1. Ab’ensi nibatwara bata okushemera?

OKUSHEMERA ti mutwarize ogurikumanywa munonga. Na munonga omu bunaku bwaitu. Omu mahanga maingi, okuteerana kw’abarikushushanisa obuhangwa, n’okuteerana aheeru y’obushwere nibireebwa nk’ebya butoosha. Emitwarize egi neeyorekwa munonga omu birikurangwa n’eby’okweshemeza. (Zab. 12:8) Eby’obushambani bijanjaire munonga kyareetera n’abamwe kwebuuza bati: ‘Nikibaasika omuntu kuguma ori oshemeire?’ Nitubaasa kugarukamu tutaine kubanganisa kwona ngu eego. Abakristaayo ab’amazima nibabaasa kuguma bashemeire baba baine obuhwezi bwa Yehova.—Shoma 1 Abatesalonika 4:3-5.

2, 3. (a) Ahabw’enki ni kikuru kurwanisa ebyetengo bibi? (b) Nituza kushwijuma ki omu kicweka eki?

² Kwonka, twine kumanya ngu kubaasa kuba abashemeire, twine kwetantara ebyetengo bibi. Nk’oku eirobo eririho eky’okurya ririkubaasa kushendashenda eky’enyanja, n’ebyetengo bibi byaba bitaihirwe mu biteekateeko nibibaasa kushendashenda Omukristaayo. Nibibaasa kureebeka nk’ebirikushemeza ahabw’emibiri yaitu etahikiriire kandi bitureetere kwejumba omu bikorwa by’obushambani. Haahinguraho obwire, ekyetengo ky’okukora ekibi  nikibaasa kuba eky’amaani kitware enda. Bwanyima, nangwa n’omuheereza wa Yehova naabaasa kukora eki arikwetenga haabaho omugisha. Buzima, “okwetenga . . . kuzaara ekibi.”—Shoma Yakobo 1:14, 15.

³ Ni kirungi kuteekateeka aha ku ebyetengo bibi birikubaasa kurugamu ekibi ky’amaani. Kwonka ka nikigaruramu amaani kumanya ngu twayeyihamu ebyetengo bibi, titurikwija kukora ebibi by’amaani kandi titurikwija kuhikwaho ebibi ebirikurugamu! (Gal. 5:16) Ka tureebe ebintu bishatu ebiraatuhwere kurwanisa ebyetengo bibi: omukago gwaitu na Yehova, obuhabuzi oburi omu Kigambo kye, n’obuhwezi bw’Abakristaayo abakuzire omu by’omwoyo.

4. Ahabw’enki ni kikuru kwirira haihi Yehova?

⁴ Obuhabuzi bwa Baibuli ahari abo abarikwenda kwirira “haihi Ruhanga” nibugira buti: “Munaabe engaro zaanyu . . . mushemeze emitima yaanyu.” (Yak. 4:8) Twaba nitutwara omukago gwaitu na Yehova nka mukuru, nitwija kuteeraho kumushemeza omu bi turikukora byona, otwariiremu n’ebiteekateeko byaitu. Twine ekyetengo ky’okugira ‘omutima ogushemeire’ turikuta omutima gwaitu aha bintu ebishemeire, ebirungi, kandi ebirikusiimwa. (Zab. 24:3, 4; 51:6; Fil. 4:8) Kwonka, Yehova naamanya ngu tituhikiriire. Naamanya ngu nitukira kugira ebyetengo bitahikire. Beitu nitumanya ngu nikimugwisa kubi twaguma twine ebyetengo bibi, omu mwanya gw’okukora kyona ekirikubaasika kubyetantara. (Kut. 6:5, 6) Okuteekateeka ahari eki nikituhwera kumariirira kugumya ebiteekateeko byaitu aha bintu birungi.

5, 6. Okushaba nikubaasa kutuhwera kuta twaba niturwanisa ebiteekateeko bibi?

⁵ Omuringo mukuru ogw’okworeka ngu nitwesigira kimwe Yehova n’okurwanisa ebyetengo bibi kurabira omu kushaba. Twayirira haihi Yehova kurabira omu kushaba, nawe naatwirira haihi. Naatuha omwoyo gwe gurikwera omu bwijwire, ekyo kituhwera kumariirira kwangira ebiteekateeko bibi n’okuguma turi abashemeire. N’ahabw’ekyo, ka tumanyise Ruhanga ebi turikwetenga n’okuteekateeka kw’omu mutima gwaitu. (Zab. 19:14) Mbwenu shi nitumushaba omu bucureezi kutushwijuma kumanya “emitwarize yoona emibi” nari ebyetengo bibi ebirikubaasa kutureetera kushiisha? (Zab. 139:23, 24) Butoosha nitweshengyereza Yehova kutuhwera kuguma turi abeesigwa twaba nitwohibwa?—Mat. 6:13.

