1. Hati turi mu bwire ki?

TURI omu biro bigumire munonga. Kuruga 1914 kuhitsya hati, Baibuli neegira ngu tutwire omu ‘biro by’emperu.’ Ebiro ebi ‘eby’akabi kaingi’ ebigumire kwemera birimu embeera mbi kukira eby’enyima ya 1914. (2 Tim. 3:1-5) Kandi, ensi neija kweyongyera kusiisikara, ahakuba Baibuli ekakigambaho kare ngu “abantu babi, abarikwegira oku batari, baryayeyongyera kuba babi.”—2 Tim. 3:13.

2. Ni by’okweshemeza bya muringo ki ebi abantu omu nsi barikukunda? (Reeba ekishushani aha kutandika.)

² Aha bikwatiraine n’eby’okweshemeza, abantu baingi nibareeba nari bakora eby’obushaarizi, eby’obushambani, eby’obufumu, nari ebindi ebi Ruhanga arikwanga. Nk’eky’okureeberaho, eby’obushaarizi n’eby’obushambani nibyo birikukirayo kwizira aha Intaneeti, tiivi, omu vidiyo, ebitabo, n’empapura z’amakuru. N’emicwe eyaabaire neetwarwa nka mibi ira, hati etongoziibwe omu myanya emwe. Kwonka ekyo tikirikumanyisa ngu emitwarize nk’egyo Ruhanga naagisiima.—Shoma Abarooma 1:28-32.

3. Abo abarikugyendera aha misingye ya Baibuli nibakira kureebwa bata?

 ³ Omu kyasha ky’okubanza abakuratsi ba Yesu bakaba nibeetantara eby’okweshemeza ebitashemeire. Ahabw’ekyo n’ahabw’okutiina Ruhanga kwabo, bakajumwa kandi baahiganisibwa. Entumwa Petero akahandiika ati: “Ekirikubatangaaza n’okureeba mutarikurahuka kukwatanisa nabo omu burare obuhinguraine; nikyo barikubajumira.” (1 Pet. 4:4) N’obunaku obu, abo abarikworobera emitindo ya Ruhanga, ab’ensi nibabareeba nk’abatari b’omurembe. Okwongyera ahari ekyo, boona “abamaririire kumara ebiro by’amagara gaabo byona omuri Yesu nibatiina Ruhanga baryahiigwa.”—2 Tim. 3:12.

4. Ebyahandiikirwe nibituha buhabuzi ki aha bikwatiraine n’ensi egi?

⁴ Ebyahandiikirwe nibihabura abo abarikwenda kukora ebi Ruhanga arikukunda kutakunda ensi n’ebikorwa byayo. (Shoma 1 Yohaana 2:15, 16.) Eby’ediini, eby’obutegyeki, n’eby’obushuubuzi by’ensi egi otwariiremu n’emikura y’amakuru biri ahansi y’obushoboorozi bwa “ruhanga w’ensi egi,” Sitaane Omuregi. (2 Kor. 4:4; 1 Yoh. 5:19) N’ahabw’ekyo, Abakristaayo twine kwegyendesereza emikago mibi. Ekigambo kya Ruhanga nikigamba amazima aga: “Mutabeihwabeihwa; ekigombe kibi kishiisha emicwe mirungi.”—1 Kor. 15:33.

5, 6. Twine kwetantara kugira omukago na baahi, kandi n’ahabw’enki?

⁵ Kubaasa kwetantara kushiisha emicwe yaitu mirungi, titwine kugira omukago n’abo abarikukora ebibi. Eki tikirikukwata aha kutakwatanisa n’abatari mu mazima abarikukora ebibi bonka, beitu n’abo abarikwetwara nk’abarikuramya Yehova kwonka abarikuhenda emisingye ye bakigyendereire. Abantu nk’abo baakora ekibi ky’amaani bakanga kweteisa, titurikubaasa kugumizamu nitukwatanisa nabo.—Rom. 16:17, 18.

⁶ Twagira omukago n’abo abatarikworobera ebiragiro bya Ruhanga, nitubaasa kutandika kukora ebi barikukora kugira ngu batukunde. Nk’eky’okureeberaho, twagira omukago guhami n’abashambani, nitubaasa kwohibwa kushambana. Eki kihikire aha Bakristaayo bamwe abehaireyo, kandi bamwe babingirwe ahabw’okwanga kweteisa. (1 Kor. 5:11-13) Baayanga kweteisa, embeera yaabo neebaasa kuba nk’egyo eyaagambirweho Petero.—Shoma 2 Petero 2:20-22.

