1. Ni bintu ki ebyabaireho omuri 66 Yesu aherize kuzaarwa? (Reeba ekishushani aha kutandika.)

TEERA akashushani ori Omukristaayo orikutuura omuri Yerusaalemu omu gwa 66. Ebintu bingi bitwire nibibaho omu mwanya ogwo. Eky’okubanza, omukungu Omurooma orikwetwa Florus aihire etalanta 17 omu ibiikiro ry’omu hekalu. Ahonaaho, Abayudaaya baagira ekiniga kingi baita amahe g’Abarooma omuri Yerusaalemu kandi baaranga ngu batungire okwetegyeka barugye ahansi y’obutegyeki bwa Rooma. Kwonka Abarooma baagira eki baakoraho ahonaaho. Omu meezi ashatu, amahe 30,000 gaija omuri Yerusaalemu garikwebemberwa gavana wa Rooma orikwetwa Syria, Cestius Gallus. Abaserukare baija omu bicweka ebiri haihi na Yerusaalemu, abaheekyera Abayudaaya bacwamu kweshereka omu hekalu. Ekyakuratsireho, abaserukare b’Abarooma baatandika kushenya engo za hekalu! Haabaho okutiina kw’amaani omu rurembo rwona. Okaba noija kwehurira ota waaba nooreeba ebi byona nibibaho?

2. Abakristaayo omuri 66 bakaba baine kukora ki, kandi eki kikabaasika kita?

 ² Hatariho kubanganisa noijuka ebigambo bya Yesu ebiri omu Engiri eyaahandiikirwe Luka ebi: “Ku murireeba Yerusaalemu eyehinguririziibwe engabo, obwo muryamanya ngu okuhwerekyerera kwayo kuri haihi.” (Luk. 21:20) Kwonka noobaasa kwebuuza oti: ‘Nimbaasa kworobera nta obuhabuzi oburikuhikaana n’okurabura okwo?’ Kandi Yesu akagira ati: “Obwo abari Buyudaaya bahungire aha nshozi, n’abariba bari omu rurembo bashohore; n’abariba bari omu byaro batarirutaahamu.” (Luk. 21:21) Mbwenu shi okaba noobaasa kuruga ota omuri Yerusaalemu obwo abaserukare baingi barwetooroire? Bwanyima hakabaho ekintu kirikutangaaza. Amahe g’Abarooma gakatandika kuruga omuri Yerusaalemu! Nk’oku kyabaire kigambirwe, okutaahirirwa okwo kukacuubwa bugufu. (Mat. 24:22) Hati bakaba baine omugisha gw’okworobera obuhabuzi bwa Yesu. Ahonaaho bakahunga baaza omu nshozi eziri obuseeri bw’Omugyera Yorudaani n’Abakristaayo abandi abeesigwa ab’omu rurembo orwo n’ebicweka ebirwetooroire. * Bwanyima omuri 70 Yesu aherize kuzaarwa, abaserukare abandi bakaija omuri Yerusaalemu baarucwekyereza. Kwonka buri omwe owaayorobeire obuhabuzi bwa Yesu akahonokaho.

3. Ni mbeera ki eri haihi kuhika aha Bakristaayo, kandi nituza kureeba ki omu kicweka eki?

³ Obwire butari bwa hare, buri omwe ahariitwe naija kuhikwaho embeera nk’egi. Yesu tararabwire Abakristaayo aha kucwekyerera kwa Yerusaalemu kyonka, kureka akakoresa n’ebyabaireho kworeka ekiraije kubaho omu bunaku ‘bw’okubonabona kwingi’ okuri haihi kubaho. (Mat. 24:3, 21, 29) Buzima, amakuru marungi gari ngu “omutwe muhango gw’abantu” nibaija kuhonokaho omu bwire bugumire obu. (Shoma Okushuuruurwa 7:9, 13, 14.) Baibuli neetugambira ki aha bintu ebiri haihi kubaho? Tushemereire kuba twiniire ekihika eky’okugarukamu, ahakuba nikitwariramu okucungurwa kwaitu. Hati ka tushwijume omu bwijwire tureebe oku ebintu ebi biraatukwateho.

