1. (a) Ahabw’enki okurwanisa Sitaane kiri kikuru hati? (b) Nitumanya tuta ngu nitubaasa kusingura Sitaane?

SITAANE naarwanisa abashukirweho amajuta abakiri omu nsi ‘n’ab’entaama ezindi.’ (Yoh. 10:16) Ekigyendererwa ky’Omuregi n’okuhabisa abaheereza ba Yehova baingi omu bwire bukye obu atsigaize. (Shoma Okushuuruurwa 12:9, 12.) Mbwenu shi nitubaasa kusingura Sitaane? Eego! Baibuli neegira eti: “Murwanise Sitaane, aryabahunga.”—Yak. 4:7.

2, 3. (a) Emiteekateekyere erikugira ngu Sitaane tariho neeshagika eta ebigyendererwa bye? (b) Noobaasa kumanya ota ngu buzima Sitaane ariho?

² Abantu baingi tibarikwikiriza ngu Sitaane ariho. Bo nibateekateeka ngu ebirikukwata ahari Sitaane na baadaimoni n’ebitebyo ebitahikire ebirikwizira omu bitabo, vidiyo n’emizaano erikutiinisa. Abantu nk’abo nibateekateeka ngu tihariho muntu oine obwengye orikubaasa kwikiririza omu bihangirwe eby’omwoyo ebibi. Nooteekateeka ngu Sitaane na baadaimoni nibafayo ahabw’okugira ngu abantu tibarikwikiriza ngu bariho? Ngaaha! Ahabw’okuba, nikyorobera Sitaane kuhumya emitima y’abantu abarikubangaanisa ngu ariho. (2 Kor. 4:4) Okureetera abantu kwikiriza ngu ebihangirwe eby’omwoyo tibiriho, n’omuringo gumwe ogu Sitaane abaasize kukoresa kuhabisa abantu.

 ³ Itwe abaheereza ba Yehova, tituri bamwe ahari abo abahabisiibwe Sitaane. Nitumanya ngu Omuregi ariho, ahabw’okuba Sitaane niwe yaagambire na Haawa arikukoresa enjoka. (Kut. 3:1-5) Sitaane akajuma Yehova ahabw’okuhikiirira kwa Yobu. (Yob. 1:9-12) Sitaane akateeraho kureetera Yesu kwohibwa. (Mat. 4:1-10) Kandi bwanyima y’Obukama bwa Ruhanga kutandika kutegyeka omuri 1914, Sitaane akatandika “kurwanisa” omukazi n’ab’oruzaaro rwe abaabaire bakiri omu nsi. (Kush. 12:17) Orutaro oru na hati rukiriho, ahakuba Sitaane naateeraho kushiisha okwikiriza kw’abo abakiri omu nsi aha 144,000 n’ab’entaama ezindi. Kubaasa kusingura orutaro oru, twine kurwanisa Sitaane kandi tukagira okwikiriza kuhami. Ekicweka eki nikyoreka emiringo eshatu oku turikubaasa kukikora.

4. Sitaane ayorekire ata ngu naayehimbisa?

⁴ Sitaane ti mucureezi na kakye. Ekihangirwe ky’omwoyo eki okuteeraho kuhakanisa obushoboorozi bwa Ruhanga obw’okutegyeka byona, n’okwenda ngu kiramibwe nka ruhanga, n’obuhame ngu kiine amaryo n’omweragiiro. N’ahabw’ekyo, omuringo gumwe ogu turikubaasa kurwanisa Sitaane n’okwetantara okwehimbisa tukaba abacureezi. (Shoma 1 Petero 5:5.) Okwehimbisa ni ki? Mbwenu shi okwehimbisa butoosha ni kibi?

5, 6. (a) Okwehimbisa butoosha ni kibi? Shoboorora. (b) Ni kwehimbisa ki okuri okw’akabi, kandi ni by’okureeberaho ki eby’omu Baibuli ebirikworeka eki?

