1-3. Ahabw’enki munyaanyazi-itwe omwe yaahamize ngu Yehova naamanya eki turikuba nitwetenga?

LANA tarikubaasa kwebwa ekyabaireho eizooba rimwe obu yaabaire ari omuri Germany omu 2012. Naateekateeka ngu okushaba kwe kw’emiringo ebiri kukagarukwamu. Akabanza kushaba ari omu gaari y’omwika arikuza aha kishaayi ky’enyonyi. Akashaba ngu Yehova amuhwere abaase kubuurira ari omu muhanda. Akagaruka yaashaba ku yaahikire aha kishaayi ky’enyonyi akamanya ngu enyonyi ei yaabaire naaza kugyendamu neeza kugyenda bwasheesha. Lana akashaba ahabw’okugira ngu akaba akoreise esente ze zoona eza Buraaya, kandi ataine h’okuraara.

² Lana akaba atakaherizeho gye okushaba kwe okwa kabiri yaahurira omuntu arikugira ati: “Iwe, Lana, nookora ki aha?” Omwojo owaabaire naagamba, akaba ari ogwo ou yaashomireho nawe. Omwojo ogwo akaba ari na nyina na nyinenkuru, abaabaire bamushendekyereize aha kishaayi ky’enyonyi arikuza South Africa. Nyina w’omwojo ogwo orikwetwa Elke ku yaamanyire embeera ya Lana, akeeta Lana kuza kuraara owaabo. Elke na nyina bakaba efura  ahari Lana kandi baaguma nibabuuza ebibuuzo ebirikukwata aha kwikiriza kwe n’omurimo gwe nk’omubuurizi ow’obutwire.

³ Ku bwaseesire, bwanyima y’okumuha kyantsya nungi, Lana akagarukamu ebibuuzo bingi ebirikukwata aha Baibuli, kandi akatunga endagiriro yaabo kugira ngu agume naabahwera. Akagaruka gye omuka, kandi yaagumizamu naaheereza nka payoniya ow’obutwire. Naamanya ngu ogwo “ohurira okushaba” akamanya eki yaabaire naayenda kandi yaamuhwera.—Zab. 65:2.

4. Ni byetengo ki ebi turikuza kushwijuma?

⁴ Twatunga oburemeezi ahonaaho, nitubaasa kworoberwa kushaba obuhwezi, kandi Yehova naashemererwa kuhurira okushaba kw’abaheereza be abeesigwa nk’okwo. (Zab. 34:15; Enf. 15:8) Kwonka twateekateeka aha kushaba okw’eky’okureeberaho, nitubaasa kushanga ngu hariho ebyetengo ebikuru ebi tutarikufaho. Nk’eky’okureeberaho, teekateeka aha ku ebyetengo byaitu eby’omwoyo birikugambwaho omu bicweka bishatu eby’okushaba kw’eky’okureeberaho. Mbwenu shi hariho eki turikubaasa kukora kuhikaana n’ekicweka kya kana, ekirikukwata aha by’okurya byaitu by’obutoosha?—Shoma Matayo 6:11-13.

5, 6. Ahabw’enki okushaba eby’okurya byaitu by’obutoosha kiri kikuru n’obu twakuba twine ebintu birikumara?

⁵ Yetegyereze ngu buri muntu aine kushaba aha bikwatiraine n’eby’okurya byaitu eby’obutoosha beitu bitari by’okurya byangye eby’obutoosha. Victor, omureeberezi orikutaayaayira ebibiina omuri Africa, naashoboorora ati: “Ninkira kwebaza Yehova ahabw’okugira ngu nyowe n’omukazi wangye nituba tuteerarikiriire ahu eby’okurya byaitu biraarugye, nari oraashashure enju ei turikuraaramu. Ab’eishe-emwe nibatureeberera buri izooba. Kwonka nitushaba ngu abo abarikutuhwera babaase kwemera oburemeezi bw’eby’entaasya obu baine.”

⁶ Twaba twine eby’okurya kumara ebiro bingi, nitubaasa kuteekateeka aha b’eishe-emwe abooro nari abahikirweho ekihikiirizi. Titushemereire kubashabira kwonka, beitu twine kukora ebirikuhikaana n’okushaba kwaitu. Nk’eky’okureeberaho, ebi twine nitubaasa kuhaho ab’eishe-emwe bagyenzi baitu abaine ebi barikwetenga. Kandi twine n’okuhayo ahabw’omurimo ogurikukorwa omu nsi yoona, turikumanya ngu esente nk’ezo nizikoresibwa gye.—1 Yoh. 3:17.