4. Niki ekirikwija kurugiiriraho okutandika kw’okubonabona kwingi, kandi eki nikiija kubaho kita?

⁴ Okubonabona kwingi nikwija kutandika kuta? Ekitabo ky’Okushuuruurwa nikigarukamu kirikugamba aha kucwekyerezibwa kwa “Babulooni Orukuru.” (Kush. 17:5-7) Ka kihikire kushushanisa amadiini goona ag’ebishuba na maraaya! Abeebembezi baago baraayire n’abategyeki b’ensi egi embi. Omu mwanya gw’okushagika Yesu n’Obukama bwe, bashagikire abategyeki b’abantu kandi nibahenda emisingye ya Ruhanga kugira ngu bakundwe ab’eby’obutegyeki. Nibataaniira kimwe aha bashukirweho amajuta ba Ruhanga abashugaine kandi abarikwera. (2 Kor. 11:2; Yak. 1:27; Kush. 14:4) Kwonka shi n’oha oraacwekyereze ekibiina ekiri nka maraaya? Yehova Ruhanga naija kuta ebiteekateeko bye omu mitima y’amahembe ikumi ag’enyamaishwa erikutukura. Amahembe aga nigajwekyera ab’eby’obutegyeki abarikushagika ekibiina ky’Amahanga Ageteeraine, ekirikujwekyerwa “enyamaishwa erikutukura.”—Shoma Okushuuruurwa 17:3, 16-18.

5, 6. Ahabw’enki nitugira ngu okucwekyerezibwa kwa Babulooni Orukuru tikirikumanyisa okufa kw’abanyadiini boona?

⁵ Mbwenu shi tushemereire kuteekateeka ngu okucwekyerezibwa kw’amadiini ga Babulooni Orukuru nikimanyisa okufa kw’abantu boona abari omu madiini ago? Nikibaasa kutaba kityo. Nabi Zekaria akahwerwa kuhandiika aha bunaku obwo. Arikugamba aha baabaire bari omu diini z’ebishuba, naashoboorora ati:  “Aryagira ati: Tindi nabi, ndi omuhingi; ahabw’okuba okwiha omu buto bwangye eitaka rituura riri eitungo ryangye. Kandi ku harigira owaamubuuza ati: Obwo buhuta bw’omu ngaro zaawe bukaruga hi? Aryagarukamu ati: Obuhuta obu nkabuhutaarizibwa omu nju ya banywani bangye.” (Zek. 13:4-6) N’ahabw’ekyo, na bamwe aha beebembezi b’amadiini ago nibaija kuhunga omu diini ezo kandi beehakane ngu tibakabaga mu madiini ago.

⁶ Abaheereza ba Ruhanga nibaija kutwaza bata obunaku obwo? Yesu akashoboorora ati: ‘Ebiro ebyo kuri bitaracwirweho, tihaakurokokireho muntu n’omwe; kwonka ahabw’entoore ebiro ebyo biryacuubwaho.’ (Mat. 24:22) Nk’oku twaba twareebire, omuri 66 Yesu aherize kuzaarwa, okubonabona ‘kukacuubwaho.’ Eki kikabaasisa entoore nari abatoorainwe, nibo Bakristaayo abashukirweho amajuta, kuhunga bakaruga omu rurembo n’ebicweka ebirwetooroire. Nikyo kimwe, ekicweka eky’okubanza eky’okubonabona kwingi ‘nikiija kucuubwa bugufu’ “ahabw’entoore.” Ab’eby’obutegyeki nigo ‘mahembe ikumi’ tibarikwija kwikirizibwa kucwekyereza abaheereza ba Ruhanga. Kureka, nihaija kubaho akaire kakye k’obutebeekana.