⁵ Kashoboorozi emwe neeshoboorora ekigambo okwehimbisa “nk’okweha ekitiinisa” nari “okuhurira oine okumarwa ahabw’okugira ngu iwe nari abu orikumanya, baakora ekintu kirungi nari baine ekintu kirungi.” Okwehimbisa okw’omuringo ogwo ti kubi. Entumwa Paulo akagambira Abatesalonika ati: ‘Naitwe nitwehimbisa ahabwanyu omu bibiina bya Ruhanga, nitusiima okugumisiriza kwanyu n’okwikiriza kwanyu omu kuhiigwa n’omu kubonabona ebi mwemeire.’ (2 Tes. 1:4) Okusiima ebi abandi barikukora n’okwehimbisa omu muringo oguringaniire ti kibi. Titushemereire kuhemuka ahabw’amaka gaitu, enganda zaitu, nari ekicweka eki turikurugamu.—Byak. 21:39.

⁶ Kwonka hariho omuringo ogundi ogw’okwehimbisa ogurikubaasa kushiisha omukago gwaitu na Yehova. Okwehimbisa okwo nikubaasa kutureetera kubiika enziika tubaase kwanga obuhabuzi omu mwanya gw’okwecureeza tukabwikiriza. (Zab. 141:5) Omuringo ogu nigushoboororwaho “nk’okwetunguura” nari “okugira amaryo orikuteekateeka ngu nookira abandi.” Yehova naayanga amaryo. (Ezk. 33:28; Amo. 6:8) Kwonka Sitaane we naashemererwa kureeba abantu barikwetunguura kandi baine amaryo, ahakuba nawe nikwo ari. Sitaane aine kuba yaashemereirwe ku yaareebire abashaija nka Nimuroodi, Faraho, na Abusalomu barikwetunguura kandi baine amaryo! (Kut. 10:8, 9; Kur. 5:1, 2; 2 Sam. 15:4-6) Amaryo gakareetera Kaini kukora ekibi. Ruhanga akamuha obuhabuzi, kwonka ahabw’amaryo tarabaasize kubukuratira. Akanga kukuratira eki Yehova yaamugambiire atyo yaakora ekibi ky’amaani.—Kut. 4:6-8.

7, 8. (a) Okushoroora omu rangi niki, kandi nikubaasa kutureetera kuta kugira amaryo? (b) Shoboorora oku okwehimbisa kurikubaasa kushiisha obusingye bw’ekibiina.

⁷ Obunaku obu, abantu nibeehimbisa omu miringo mibi etarikushushana. Obumwe abantu nibeehimbisa ahabw’erangi yaabo. Kashoboorozi emwe neeshoboorora ekigambo okushoroora omu rangi “nk’okwanga nari okutwariza kubi abantu b’enganda ezindi” nari “okuteekateeka ngu abantu b’enganda ezindi baine emitwarize n’okubaasa kw’omutaano, kandi ngu ab’enganda ezimwe nibazaarwa barikukira  abandi nari bari ab’ahansi munonga.” Abantu okuhimbisa erangi zaabo kurugiremu obweshariingo, entaro, nangwa n’okwitagurana.

⁸ Ebintu nk’ebyo tibiine mwanya omu kibiina Ekikristaayo. Kwonka, obutaikirizana oburikubaho ahagati y’ab’eishe-emwe nibubaasa kurugiirira aha kwehimbisa, kandi nibubaasa kubuga n’omu bandi. Ekyo nikyo kyahikire aha B’eishe-emwe omu kyasha ky’okubanza abu Yakobo yaaburize ati: “Engamba n’endwano eziri omuriimwe niziruga hi?” (Yak. 4:1) Enyehurira nk’egyo ey’enziika n’okwetunguura neebaasa kushiisha emigambire n’ebikorwa byaitu, ekirikubaasa kureetaho obusaasi bwingi. (Enf. 12:18) Buzima, okwehimbisa nikushiisha obusingye bw’ekibiina.