⁶ Oku twakuziibwe, nari oku twabaire nitutwaza enyima, nikubaasa kuba kwatureeteire kukunda ebintu ebi Yehova arikwanga. N’obu kiraabe kiri kityo, naabaasa kutuhwera kukora empindahinduka kugira ngu tugumizemu nitumuheereza omu muringo ogu arikusiima. Omugabe Daudi akaba naamanya eki. Ku yaaherize kushambana na Batisheba, akeeshengyereza Yehova ati: “Ompangyemu omutima ogushemeire, . . . Ogarure omwoyo murungi omunda yangye.” (Zab. 51:10, 12) Omubiri gwaitu ogutahikiriire niguba nigwenda kutureetera kukora ebibi, kwonka Yehova naabaasa kutuha omwoyo ogurikumworobera, nikyo kyetengo ky’okumworobera. N’obu ebyetengo bibi byakuba byatsimbire emizi birikukira ebiteekateeko byaitu birungi, Yehova naabaasa kutuhwera kworobera ebiragiro bye kandi tube abasinguzi omu kubigyenderaho. Naabaasa kuzibira buri kintu kyona eky’akabi kututegyeka.—Zab. 119:133.

⁷ Yehova twamushaba obuhwezi naabaasa kutugarukamu kurabira omu Kigambo kye, Baibuli. Obwengye oburi omu Kigambo kya Ruhanga “okubanza buba obushemeire.”  (Yak. 3:17) Okushoma Baibuli buri izooba n’okuteekateeka aha bi turikushoma, nikibaasa kuturinda ebiteekateeko bibi. (Zab. 19:7, 11; 119:9, 11) Ekindi, Baibuli erimu eby’okureeberaho n’obuhabuzi ebirikubaasa kutuhwera kwetantara kugira ebyetengo ebitashemeire.

8, 9. (a) Niki ekyareeteire omutsigazi omwe kushambana n’omukazi? (b) Ebiri omu Enfumu eshuura 7 nibibaasa kutuhwera kwetantara mbeera ki ez’obunaku obu?

⁸ Omu Enfumu 5:8, nitushoma tuti: “Mwetantarire hare, kandi otairira haihi emiryango y’enju ye.” Akabi k’okwehuzya obuhabuzi obu, nikoorekwa omu Enfumu eshuura 7, ahu turikushoma ebirikukwata aha mutsigazi owaabaire naayerabya aha nju y’omukazi enshambani. Bukaba nibutandika kwira. Omukazi owaabaire ajwaire eby’obwamaraaya akashanga omutsigazi ogwo omu keekubo k’enguuto. Yaamukwata yaamunywegyera. Ebigambo by’omukazi ogwo ebirikubeihabeiha bikamureetera kugira ekyetengo ekyabaire nikireebeka nk’eki atarikubaasa kwangira. Bakagwa omu bushambani. Nikireebeka omutsigazi ogwo akaba atagiire kushambana. Kureka akaba ataine bwengye kandi akaba atarikumanya kucwamu gye. Kwonka, akaba aine kwemera byona ebyarugire omu bikorwa bye. Kikaabaire kirungi ku ogire ngu akeetantara omukazi ogwo yaamuguma hare!—Enf. 7:6-27.

 ⁹ Mbwenu shi obumwe naitwe nituremwa kucwamu gye, tweta omu mbeera z’akabi ezirikubaasa kwimutsya ebyetengo bibi? Nk’eky’okureeberaho, nyekiro, emikura ya tiivi emwe neeyoreka ebintu bibi munonga, n’ahabw’ekyo nikibaasa kuba eky’akabi waaguma noohindaguturana emikura orikwenda kureeba ebiriho. Nari obumwe noobaasa kuba nookoresa Intaneeti orikwimata aha buri ki waareeba, nari obumwe oza aha mikura eriho ebirikwitsa enshoni nari eby’okuteerana. Mbwenu shi eki tikirikubaasa kworeka ngu oriyo noimutsya ebyetengo bibi, kandi kikakugumira kuguma ori oshemeire?