7, 8. Ni mugisha ki oguraabeho bwanyima y’okucwekyerezibwa kw’ebibiina by’amadiini g’ebishuba, kandi abaheereza ba Ruhanga abeesigwa nibaija kuba bata ab’omutaano omu bwire obwo?

⁷ Niki ekiraabeho bwanyima y’okucwekyerezibwa kw’ebibiina by’amadiini g’ebishuba? Nibwija kuba obwire bw’okworeka buzima ekiri omu mitima yaitu. Abantu baingi nibaija kusherura obuhungiro omu bibiina by’abantu ebirikugyeragyeranisibwa ‘n’enkiri z’omu nshozi.’ (Kush. 6:15-17) Kwonka omu muringo gw’akamanyiso, abaheereza ba Ruhanga nibaija kusherura obweshereko omu buhungiro obu Yehova arikuha. Omu kyasha ky’okubanza, akaire k’obutebeekana akaabaireho bukaba butari bwire bw’Abayudaaya kuhinduka kuza omu Bukristaayo. Bukaba buri obwire bw’abo abaabaire bari Abakristaayo kugira eki baakora kandi bakooroba. Nikyo kimwe, titushemereire kuteekateeka ngu akaire k’obutebeekana omu kubonabona kwingi nikaija kubaasisa abantu basya kuhinduka abaheereza ba Ruhanga. Kureka, nigwija kuba guri omugisha gw’abaheereza ba Yehova boona ab’amazima kworeka ngu nibamukunda kandi bakashagika na beene Ishe Kristo.—Mat. 25:34-40.

⁸ N’obu turaabe tutarikwetegyereza gye byona ebiraabeho omu bwire obwo obw’okugyezibwa, nituteekateeka ngu nikiija kwetengyesa kugira ebi twayefeerereza. Omu kyasha ky’okubanza, Abakristaayo bakatsigaho ebintu byabo kandi baagumira oburemeezi kubaasa kuhonokaho. (Mak. 13:15-18) Mbwenu shi kubaasa kuguma turi abeesigwa, nitwija kwikiriza kufeerwa ebintu byaitu ebimwe? Nitwija kuba tweteekateekire kukora kyona ekiraatushabwe kuguma turi abeesigwa ahari Yehova? Kiteekateekyeho! Omu bwire obwo, niitwe twenka abaraabe nitutooreza nabi Danieli owa ira turikugumizamu nituramya Ruhanga n’obu haakubaho ki.—Dan. 6:10, 11.

9, 10. (a) Abaheereza ba Ruhanga nibaija kuranga butumwa ki omu kubonabona kwingi? (b) Abazigu ba Ruhanga nibaija kutwaza bata?

⁹ Obu tiburikwija kuba obwire bw’okubuurira amakuru marungi g’Obukama. Obwire obwo nibwija kuba bwahingwire. Obwire bw’emperu nibwija kuba bwahika! (Mat. 24:14) Hatariho kubanganisa abaheereza ba Ruhanga nibaija kurangirira obutumwa obw’okucwa orubanja. Nibubaasa kutwariramu okuranga ngu ensi ya Sitaane embi eri haihi kucwekyererezibwa kimwe. Baibuli neegyeragyeranisa obutumwa obu aha rubaare eti: “Orubaare rwingi rwateera abantu niruruga omu iguru, buri rubaare rwine oburemeezi bw’eraatiri igana; abantu baajuma Ruhanga ahabw’ekibonaboneso ky’orubaare orwo; ahakuba  kikaba kiri kihango munonga.”—Kush. 16:21.