9. Baibuli neetuhwera eta kurwanisa okushoroora n’okwehimbisa okutahikire? (Reeba ekishushani aha kutandika.)

⁹ Ku turaabe nitukunda kwetunguura aha bandi, twine kwijuka ngu “omuntu weena ow’amaryo g’omu mutima n’ekirikunugwa ahari” Yehova. (Enf. 16:5) Kandi twine kweshwijuma tukareeba oku turikutwariza abantu b’erangi ezindi, amahanga agandi, nari ab’enganda ezindi. Ku turikutwariza kubi abantu b’erangi ezindi nari amahanga agandi, nituba tutarikwikiriza ngu Ruhanga “akahanga amahanga goona ag’abantu, naabakomoora aha muntu omwe.” (Byak. 17:26) Ekyo nikyoreka ngu hariho abantu b’oruganda rumwe, ahabw’okuba boona bakakomooka ahari ishenkurubo Adamu. Nikiba kiri eky’obusaasi kwikiriza ngu abantu b’erangi endiijo nibakira abandi nari ngu n’ab’ahansi. Emiteekateekyere nk’egyo niyo Sitaane arikukoresa kushiisha rukundo n’obumwe bw’ab’eishe-emwe. (Yoh. 13:35) Itwe kubaasa kurwanisa Sitaane tukasingura, twine kwangira kimwe emiringo yoona y’okwehimbisa etahikire.—Enf. 16:18.

10, 11. (a) Ahabw’enki nikibaasika kurahuka kukunda ensi? (b) Ahabw’enki Deema yaakunzire ebiri omu nsi?

¹⁰ Sitaane niwe “mutegyeki w’ensi egi,” kandi eri omu bushoboorozi bwe. (Yoh. 12:31; 1 Yoh. 5:19) N’ahabw’ekyo, bingi ebirikukorwa omu nsi nibitaana n’emitindo ya Baibuli. Eki tikirikumanyisa ngu buri kintu kyona ekiri omu nsi ni kibi. Kwonka, twine kumanya ngu Sitaane naakoresa ensi ye kutunguura ebyetengo byaitu, kandi ateeraho n’okutureetera kushiisha nari kukunda munonga ensi reero tukehuzya okuramya Yehova.—Shoma 1 Yohaana 2:15, 16.

¹¹ Okukunda ensi kikashiisha bamwe aha b’eishe-emwe omu kyasha ky’okubanza. Nk’eky’okureeberaho, Paulo akahandiika ati: “Deema, ahabw’okukunda eby’ensi eby’ebiro ebi, akantsigaho.” (2 Tim. 4:10) Baibuli terikugamba eki Deema yaakunzire omu nsi, ekyamureeteire kutsigaho Paulo. Naabaasa kuba yaatandikire kukunda munonga eby’obutungi kukira eby’omwoyo. Ekyo ku kiraabe nikyo kyahikire ahari Deema, akafeerwa emigisha y’eby’omwoyo. Mbwenu shi eby’ensi bikaba nibingana n’emigisha ei yaafeereirwe? Ensi ekaba neebaasa kuha Deema ekirikukira emigisha ei Yehova yaabaire naija kumuha arikuheereza na Paulo?—Enf. 10:22.