7. Yesu akeegyesa ki aha bikwatiraine n’okuteemereza “emitima aha bya nyencakare”?

⁷ Yesu obu yaagamba aha by’okurya byaitu by’obutoosha, naabaasa kuba yaabaire naamanyisa ebyetengo ebi twine. N’ahabw’ekyo, akoongyera yaayoreka oku Ruhanga arikujweka ebimuri, reero yaagira ati: “Tarikizaho kubajweka, imwe abaine okwikiriza kukye? N’ahabw’ekyo mutaryemereza emitima nimutonzya muti, . . . Turyajwara ki?” Akahendera arikuha obuhabuzi bukuru obu: “Mutaryemereza emitima aha bya nyencakare.” (Mat. 6: 30-34) Eki nikyoreka ngu omu mwanya gw’okuta omutima aha kusherura eby’obutungi, twine kumarwa n’ebi turikutunga buri izooba ebikuru. Ebyetengo ebyo nibibaasa kutwariramu oburaaro, okutunga omurimo kureeberera amaka gaitu, n’obwengye bw’okugumira oburemeezi bw’eby’amagara. Kwonka twashaba ahabw’ebi turikwetenga byonka, nikyoreka ngu nitugwera orubaju. Twine ebyetengo eby’omwoyo ebiri bikuru munonga.

8. Yesu okugamba aha by’okurya by’obutoosha nikitwijutsya kyetengo ki ekikuru? (Reeba ekishushani aha kutandika.)

⁸ Yesu okugamba aha by’okurya byaitu by’obutoosha nikitwijutsya ngu twine kufayo n’aha byetengo byaitu eby’omwoyo. Akagira ngu “omuntu tatungwa by’okurya byonka, kureka n’ekigambo kyona ekiruga omu kanwa ka Ruhanga.” (Mat. 4:4) N’ahabw’ekyo tushemereire kugumizamu turikushaba ngu Yehova agumizemu naaturiisa eby’okurya eby’omwoyo omu bunaku obuhikire.

9. Ni mu muringo ki ogu ebibi byaitu biri “amabanja”?

⁹ Ahabw’enki Yesu yaakoreise ekigambo “amabanja,” kandi obwo aha izooba erindi akakoresa “eby’okushisha”? (Mat. 6:12; Luk. 11:4) Emyaka erikurenga omuri 60 ehingwire, magaziini egi ekashoboorora gye eti: “Ekibi ky’okuhenda ebiragiro bya Ruhanga nikitureetera kugira eibanja ahariwe. . . . Ahabw’ebibi byaitu Ruhanga yaayenda naabaasa kutwaka amagara agu twine. . . . Naabaasa kurekyera aho kugira omukago murungi naitwe. . . . Ku turikumworobera nitworeka ngu turiyo nitushashura eibanja ry’okumukunda; kandi ku turikushiisha nituba twaremwa kushashura eibanja ry’okumukunda, ahakuba okushiisha tikurikushemeza Ruhanga.”—1 Yoh. 5:3.

10. Yehova naihirira ahari ki kutusaasira eby’okushiisha byaitu, kandi twine kwehurira tuta ahabw’ekyo?

¹⁰ Nituba nitwenda kusaasirwa ebibi byaitu buri izooba, ekirikworeka gye ngu ekitambo kya Yesu niyo ntebeekanisa yonka ei Ruhanga arikubaasa kwihiriraho kushazamu ebibi byaitu. N’obu ekitambo eki kiraabe kyahairweyo emyaka nka 2,000 ehingwire, tushemereire kukisiima nk’ekiconco eki tuhairwe obunaku obu. “Okucungura” amagara “n’okw’obuguzi bwingi” ahakuba tihariho eki omuntu otahikiriire arikubaasa kutukorera kushashura obuguzi obwo. (Shoma Zaaburi 49:7-9; 1 Petero 1:18, 19.) Buzima, titushemereire kurekyera aho kwebaza Yehova ahabw’ekiconco eki eky’omuhendo. Kandi, ebigambo ‘eby’okushiisha byaitu,’ beitu bitari ‘eby’okushiisha byangye,’ nibitwijutsya ngu boona abari omu ka y’okuramya nibeetenga entebeekanisa egi erikworeka ngu Ruhanga abainiire embabazi. Hatariho kubanganisa, Yehova naayenda ngu tutafayo aha by’omwoyo byaitu byonka, beitu n’eby’abandi, otwariiremu n’abo abarikubaasa kuba batushobeize. Butoosha, enshobe nk’ezo niziba ziri nkye, kandi nizitubaasisa kworeka ngu buzima nitukunda ab’eishe-emwe bagyenzi baitu, kandi ngu tweteekateekire kubasaasira, nk’oku Ruhanga arikutusaasira.—Kol. 3:13.