10. Ahabw’enki okweshunga kiri eky’akabi? (Reeba ekishushani aha kutandika.)

¹⁰ Omuringo ogundi ogu Baibuli erikutuhwera n’okutuha obuhabuzi aha ku twine kutwariza abo abu tutarikushushanisa nabo obuhangwa. (Shoma 1 Timoseo 5:2.) Obuhabuzi obwo nibutwariramu okuteeshunga nabo. Abamwe nibabaasa kuteekateeka ngu okukoresa obumanyiso, okukoresa ebicweka byabo by’omubiri, n’okureeba omuntu omu muringo ogurikworeka ngu noomurigira, ti ky’akabi waaba otamuhikire kumukwataho. Kwonka okweshunga, nari okwikiriza ngu omuntu ayeshungye naiwe nikibaasa kurugamu okukora ekibi ky’amaani nk’obushambani. Kikaba kyabaireho kandi na hati nikibaasa kubaho.

11. Yosefu akataho ky’okureeberaho ki ekirungi?

¹¹ Yosefu akatwaza omu muringo gw’obwengye omu nshonga egi. Omukazi wa Potifaari mukama wa Yosefu, ku yaateireho kumubeihabeiha, Yosefu akanga. Kwonka omukazi ogwo tarabirugireho. Butoosha akaba amweta ngu bagume hamwe. (Kut. 39:7, 8, 10) Kurugiirira aha mucondooza omwe wa Baibuli, muka Potifaari akaba ari nk’orikugira ati: “‘Ka tube hamwe turi twenka kumara obwire,’ arikuteekateeka ngu [Yosefu] naija kuba niwe yaabanza kugira eki yaakora.” Kwonka, Yosefu akaba amaririire kutaikiriza obukoryo bw’omukazi ogwo obw’okubeihabeiha. Akanga kweshunga n’omukazi ogwo, kandi ekyo kikamuhwera kutata ebiteekateeko bibi omu mutima gwe bikatsimba emizi. Omukazi ogwo ku yaateireho kugyema Yosefu kuteerana nawe, Yosefu akacwamu gye ahonaaho. Akatsiga ekijwaro “omu ngaro ze, yaahunga, yaashohora aheeru.”—Kut. 39:12.

12. Nitumanya tuta ngu ebi turikureeba nibibaasa kukwata aha mutima gwaitu?

¹² Baibuli neerabura aha kabi akari omu kwikiriza amaisho gaitu kuhabya omutima gwaitu. Amaisho agatarikuhamira mu mwanya gumwe nigabaasa kwimutsya nari kukanyisa ebyetengo bibi. Yesu akarabura ngu omuntu weena “orikureeba omukazi akamwetenga, biri aherize kumushambanaho omu mutima gwe.” (Mat. 5:28) Yetegyereze ekyabaire aha Mugabe Daudi. Ku yaabaire ayemereire aha mutwe gw’enju, “yaareeba omukazi naayonga.” (2 Sam. 11:2) Akaremwa kureeba aha rubaju n’okuta ebiteekateeko bye ahandi. Ekyo kikamureetera kwegomba omukazi w’ondiijo yaataho n’oburyo bw’okushambana nawe.

13. Ahabw’enki tushemereire ‘kukora endagaano n’amaisho gaitu,’ kandi eki nikitwariramu ki?

¹³ Kubaasa kwetantara ebyetengo bibi, twine ‘kuragaana endagaano n’amaisho gaitu,’ nka Yobu omwesigwa oku yaakozire. (Yob. 31:1, 7, 9) Twine kucwamu kurinda amaisho gaitu kutagaikiriza kureeba omuntu ondiijo omu muringo gw’okumurigira. Eki nikitwariramu okureeba ebishushani ebirikushagika obushambani, yaaba biri aha kompyuta, aha byapa, aha mutwe gwa magaziini, nari ahandi hoona.

14. Oine kukora ki kubaasa kuguma ori oshemeire?

¹⁴ Kurugiirira aha bi twaheza kureeba ku haraabe haine ahu oine kuhinduramu omu  ku orikurwanisa ebyetengo bibi, teeraho kugira eki waakora ahonaaho. Oyekundiire gyendera aha buhabuzi oburi omu Kigambo kya Ruhanga, oburikubaasa kukuhwera kwetantara okukora ekibi, reero okaguma oshemeire.—Shoma Yakobo 1:21-25.