12. Ni miringo ki ei turikubaasa ‘kubeihwabeihwa obutungi’?

¹² Ebintu nk’ebyo naitwe nibibaasa kutuhikaho. Naitwe twine ekyetengo ky’okuhikiiriza obujunaanizibwa bwaitu bw’okureeberera ab’omu maka gaitu. (1 Tim. 5:8) Twateekateeka aha birungi ebi Yehova yaabaire ahaire Adamu na Haawa, ku turikureeba ebitwetooroire nituhamya ngu Yehova naayenda tushemererwe. (Kut. 2:9) Kwonka Sitaane naabaasa kushiisha ebigyendererwa byaitu arikukoresa ‘okubeihwabeihwa kw’obutungi.’ (Mat. 13:22) Abantu baingi nibateekateeka  ngu okugira sente nikibareetera okushemererwa nari ngu okugira ebintu bingi n’obusinguzi. Emiteekateekyere nk’egyo tehikire, kandi neebaasa kutureetera kufeerwa eky’omuhendo eki twine nigwo mukago gwaitu na Yehova. Yesu akarabura abakuratsi be ati: “Tihariho omuntu orikubaasa kuheereza abakama babiri; ahakuba aryayangaho omwe akunde ondi; nari aryagumira kyarimwe ahari omwe, agaye ondi. Timurikubaasa kuheereza Ruhanga na Mamona.” (Mat. 6:24) Twateeraho kusherura eby’obutungi bikatuhindura abahuuku, nitubaasa kureka kuheereza Yehova, kandi ekyo nikyo Sitaane arikwenda ngu tukore! Titushemereire kwikiriza sente nari ebintu kuza omu mwanya gw’omukago ogu twine na Yehova. Kubaasa kusingura Sitaane, twine kugira emiteekateekyere ehikire aha by’obutungi.—Shoma 1 Timoseo 6:6-10.

13. Ensi eine miteekateekyere ki egwire aha bushwere n’okuteerana?

¹³ Omutego ogundi ogw’ensi ya Sitaane n’eby’obushambani. Obunaku obu, abantu baingi nibatwara obushwere n’okwesigana omu bushwere nk’ekintu ekirikubazibira kukora ebi barikwenda kandi ekihweire aha murembe. Nk’eky’okureeberaho, omukazi omwe orikuzaana emizaano akagira ati: “Okushwera nari okushwerwa omuntu omwe tikirikubaasika aha bashaija n’abakazi. Tindikumanya omuntu ori omwesigwa, nari orikwenda kuba omwesigwa.” Kandi omushaija omwe orikuzaana emizaano nawe akagira ati: “Tindikumanya yaaba kiri omu buhangwa bwaitu kuba n’omuntu omwe ebiro byona eby’amagara gaitu.” Abaheereza ba Ruhanga ku barikushiisha ekiconco ky’obushwere, Sitaane naashemererwa. Omuregi buzima tarikushagika entebeekanisa egi, kandi tarikwenda kureeba obushwere burungi. Kubaasa kurwanisa Sitaane tukasingura, twine kuha ekitiinisa entebeekanisa ya Ruhanga ey’obushwere.

14, 15. Nitubaasa kwetantara tuta eby’obushambani?

¹⁴ Ku turaabe turi omu bushwere nari tutakabugiremu, twine kwetantara emiringo yoona ey’eby’obushambani. Eki shi kyorobi? Ngaaha! Nk’eky’okureeberaho, waaba ori omunyeeto, noobaasa kuhurira abu orikushoma nabo nibagamba aha kuteerana, nari niboohoreza obutumwa n’ebigambo birikukwata aha kuteerana, omu myanya emwe ekirikutwarwa nk’ekirikwingana n’okujanjaaza ebirikwitsya enshoni omu baana bato. Baibuli neegira eti: “Orikushambana naaba akozire ekibi ky’okushiisha omubiri gwe wenka.” (1 Kor. 6:18) Okubonabona n’okufa nibibaho ahabw’okujanjaara kw’endwara z’obushambani. Kandi eminyeeto baingi abatakagiire mu bushwere kwonka abatashugaine nibagira ngu nibeefuuza eki baakozire. Amazima agarikukwata aha kuteerana okutahikire, nigataanira kimwe ahari ebyo ebirikworekwa omu by’empurizana, ebigyendereire kutureetera kwikiriza ngu okuhenda ebiragiro bya Ruhanga tikwine bibi ebirikurugamu. Emiteekateekyere nk’egyo neetureetera kugwa omu “bugobya bw’ekibi.”—Heb. 3:13.