¹⁰ Ebi byona abazigu baitu nibaija kubireeba. Ruhanga akahwera Nabi Ezekieli kushoboorora eki Googi owa Magoogi, nikwo kwegaita kw’amahanga araakore. Akagira ati: “Oku nikwo Mukama RUHANGA arikugamba naagira ati: Eryo izooba oryaizirwa ebiteekateeko, ogire enaama mbi, ogire oti: Naaza kwinamuka, nteere ensi y’ebirorero ebitaine ngo z’amabaare, ngwe aha bantu abagaramisiriize, abatwire buhooro, boona batwire ahataine ngo z’amabaare, n’obu gaakuba amarembo againe enyigi ezirikukingwa empimbi, kunyaga eminyago n’okugitwara, okuteera emyanya eyaabaire eri amatongo, mbwenu etwirwemu, n’okuteera abantu abaataarwirwe omu mahanga bakeetungira ente n’ebintu, bakatuura ahagati y’ensi.” (Ezk. 38:10-12) Abaheereza ba Ruhanga nibaija kuba bari ab’omutaano, barikushusha nk’abari “ahagati y’ensi.” Eki nikiija kurenga amahanga. Buzima, naija kuba aine ekihika ky’okutaahirira abaheereza ba Yehova abashukirweho amajuta n’ab’entaama ezindi.

11. (a) Niki eki twine kwijuka aha bikwatiraine n’ebintu ebiraabeho omu bwire bw’okubonabona kwingi? (b) Abantu nibaija kutwaza bata ku baraareebe obumanyiso oburaabe omu iguru?

¹¹ Turikushwijuma ekiraakurateho, twine kwijuka ngu Ekigambo kya Ruhanga tikirikworeka obwire bwenyine obu ebintu ebyo biraabeho n’oku biraakuratane. Kwonka nikireebeka nibiija kubaho omu bwire bumwe. Yesu omu bunabi bwe akagamba aha kucwekyerezibwa kw’obusingye obu ati: “Haryabaho obumanyiso aha izooba n’aha kwezi n’aha nyonyoozi, kandi aha nsi amahanga garyashaasha, gashobeirwe ahabw’okuhoorera kw’enyanja n’ebingonzi; abantu bahahaaze emitima ahabw’obwoba n’okutegyereza ekirikwenda kwija aha nsi; ahabw’okuba eby’amaani eby’omu iguru biryatengyetsibwa. Bwanyima y’ebyo baryareeba Omwana w’omuntu naizira omu kicu aine obushoboorozi n’ekitiinisa kingi.” (Luk. 21:25-27; shoma Mako 13:24-26.) Mbwenu shi okuhikiirira kw’obunabi obu nikwija kutwariramu obumanyiso burikutiinisa omu iguru ryenyine? Twine kutegyereza tukareeba ekiraabeho. Kwonka kyona ekiraabeho, obumanyiso obwo nibwija kureeta okutiina n’obwoba omu mitima y’abazigu ba Ruhanga.

12, 13. (a) Niki ekiraabeho Yesu ku araije “aine obushoboorozi n’ekitiinisa kingi”? (b) Abaheereza ba Ruhanga nibaija kutwaza bata obunaku obwo?

¹² Niki ekiraabeho Yesu ku araize “aine obushoboorozi n’ekitiinisa kingi”? Obu nibwija kuba obwire bw’okuha ebihembo abeesigwa n’okufubira abatari beesigwa. (Mat. 24:46, 47, 50, 51; 25:19, 28-30) Kurugiirira ahari Matayo, Yesu akagamba aha kamanyiso hamwe n’enfumu y’entaama n’embuzi, ati: “Omwana w’omuntu ku ariizira omu kitiinisa kye hamwe na baamaraika be boona, aryashutama aha kitebe kye eky’ekitiinisa, amahanga goona gateeraniirwe omu maisho ge; kandi aryagashoroora, nk’oku omuriisa ashoroora entaama omu mbuzi. Entaama aryazita aha rubaju rwe rwa buryo, kwonka embuzi aryazita aha rwa bumosho.” (Mat. 25:31-33) Niki ekiraahikye ahari abo abari nk’embuzi n’abo abari nk’entaama? Enfumu egyo neehendera n’ebigambo ebi: “Abo [abari nk’embuzi] baryaza omu kubonabonesibwa [okucwekyerezibwa] okw’ebiro n’ebiro, kwonka abahikiriire bo baryataaha omu magara agatahwaho.”—Mat. 25:46.