7. Ni baahi abashemereire kuba banywani baitu ab’ahamara?

⁷ N’obu turaabe nitubaasa kutwariza gye abatarikworobera ebiragiro bya Ruhanga, titwine kuba banywani baabo ab’ahamara. N’ahabw’ekyo nikiba kitahikire omwe aha Bajurizi ba Yehova otari mu bushwere kuriima omuntu otari muheereza wa Yehova, kandi otarikukuratira emitindo ye erikwera. Okurinda obwesigwa ni kikuru munonga aha Bakristaayo kukira okumanywa abantu abatarikworobera ebiragiro bya Yehova. Banywani baitu ab’ahamara bashemereire kuba abo abarikukora ebi Ruhanga arikukunda. Yesu akagira ati: “Weena okora ebi Ruhanga akunda, niwe murumuna wangye, niwe munyaanyazi, kandi niwe maawe.”—Mak. 3:35.

8. Emikago mibi ekareetera Abaisraeli aba ira kukora ki?

⁸ Abaisraeli bakahikwaho akabi ahabw’okugira emikago mibi. Yehova ku yaherize kubacungura kuraga Misri omu buhuuku akabeebembera kubahitsya omu Nsi Eyaaraganisiibwe, akabagambira kutakoragana n’abantu b’omu nsi egyo ati: “Otariramya baaruhanga baabo, otaribaheereza n’obu kwakuba okutwaza nkabo; kureka oryabahwerekyerereza kimwe, n’enyomyo zaabo ez’amabaare ozisheenyagure. Muryaheereza” Yehova Ruhanga waanyu.  (Okuruga 23:24, 25) Kwonka Abaisraeli baingi bakaremwa kworobera obuhabuzi bwa Ruhanga. (Zab. 106:35-39) Ahabw’okugira ngu tibarabaire beesigwa ahari Ruhanga, Yesu bwanyima akabagira ati: “Reeba, enju yaanyu etsigirweho n’omushaka.” (Mat. 23:38) Yehova akatsigaho Israeli, emigisha ye yaatandika kugiha ekibiina kisya Ekikristaayo.—Byak. 2:1-4.

9. Ahabw’enki emikura y’eby’amakuru erikubaasa kuba ey’akabi?

⁹ Bingi ebirikushohozibwa aha mikura y’amakuru ey’ensi egi n’eby’akabi aha mukago gwaitu na Yehova. Ebirikwizira aha mikura nk’egyo tibitebeekanisiibwe kuhwera abantu kwikiririza omuri Yehova n’ebiraganiso bye. Omu mwanya gw’ekyo, nibyoreka emiteekateekyere y’ensi ya Sitaane n’ebigyendererwa bye. N’ahabw’ekyo, twine kwegyendesereza kutatoorana ebintu ebirikubaasa kutureetera ‘kwetenga eby’ensi.’—Tit. 2:12.

10. Niki ekirikwija kuhika aha birikushomwa n’ebirikureebwa ebiri omu nsi egi embi?

¹⁰ Juba, okushoma n’okureeba eby’akabi nikwija kuba kutakiriho. Byona nibiija kuhwaho ensi ya Sitaane ku eraacwekyerezibwe. Ekigambo kya Ruhanga nikigira kiti: “Ensi egi neehwaho n’okwetenga kwayo; kwonka okora ebi Ruhanga akunda, agumaho ebiro byona.” (1 Yoh. 2:17) Nikyo kimwe, omuhandiiki wa Zaaburi akeeshongora ati: “Ababi baryacwekyerezibwa; kwonka abategyereza MUKAMA baryahungura ensi. Kwonka abacureezi baryahungura ensi, beesiime ahabw’okugira obusingye bwingi.” Kumara bwire ki? “Abahikiriire baryahungura ensi, bagituuremu ebiro byona.”— Zab. 37:9, 11, 29.

11. Ruhanga naatebeekanisiza ata abaheereza be eby’okurya by’omwoyo?

¹¹ Okutaana n’ebirikushohozibwa aha mikura y’ensi, ebintu ebirikushohozibwa ekibiina ky’Abajurizi ba Yehova omu biro ebi eby’emperu nibihiga abantu kugira emitwarize erikuhitsya omu magara agatahwaho. Yesu arikushaba Yehova akagira ati: “Aga nigo magara agatahwaho, okumanya Iwe Ruhanga omwe ow’amazima, n’Ogwo ou waatumire Yesu Kristo.” (Yoh. 17:3) Tataitwe ow’omu iguru arikukoresa ekibiina kye, naatuha eby’okurya bingi by’omwoyo ebirikwombeka. Ka twine omugisha kugira magaziini, burocuwa, ebitabo, vidiyo, n’Omukura byona ebirikushagika okuramya okw’amazima! Ekibiina kya Ruhanga nikigira n’enteerane butoosha omu bibiina ebirikurenga 110,000 omu nsi yoona. Omu nteerane ezo n’omu nteerane empango, nitushwijuma ebiri omu Baibuli ebirikutuhwera kwikiririza omuri Ruhanga n’ebiraganiso bye.—Heb. 10:24, 25.