15. Twaba nitugumirwa kweihaho ebyetengo bibi, ahabw’enki ni kikuru kusherura obuhwezi?

¹⁵ Ku turaabe nitugumirwa kweihaho ebyetengo ebirikukwata aha kuteerana, nitubaasa kushaba Abakristaayo bagyenzi baitu kutuhwera. Okugaaniira n’abandi aha buremeezi obw’omuringo nk’ogwo, buzima ti kyorobi. Kwonka twagira obumanzi bw’okwikiriza Omukristaayo okuzire omu by’omwoyo kutushwijuma, nikibaasa kutuhwera kwetantara kutwara ebyetengo bibi nk’ebitari by’akabi. (Enf. 18:1; Heb. 3:12, 13) Okugaaniira n’Omukristaayo okuzire omu by’omwoyo aha bweremwa bwaitu, nikibaasa kutuhwera kumanya enshonga ei tubaire tutarikwetegyereza gye. Eki nikibaasa kutuhwera kukora empindahinduka ezirikwetengyesa, kubaasa kwerindira omu kukunda kwa Yehova.

16, 17. (a) Abareeberezi nibabaasa kuhwera bata abaine ebyetengo bibi? Ha eky’okureeberaho. (b) Ahabw’enki abo abarikureeba ebirikwitsa enshoni baine kusherura obuhwezi ahonaaho?

¹⁶ Abareeberezi okukira munonga nibo bahikire kutuhwera. (Shoma Yakobo 5: 13-15.) Omutsigazi omuri Brazil akaba aine ebyetengo bibi kumara emyaka mingi. Naagira ati: “Nkaba nimmanya ngu ebiteekateeko byangye tibirikushemeza Yehova, kwonka nkaba nimpemuka munonga kugambira abandi enyehurira yangye.” Eky’omugisha, omureeberezi orikufayo omu kibiina eki omwojo ogwo yaabaire arimu, akamuhiga kusherura obuhwezi. Omutsigazi ogwo naagira ati: “Nikitangaaza oku abareeberezi baangiriire embabazi, bakangirira embabazi nyingi kandi baanyetegyereza kukira oku naabaire ninteekateeka ngu bashemereire kuntwariza. Bakahurikiza n’obwegyendesereza ndikubagambira oburemeezi bwangye. Bakakoresa Baibuli nkumpamiza ngu Yehova naakinkunda, kandi baanshabira. Ekyo kikampwera kworoberwa kwikiriza obuhabuzi bwa Baibuli obu baampaire.” Bwanyima y’okuhinguraho emyaka n’okukora entunguuka omu by’omwoyo, naagira ati: “Niinyetegyereza gye oku kiri kikuru kusherura obuhwezi omu mwanya gw’okuteeraho kwekorera emigugu yaitu twenka.”

¹⁷ Ni kikuru kusherura obuhwezi na munonga ebyetengo bibi byaba nibireetwa okureeba ebirikwitsa enshoni. Twatuuraho kusherura obuhwezi, ebyetengo bibi nibyeyongyera ‘kutwara enda, bizaara ekibi’ ekirikushaasha abandi kandi kikajumisa n’eiziina rya Ruhanga, Yehova. Ekyetengo ky’okushemeza Yehova n’okwenda kuguma omu kibiina Ekikristaayo, bibaasiise baingi aha baheereza be kwikiriza kuhwerwa.— Yak. 1:15; Zab. 141:5; Heb. 12:5, 6.

18. Omaririire kukora ki?

¹⁸ Obu ensi ya Sitaane erikweyongyera kusiisikara omu micwe, ka kishemereire kuba nikyesiimisa Yehova kureeba abaheereza be abeesigwa nibateeraho kurinda ebiteekateeko byabo kuguma biri birungi kandi barikuhamira aha mitindo ye ey’emicwe! N’ahabw’ekyo, buri omwe ahariitwe aine kumariirira kuguma haihi na Yehova kandi akaikiriza obuhabuzi obu arikutuha kurabira omu Kigambo kye n’ekibiina Ekikristaayo. Okuguma turi abashemeire nikireeta okumarwa n’obugwa gye hati. (Zab. 119:5, 6) Omu biro by’omumaisho, Sitaane ku araarugyeho, nitwija kutunga omugisha gw’okutuuraho ebiro byona omu nsi eshemeire etarimu bintu ebirikutureetera kukora ebibi.