¹⁵ Ku oraabe nooyohibwa kwejumba omu by’omushambani, oshemereire kukora ki? Manya obweremwa bwawe. (Rom. 7:22, 23) Shaba Ruhanga kukuha amaani. (Fil. 4:6, 7, 13) Yetantare emyanya erikubaasa kukureetera kugwa omu bushambani. (Enf. 22:3) Kandi waayohibwa, gira eki waakora ahonaaho kubaasa kukwangira.—Kut. 39:12.

16. Yesu akatwaza ata obu Sitaane yaabaire naamureetera kwohibwa, kandi nitumwegaho ki?

¹⁶ Yesu akatuteeraho eky’okureeberaho kirungi eky’okusingura okwohibwa. Tarabeihabeihirwe ebiraganiso bya Sitaane  kandi akaba atabanza kutwara obwire kuteekateeka aha burungi bwabyo. Kureka, ahonaaho akaba agarukamu ati: “Kikahandiikwa ngu.” (Shoma Matayo 4:4-10.) Yesu akaba naamanya gye Ekigambo kya Ruhanga, kandi ekyo nikyo kyabaire kimubaasisa kurahuka kujuriza ebyahandiikirwe omu kwohibwa. Okubaasa kurwanisa Sitaane kandi tukasingura, twine kwangira okwohibwa kwejumba omu by’obushambani.—1 Kor. 6:9, 10.

17, 18. (a) Ni miringo ki endiijo ei Sitaane arikukoresa, kandi ahabw’enki eki kitaine kututangaaza? (b) Sitaane abiikiirwe ki, kandi eki nikituhiga kita kugumisiriza?

¹⁷ Okwehimbisa, okwetenga eby’obutungi, n’obushambani n’emiringo eshatu ei Sitaane arikukoresa. Hariho n’emiringo endiijo. Nk’eky’okureeberaho, ab’eishe-emwe abamwe nibahiiganisibwa ab’omu maka gaabo, nibajumwa aha ishomero, nari ab’obushoboorozi nibabaremesa kubuurira nk’oku barikwenda. Oburemeezi nk’obwo tiburikututangaaza, ahakuba Yesu akarabura abakuratsi be ati: “Muryayangwa abantu boona nibabatura eiziina ryangye. Kwonka origumisiriza okuhitsya aha muheru, niwe arijunwa.”—Mat. 10:22.

¹⁸ Nitubaasa kurwanisa tuta Sitaane kandi tukasingura? Yesu akagambira entumwa ze ati: “Omu kwehangaana nimwo murijunira amagara gaanyu.” (Luk. 21:19) Tihariho eki abantu barikubaasa kukora ekirikubaasa kuba eky’akabi ahariitwe ebiro byona. Tihaine orikubaasa kushiisha omukago gwaitu na Ruhanga okwihaho twaba naitwe twikiriza ngu kibeho. (Rom. 8:38, 39) Nangwa n’abaheereza ba Ruhanga ku barikufa, ekyo tikirikuhaisa Sitaane obusinguzi, ahabw’okuba Yehova naija kubazoora! (Yoh. 5:28, 29) Kwonka emitego ya Sitaane neeyeyongyerera kimwe. Bwanyima y’okucwekyerera kw’ensi egi embi, Sitaane naija kubohwa kumara emyaka 1,000. (Kush. 20:1-3) Bwanyima y’emyaka rukumi Yesu arikutegyeka, Sitaane naija “kubohororwa okumara omwanya mukye” kuteeraho ogw’aha muheru kuhabisa abantu abahikiriire. Bwanyima y’ekyo, Omuregi naija kucwekyerezibwa. (Kush. 20:7-10) Sitaane we ayorekyereire okucwekyerezibwa, kwonka ahariiwe tikwo kiri! Murwanise Sitaane, muhamire omu kwikiriza. Nitubaasa kumurwanisa kandi tusingure!