12. Shoboorora obuhabuzi bwa Baibuli obw’okusherura ow’okutaaha nawe omu bushwere “omuri Mukama” honka.

¹² Ab’eishe-emwe abatakagiire mu bushwere abarikwenda kubutaahamu okukira munonga baine kwegyendesereza abu barikunywana. Ekigambo kya Ruhanga nikiha obuhabuzi obu: “Mutakwatanisa n’abatarikwikiriza, abu mutaine nabo kakwate. Okuhikiirira n’okutahikiirira biine kakwate ki? Nari omushana n’omwirima nibikwatanisa bita?” (2 Kor. 6:14) Baibuli neehabura abaheereza ba Yehova kusherura ow’okutaaha nawe omu bushwere “omuri Mukama” honka, ekirikumanyisa ngu kurugiirira aha Byahandiikirwe aine kuba ari omuheereza wa Yehova oyehaireyo kandi obatiziibwe. (1 Kor. 7:39) Waataaha omu bushwere n’Omukristaayo mugyenzi waawe, nooba waatunga omuntu oyehaireyo ahari Yehova orikubaasa kukuhwera kuguma ori omwesigwa.

13. Ni kiragiro ki ekirikukwata aha bushwere eki Ruhanga yaahaire Abaisraeli?

 ¹³ Yehova naamanya ekirungi eki abaheereza be barikwetenga, kandi ekiragiro ky’okusherura ow’okutaaha nawe omu bushwere muri Mukama honka ti kisya. Nk’eky’okureeberaho, yetegyereze ekiragiro eki yaahaire Abaisraeli kurabira omuri Musa. Aha bikwatiraine n’amahanga agaabaire gatarikuheereza Yehova Abaisraeli bakagambirwa bati: “Otarishwerana nabo, kuhingira muhara waawe mutabani waabo, nari mutabani waawe kumushwererera muhara waabo; ahabw’okuba baryahindura mutabani waawe, arekye kunkurata, kureka aheereze baaruhanga abandi; haza kireetere MUKAMA kukugirira ekiniga, n’okurahuka kukucwekyereza.”—Bir. 7:3, 4.

14, 15. Sulemaani okwehuzya ekiragiro kya Yehova kikamurugiramu ki?

¹⁴ Ira mutabani wa Daudi orikwetwa Sulemaani, akashaba obwengye, kandi Ruhanga akabumuha omu bwingi. N’ahabw’ekyo Omugabe Sulemaani akaba omutegyeki w’obwengye rurangaanwa omu nsi y’engaiga. Buzima, n’omugabekazi wa Sheeba ku yaataayaayiire Sulemaani, akatangaara ati: “Tindabiikiriize okuhitsya obu nyeiziire, eriisho ryangye rikabyereebera; mbwenu naashanga batarangambiire n’obu kyakuba ekicweka kyabyo kimwe kya kabiri; kandi obwengye bwawe n’obugwa gye bwawe nibikira oku naabihuriire.” (1 Bag. 10:7) Kwonka Sulemaani akaija yaaba eky’okureeberaho kibi, ekirikworeka ekirikubaasa kubaho omuntu yaayehuzya ekiragiro kya Ruhanga ky’okutataaha omu bushwera n’otari Mukristaayo.—Mub. 4:13.

¹⁵ N’obu Yehova araabe yaabaire akoreire Sulemaani ebintu bingi, Sulemaani akeehuzya ekiragiro kya Yehova eky’okutashwera omukazi kuruga omu mahanga agandi, abantu abaabaire batarikuramya Yehova. Sulemaani akakunda “abakazi baingi b’endugamahanga” bwanyima yaahitsya abakazi 700 n’ebinyanshunju 300. Eki kikarugamu ki? Omu myaka ya Sulemaani eya bukuru, abakazi be abakaafiire bakahindura “omutima gwe, yaakuratira baaruhanga abandi, . . . yaakora ebirikwangwa” Yehova. (1 Bag. 11:1-6) Emikago mibi ya Sulemaani ekashiisha obwengye bwe yaamureetera kuruga omu kuramya okw’amazima. Oku ka n’okurabura kw’amaani aha Bakristaayo abarikuteekateeka kutaaha omu bushwere n’omuntu otarikuheereza Yehova!