¹³ Abo abari nk’embuzi nibaija kutwaza bata ku baraamanye ngu nibaza kucwekyerezibwa. Nibaija ‘kucura.’ (Mat. 24:30) Kwonka shi beene Ishe Kristo n’ab’entaama ezindi nibaija kugira eki baakora omu bwire obwo? Barikwikiririza kimwe omuri Yehova Ruhanga n’Omwana we, Yesu Kristo, nibaija kukuratira ekiragiro kya Yesu eki: “Ebi ku biritandika kubaho, mureebe ahaiguru, mwimutsye emitwe yaanyu, ahakuba okucungurwa kwanyu  kuryaba kuri haihi.” (Luk. 21:28) Buzima, nitwija kugira emiteekateekyere mirungi, turikuhamiza kimwe ngu nituza kucungurwa.

14, 15. Ni murimo ki ogw’okurundaana ogurikwija kubaho bwanyima ya Googi owa Magoogi kutandika kutaahirira, kandi omurimo gw’okurundaana nigutwariramu ki?

¹⁴ Niki ekirikwija kubaho Googi owa Magoogi ku araatandike kutaahirira abaheereza ba Ruhanga? Matayo na Mako bombi bakahandiika aha kiraabeho bati: “[Omwana w’omuntu] aryatuma baamaraika be, ateerane entoore ze okuruga omu mbaju ina aha muheru gw’ensi, okuhika aha muheru gw’eiguru.” (Mak. 13:27; Mat. 24:31) Omurimo gw’okurundaana ogu ti kurundaana abashukirweho amajuta okw’okubanza; kandi ti kutaho kamanyiso ak’ahamuheru okw’abashukirweho amajuta abaraabe bakiriho. (Mat. 13:37, 38) Okuteebwaho akamanyiso oku nikwija kubaho, okubonabona kwingi kutakatandikire. (Kush. 7:1-4) Mbwenu shi, omurimo gw’okurundaana ogu Yesu yaagambireho ni guuha? Obu n’obwire obu abaraabe bakiriho aha 144,000 baraatungye ekiconco kyabo eky’okuza omu iguru. (1 Tes. 4:15-17; Kush. 14:1) Eki nikiija kubaho bwanyima ya Googi owa Magoogi kutandika kutaahirira. (Ezk. 38:11) Ebigambo bya Yesu nibiija kuhikiirira ebi: ‘Obwo abahikiriire baryayengyengyeta nk’eizooba omu bukama bwa Ishebo.’—Mat. 13:43. *

¹⁵ Mbwenu shi eki nikimanyisa ngu abashukirweho amajuta nibaija kutwarwa omu iguru n’emibiri yaabo? Baingi abari omu madiini agarikweyeta Amakristaayo nibateekateeka ngu nibaija kutwarwa omu iguru n’emibiri yaabo. Kandi, nibateekateeka ngu Yesu naija kugaruka kutegyeka ensi arikureebwa. Kwonka,  Baibuli neeyoreka gye ngu “akamanyiso k’Omwana w’omuntu” nikaija kureebeka omu iguru kandi ngu Yesu naija kwiza “omu bicu by’omu iguru.” (Mat. 24:30) Ebigambo ebi nibyoreka ngu naija kuba atarikureebwa. Kandi, “omubiri n’eshagama tibirikubaasa kuhungura bukama bwa Ruhanga.” N’ahabw’ekyo abo abaraatwarwe omu iguru nibaija kubanza baahindurwa, “omu kaanya kakye, nk’ak’okuhumbya eriisho, aha nzamba ey’aha mperu.” * (Shoma 1 Abakorinso 15:50-53.) Abashukirweho amajuta abeesigwa abaraabe bakiriho nibaija kutwarwa hamwe omu kaanya kakye.

