“Bwanyima y’esente zaitu kugwa omuhendo, ebeeyi y’eby’okurya ekaza ahaiguru kandi bikaba bikye,” nikwo Paul, oine omukazi n’abaana babiri arikugira. “Tukaba twemerera omu nyiriri kumara eshaaha nyingi, kwonka obumwe eby’okurya bikaba bihwaho batakatuhikire. Abantu bakahururuka ahabw’enjara, kandi abandi bakaba bagwa aha muhanda. Emihendo y’ebintu ebirikwetengyesa munonga ekeeyongyera kuhika omu bukaikuru bw’esente, yaagumizamu yaahika omu buhumbi. Ekyarugiremu, esente z’eihanga ryaitu zikabura omugasho. Nkaba ntakibaasa kwiha esente omu banka, kutunga enshumbushano, nari akasiimo k’okuhuumura aha murimo.”

Paul akaba naamanya ngu ab’omu ka ye kubaasa kubaho, akaba aine kukoresa ‘obwengye obuhikire.’ (Enfumu 3:21) “Nkaba nshomire eby’amashanyarazi, kwonka nkaba nyikiriza buri murimo gwona ogu naabaire ntunga, n’obu gwabaire guba guri ogw’esente nkye,” nikwo arikugira. “Abamwe bakaba banshashura eby’okurya nari ebintu by’omu nju. Ku baabaire banshashura emiti ena ya saabuuni, nkaba nkoresaho ebiri reero endiijo ebiri ngiguza. Bwanyima nkatunga obwana bw’enkoko 40. Ku bwakuzire, nkabuguza naagura obundi 300. Bwanyima, nkahanisa enkoko 50 baampamu enshaho ibiri z’obuhuunga buri emwe erikuremeera kiro 50. Enshaho z’obuhuunga ezo, zikampwera kuriisa eka yangye n’abandi kumara obwire buraingwa.”

Paul akaba naamanya ngu ekintu kikuru eki omuntu weena ashemereire kukora n’okwesiga Ruhanga. Twakora eki Ruhanga arikuragiira, naatuhwera. Yesu arikugamba aha kutunga ebirikwetengyesa akagira ati: “Mutaryemereza emitima; kandi . . . Shoimwe naamanya ku mubikyenire.”—Luka 12:29-31.

Eky’obusaasi, omuzigu wa Ruhanga, Sitaane, naareetera abantu baingi kuta omutima aha by’omubiri. Abantu berarikiriire munonga ahabw’ebi barikwetenga, ebyabuzima n’ebitari byabuzima, kandi nibateeraho munonga kutunga ebintu ebi batarikwetenga. Baingi nibagira amabanja, bwanyima baija bakimanya  ngu “oyegurize aba omuhuuku w’omugurize.”—Enfumu 22:7.

Abantu baingi nibacwamu kubi. “Abamwe bakatsigaho amaka gaabo n’abanywani baabo baaza kusherura ‘embeera nungi’ omu nsi z’aheeru,” Paul nikwo arikugira. “Abamwe bakagyenda bataine ebipapura ebirikubagambaho tibaatunga mirimo. Bakatandika kweshereka poriisi kandi baaguma nibaraara aha nguuto. Bakanga kwesiga Ruhanga kubahwera. Kwonka nyowe n’ab’omu ka yangye tukaikiriza kugumira oburemeezi bw’esente, turikuhwerwa Ruhanga.”

Paul naagumizamu ati: “Yesu akagira ati: ‘Mutaryemereza emitima aha bya nyencakare; ahakuba ebya nyencakare biryayemererezibwa omutima okwabyo. Buri kiro kiine amaganya gaakyo.’ N’ahabw’ekyo nkaba nshaba ngu Ruhanga atuhe eby’okurya bya buri izooba kugira ngu tubaase kubaho. Kandi buzima akatuhwera, nk’oku Yesu yaaraganiise. Kwonka butoosha tukaba tutarikubaasa kutunga eki turikwenda. Eizooba rimwe, nkaza aha runyiriri kutunga eby’okurya kwonka nkaba tarikumanya eki baabaire nibaguza. Ku naahikire omu maisho, nkashanga nibaguza amakamo. Buzima tindikukunda amakamo. Kwonka bikaba biri eby’okurya, n’ahabw’ekyo eizooba eryo tukanywa amakamo. Ninsiima Ruhanga kureeba ngu nyowe n’ab’eka yangye tihaine obu twagiire kubyama n’enjara omu bwire obwo.” *

“Hati turi hakiri omu by’entaasya. Kwonka kurugiirira aha bi turabiremu, twegire ngu kubaasa kwemera okwerarikirira twine kwesiga Ruhanga. Yehova * naija kuguma naatuhwera twaguma nitukora ebi arikukunda. Tureebire okuhikiirira kw’ebiri omu Zaaburi 34:8 aharikugira hati: ‘Yeimwe, nimuroze, mureebe MUKAMA ku ari murungi! Orikumwesiga weena aine omugisha.’ N’ekirugiremu, titurikutiina embeera egumire erikubaasa kureetwaho oburemeezi bw’eby’entaasya.

“Hati nitwetegyereza gye ngu eki omuntu arikwetenga kubaasa kubaho, ti murimo nari esente kureka n’eby’okurya. Buzima tutegyereize n’ekihika kureeba ebiraganiso bya Ruhanga nibihikiirira: ‘Haryabaho omweru mwingi omu nsi.’ Ekyo kitakabaireho, ‘ku turaabe twine eby’okurya n’eby’okujwara, ebyo bigume bitumare.’ Nitugumibwa ebigambo bya Baibuli ebi: ‘Mutarigira omutima ogurikukunda empiiha, ebi mwine bibe nibyo byabamara. Ahakuba We akagira ati: Tindikutsigaho kandi tindikuhemukaho na kakye. Nikyo turikugambira, tutarikubanganisa, tuti: Mukama niwe muhwezi wangye, tinditiina.’” *

Nikyetengyesa okwikiriza kw’amaani kubaasa ‘kugyenda na Ruhanga’ nk’oku Paul n’ab’eka ye barikukora. (Okutandika 6:9) Ku turaabe twine oburemeezi bw’esente hati, nari ku turaabutungye omu biro by’omumaisho, twine kwegyera aha ky’okureeberaho kya Paul eky’okugira okwikiriza n’obwengye oburikukora.

Kwonka shi oburemeezi omu ka bwaba nibutureetera okwerarikirira?