16. Abakristaayo abari omu bushwere n’abatari Bakristaayo nibaheebwa buhabuzi ki kuruga omu Baibuli?

¹⁶ Kandi shi omuntu ku yaakuhinduka omuheereza wa Ruhanga kwonka ou ari nawe omu bushwere atari Mukristaayo? Baibuli neegira eti: “Abakazi, mworobere mutyo baabaroimwe; ku haraabe hariho abatarikworobera kigambo kya Ruhanga, bahindurwe emitwarize y’abakazi baabo, bataine kigambo kyona eki babagambiire.” (1 Pet. 3:1) Ebigambo ebyo n’eby’abakazi Abakristaayo, beitu ebigambo nibyo bimwe nibikwata n’aha mushaija orikuhinduka omuheereza wa Yehova kwonka aine omukazi otari Mukristaayo. Obuhabuzi bwa Baibuli obwo nibumanyisa ngu, oine kuba murungi ahari mugyenzi waawe, kandi okakuratira emitindo ya Ruhanga erikukwata aha bushwere. Baingi abatari Bakristaayo baikiriize amazima baaheza kureeba baibabo nari abakazi baabo bahindwire aha mitwarize yaabo ahabw’okugyendera aha misingye ya Ruhanga.

17, 18. Ahabw’enki Noa n’Abakristaayo omu kyasha ky’okubanza baahonokireho?

¹⁷ N’obu emikago mibi eraabe neeshiisha emicwe mirungi, emikago mirungi yo neerugamu ebirungi. Teekateeka aha  ky’okureeberaho kya Noa, owaabaire naatuura omu nsi mbi kwonka ataine kigyendererwa ky’okuhindura abantu b’omu nsi egyo banywani be ab’ahamara. Omu bwire obwo, Yehova akareeba “obubi bw’abantu buri bwingi omu nsi, na buri kiteekateeko ky’omu mitima yaabo kiri kibi obutoosha.” (Kut. 6:5) N’ahabw’ekyo Ruhanga akamariirira kucwekyereza abantu babi arikukoresa omwegyemure. Kwonka, “Noa akaba ari ohikiriire, otaine kabara omu busingye bwe. Noa yaaguma naagyenda na Ruhanga.”—Kut. 6:7-9.

¹⁸ Noa buzima taranywanire abantu abatarikutiina Ruhanga. Noa n’abandi mushanju omu ka ye bakeejumba omu kukora omurimo ogu Ruhanga yaabaire abahaire, ogwabaire nigutwariramu okwombeka obwato. Omu bwire obwo, Noa akaba ari n’omubuurizi “w’okuhikiirira.” (2 Pet. 2:5) Noa akaba aine bingi by’okukora ebirikushemeza Ruhanga, nk’okubuurira, okwombeka obwato, n’okugira omukago murungi n’ab’omu ka ye. N’ekyarugiremu, Noa n’ab’omu ka ye bakakira omwegyemure. Tushemereire kusiima Noa, omukazi we, abatabani, n’abakazi baabo abaaheereize Yehova omu bwesigwa, ahakuba boona abariho obunaku obu ni baijukuru baabo. Nikyo kimwe, Abakristaayo omu kyasha ky’okubanza bakeetaanisa n’abantu abaabaire batarikuheereza Ruhanga kandi bakakira obu Yerusaalemu yaacwekyerezibwa omuri 70.—Luk. 21:20-22.

19. Kubaasa kusiimwa Ruhanga, twine kukora ki?

¹⁹ Abaheereza ba Yehova twine kutooreza Noa, ab’omu ka ye, n’Abakristaayo b’omu kyasha ky’okubanza. Twine kwetaanisa aha nsi egi embi etwetooroire, reero tusherure emikago erikwombeka kuruga omu bukaikuru bw’ab’eishe-emwe na banyaanyazi-itwe abeesigwa. Okuguma haihi n’abo abarikukuratira obwengye obu Ruhanga arikutuha nikituhwera ‘kuhamira omu kwikiriza’ omu biro ebi ebigumire. (1 Kor. 16:13; Enf. 13:20) Kandi teekateeka aha matsiko gaitu aga ag’omuhendo! Twayegyendesereza emikago mibi omu biro ebi eby’emperu, nitubaasa kuhonokaho ensi egi embi yaaba neecwekyerezibwa, reero tutaahe omu nsi ya Yehova ensya eri haihi kubaho!