11. Ahabw’enki ni kikuru kugira omutima gw’okusaasira?

¹¹ Eky’obusaasi, nk’abantu abatahikiriire obumwe nitubaasa kugirirana enziika. (Lev. 19:18) Twagambira abandi okutaikirizana oku twine n’omuntu ondiijo, nibabaasa kuza aha rubaju rwaitu, kireete okwebaganisamu omu kibiina. Twareka embeera egi kugumaho, nikiba nikyoreka ngu titurikusiima embabazi za Ruhanga n’ekitambo. Tataitwe naija kurekyera aho kutuhwera kugasirwa omu muhendo  gw’ekitambo ky’Omwana we, twaba tutarikusaasira bandi. (Mat. 18:35) Yesu akashoboorora eki ahonaaho yaaheza kwegyesa okushaba kw’eky’okureeberaho. (Shoma Matayo 6:14, 15.) Ekindi, kubaasa kugasirwa omu ntebeekanisa ya Ruhanga ey’okusaasira, twine kuteeraho kwetantara kuguhindura omuze gw’okushiisha. Ekyetengo kyaitu ky’okwetantara omuze gw’okushiisha nikikuratwa okundi kushaba.—1 Yoh. 3:4, 6.

12, 13. (a) Niki ekyabaireho ahonaaho Yesu aherize kubatizibwa? (b) Ahabw’enki twine kwetaho orubanja twagwa omu kwohibwa? (c) Yesu akataho ky’okureeberaho ki ahabw’okuguma ari omwesigwa kuhitsya aha kufa?

¹² Twayetegyereza ekyabaireho ahonaaho Yesu yaaheza kubatizibwa, nikibaasa kutuhwera kumanya ahabw’enki twine kushaba Yehova ngu, “otatutwara omu kwohibwa.” Omwoyo gwa Ruhanga gukeebembera Yesu kuza omu ihamba. Ahabw’enki? Kuza “kwohibwa Sitaane.” (Mat. 4:1; 6:13) Mbwenu shi ekyo kishemereire kututangaaza? Tikishemereire kututangaaza twaba nitwetegyereza enshonga ahabw’enki Ruhanga yaayohereize Omwana we omu nsi. Akamwohereza kushoboorora enshonga eyaareetsirweho Adamu na Haawa obu baayanga obushoboorozi bwa Ruhanga bw’okuba ohikire kutegyeka byona. Kikaba nikyetengyesa obwire kuhinguraho kubaasa kugarukamu ebibuuzo ebi Sitaane yaareetsireho. Nk’eky’okureeberaho, mbwenu shi haine ekyabaire kishobire aha muringo ogu Ruhanga yaahangiremu omuntu? Kikaba nikibaasika omuntu ohikiriire kugumizamu arikwikiriza obushoboorozi bwa Ruhanga bw’okutegyeka byona n’obu haakubaireho okugyemeserezibwa kuruga aha ‘mubi’? Mbwenu shi abantu bakaba nibabaasa kuba gye batari hansi y’obutegyeki bwa Ruhanga, nk’oku Sitaane yaagizire? (Kut. 3:4, 5) Okubaasa kugarukamu ebibuuzo nk’ebyo, kikaba nikyetengyesa obwire, kwonka kikaayorekire ebihangirwe byona ebiine obwengye ngu Yehova naakoresa obushoboorozi bwe omu muringo ogurikugasira abandi.

¹³ Yehova n’orikwera, n’ahabw’ekyo tarikubaasa kureetera omuntu weena kwohibwa kukora ekibi. Omu mwanya gw’ekyo, Omuregi niwe “Omwohi.” (Mat. 4:3) Omuregi naabaasa kureetaho embeera ezirikureeta okwohibwa. Kwonka, kiri ahari buri omwe yaaba araikirize kwohibwa nari kwanga. (Shoma Yakobo 1:13-15.) Yesu we ahonaaho akangira okwohibwa kwona arikujuriza ebiri omu Kigambo kya Ruhanga. N’ahabw’ekyo, Yesu akooreka ngu naahamira aha bushoboorozi bwa Ruhanga nk’ohikire kutegyeka byona. Kwonka Sitaane tarabirugireho. Akategyereza “okuhitsya obu aribona ogundi mwanya.” (Luk. 4:13) Yesu akagumizamu arikwangira okuteeraho kwa Sitaane kumuremesa kuhamira ahari Ruhanga. Kristo akahamira ahari Yehova nk’ohikire kutegyeka byona, kandi akahamya ngu omuntu ohikiriire naabaasa kuba omwesigwa n’obu haakuba hariho okugyezibwa kw’amaani. Kwonka, okuteeraho kwa Sitaane kutega abakuratsi ba Yesu, naiwe nikukutwariramu.