16, 17. Niki ekirikwija kubaho obugyenyi bw’Omwana gw’Entaama butakabaireho omu iguru?

¹⁶ Boona 144,000 ku baraahikye omu iguru, entebeekanisa z’obugyenyi bw’omwana gw’entaama ezirikuhererukayo niziija kutandika. (Kush. 19:9) Kwonka haine ekindi ekiraabeho obugyenyi obwo oburikushemeza butakabaireho. Ijuka ngu abaraabe bakiriho aha 144,000 baaba batakatwirwe omu iguru, Googi owa Magoogi naija kutaahirira abaheereza ba Ruhanga. (Ezk. 38:16) Abaheereza ba Ruhanga nibaija kutwaza bata? Nibaija kureebeka nk’abataine burinzi. Nibaija kworobera obuhabuzi obwahairwe omu biro by’Omugabe Yehoshafaati: “Omuri orwo rugamba timurikwija kwetenga kurwana; muze omu myanya yaanyu, mwemerere kwonka, mureebe oku MUKAMA araabasingurire, imwe Abayuda n’aba Yerusaalemu. Mutatiina, kandi mutahahaaza emitima.” (2 Bus. 20:17) Kwonka, ab’omu iguru nibaija kutwaza omu muringo ogundi. Okushuuruurwa 17:14 harikugamba aha bwire obu abashukirweho amajuta baraabe bari omu iguru, nihatugambira aha bazigu b’abaheereza ba Ruhanga hati: ‘Baryarwanisa Omwana gw’entaama, kwonka omwana gw’entaama aryabasingura, ahakuba ni Mukama w’abakama kandi Omugabe w’abagabe, kandi abo abu aine n’abaayetsirwe, abaatoorainwe kandi abeesigwa.’ Yesu ari hamwe na 144,000 abu araabe naategyeka nabo omu iguru, nibaija kucungura abaheereza ba Ruhanga aha omu nsi.

¹⁷ Orugamba rwa Haramagedoni nirwija kureetera eiziina Yehova eririkwera kuhimbisibwa. (Kush. 16:16) Omu bunaku obwo, boona abari nk’embuzi nibaija kutaaha omu kucwekyerezibwa okw’ebiro n’ebiro. Ensi neija kurugaho neehwamu obubi bwona, kandi omutwe muhango gw’abantu nibaija kuraba omu kicweka ekirikuhererukayo eky’okubonabona kwingi. Entebeekanisa zoona ku ziraahwe, nihaija kubaho ekintu ekirikukirayo obukuru ekirikugambwaho omu kitabo kya Okushuuruurwa, nibwo bugyenyi bw’Omwana gw’Entaama. (Kush. 21:1-4) * Abo boona abaraahonokeho omu nsi nibaija kuguma nibasiimwa Ruhanga kandi bareebe rukundo ye nyingi. Obwo ka nibwija kuba obugyenyi bw’amaani! Mbwenu shi titwine ekihika ky’amaani kuhika aha izooba eryo?—Shoma 2 Petero 3:13.

18. Ahabw’ebintu ebi tutegyereize ebiri haihi kubaho, tushemereire kumariirira kukora ki?

¹⁸ Twaba tutegyereize ebintu birungi ebi kubaho, buri omwe ahariitwe ashemereire kuba naakora ki? Entumwa Petero akahandiika ati: “Ebyo byona ku biraabe biri eby’okuyaga bityo, mureebe oku mushemereire kuba abarikwera kandi abarikutiina Ruhanga omu mitwarize yaanyu, nimutegyereza ekiro kya Mukama . . . N’ahabw’ekyo, abarikukundwa, nk’oku mutegyereize ebyo, mwezirikye abashangye mwine obusingye, mutaine ibara ribi n’obu kaakuba akamogo omu maisho ge.” (2 Pet. 3:11, 12, 14) Ka tumariirire kuguma turi abeecumi omu by’omwoyo, turikushagika Omugabe w’Obusingye.