaho ebibuuzo bikuru. Ahabw’eki? Teekateeka ahari eki: Yehova arikugamba aha bunaku obu Googi araasingurwe, naagira ngu ndyakugaburira “amahungu g’emiringo yoona n’enyamaishwa mbi, bikugaashe.” (Ezk. 39:4) Yehova naayongyeraho ati: “Eryo izooba ndyaha Googi ah’okuziikwa omuri Israeli. . . . Okwo niyo bariziika Googi n’enyanja y’abantu be boona.” (Ezk. 39:11) Kwonka shi ekihangirwe ky’omwoyo nikibaasa kuriibwa kita “amahungu g’emiringo yoona n’enyamaishwa”? Sitaane naabaasa kuheebwa ata “ah’okuziikwa” omu nsi? Baibuli neegamba butunu ngu Sitaane naija kubohwa kumara emyaka 1000, tarikwija kuriibwa nari kuziikwa.—Kush. 20:1, 2.

Nitumanya gye ngu bwanyima y’emyaka 1,000, Sitaane naija kubohororwa, kandi “aze kubeihabeiha amahanga agari aha mbaju ina ez’ensi, Googi na Magoogi, okubateerana hamwe kurwana.” (Kush. 20:8) Kwonka shi Sitaane naabaasa kubeihabeiha ata Googi we wenyini ku araabe ari Googi? N’ahabw’ekyo, Googi orikugambwaho omu kitabo kya Ezekieli nari omu ky’Okushuuruurwa buzima ti Sitaane.

Mbwenu shi, Googi owa Magoogi n’oha? Kubaasa kugarukamu ekibuuzo eki, twine kushwijuma Ebyahandiikirwe tukamanya orikurwanisa abantu ba Ruhanga. Baibuli terikugamba aha kutaahirira kwa ‘Googi owa Magoogi’ kwonka, beitu n’aha kutaahirira ‘kw’omugabe wa bukiizi-bwa-bumosho’ hamwe n’okutaahirira ‘kw’abagabe b’ensi.’ (Ezk. 38:2, 10-13; Dan. 11:40, 44, 45; Kush. 17:14; 19:19) Oku shi n’okutaahirira kutarikushushana? Ngaaha. Hatariho kubanganisa Baibuli neemanyisa okutaahirira nikwo kumwe kwonka erikukoresa amaziina gatarikushushana. Ahabw’enki nitugira tutyo? Ahabw’okuba Ebyahandiikirwe nibitugambira ngu amahanga goona ag’omu nsi nigaija kwejumba omu kutaahirira okw’aha muheru okurikwija kureetera orutaro Haramagedoni kutandika.—Kush. 16:14, 16.

Ku turikugyeragyeranisa Ebyahandiikirwe ebirikugamba aha kutaahirirwa kw’abaheereza  ba Ruhanga, nitureeba ngu Googi owa Magoogi t’eiziina rya Sitaane, kureka n’amahanga agaraabe gakwataniise hamwe. Mbwenu shi okukwatanisa oku nikuza kwebemberwa omugabe wenyine ‘ow’obukiizi-bwa-bumosho’? Ekyo titurikubaasa kukihamya butunu. Kwonka eki nikihikaana n’eki Yehova arikugamba ahari Googi ati: “Orugye omu mwanya gwawe gw’omu bicweka by’aha muheru gw’obukiizi-bwa-bumosho, iwe n’amahanga maingi agari hamwe naiwe, boona bari aha mbaraasi eihe rihango kandi ry’amaani.”—Ezk. 38:6, 15.

Nikyo kimwe, nabi Danieli, owaabaire ariho omu bwire bwa Ezekieli, naagamba aha mugabe wa bukiizi-bwa-bumosho ati: “Kwonka bwanyima amakuru agariruga oburugwa izooba n’aha bukiizi-bwa-bumosho garyamwemereza omutima, ahurure n’ekiniga kingi kuhwerekyereza baingi n’okubamariraho kimwe. Aryateera amahema ge g’obugabe ahagati y’enyanja n’orushozi orurikwera orw’ekitiinisa; kwonka aryahika aha muheru gw’amagara ge, ataine kihwera.” (Dan. 11:44, 45) Eki nikihikaana n’ebiri omu kitabo kya Ezekieli ebirikugamba aha bikorwa bya Googi.—Ezk. 38:8-12, 16.

Niki ekindi ekirarugye omu kutaahirirwa oku okw’aha muheru? Danieli naatugira ati: “Omu bunaku obwo Mikaeli [Yesu Kristo], omukuru rugambwa oreeberera abantu baawe, aryaimuka [kuruga 1914], habeho obunaku bw’obusaasi obutakabahoga [okubonabona kwingi], okwiha obu eihanga ryabaho okuhitsya obwo; kwonka omuri obwo bunaku, abantu baawe baryajunwa, weena ou eiziina rye ririshangwa rihandiikirwe omu kitabo.” (Dan. 12:1) Ekikorwa eki ekiraakorwe Yesu omujwekyerwa wa Ruhanga, nikishoboororwaho omu Okushuuruurwa 19:11-21.

Kwonka shi n’oha orikugambwaho nka “Googi na Magoogi” omu Kushuuruurwa 20:8? Omu kugyezibwa okw’aha muheru bwanyima y’emyaka 1000, abo abaraagomere Yehova nibaija kuba baayoreka emiteekateekyere y’obwinazi nk’eya ‘Googi na magoogi,’ amahanga agaraataahirire abaheereza ba Ruhanga aha muheru gw’okubonabona kwingi. Ekiraahikye aha bantu b’emiringo ebiri aba nikishushana, boona nibaija kucwekyerezibwa! (Kush. 19:20, 21; 20:9) Nikireebeka ngu kihikire kugira ngu abo abaraagome bwanyima y’emyaka rukumi ey’okutegyeka kwa Kristo nibeetwa “Googi na Magoogi.”

Itwe abeegi ba Baibuli abeeziriki, nitutegyereza n’ekihika omu bwire butari bwa hare kumanya orikwija kuba ‘omugabe w’obukiizi-bwa-bumosho.’ Weena oraayebembere amahanga agaraabe gakwataniise, twine obuhame aha bintu bibiri ebi: (1) Googi owa Magoogi n’amahe ge nibaija kusingurwa kandi bacwekyerezibwe; kandi (2) Omugabe waitu orikutegyeka, Yesu Kristo, naija kucungura abaheereza ba Ruhanga kandi abahitsye omu nsi ensya erimu obusingye n’oburinzi.—Kush. 7:14-17.