14. Twine kukora ki kubaasa kutagwa omu kwohibwa?

¹⁴ Ahabw’enshonga erikukwata aha bushoboorozi bwa Ruhanga obw’okutegyeka, naikiriza Omwohi kukoresa ensi egi kutureetera kwohibwa. Ruhanga tarikututwara omu kwohibwa. Omu mwanya gw’ekyo, atwinemu obwesigye kandi naayenda kutuhwera. Kwonka Yehova ahabw’okumanya ngu twine obugabe bw’okwecweramu, tarikuturinda butunu ngu tutagwa omu kwohibwa. Twine kukora ebintu bibiri ebi: Kuguma nitureeba omu by’omwoyo, kandi tukaguma nitushaba. Yehova naagarukamu ata okushaba kwaitu?

15, 16. (a) Ni kwohibwa ki oku twine kwangira? (b) N’oha oshemereire kuteebwaho orubanja twagwa omu kwohibwa?

¹⁵ Yehova naatuha omwoyo gwe gurikwera, ogurikubaasa kutuha amaani kandi gukatuhwera kwangira okwohibwa. Kandi Yehova  naaturabura bukiri kare kurabira omu Kigambo kye n’ekibiina kye aha mbeera ezi twine kwetantara, nk’okumara obwire bwingi, esente, n’amaani aha bintu ebitari bikuru. Espen na Janne nibatuura omu eihanga ry’erigaiga omuri Buraaya. Kumara emyaka mingi, bakaba bari baapayoniya ab’obutwire omu kicweka kimwe omu ihanga eryo ahu ababuurizi baabaire nibeetengwa. Ku baaherize kuzaara omwana w’okubanza, bakarekyera aho kuheereza nka baapayoniya, kandi hati baine omwana wa kabiri. Espen naagira ati: “Hati obu tutarikubaasa kumara obwire bwingi omu by’omwoyo nk’oku twabaire nitukora, nitukira kushaba Yehova ngu tutatwarwa omu kwohibwa. Nitushaba Yehova kutuhwera kuguma tuhami omu by’omwoyo, kandi twine omujinya omu kubuurira.”

¹⁶ Okwohibwa okukanyire munonga omu biro ebi, n’okureeba ebirikwitsa enshoni. Twagwa omu kwohibwa, titurikubaasa kukwatsa Sitaane orubanja. Ahabw’enki? Ahabw’okugira ngu Sitaane tarikubaasa kutugyema kukora eki tutarikwenda. Bamwe basingwirwe okwohibwa oku, barikwikiriza kuguma nibateekateeka aha bintu bibi. Kwonka nitubaasa kwangira okwohibwa oku, nk’oku ab’eishe-emwe baingi bakozire.—1 Kor. 10:12, 13.

17. (a) Nitubaasa kukora tuta ebirikuhikaana n’okushaba kwaitu ngu Yehova atujune omubi? (b) Ni buruhuuko ki oburi haihi kubaho?

¹⁷ Kubaasa kukora ebirikuhikaana n’okushaba kwaitu ngu “otujune Omubi,” twine kuteeraho kutaba “b’ensi” ya Sitaane. Titwine kukunda “ensi [ya Sitaane] n’obu byakuba ebintu ebigirimu.” (Yoh. 15:19; 1 Yoh. 2:15-17) Twine kugumizamu nitukora eki. Ka nihaija kubaho oburuhuuko Yehova ku araagarukyemu okushaba kwaitu arikwihaho Sitaane n’ensi ye mbi! Kwonka twine kwijuka ngu Sitaane ku yaanagirwe omu nsi kuruga omu iguru, akaba naamanya ngu aine obwire bukye. Aine ekiniga kingi, naakora kyona ekirikubaasika kutureetera kutaba beesigwa. N’ahabw’ekyo tushemereire kuguma nitushaba ngu tucungurwe.—Kush. 12:12, 17.

18. Kubaasa kuhonokaho ensi ya Sitaane yaaba neecwekyerezibwa, twine kugumizamu nitukora ki?

¹⁸ Oine ekihika ky’okutuura omu nsi etarimu Sitaane? Ku kiraabe nikwo kiri, guma nooshaba ngu Obukama bwa Ruhanga bweze eiziina rye, kandi bureetere ebi arikukunda kukorwa omu nsi. Shaba Yehova kuhaazya ebyetengo byawe eby’omwoyo n’eby’omubiri. Buzima, mariirira kukora ebirikuhikaana n’okushaba kw’eky’okureeberaho.